Sunday, April 22, 2007

تعليق على السكوت

القصيدة دي كانت تعليق الإنسان والشاعر الجميل محمود سراج على التدوينة اللي فاتت ولأني بصراحة معجبة بالقصيدة جدا قررت إني أحطها في تدوينة لوحدها لأنها فعلاً تستاهل شكراً لحد الأسبوع الجاي يا محمود :)
....
وسط السكوت
كان الكلام
جوه العيون
رافض يموت
وسط السكوت
النظرة صبحت ليها صوت
نظرات بتشكى لبعضها
ف الصمت شايلة همها
لكنها
وسط السكوت
كانت بتفتح حضنها

4 comments:

YOTTA said...

MALLOUKA,

ازيك يا بنت، عاملة ايه؟
بصى بأه ،،،،
أولا الكلام اللى كاتبه سراج فى الصمت حلو أوى
ثانيا:بالنسبه لحكاية السكوت والكلام فانتى -كتر خير سعادتك- خليتينى أكتشف حاجة مهمة وهى انى أكبر رغاية ،،،،،
ومع ذلك انا فى حالة صمت دائم (تقريبا)00
هاوضح اكتر: فيه ناس كتييييييييييير أوى اليومين دول الواحد بيفقد قدرة التعامل معاهم
يعنى افكارهم غير افكارى، وطريقة تفكيرهم مابتعجبنيش،والامل مفقود فى انهم يتغيروا
والكارثة لما يكون بعضهم بتشوفيه كل يوم، أو يكون حد عايش معاكى فى البيت مثلا00 ومضطرة تتعاملى معاه
وبالتالى -وبعد محاولات كتييييرة للتواصل- بأحاول أتجنبهم عن طريق التزام الصمت التام ،وأحيانا التجاهل00

أما بالنسبة لانى اكبر رغاية
فأنا أكبر رغاية مع نفسى
بمعنى انى ما بابطلش كلام مع نفسى من أول ما بافتح عينى لغاية ما باروح فى النوم
لدرجة انى أحيانا باتنرفز علياواقوللى "اسكتى 00كفايه00حرام"0
بجد انا صدعت منى
ومش عارفه اوصل للحظة صمت مع نفسى00
بس عموما أنا مبسوطة كده00يعنى اذا ماكنتش هاسمعنى مين هيسمعنى!!!0

يعنى "تيجى نسكت" مع الناس ماشى 00يعنى عشان نريح الناس مننا ونستريح ،
بس المهم مانبطلش كلام مع نفسنا00

مَلَكة said...

Yotta

انا فرحانة جدا بجد بردك هنا واكيد ردك عليا على الميل واكيد ردودك عليا في المنتدى
الواحد مش عارف يردلك جمايلك منين ولا منين:D

فقدان القدرة على التواصل مع المحيطين بينما الصداع من كتر رغيك معاكي
حافظاها الحالة دي
ببساطة لأن فيه واحدة اعرفها زيك كدة بالظبط
ولو إن الكلام مع الذات مش دايما حلو
ومش دايما لازم
خاصة لو انتي اقسى من اي حد عليكي
هتبقى مشكلة لما ميكونش فيه غيرك عشان تتكلمي معاها وقتها
وساعات لما بتسكتي مع الناس
بيبقى مش لأنك مش عايزة تكلميهم وانما لأن جواكي كتير اوي عايزة تبوحي بيه ليهم لكن مش قادرة
أو مش عارفة
في الحالتين النتيجة واحدة
السكووووت

نورتيني يا آية والله بس يارب الزيارة متنقطعش أبدا:)

Mahmoud Serag said...

متشكر اوى على اللفتة الجميلة منك يا ملكة
و سعيد انها عجبتك

مَلَكة said...

ياخبر يا محمود ده انا اللي المفروض اشكرك على القصيدة الجميلة دي
تحياتي ليك دايما :)