حاجة غريبة أوي يا جدع ، الواحد يبقى قاعد مأنتخ بيتفرج على التلفاااز وبعدين تقلب على قناة (One tv) بتاعة دبي تلاقي حلقة من حلقات (Friends) شغالة كدة إذ فجأتن. ولو إنت من البشر اللي عمرهم ما بيحفظوا مواعيد أفلامهم ومسلسلاتهم المفضلة (زي حالاتي كدة) هتنشكح بالقوي يعني وتقعد تتفرج على الحلقة وإنت في إيدك شوية لب معتبراً إن الوالدة داعيالك النهاردة بروقان البال
وبعدين يا سيد وإنت رامي ودنك مع الواد (روس) تلاقيه مثلا بيقول إنه يهودي وترمي عينك كدة بالغلط على الترجمة قوووم إيه؟ تلاقيهم مترجمينها "بلا ديانة" !!! وش كدة قرر مترجمين القناة إن الديانة اليهودية دي مش موجودة أصلا وبح خلاص مش معترفين بيها وعلى هذا الأساس مش عاوزين نعمل بلبلة في مخ الناس اللي بتتفرج فنقولهم إنها ...مش ديانة أصلاً..ياحلاوة يا ولاد!
طبعا وقتها هتقول لنفسك مش مهم يا واد طنش خاااااالث واستمتع بالحلقة و أهو نص العمى ولا كله وكفاية إنك بتفهم إنجليزي وبلاها ترجمة. قوم يعدي مشهد رومانسي كدة عثول (مفيهوش حاجة عيب عشان الناس اللي مخها ما بيصدق يروح لبعيد) وتلاقي البت (مونيكا) بتقول للواد (تشاندلر) إنها بتحبه والجملة العتيدة "I love you" تخرم ودانك وانت قاعد وبحركة غريزية لا ارادية باعتبارك برضو مواطن مصري عينك تخبط في شريط الترجمة فتلاقيها اتحولت إذ فجأتن إلى "أنا أهتم لأمرك" كدة يعني أنا أهتم لأمرك ومش أكتر من كدة زيك زي أي قطة مشردة بهتم بيها وبعطشف عليها وبحط لها كل يوم لبن ع السلم وخلاص!!
السؤال يا محترم بقى منك له لها: إيه العيب في جملة الحب دي عشان يشيلوها رغم إن مفيش مخلوق ميعرفهاش؟ وهل الحب - لا سمح الله - ممنوع رقابياً أو قد يؤدي - برضو لا سمح الله - لمعصية حتى لو كان في مجرد جملة في مسلسل؟؟
وإيه مشكلة الديانة اليهودية عشان ميعترفوش بيها؟ مش دي برضو ديانة من الديانات السماوية التلاتة ولازم احنا - كمسلمين- نعترف بيها وبالمسيحية كجزء من إيماننا بالله؟ ولا ده جزء من انكار الاخر اللي بنحترفه في وطننا العربي المجيد؟؟
وبعدين، إذا كان فيه فيلم أو مسلسل ضد التقاليد العربية أو مش عاجب وجهة نظر القناة فإما إنهم يذيعوه باعتبار إن اللي بيتفرج عنده نوع من أنواع التمييز بين اللي ممكن يتوافق مع ثقافته واللي مش ممكن أو إنهم يريحونا ويريحوا نفسهم وميذيعوش الحاجة دي من الأصل وبلاها وجع الدماغ من الأول !!
وأخيراً ، اللي ميعرفوش مسلسل فريندز:ـ
ابقوا جوجلوا عليه يارفاق و مش هتدوروا كتير لأنه أشهر من السيد الرئيس بذات نفسه (حبيبنا كلنا طبعاً)!
36 comments:
ههههههههههههههههههه
اكيد انتي فهمتي غلط يا ملكة .. دي حركة مقصودة من القناه تقصد توصل بيها ان اللي ميعرفش انجليزي يا عيل صغير يا جاهل و في الحالتين "من وجهة نظر القناه برضة " ميستاهلش يفهم
حظي حلو دايما مع بوستاتك .. غالبا يا باخد المركز الاول او التاني في التعليق .. المفروض اللي يعلق اول واحد ثلاث مرات ياخد نسبة من اسهم المدونة :)
يابني ده أنا لسة بظبط في التدوينة أقوم ألاقي التعليق جاي كدة
الظاهر أنا وانت موعودين بالتعليقات الطازجة على التدوينات اللي لسة طالعة م الكيبورد:)
أنا فعلاً بحس إنهم بيستخفوا بعقول المشاهدين بطريقة مستفزة
رغم إن صعب متلاقيش حد فاهم انجليزي دوقتي
الناس كلها بقت بتدرس انجليزي أصلا
بعد كدة هيبقوا يعملوا ترجمة لمسلسلات اللغة العربية الفصحى عشان الناس تفهمها
بس ياريت ميكونش نفس نظام الترجمة ده
هتبقى مصيبة!!
وبعدين وماله؟
وانت خارج ابقى خدلك سهمين من المدونة
بس أوعى تتعور بقى:D
انا اصلي احب اسعي علي الرزق بدري
و احب التدوينة و هية لسة طالعة من الفرن قصدي من الكيبورد طازجة
و بعدين ما يستخفوا .. ما كل الناس بقت تستخف بكل الناس .. عادي يعني
اصلا بعد كدة مش هبقي في لغة عربية فصحي .. يا بنتي اذا كانت العامية المصرية هتندثر تحت العامية الشامية :)
دي هتبقي هيصة
المهم متفقناش هتيديني كام في المية من المدونة .. انا ممكن اقبل ب 3 فدادين ازرعهم و ابني عليهم بيت و اشوف مستقبلي بقي
خليك فى البيت يوم 23 يوليو لمعرفة التفاصيل أدخل مدونة خليك فى البيت
أولا بالنسبة للبوست نفسه ..
خطا عادي جدا من مترجممسطول ابتلاه الزمن بمراجع أكثر سطلا متمنين أن يرزقهم الله بجمهور بيتفرج عالصور بس ومش فاضي يقرا.
ثانيا بالنسبة لفريندز نفسه .. مسلسل تحفة طبعا .. خصوصا جنيفر انستون .. دي حدوتة لوحدها ... ممكن يا طانط تحطيلها صورة لوحدها بعيد عن العيال الوحشين دول؟
ثالثا .. بالنسبة لتقسيم البلوج اراضي وبيعها بالمزاد العلني .. عاوز حتة متر في متر نعملها تربة .. محدش ضامن عمره وياريت حواليها جونينة
July
أهلا بكِ في النادي!
عارفة.. الغريب إن الأسلوب ده بيستخدمه حتى المترجمون على النت.. يعني دول هواة أصلا، وعاملين الترجمة دي للنت، وبرغم كده بيفرضوا رؤيتهم ويحذفوا مالا يعجبهم من الترجمة، أو ما يرون أنه سيفسد أخلاقك!
كون إنه بينكر الديانة اليهودية أو لا يعترف بها، فده لايكفي إطلاقا لحذف الترجمة أو تزويرها.. مش لأنها ديانة وبنعترف بيها.. إنما لأن استخدام الكلمة نفسه مش عييب يعني..
يعني لو كان البطل بوذي أو هندوسي حتى.. نستهبل إحنا ونقول ملحد؟
طيب هي ملحد دي يعني اللي عادي؟
حاجة غريبة جدا والله..
إنما تغيير كلمة "أحبك" إلى أنا أهتم لأمرك فانتي كده بتبالغي يا ملكة.. وماله يعني!
الراجل المترجم شايف إنها قلة ذوق الواحد يقول بحبك كده وش.. لازم أنا أهتم لأمرك.. ذوقك حلو.. عنيك فحلقي بتنور في الضلمة.. لحد ما نوصل للحب في آخر المسلسل!
على فكرة.. حلوة قوي (جوجلوا) دي!
طحياطي!
ههههههههههه والله الناس دول عليهم حبة حركات قال ايه التزام واحترام وكده والله الاحسن اني متكلمش عشان متفقديش احترامك ليا من اول زيارة
لغتك في الكتابة جميلة وبحبها وبكتب بيها
اكيد مش هتبقي اخر زيارة
بقى مسلسل فريندز أشهر من السيد الرئيس ...............حُلوة دي ! تحيااااااتي يا ملكـــة ...
.
.
.
بس أنا عُمري ما خرمت ودني ترجمة زي كده Never
هوا بس ف الشتيمة ، بيبقى باين إنها مش بيترجموها صح !
.
.
تحياتي تاني
آخر كلاكيت توو
وما الحياة إلا هيصة كبيرة يعني:)
آه فدانين وماله
مش عايزهم مزروعين درة بالمرة؟؟
هو الواحد لو فرط في مدونته يعني
يبقاله ايه بعد كدة ياجدعان؟؟
وعجبي:D
أخليني في البيت ليه يعني؟
ماهو كدة كدة أجازة اساسا
يلا ما علينا
عمار يامصر
وياجمال يامثال الحرية
جمال بن ريسنا طبعا!!
شادي
معتقدش خطأ يا شادي لأني شفت الحكاية دي أكتر من مرة وبيتهيألي ده جزء من سياسة القناة أصلا
لكن أنا مش قادرة أفهم ايه المشكلة في حاجات مش ممنوعة رقابياً وبديهية جدا يعني
ليه تتشال وتتغير؟
بقى بتحب رايتشل؟؟
مع إنها غتيتة يعني
(كل البنات مبتحبهاش عشان كل الرجالة بيحبوها)
بس وعليه مفيش صورة ليها لوحدها
ياتاخد الليلة ع بعضها يا بلاش:D
مين قال ياجدعان إني هبيع المدونة؟
هي عمر أفندي ولا إيه؟؟
أان ضد نظام الخصخصة قلباً وقالباً
بلدنا بس هي اللي تتباع
إنما أي حاجة تانية لأ لأ لأ لأ
وتحيا مصر ياعم
دافنشي
يا أهلا وسهلا بيا
اتفضلي شاي طيب!
وترجمة يهودي أو جملة حب بريئة حتى لو بين أم وابنها هيفسد الأخلاق؟؟
طب ليه وعشان إيه؟!
هههههههههههههههههه
فحلقي بتنور في الضلمة؟
أعتقد ده مش حب وقتها كدة
هو هيحب قطة يعني ولا إيه؟
عندك حق الجملة دي وحشة وقليلة الأدب والمفروض نمنع الأطفال انهم يسمعوها أو يقروها أو حتى يعرفوا يعني ايه حب
وفي الاخر هما يستنتجوها زي ما انت قلت في اخر المسلسل
"عينيف أوي رصيف نمرة 5 ده"
اتفضلها يافندم الف لك حتة منها في ورقة تاكلها وانت مروح؟؟
مشكرين وكل ال"طحية" لحضرتك:)
دكتور مستكنيص
وده معناه إني ناوية أفقدها فيما بعد عادي يعني؟:D
متشكرة جدا يافندم ويارب فعلا متكونش اخر زيارة
إبراهيم
آآه فيه مانع سعادتك يعني؟
طب اشمعنى بتخرم ودني أنا طول الوقت يعني؟؟
الظاهر أنا بركز معاهم زيادة عن اللزوم:(
الشتايم بيقطعوها أساسا بس دي مفيهاش حاجة ليهم حق فيها
انما الكلام العادي معتقدش فيه حاجة عشان يتترجم غلط أو يتجاهلوه أصلا
مشكرين يافندم ونورت
يابنتي لا
ده اختبار ذكاء
علشان يشوفوا اللي هيعرفوا الغلطات
يعينوهم مترجمين
شفتي السحر
لقد أتيت
شوفي .. لو عندك فريندز على الكمبيوتر زي ماهو عندي ، فممكن تنزلي السابتايتلز الإنجليزي .. بحيث الكلام اللي بيتقال بيتكتب زي ما هو بلغته .. ولو كلمة كده والا كده وقفت معاكي تقومي متجهة رأسا على أي قاموس إلكتروني محترم وشايفة الكلمة ، وبعدين ترجعي تكملي تاني .... هو ده الشغل
وعلى فكرة .. الحاج "روس" أعتقد أنه يهودي حقيقة بعيدا عن المسلسل يعني .. اسمه نفسه ديفيد شويمر .. فيمكن الراجل معتز بنفسه وكده وأصر يلعب دور يهودي .. أي حاجة يعني
وبعدين .. فكك .. هي جت على دي :)
صحيح .. أما ننتهز الفرصة ونكتب اللينك الحليوة ده
www.imdb.com
معلومات عن الأفلام .. الممثلين .. الخ .. كل ده وأكتر هاتلاقيه هناك
كأني باعمل اعلان عن مجلة روتانا سينما .. ما علينا .... أمشي بقى
سلام
ملكة ..
انا قلت 3 فدادين و مش مهم يكونوا مزروعين
انا هزرعهم
لأ يا ملوكة أوعي تفرطي في أي شبر من المدونة والنبي أحسن هتشردي القراء بتوعك زي ما المصانع بتشرد العمال لما بيخصخصوها:)
أنا مش عارفة مش باحب اتابعه فريندز يعني لو شفته يبقي بالصدفة كدة.. باخد وقت علي ما اتقبل فكرة ان دمهم خفيف والمفروض اضحك
يمكن العيب فيا غالبا علشان كل الناس بتحبهم
تحياتي يا جميلة
عمرو
يا أهلا بيك ومبروك كمان(2×1 يعني)ه
فعلا؟
طب يعني أنا أروح اقدم لوظيفة مترجمة هناك؟
بس مقولتليش
اللي يلاحظ كام غلطة ياخد ايه في الآخر غير الوظيفة؟
طرااااخ
احم خلاص عرفت هياخد ايه!!
فكروني باعلانات الشمعدان بتاعة زمان
ايييه دنيا!
نورتني ياعمرو ويارب متكونش اخر زيارة
مهاب
ياويلكم ياويلكم ياميت نهار ويلكم
أنا فعلا عندي فريندز ع الجهاز والحمد لله مش محتاجة لها ترجمة عشان بتعامل معاها من منطلق تدريب على السمع وكدة غير إني بجد معظم الكلام بفهمه
إنما اما يكون فيه ترجمة بيبقى الواحد غزم عنه بيبص عليها حتى لو فاهم الكلام اصلا
حركة غريزية بحتة يعني
وبالنسبة لروس فاسمه فعلا يهودي صرف يعني إنما انت عارف مبتفرقش معانا الحاجات دي
الراجل ممثل وبس
اي حاجة تانية أبسلوتلي ناثينج خالث يعني
على فكرة بقى أنا بعشق الموقع ده من ساعة ما اكتشفته
تقريبا من المواقع اللي لما بدخلها ممكن أنسى نفسي وياريتنا عندنا واحد زيه
بس مينفعش
وإلا هنحس إننا مش احنا
وهتبقى أزمة هوية والبتنجان ده
وبعدين مالها مجلة روتانا سينما؟
على رأي المثل
اديني في الهايف ...الخ الخ
متغيبش علينا يا مهابوف
نورتنا يافندم
آخر
لا والنبي!
ماتسيبني أنا أزرعهملك بالمرة؟
أكرر وبوطنية مش موجودة حتى في بولاق
المدونة ليست للبيع
زي مانا قلت قبل كدة
اللي يفرط في مدونته كأنه بالظبط فرط في..في ساعته!
بث خلاث
ملكة
طب أأجر حتة صغيرة .. و اهو نبقي جيران :)
إيما
ميهونش عليا يا ايمايتي إني أشرد الناس كدة
ده غير إني هكون أول واحدة يعني
وانتي عارفة فيه أزمة سكن اليومين دول يعني:D
بس معتقدش ان دي مشكلة يا ايمي لأن لولا اختلاف الأذواق زي ما انتي عارفة
انا برضو اعرف ناس مبيحبوش المسلسلات دي اصلا ومابيضحكوش ابدا اما بيشوفوها
فهي وجهات نظر يعني متقلقيش
نورتيني ومشكرة ليكي كتيير:)
آخر اللي مش ناوي يجيبها لبر
انت قاعد مستني نصيبك ولا ايه؟:D
ايجار جديد ولا قديم؟
شوف أنا مستعدة نبقى جيران
بس ايه ده؟
هو احنا مش جيران اصلا ولا ايه؟
طيب هبقى ارش على غسيلكم مياه من بلكونتنا:D
و اللة مافارقة
فرندس من حلندس من شرنجس
؟
اهو كلة بيمثل على كلة
_خدى بالك المرة الجاية _
هى الترجمة بتاع معامل انيس عبيد
و لا تلفزيون دبى
_دى نقطة مهمة ف القضية _
ملكة دة يبقي جر شكل بقي
و بعدين رش الميه في الحلم مش خير
احنا صحيح جيران بس في شارع التدوين انما انا بدور اننا نبقي جيران في عمارة واحدة :)
و بعدين قديم جديد مش قضية اللي تقولي عليه
يمكن الحب حرام ولا حاجة او قلة ادب يعنى ازاى حد يقول انا بحبك !!
انا باجى كل شوية بوستات كده بتفوتنى معلش على التأخير لكن بقرا كل اللى فاتنى
بقولك يعنى مفيش تدوينة بتفوتنى مدونتك من اجمل المدونات فعلا
تحياتى
هههههههههههههههههههههههههههه
أولا انتي اللي غلطانة
فيه تنويه بيبقى قبل المسلسل باللغة اليابانية ( عشان الكل يفهمه يعني ) بيقول عزيزي المشاهد إذا كنت من متقني الإنجليزية ماتبقاش غبي و تبص للترجمة
هههههههه
يا بنتي دي معاناة
تصدقي بايه
و الله العظيم انا في فيلم انجليزي مش فاكر اسمه ايه
كنت سامع الواد بودني بيقول انه بقاله خمس ايما ضايع كلمة فايف كلت من ودني حتة و لقيت الترجمة انه بقاله تلات ايام ضايع
المشكلة مش ان الرقابة بتغير
لأ
المشكلة ان المترجمين مش بيعرفوا انجليزي
يا ملكة يا بنتي
احنا في بلد تخطئ لعدم الفهم ...لو كنا نخطئ عن قصد ماكانش ده بقى حالنا
كفراوي
هو من وجهة النظر العبثية
مفيش أي فرق في أي بتنجان
وعليه
فمش فارقة أنيس عبيد ولا قناة دبي
على الأقل أنيس عبيد كانت بتحترم نفسها ومش بتشيل الكلام ولا بتترجم ع مزاجها
اللهم إلا"اللعنة" والحاجات دي
!!
آخر
أيون بالظبط كدة هو جر شكل
عرفت منين؟
ثم أحنا عمارتنا كومبليت كدة
أصلنا ساكنين جنب الحزب الوطني
ولا تعليق!!
محمد ياسر
الظاهر بعد كدة هيحذفوا جمل الحب من الكلام باعتبارها مفسدة للأخلاق!!
ميري كتيير ليك يا محمد
ويارب تنورنا دايما:)
مادو
ياباني؟
أنا معرفش من الياباني حاجة غير جملة
Made In Japan:D
الغريب انهم فعلا بيستعبطوا المشاهد ولامؤاخذة يعني مش بيثقوا أصلا إن فيه حد متعلم انجليزي يكون بيتفرج
عالم عايزة الحرق!
والله يا أونكل مادو إنت عندك حق
فعلا ياولاد
العلم نورن:)
مش عارف ليه انتم بتتعاملوا مع المسألة بطريقة نظرية المؤامرة ؟ أنا مش باشوف فرندز ده لكني حاسس أن الموضوع بسيط جدا : أولا المترجم عنده معلومات أكتر مننا وعارف أن روس مش يهودي مخلص ومش بيؤدي الفروض الدينية اليهودية بانتظام نظرا لإنشغاله في العمل الفني وبالتالي فهو في الحقيقة من غير دين وحتى لو قال روس أنه يهودي فمن واجب المترجم الأمين أنه يصلح للمتفرج الجملة ويقول له الحقيقة.
أما مونيكا فأكيد المترجم عارف من مصادره الخاصة أن حبها لتشاندلر ده برضه حب مش حقيقي وإن أخرهم يكونوا أصحاب أنتيم ، علشان كده مش عايز يترجم الجملة إلى أنا أحبك وترجمها إلى أنا أهتم بأمرك.
وفي رأيي أن القناة اللي تسمح لهذا المترجم وأمثاله بهذا العبث هي قناة لا بتحبنا ولا بتهتم بأمرنا !
الحكاية دي بتفكرني بواحد صاحبي كان زعلان من واحد شتمه في التليفون بكلمه انجليزية قبيحة ، ولما قابلت الواد قلت له انت ليه قلت الكلمة دي لصاحبك ؟ قاللي فيها ايه ، مش الكلمة دي معناها "عليك اللعنة" ، أنا باشوفها كده في الترجمة. قلت له لا طبعا ده مش معناها. قال لي طيب معناها ايه ؟ .. قعدت أفكر شوية في ترجمة مناسبة .. ولما ماقليتش حاجة أقولها قلت له عليك اللعنة !
معاذ
كلنا بارانويين يافندم
مش مصريين ولا إيه؟؟
أيوة أنا برضو بقول إن القناة دي عايزة الحرق والله
حتى لو كانت بتجيب فرندز
ام بي سي فور برقبتها:)
هو ده الجيل الجديد بتاع أنيس عبيد
كل الشتايم تختزل في "عليك اللعنة" و"تبا"وخلاص كدة
أنا أظن إن إجابتك كانت الوحيدة المنطقية عليه
مشيها اللعنة وخلاص يعني هي هتفرق أوي؟
اقولك على حاجة انتى ممكن ماتخديش بالك منها اساسا هو فى حد فى مصر غيرك طبعا بيتفرج على فيلم او مسلسل اجنبى وودنة شغالة مع الصوت يابنتى الناس اتعودت تقرى وتربط فى الاخر وخلاص وياريت كل الناس بتفكر نفس التفكير وليها نفس الدماغ
Post a Comment