Monday, October 27, 2008

اللا مختار من كتاب الحياة 3

-1-

أول مرة الجهاز يتمسح من عليه كتاباتي الأولى

قعدت اكتر من ساعتين

من الصدمة

مش عارفة أتكلم

ماكنتش متخيلة

إني هوصل لمرحلة

في يوم من الأيام

همسح فيها اللي كتبته بإيدي

واقطع ورق كتير مليته كلمات وشخبطة

كان لازم اعرف من الأول

إن مفيش حاجة في الدنيا ممكن تكون غالية

للدرجة اللي إحنا متصوراها!

-2-

لما كانوا في المدرسة بيقولوا لنا

"طلعوا ورقة واكتبوا فيها أسامي الحاضرين"

كان أول واحد دايما يعمل مربع فيه رقم1

ويكتب جنبه اسمه ويمررها للي بعده

وعلى ما الورقة توصلني

كنت ألاقي الورقة اتملت مربعات وأسامي

وتروح الورقة للمدرس فيها 49 مربع

ودايرة واحدة !

-3-

حاجة في منتهى الغتاتة

إني أكون بتخانق

وانا عارفة وكل اللي حواليا عارفين

إني على حق

وإني بطالب بحاجة مشروعة

وفي عز زعيقي وانفعالي

الاقي صوتي خانني وعيطت!

-4-

لما كنت عايزة أخرج في مظاهرة

أهلي قالولي

" لما تخلصي دراسة

ابقي اعملي اللي انتي عايزاه"

ولما خلصت دراسة

رجعوا قالولي

"لما تبقي في بيت راجل

ابقي اعملي اللي انتي عايزاه"

ولما جه الراجل ...

كلهم أكدوا لي

إني عمري ما هعمل اللي انا عايزاه !

- 5-

الراجل اللي بيزعق ويشتم ويضرب ويطلق

عشان كان متنرفز

واللي بيتحرش بأي واحدة

عشان كان مستثار باللي هي لابساه

واللي بيقول إن المرأة عورة

وهو مدمن أفلام بورنو

واللي بيعمل اللي هو عايزه قبل الجواز

بس لو جت الست قالتله انها (حبت) قبله واحد

ويقولها انتي (......) ويسيبها

بصراحة

يستحسن يعمل عملية ويتحول

عشان المشرحة مش ناقصة قتلى!

-6-

كل الناس

بتحب اسكندرية في الشتا

عشان بيهربوا لها

بس لو كان كل واحد عنده اسكندرية جواه

كان ممكن نحب شهر أغسطس

في الصعيد!

-7-

السيد الرئيس

السيد الوزير

السيد المحافظ

السيد رئيس جهاز التعبئة والاحصاء

والله لو كنت أعرف إن وجودي كرقم

هيستهلك ورق الحكومة زيادة

بمعدل 0.1 كل كام سنة

كنت منعت جوازة أمي من أبويا دي بأي شكل!

-8-

بيقولوا اللي يشرب من كباية مكسورة

ينكسر قلبه

أنا بقى هموت وأعرف

فين الحنفية اللي بتنقط من 20 سنة دي؟!

-9-

الراجل أبو شعر طويل

اللي عدى علينا وإحنا بنصور التماثيل

في الأوبرا

وقف وقال لنا هو مش حرام الكلام ده عندكم؟!

مع إنه كان مصري ومسلم مش أجنبي

ومع إننا كنا (بس) لابسين حجاب

رديت عليه بمنتهى البساطة وقولتله

إن الحجاب مش معناه إن الفن حرام

بس كنت غلطانة ساعتها

كان لازم أقول له

لكم دينكم ولي دين!

-10-

لما هموت هسيب لبنتي أو لابني

تركة صغيرة تقيلة

عبارة عن ورقة

هيلاقوا فيها كلمتين بس

" أنـــا آســـفــة "!

- اللامختار من كتاب الحياة 2

- اللامختار من كتاب الحياة 1

Sunday, October 05, 2008

تساؤلات منطقية ذاتية

-1-

هما ليه موظفين الحكومة في مصر ما بيشتغلوش إلا لما يتشتموا أو حد يعمل لهم فضيحة ويزعق فيهم؟!

-2-

هو مين اللي حكم بأن اللي بيحصل لنا كمصريين دلوقتي نتيجة لأننا كلنا بقينا كفرة؟

طيب ما اللي في أمريكا وسويسرا مش كلهم عارفين ربنا وفيه منهم مش بيؤمنوا بوجوده أساساً

اشمعنى دول ربنا مش غضبان عليهم ومش باعت لهم حكومة زي بتاعتنا؟!

-3-

ليه الناس في محلات الأكل بيبصوا لغيرهم طول ماهم قاعدين؟!

-4-

هي ليه الست المصرية اللي جوزها بيموت لازم تفضل لابسة أسود لحد ما هي تموت ولو قلعته ولبست ملون حتى لو بعد 3 سنين مش 3 ايام الناس بتقول عليها ست قليلة الأصل؟!

-5-

هو ليه كل لما أسأل حد من الكبار عن مدى حرمانية الرشوة دلوقتي يردوا بأن "الضرورات تبيح المحظورات"؟!

-6-

هو ليه كل لما أركب عربية السيدات في المترو بلاقي كل اللي فيها بيتفحصوني من راسي لرجليا ؟!

وليه بيتفحصوا كل واحدة طالعة ونازلة مع إنهم عارفين إن غيرهم قبلهم كانوا بيتفرجوا عليهم برضو؟!

-7-

ليه فيه موالد في مصر أساساً مع إنها مش حاجة في الدين؟!

-8-

ليه معظم الرجالة العرب ما بيرضوش يتجوزوا واحدة مرتبها أعلى من مرتبهم؟!

-9-

هو امتى بالتحديد ظهر مصطلح "عارف ربنا"؟

ويعني إيه عارف ربنا؟

وهل لو واحد "عارف ربنا" لكن مابيسمعش كلامه تبقى دي معرفة قلتها أحسن ولا إيه؟!

-10-

ليه الناس بتفترض إن أي مكان هو ملكيتهم الخاصة ممكن يلزقوا عليه أي استيكرز زي ماهم عايزين؟

وليه بيكفروا اللي بيقول لهم ماتبوظوش المنظر العام بمبرر إن استيكراتهم عن الحجاب والنار والزنا ودي منفعة للمسلمين؟!

-11-

هما ليه الناس حتى لو مبسوطين لازم لو ماشيين لوحدهم يبقوا مكشرين؟!

-12-

ليه عسكري المرور في أي حتة لما بسأله بيقول لي "ماعرفش"؟!

-13-

هو ليه فاروق حسني لسة وزير لحد دلوقتي؟!

-14-

هو ليه بعض الرجالة عندهم في القاموس كلمة ست معناها شهوة و استباحة؟

-15-

ليه الرجالة لما بيشوفوا بنت لبسها مش على مزاجهم مابيرضوش يقوموا لها في الأتوبيس؟

وعموما ليه لما بقوا بيشوفوا ستات حتى لو كبار في السن بيفضلوا قاعدين؟

-16-

ليه الرجالة المصريين عموماً شايفين إن الست مهما كانت عظيمة فهي عمرها ماهتبقى أعظم منهم لسبب بسيط: إنهم رجالة؟!

-17-

ليه فيه ناس بتتجوز وتخلف عيال بالدستة مع إنهم مش لاقيين ياكلوا؟!

-18-

أنهي قانون صدر وقال إن "الراجل ما بيعيطش"؟

وليه بيقولوا "الراجل ما يتكسفش"؟

-19-

هي ليه المشاكل جزء من الحياة؟

ليه لازم نتقبلها دايماً؟

ليه لازم نرضى بالجزء الاستثنائي من الحياة لحد ما يبقى هو الحياة نفسها؟!

-20-

احنا ليه كمصريين ساكتين على كل ده وليه ساكتين كل ده؟!

-21-

ليه الاسدال أو النقاب لازم يبقى أسود؟

يعني لو الألوان بتفتن وفيها شر مش كان ربنا هيرحمنا منها من الأول؟!

-22-

ليه بعض الناس بيستقووا على الست لما بتبقى لوحدها؟!

-23-

ليه الناس بتحب جداً تتفرج وتسمع الخناقات؟!

-24-

هو احنا ليه كلنا مصيرنا لازم نربطه دايماً بشخص واحد؟

إما الريس أو وزير ما أو مديرنا في الشغل أو حتى زوج أو زوجة؟!

-25-

أنا ليه بطلت كتابة حاجات ترضيني ؟!