Wednesday, June 20, 2007

تلميحات

منذ عشرين عامًا إلا يوم

كانت تنتظر

فوق المقعد الخشبي

في اليد كتاب لا ينتهي

تقتل به الوقت

أو يقتلها

والنافذة الأمامية مغلقة

هي دائمًا مغلقة

حين ملّها الانتظار

استعدت للنهوض

لكن حركة بسيطة

في مزلاج النافذة الأمامية

أعادتها لمشهدها الأول

للمقعد الخشبي والكتاب

!! ربما لعشرين أخرى

37 comments:

اخر من الاخرين said...

عارفة انا مؤمن تماما ان اللي يصبر ينول
و ان الصبر مفتاح الفرج
بس صبر و انا قاعد ... امل صافي
امل مسيطر علي انسان و علي حياه
ايه هوة الفرج اللي يستاهل كل الامل دة
و مع ذلك عندي رغبة قوية اجرب اني انتظر حاجة للدرجة دي .. يمكن يكون فيها حل لكل المشاكل

sendrlla said...



بتفكرنى برده بزمن الاساطير او يعنى تنفع بدايه لقصة جميله فيها معانى كتير للاخلاص والوفاء والصبر و التضحيه حاجات كتير اوى

ما تحاولى فعلا تحوليها لقصه وتحطى دى البدابه

جمييله بجد

إبـراهيم ... معـايــا said...

أولاً : حمد لله على ســلاااامتـك مرتين ، سلامتك الصحية ، وعودتك التدوينية .... ،،،، تتميزر كتاباتـك بالصدق ... و الاحتراف مــعًا ...

الصورة حلوووة قوي ، كأنها اترسمت لكلماتـك دي :)

لوحة جديدة ، ورؤية مختلفة لمشهد الانتظـار !

ملكة said...

آخر

أنا بقى مش عارفة إذا كان الصبر بينول في الآخر ولا لأ
بس هو أكيد هيكون فيه نتيجة مش هنوصل لحارة سد يعني
يمكن لما بنستني حاجة للدرجة دي بنعلق عليها بقية حاجاتنا اللي بطلنا نسنتناها عشان كدة بنعيش تقريبا طول عمرنا في حالة انتظار
ساعات كمان بننسى بعد زمن احنا كنا مستنيين ايه؟وليه؟؟

دايما زيارتك وردك بيسعدوني
تحياتي لك

ملكة said...

سندريلا

حمدالله على السلامة:)

مش عارفة ياسندريلا الحاجة اما بتتكتب معايا بشكل معين بلاقي صعوبة اني اغير شكلها لنوع تاني
وبعدين هي الحكاية خلصت على كدة
مش عارفة لو حطيتها بداية هيكون ايه بعدها؟
أفضّل أستنى معاها العشرين سنة واشوف هيحصل ايه بدل ما أتخيل سيناريوهات كتير ربما ولا واحد منهم يتحقق فعلا

ميرسي ليكي بجد
ويارب أشوفك هنا دايما:)

ملكة said...

إبراهيم

الله يسلمك يافندم..مرتين برضو:D

الحمد لله إن النص الملخبط ده عاجبك
مش بقولك دايما رافع روحي المعنوية؟:)

دمت بكل خير

شقلوطة said...

الله ..حلوة حلوة ..
وحشتينى و بسأل سلمى عنك علطول ..و هاكلمك قريب..قولى أنتى يارب بس
..
بس بجد يا ملكة ..صورة و تدوينة حلوة ..

إيما said...

روعة يا ملكة بجد والله
الكلمات سحر والصورة كمان وخلفية الموسيقي الجميلة وراهم كإنهم دنيا تانية
وكمان تعبير ملها الانتظار ده ساحر

تحياتي ليكي يا بنوتة وللعالم الجميل الذي تأتي منه كلماتك

ملكة said...

مهموهتي

ربنا يخليكي كلامك دايما بيشجعني
على فكرة انتي كمان واحشاني بس انا عارفة اليومين اللي بعد الامتحانات ما بتخلص دول بيبقوا زحمة لدرجة محدش بيعرف يعمل فيهم حاجة
يارب نتقابل بقى رغيك واحشني يابت انتي:)

ملكة said...

إيما

ميرسي يا إيمان على زيارتك وردك الرقيق ده
سعيدة كمان إن كلماتي دخلتك عالم تاني
ده أقصى سعادة لحد بيكتب ممكن تحصل:)

نورتيني وماتغيبيش علينا

shady said...

جميلة يا ملكة
غلاف الحزن دا دايما بيشدني

ناردين said...

الملكة..
اللافعل يساوي موت.. مقعد خشبي ربما تابوت .. وكتاب ككفن الموتى ..
اعذريني بس احساس العجز واليأس وانتظار المستحيل وتوهم ما قد يبعث على الاستمرار في الانتظار .. وصلني ولمسني و...
مش عارفة..

أنـــا حـــــــــرة said...

بسم الله ما شاء الله
عارفه يا كلبة بعد كده
اجى اقولك مش بتفكرى تنشرى
فتقوليلى هو انا بكتب حاجه تتنشر
هديكى ياللى انتى عارفاه

فينك يا بنتى ؟

تحفة
تحفة
تحفة

بسم الله ما شاء الله

اخر من الاخرين said...

ههههههههههههههههههههه

تعليق انا حرة يفطس من الضحك
تعليق رائع الحقيقة بيناقش البوست بكل موضوعية :)

صحيح لازم تنشري

أنـــا حـــــــــرة said...

معلش يا ملكة تعالى على جنب لحظة


محمد بيه
ايه اللى دخلك بين اتنين بناتيت دلوقتى
" و مش عايزة لسانك يطول "

يللا لم عزالك من هنا كمان

:)

ملكة said...

شادي

حمد الله على السلامة الأول
هو مش غلاف حزين أوي
انما تقدر تقول فيه حالة شجن بسيطة كدة

مش الامتحانات خلصت؟
عايزين نشوفك في المدونة بقى يا دكتور
تحياتي ليك:)

ملكة said...

ناردين

وهو المطلوب اثباته من البداية وللنهاية:)

سعيدة جدا بزيارتك الأولى ويارب متكونش الأخيرة

تحياتي ونورتيني كتير

ملكة said...

ياسمين

بس وربنا انا فعلا مش لاقية عندي حاجة انشرها فعلا
واما بفكر في الخطوة دي بحس لسة بدري كتير عليها
بس ربنا يسهل وميجيش يوم احس ان كدة متأخر أوي عليها!

انتي بالذات عارفة ان رأيك مهم جدا جدا عندي فتصوري اما انتي تقوليلي تحفة بقى
الناس هتطلع تدور عليا فوق في السما دوقتي:)

تسلمي يا أحلى ياسمين في الدنيا

ملكة said...

آخر

ايه ياعم محمد انت داخل تجر شكل البنت ولا ايه؟؟:D

انا هروح انشر الغسيل أهو
دعواتكم معانا :)

وبعدين يا بت يا ياسمين انا مبحبش اروح على جنب أنا
انا بحب اقف في النص عشان احجز بين الناس اللي بتتخانق

يعني تقوليله لم عزالك اقوم انا اقوله لأ يقوم هو يتقمص ويلمهم وفي الاخر اسيبكوا انتوا التنين براحتكوا بقى

حدش عايز ينضم للخناقة؟

اخر من الاخرين said...

معلش بقي يا حرة

انا اقعد هنا بمزاجي لحد ما ملكة هية اللي تقولي امشي (بيتها بقي و هيه حرة فيه) :)

شوفي ماسك لساني بالعافيه :) .. بس نفسي اقولك انتي جايه تعلقي ولا جايه تهرجي :) .. روحي اقري تعليقك تاني كدة ..

ملكة سؤال صريح ؟؟
بزمتك مش تستاهل يتجر شكلها :))
في الوقت اللي انا بعلق فيه زمان الغسيل نشف .. فكرتيني بنفسي و انا بنشر :))
عموما انا مش بتقمص غالبا و بعدين الاختلاف في التعليق لا يفسد للبوست قضية ..
حسابي معاها بقي

هدى said...

جميلة قوي

وصلتني جدا

رغم اني توقفت عن فعل الانتظار

كل الحب

shady said...

يا ستي والله ظروف عاملالي شوية لخبطة مش عارف انظم نفسي اليومين دول .. بس هابقا موجود الفترة اللي جاية بإذن الله .. ابقي عبرينا انتي كمان

عملتي ايه في الامتحانات ؟؟

Davinci said...

جميلة!
حزينة شوية.. فكرتني بالعمر اللي بيسرسب واحنا قاعدين زيها كده.. بننتظر..

حلو قوي تعبير "تقتل به الوقت.. أو يقتلها".. بس يعني إيه "كتاب لا ينتهي"؟
تقصدي لا يتغير؟

والصورة تحفة فعلا..

تحياتي

الشفافية said...

الصورة جميلة
والكلمات موحية

والموسيقى ولا أروع

كل شيء كان يؤسر قلبي

إلى الأمام دائما

محمد العدوي said...

الانتظار رحلة الانسان الدائمة في الحياة .

يمكن من غيرها تفقد نصف احداث الدنيا معانيها ..


تحيتي

YOTTA said...

حمد الله ع السلامة يا موكا
بجد الكلام ده جميل أوى

والصورة عجبتنى جداً

بس ياترى هتفضل مستنية كده (لعشرين أخرى) فعلاً؟؟؟

Anonymous said...

انا اول مرة ازورك يا ملكة , لا التانية انا مبسوطة كتير اني عديت عليكي ان من احلي الناس اللي قريت ليهم واول مرة اعرف انك بتكتبي شعر حلو كدة وتعليقي علي المدونة كلها
دعاءفتوح

momken said...

ما اصعب الانتظار وما احلى اللقاء
وليس اجمل من انتظار الاحباب الا لقائهم
وليس اجمل من رفض الاحباب الا قبولهم
كل الصعب من الحبيب يطيب لى


البوست جميل جدا جدا

تحياتى

ملكة said...

آخر كمان مرة

وانا برضو هقول لحد يمشي؟
بيتك ومطرحك يافندم:)

وبعدين تجر شكل البنت ليه بس؟
دي طيبة وغلبانة وعلى نياتها
وهي اللي كسرت قاعدة"قصيرة ومكيرة" اياها
هي قصيرة أه بس مش مكيرة اطلاقا مطلقا:D

ولعلمك
أنا اجدع واحدة تنشر الغسيل
بس بكره عمى إني أطبقه:S
و أخيراً
ابقى طخه بس ما تموتوش يابوي:D

ملكة said...

هدى

إنتِ أجمل
لكن

ليه توقفت عن فعل الانتظار؟
يمكن لقيتي فعل أحسن تستثمري وقتك فيه
أتمنى تكوني لقيتي:)

دمتِ بود ياهدهود

ملكة said...

شادي

ربنا يفك الملخبط كله يادكتور

وبلاش سيرة الامتحانات
على رأي الست
اللي فات ننساه
ننسى كل قسااااااااه
وتحديدا قساه ده

نورتني:)

ملكة said...

دافنشي

العمر مش بيتسرسب
احنا اللي بنفتح ايدينا وبنسيبه يقع منها بإرادتنا

اما الكتاب فمش بيتغير لأن هي مش بتقراه أصلا
بيحصل انك تفتح صفحة كتاب وتسرح بعيد ومتقراش حاجة من اللي ادامك
بتستعمل الصفحة مراية لأفكارك وتأملاتك وهواجسك
وطبيعي أوي إن تفضل بالشكل ده تقرا في كتاب إلى ما لا نهاية!

تحياتي كتير ليك وميرسي ع التاج:)

ملكة said...

الشفافية

جميل
وهو المطلوب تحقيقه ثم اثباته

أتمنى أشوفك هنا دايماً إن شاء الله

ملكة said...

محمد العدوي

I couldn't agree more:)

لولا الانتظار ما وصلنا

تحيتي ليك يافندم

ملكة said...

يوتا

الله يسلمك ياحبيبتشي والنبي ليكي وحشة كبيييرة
بصراحة ده رهن بالنافذة الأمامية
يمكن ده ضعف؟
او انسياق مع أمل أضعف من أول ضوء للنهار
لكن
هتستنى
عشان حاجة تستاهل بالشكل ده لازم نسنتناها

عايزة ابقى اشوفك يابت بقى
واحشاني كتيير:)

ملكة said...

دعاء

ايه المفاجأة الرائعة دي؟
بجد مفاجأة جميلة أوي ربنا يخليكي ليا يارب
كلامك فرحني أوي خاصة لما يكون منك انتي بالذات
ربنا يسعدك قد ما أسعدتيني النهاردة وكل يوم

نورتيني يادعاء ويارب يكون فيه مرة تالتة كمان:)

ملكة said...

ممكن

كل اللي اتقال موافقة عليه مليون في المية
لكن ازاي رفض الأحباب جميل؟؟
مش عارفة أستوعبها
أو ربما أنا لسة موصلتش لمرحلة استعذاب الرفض!

زيارتك أسعدتني بس يرب متكونش الأخيرة:)