Thursday, May 24, 2007

!!! عايزة أعييييش

مليون حاجة في نفسي اعملها من غير ما حد يتكلم او يعترض او يعلق او عيب حرام ميصحش مش حلو ممكن تتفهم غلط ممكن تتفهم صح مش مهم كل ده مش مهم اي حاجة مش مهم اي حد مش عايزة ابقى لوحدي مش عايزة البس اسود ولا عايزة اشوفه مش عايزة البس جزمة واقفلها مش عايزة البس جزمة في رجلي خالص مش عايزة ابقى زرقا ولا عايزة ابكي ولا ازعل ولا اسمع اغنية تخليني ادمع ولا اقرا حاجة وتهزني مش عايزة حيطان البيت تقيدني ولا الناس في الشارع يحبسوني مش عايزة لساني يسكتني ولا عايزة ادور على كلام حلو اكتبه
.
عايزة اجري تحت مطرة ومش مهم هدومي والطرحة يتبلوا مش مهم يقولوا ايه مش مهم اروح ازاي عايزة انسى كل حاجة واي حد عايزة كمان اكل ايس كريم عشان واحشني اوي ومش مهم يكون معايا منديل امسح بيه ايديا اما الايس كريم يسيح ليه كل ما كنا بناكل ايس كريم واحنا صغيرين كان بيسيح مننا ويزعقولنا ؟طب وايه يعني اما يسيح؟ ايه يعني اما نوسخ هدومنا وايدينا وبوقنا بيه؟ الدنيا اتقلبت؟ طظ في اي حاجة واي حد الا الايس كريم ويكون فراولة كمان عشان بحبها مع ان بتجيبلي حساسية طب وايه يعني؟ طعمه بيبقى حلو وبحبه أوي طظ في اي حاجة تانية

عايزة وانا ماشية لو وقعت متكسفش ومبقاش عايزة اعيط والارض تنشق وتبلعني عايزة اقوم ومش هنفض هدومي مش مهم الهدوم ومش مهم الشارع والناس طب ليه كل ما كنت بمشي مع الكبار و اقع كنت بتضرب بالقلم على وشي؟ فيها ايه لما وقعت؟ الارض هي اللي وجعتني مش انا اللي وجعتها طب كنت أنا اللي بتضرب ليه؟ عايزة اما اقع دوقتي واقوم ابقى الاقي حد ياخدني في حضنه ويطبطب عليا بس بعدها نفضل نضحك سوا عليا وعلى الارض اللي انا المرة دي وجعتها

عايزة اكلم اللي انا عايزاهم وقت ما انا عايزة واقول اللي نفسي فيه ومش مهم يفهموا ميفهموش مش مهم يقولوا عليا ايه او يفتكروا ايه مش مهم حاجة وكمان مش مهم حد فيها ايه يعني لما اتكلم؟ اما بقول اللي في نفسي ما بتعبش وهما كمان مش هيتعبوا خلاص يبقى كلنا نقول اللي احنا عايزينه في الوقت اللي عايزينه للناس اللي عايزينهم وطظ في اي حاجة تانية متخليناش نتكلم
.
عايزة كمان اخرج في عز الشتا على كوبري قصر النيل الساعة 5 الصبح وخدودي الدافية يخبطها الهوا الساقع جدا وأصرخ بأعلى صوت ليا مش مهم اصرخ بايه ولا ليه ولا مين اللي هيسمع مش مهم كمان بعد ما اصرخ ادور اعمل ايه وليه وازاي وبعدين عايزة الغي كل الاسئلة والغي كل الكلمات اللي كتبتها وزهقت منها لأ أنا عايزة أخترع أبجدية جديدة أو أنسى القراية والكتابة أصلا عايزة اتعلم حاجة تانية لأ مش عايزة اتعلم عايزة الاقي نفسي عارفة اعبر عن نفسي بالطريقة اللي بحبها من غير ما اتعلم حاجة خالص عايزة ألون بس مش عايزة أرسم وعايزة استمتع بالموسيقى بس مش عايزة ادرسها واعرف دي يعني ايه وده يعني ايه وعايزة اشخبط وأغني بصوت عالي وعايزة ألعب وعايزة كمان أرقص وافرد دراعاتي بعييييييد جدا بس مش عايزة الاقي حاجة خبطت فيهم وقفتهم
.
عايزة اكل شوكلاتة وقت ما احب ومش عايزة الناس تتريق عليا ولا تسخر مني ولا من الحاجات اللي بحبها ولا يجبروني احب حاجات مبحبهاش مش عايزة اشوف حاجة غلط واسكت عليها عايزة ازعق بأعلى صوت واقول كل اللي انا عايزاه مش عايزة اخاف من حاجة ولا اخاف من حد
مش عايزة أروح الجامعة ومش عايزة أشوف أي واحد لابس بدلة بيضا عليها نجوم ولا اي واحد لابس اسود وقاعد جنب عربيات خضرا كبيرة مش عايزة اركب اتوبيسات مش عايزة اصلا اشوفهم ولا عايزة اشوف عربيات عايزة الناس تمشي على رجليها وانا كمان امشي على رجلي كتييير لحد ما اتعب مش عايزة اتعب اصلا عايزة افضل ماشية على طول انا بحب امشي وكمان مش عايزة امشي وانا مكشرة وراسمة على وشي ملامح جد عايزة اضحك واغني واصرخ واجري بس مش عايزة اعيط ولو عيطت مش عايزة حد يلومني وكمان لو عيطت مش عايزة ابقى لوحدي ولو بقيت لوحدي مش عايزة اسمع صوتي ومش عايزة أفكر ومش عايزة أفتكر ومش عايزة أفسر وأستنتج وأشرح وأكره نفسي مش عايزة أزعل خالص

عايزة اللي بحبهم يكونوا مجانين زيي ننسى سوا الناس والدنيا كلها والقيود والتقاليد والصح والغلط مين اصلا قال ان كل الناس تعرف ايه الصح وايه الغلط؟طب ليه بقى صح؟مين قال انه صح وليه التاني غلط و ايه يحكم انه غلط ومين؟ عايزة أحب واتحب زي ما انا عايزة وعايزة كمان اتمشى مع الانسان اللي احبه في الاماكن اللي بحبها وع البحر رجليا حافية والمياه تيجي عليها عايزة احكي ويحكي هو من غير ما نبطل كلام نتكلم كتيير نقول كل حاجة من غير ما نخاف طظ في اي تجارب للناس طظ في الاصول وطظ في العادي طظ في الملل وطظ في الكدب وطظ في الكرامة وطظ في الحيرة وطظ في الاشارات وطظ في المواقف والكلام والذكاء والغباء مش مهم أي حاجة

مش عايزة ماديات بكره الفلوس بكرهها جدا جدا وبكره اللي بيحبوها اكتر من اي حاجة وبكره اللي بيكرهوا بعض عشانها وبكرههم وبكرهها اما بتخنقني وبتخنق اللي بيكرهوها زيي عايزة اعيش من غيرها او الغيها من حياتي ممكن كمان الناس تتعامل من غيرها اللي عايز حاجة ياخدها واللي مش عايز يديها عايزة ازرع ورد عندي في البيت لأ مش عايزة اعيش في البيت ولا وسط الزحمة والخنقة والناس والجيران عايزة اعيش في مكان مفتوح طب مكان ليه اصلا؟ مش عايزة مكان خالص
مش عايزة اعتذر عن حاجة كتبتها عشان كل اللي بكتبه حقيقي ونفسي فيه مش عايزة أذاكر و بكره الامتحانات والدراسة واللي بعد الدراسة كنت بحب اللي قبل الدراسة وعايزة افتكر هو احنا كنا عايشين ازاي قبل ما نروح الحضانة والمدرسة؟ مش مهم الدراسة والامتحانات والمذاكرة احنا مبنعملش بيهم حاجة ومش مهم الشغل والمجتمع والمستقبل مش مهم كل حاجة مش بتخلينا نعيش بجد

47 comments:

معاذ رياض said...

أتفق معك تماما ، احنا مش بنعمل أي حاجة من الحاجات اللي انتي قولتيها دي ، علشان كده تقريبا احنا مش عايشين

.:.-=- ELGaZaLy-=-.:. said...

السلام عليكم ورحمة الله وبركاته ازيك يا ملكة
حجات كتير اوى بنعملها والناس بتفهما غلط واية يفرق اصلا اية المشكلة ما يفهمو غلط اية يهمك؟ مش انتى صح يبقى خلاص انا بجرى تحت المطر بسافر بغنى وبطير اية المشكلة انهم يقولو مجنون اية المشكلة بشترى مصاصة وادخل بيها الشغل والمدير بيقول انى لاسع بس عبقرى اية المشكلة ان احضر محضراتى وانا حاطط ايدى فى جيوبى انا كدة

اية المشكلة!!

صح انا سعات لما بقع بقوم وانا مش عايز حد يبص المهم محدش يبص وبس مش مهم الوقوع المهم محدش يبص

اتكلمى ما احلى الكام وما اعظمة وما الزمة اتكلمى ويهمكيش ..بجد طظ كبيرة للعالم
انا بنزل بالعربية وبنزل البحر فى عز اليل بس اعتقد هاتفرق لانك بنت فى زمان بيفرق بينا
الغى حدودك واخلقى حدود خاصة بيكى

هههههههههههه

يا ستى ما يتريقو واية المشكلة ما يتريقو كبرى

عايزة تمشى امشى مش عايزة تشوفى الظباط سيبى مصر

الاخيرة دى لسعت منك مينفعش تحبى الى زيك هاتزهقى وهاتكرهى نفسك والناس مش هاينفع
محدش هيدر يحكم ابدا طظ فى كلة تصدقى البوست دة عاجبنى جدااااااا

لانك لاسع بجد شبهى


الفلوس حقيرة بس مهمة علشان سعات بتخلق حجات حلوة كتير

اخلعى الماسك وعيشى بالطبيعة وبس

عيشى وميهمكيش

Camellia Hussein said...

بصي انا حسيت انك عايزة تصرخي بصوت عالي وتقولي....انا انساااااان

The Alien said...

وأنا كمان نفسي أعيش
بس أنا بجد بحاول
بحاول أطلع من كل القيود
`إنتي كمان لازم تحاول وتخلقي عالم تعيش فيه
سيبك من الناس
عيشي علي قد ما تقدري

تحياتي

سيدوفسكي said...

سلام عليكم

مش هاتكلم كتير أو أعلق وأقول الحتة دي عجبتني لا لا الجزئية دي قصدك فيها .. الخ ..لا


كنت باقرا كلامك وابتسامة ما بيتراوح اتساعها على وشي .. ماعرفش انفعال الابتسامة كان ايه تحديدا لأنه ماكنش ثابت

بس كده .. وعدتك مش هاتكلم كتير

Masry said...

ملكة زي مابيقولوا كدة welcome in da clup....

بصي مش مستحيل . انتي عايزة تكوني انسانة و بس و كلنا كدة مش عايزين القيود اللي بتتحطلنا بالعافة دي و احنا مش واخدين بالنا. حاولي يا ملكة و خليكي واثقة انه ممكن . متسألينيش ايه ممكن يحصل يعني لاني معرف ايه اللي هيحصلي بعد ساعة بس انا واثق ان الدنيا بتتغير و ساعات تغيرات شديد و خوصوصا علي المستوي الشخصة..
خايكي دايما فاكرة ان هدفك انك تكوني انسانة بلا قيود و بتعملي اللي انتي عايزاه و اللي انتي عايشاه دي مجرد مرحلة مضطرة ليها اخدتي فيها وقت علشان تفهمي القيود و لسة شوية وقت علشان تكسريها ..
اسف علي الكلام الكتير علشان في ناس قالتلي انت بتحب تنصح و تنقل اللي جواك و بتخدك الجلالة من غير ما تعرف رأي اللي بتكلمة في كلامك ..
بس لو كسرتي القيود قبلي قوليلي

Masry said...

ملكة زي مابيقولوا كدة welcome in da clup....

بصي مش مستحيل . انتي عايزة تكوني انسانة و بس و كلنا كدة مش عايزين القيود اللي بتتحطلنا بالعافة دي و احنا مش واخدين بالنا. حاولي يا ملكة و خليكي واثقة انه ممكن . متسألينيش ايه ممكن يحصل يعني لاني معرف ايه اللي هيحصلي بعد ساعة بس انا واثق ان الدنيا بتتغير و ساعات تغيرات شديد و خوصوصا علي المستوي الشخصة..
خايكي دايما فاكرة ان هدفك انك تكوني انسانة بلا قيود و بتعملي اللي انتي عايزاه و اللي انتي عايشاه دي مجرد مرحلة مضطرة ليها اخدتي فيها وقت علشان تفهمي القيود و لسة شوية وقت علشان تكسريها ..
اسف علي الكلام الكتير علشان في ناس قالتلي انت بتحب تنصح و تنقل اللي جواك و بتخدك الجلالة من غير ما تعرف رأي اللي بتكلمة في كلامك ..
بس لو كسرتي القيود قبلي قوليلي كسرتيها ازاي علشان اعمل زيك

إبـراهيم ... said...

أنا عااااايزة أعيييييش .... .
.
.
.
حاجات حلووووة قووووي كثيير بنفضل (عايزين) نعملها ، بس برضووو ممكن يفضل فيه حاجات كثير حلوة بنعملها يا مَلَكَة ، حتى لو مش حاسبينها ، وبتبقى حلوة قوووي
...............
.
.
البوست بتاعك ـ على الرغم من طوله ـ ( عاوز أقول الموضوع ، وأبطل كلمة بوست دي ) فكرني بأغنية حد اسمه سماح ، بتقول أنا عايزة أعيش سني .. فرح ودموع

ما علينــا
أنا سعيد جدًا برضو إن الانتحانات لم تؤثر عليكي ـ فيما أرى ـ سـلبًا ...


خااااااالــص تحياتي ، وتمنياتي بالتوفيق

Anonymous said...

هاللو ملكة(وماحدش يقوللى قولى السلام عليكم..أو يحدد لى نوع السلام او الكلام..)تعرفى انى عمالة أعيط بهطل من ساعة ما قرأت احساسك وكلامك..جه كالعادة ع الجرح وفى وقت عصيب ودقيق جدا فى حياتى..
أوقات كتيرة باظبط نفسي بأفكر فى رد فعل الاخريين,وباخد بالى من تصرفاتى من مشيتى من ابتسامتى ..باكبت اللى عاوزة اقوله عشان أريح الاخر ..بس انا كدة استفدت ايه..
الحياة ليه ماشية والناس اللى فيها بعقد وحسابات دقيقة بلا لازمة..الكلاكيع انتشرت قوى..خاصة فى عالمى..
خدينى بجد معاك فى عالم مختلف..أنااول المنضمات..مين يزود؟؟!

JuSt_hUmAn said...

و ليه ما بتعمليش الحاجات دي؟
احنا اللي بنقيّد نفسنا عشان برستيجنا و نظرة المجتمع لنا و كل الهلس دا.
حاجات كتير قوي من اللي أنتي قلتيها تقدري تعمليها لو حررتي نفسك.
..
مادمت عاوز أعمل حاجة مش حرام..يبقى أعملها من غير ما أبص لأي شيء في الكون...
يكفي إنها عاجباني!

vetrinary said...

مش المهم احنا عايزيين ايه
المهم المفروض نعمل ايه
واحدمثلا عاوز انه ينام فى الشارع عريان
تفتكرى من وجهه نظرك ينفع
واحد عاوز يضحك على واحد تانى وقع قدامه
؟
؟
انتى بتحاولى انك تهربى من حجات انتى عايشاها دلوقتى
ومشاكل المرحله اللى انتى بتمرى بيها
فبتحنى للفترة اللى انتى شايفه انها فترة جميله
ومفهاش اى نوع من انواع الضغوط النفسيه
مع العلم ان الضغوط النفسيه بتكون اكبر فى المرحله دى
بس احنا لما بنكبر مبنحسهاش
يعنى لو قلت لطفل صغير انا عندى مشكله
مش عارف اتجوز البنت اللى بحبها
ممكن يقلى انا مشكلتى اكبر من مشكلتك
الاشباح اللى ساكنه معايا فى الاوضه
الواد اللى كل ما بيشوفنى يضربنى
المس اللى بتغلس عليا فى الواجب
كل مرحله وليها
مشاكلها
وظروفها
وضغوطهاالنفسيه

أُكتب بالرصاص said...

يا ستي اعمل كل حاجة
في حد حايشك
بس

خلي بالك

في حدود برضه


حبيت اجي
واسلم

واقول
طولتي الغيبة

عطشان said...

بوست جميل جدا يا ملكه و من احلى البوستات اللى شوفتها فى الفتره دى
البوست ده فعلا علشان يتقرى صح لازم تسمعى اغنيه مجنون بتاعت وسط البلد علشان تحسى بالكلام و تسيبى جو الكبت اللى واحد عايش فيه مع مجتمع متخلف و تطلعى لجو الحريه و تكبرى لكلام الناس
و على راى جورج :
كلام الناس لا بيقدم بس بيأخر

حدوته مصرية said...

طب ما تسيبك من الناس وتحاولى تعملى من الحاجات دى و انا عارف انه صعب بس حاولى

و اعملى اللى انتى عايزاه لارضاء نفسك
حاولى

تحياتى

محمد العدوي said...

والله يا ملكة احنا عملنا اللي علينا والباقي على ربنا .. تعيشي بقى او متعيشيش دا بإيده هو ..



بس والله كفاية الرغبة دي انك تعيشي .. ناس بتيجي وتموت وهي مبسوطة كدة ومش عارفة انه في حاجة مكن تتعاش ..

كل الود

Unknown said...

أحلى حاجة في الدنيا يا ملكة انك تعملي كل ده وقت ما تتمني تعمليه..
فكرتيني بأغنية لمنير دايما أفتكرها لما باعمل حاجة من الحاجات المجانيني دي: بيقول فيها:
أمشي في الفجر حافي
الرذاذ يرعش كتافي
قلبي يبقى نبع صافي
وجنني طول البعاد!

Purple Rose of Cairo said...

اول مرة ادخل مملكتك و ده حصل بالصدفة و انا باحث عن حركة شايفينكم
فعلا اتمتعت بكتاباتك و مزيكتك و خواطرك الصادقة

كلنا عاوزين نعيش زيك بالظبط ... ياللا ابتدى حملة او حركة اسمها عايزة اعيش و احنا معاكى

بسمه عبدالباسط said...

أنا فعلا نفسى أعمل كل حاجة من اللى أنتى قلتيها بس نعمل ايه فى الناس
تحياتى

kafrawy said...

انا نفسى اعرف برضة انتى عايزة اية
انا كل اللى عايزة
الستر من ربنا
و بعد كدة كل حاجة مش مهمة

Radwa said...

ملكه حبيبتى ميرسيه على كلامك يمكن انتى اكتر واحده هونتى عليه خاصة لما كتبتى بوستك الاخير كان فى منتهى الجمال والحيويه بس انا حاسه ان قولتى كل كلمه انا عايرزه اقولها كتبتينى بس يا ملكه انا مشكله حياتى كلها انى ضيعت عمرى كله من غير ما استمتع بيه نفسى ارجع تانى فترة ثانوى دى علشان اعمل فيها حاجات كتير علشان اكون صحاب واخرج معاهم واتفسح وارجع فتره اعدادى علشان افك شعرى مش المه علشان اخرج مع صحابى بعد المدرسه نجيب توك واكسسوارات ليه كنت بطلع من المدرسه اروح على طول ليه ما اروحش اشترى حاجه ساقعه وبسكوت مع زمايلى ليه كنت بروح علشان ايه علشان ازاكر زى الثانوى بره كنت من البيت للدرس ومن الدرس للبيت حياتى كلها منحصره فى المذاكره ليه ما عملتش صحاب ليه كنت فرحانه بحب البنات ليه بس وانه كلو صحابى ليه مش مش خدت واحده بس وقولت دى انتيمى وليه يوم ما عملت انتيم لما طلعت الكليه اتغيرت وعملت شله ولاد وبقت كل يوم تحب ولد وضاعت اخلاقها وانا سبتها كان العيب فيه يا ملكه ولا فى اخلاقى ولا فى مين بالضبط ليه ظيعت حياتى كلها فى المذاكره بدون تحقيق الحلم ليه لما دخلتش الكليه اللى انا عايزاها علشان انا ما كنتش بذاكر والله كنت بذاكر ولا علشان دا نصيب عارفه انا مش زعلانه انا بحب كليتى جدا جدا بس كان ليه تعب الاعصاب من الاول فى المذاكره والقرف و السهر ما كنت اعيش حياتى بدال كده كده مش هتفرق ومش هتجيب همها ليه دايما يا ملكه بحس انا ضميرى مصاحبنى خطوه بخطوه عايزه استغنى عنه شويه ليه لما كانت بنت يتوجهلى اهانه ليه مش كنت برده عليها زيها ليه كنت بسكت واعيط وخلاص علشان انا ضعيفه ولا علشان انا متربتش على انى ارد على حد ليه دايما عايزه اعمل كشف باسماء البنات اللى ضايقونى فى حياتى واجبهم دلوقتى احاسبهم ليه امشى مع بنت 3 سنين وتطلع بره تتبلى عليه وتقول انى قلت كلام ما قلتوش تكره الناس فيه وتخسرنى ناس عارفاهم من قبلها ليه دايما انا ماليش دعوة بحد ولا باخبار حد اللى تجوزت بقولها مبروك من قلبى وبفرحهلها فعلا واللى تزعل بقف جنبها وبزعل علشانها ليه انا لوفرحت البنات بيكون نفسهم يكسروا فرحتى باى حاجه وليه لما بزعل بيشمتوا فيه ليه يعنى كل دا ليه انا طيبه مع الناس ومحدش طيب معايا دا كلها مش عايزانى ازهق ليه البنات بتحبنى تهزر معايا وتقف معايا بين الدروس ولو اتصلوا بيه فى التليفون بيكونوا عايزين منى مصلحه وليه لما بتعب محدش بيرفع سماعة التليفون يسأل عليه ليه دايما بخاف من بكره ليه دايما انى مش عايزه اقرب من حد عايزه اعيش لوحدى ليه يا ملكه دا كله مش عايزانى اتعب بصى يا ملكه ما انكرش انى فى الجامعه صاحبت بنات كويسين اوى بس مش المدينه بتاعتى لا من اماكن تانيه يعنى برده كل واحد راح لحاله يعنى برده فراق كل حياتى بفارق الحاجه اللى بحبها دا كله مش عايزانى ازعل

Masry said...

ملكة بعد اذنك و ارجوكي متقوليش لا و متزعليش .. لنل عايز ارد علي sendrlla
و مش قادر امسك نفسي ..
بصي يا سيندرلا في مشكلتين
اولهم انك انسانة صح في مجتمع غلط زي ناس كتير و فوق انك صح فضلتي نقية بيضة من جوا .. مسيبتيش المجتمع يغيرك ولا يعلمك الفهلوة و الثلاث ورقات .. انتي صح و صح قوي و في يوم من الايام هتلاقي نتيجة كونك كدة .. بجد انا متاكد من كدة عن خبرة في الحياة .. دي بس ضريبة انك تكوني صح في مجتمع زبالة زي مجتمعنا .. خليكي دايما واثقة ان اللي انتي فيه دة قوة مش ضعف و ان اي الم بتحسي بيه هيقويكي مش هيضعفك .. بس بعد كدة حاولي تفهمي الناس اللي تعرفيهم اكتر يعني مش اي حد بيحاول يقرب هيبقي صاحبي .. خلي دايما خانة الصديق و الانتيم دي خانة واحدة او 2 بالكتير لان اللي هيوصل للخانة دي يستاهل انة ياخد كتير لانة مش هيكون صاحب اي حد لان انتي مش اي حد ...
باقي الناس اللي تعرفيهم واللي ممكن يطلق عليهم مجازا صحاب في فترة زمنية ما او صحاب عمل هتعامليهم كويس علشان انتي كويسة و متستنيش منهم حاجة . انتي بتتعاملي بأخلاقك و زوقك و باقي الناس مش زيك ..
ثانيا بقي موضوع المذاكرة و الكلية و الجو اللي كلنا بلا استثناء اتخمينا في هنفضل مخمومين فية .. اللي ذاكر ندم و اللي مذاكرش ندم لان احنا اصلا فاهمين غلط ..
بصي الدنيا دي او حياتك حتة واحدة مش اجزاء و لازم تتعاش فيها الحاجات مع بعض .. و الهدف الاول هو سعادتي و راحتي الشخصية .. انسي اللي حصل لانة حصل و خليكي دايما واثقة ان بكرة ممكن يكون زي ما انتي عايزة .. فكري دايما في سعادتك من غير ما تاذي حد .. اعرفي ان اي حاجة بتتعمل زي الدراسة او الشغل او اني اتعلم حاجة دي مجرد وسيلة لمساعدة نفسي علي اني اكمل حياتي . اني اكون سعيدة يعني مجرد وسيلة مش غاية .. فكري دايما في غايتك و اللي انتي عايزاه و متسيبيش الدنيا تضحك عليكي ...
ممكن تغيري حياتك بكلمة لو صحيتي الصبح و قلتي انا هعيش زي ما احب و علشان اكون سعيدة و ناجحة بغض النظر ايه حصل زمان .. بكرة لسة بتاعك
كلامك زعلني و لخبطني و فكرني باحداث كتير و حسسني اني كنت ضعيف علشان سبت الدنيا في وقت من الاوقات تأثر عليا و فكرني ازاي قررت اكون قوي ..
حياتك حتت صلصال بس ساعات بتكون ناشفة شوية فمتستسليملهاش
اسف علي الاطالة

Yasmine Adel Fouad said...

حقك

حقك تتمسكى بانك تبقى انسانه بجد

مش انسانه تمثيل

كونى نفسك و كفى

Anonymous said...

ياه شايلة دة كله فى قلبك وساكتة!
فضفضى فضفضى.

مَلَكة said...

معاذ

المشكلة إننا بندي للناس والمنظر العام أهمية أكتر من أهمية حريتنا الشخصية
رغم اننا لو مارسنا حرياتنا دي مش هنضايق ولا هنأذي حد

هو الأصل الناس ولا البني ادم؟؟

تحياتي على وصولك لنفس الحقايق دي:)

مَلَكة said...

الغزالي

أنا برضو بسألني نفس السؤال
وايه يعني اما يفهموا غلط طالما احنا مبنعملش حاجة غلط؟؟؟

أنا لسة باكل مصاصة على فكرة بس بقيت بتكسف أكلها وانا ماشية في الشارع أصل يابني احنا عندنا شعب ظريف لازم يديك كلمتين في جنابك مهما تعمل ان شالله لو كانت حتة مصاصة يتيمة!

أيووووة تفرق جدا لأني بنت
بس أنا مش متضايقة من كوني بنت لأن دي نعمة الحمد لله
الفكرة اني ساعات بحس ان المجتمع بيحاسبني لمجرد كوني بنت في بعض الحاجات اللي مش هتضر حد لو عملتها لكنها مرفوضة او على الاقل مستنكرة من الناس
المشكلة في ان الحدود ساعات بتتفرض عليك زي ما قلتلك لمجرد نوعك اللي اتخلقت بيه
ساعات بيفرضوا عليا حدود علشان خايفين عليا ودي مفيهاش اي مشكلة وساعات بتكون الحدود مووجودة علشان ده العادي والمتعارف عليه وده بقى اللي بيحرق الدم:(

انت بتقول فيها؟؟
أنا مش عايزة أعيش في مصر لأنها ببساطة دولة بوليسية من الدرجة الأولى بالاضافة إلى عدة أسباب أخرى ما علينا

بس انا مقولتش عايزة احب الناس اللي زيي أنا بس عايزة اللي بحبهم يكونوا مجانين او بمعنى أصح ميكونوش من بتوع"لا عيب وحرام ميصحش الناس هيقولوا ايه" الخ الخ
انما مش عايزاهم يكونوا زيي بل بالعكس عايزاهم يكونوا غيري تماما لكن يكون فيه اهتمامات مشتركة على الاقل

مش متفقة معاك
الفلوس حقيرة وبتقتل حاجات كتير حلوة مش هي اللي بتخلقها
احنا اللي بنخلق الحاجات الحلوة الخاصة بينا

تصدق بالله؟
التعليق بتاعك ده جاااامد جدا ولو غبت عن المدونة تاني هيحصل ما لا يحمد عقباه لك:D

نورتني يافندم كثيراً

مَلَكة said...

كاميليا

بالظبط كدة
نفسي الناس كلها تصرخ وتتمسك بانسانياتها
شكل الدنيا هيتغير كتير ساعتها

تحياتي يا كاميليا نورتيني


the alien

جميل اوي لما نكسر حدود الخنقة ونعيش حياتنا بجد
الأصل في الحرية مش في السجون
بجد ياريت كلنا نعيشها على قد ما نقدر لأنها قصيرة أوي

تحياتي كتيير

مَلَكة said...

الرفيق مهاب سيدوفسكي

ياسلام؟
ما انت عارف ان انا رغاية وتقوم تقولي مش هتتكلم كتير؟؟
من امتى يارفيق بقيت هادي كدة؟
الدنيا غيرتك جامد جامد يعني:(

أموت واعرف الابتسامة دي معناها ايه؟؟
(وش متشكك)

بس عموما
يو آر ويلكم أووول ذا تايم:)

مَلَكة said...

آخر

الله يكرمك هو انت صاحب القبيلة ولا ايه؟:)

أنا موافقاك جدا ان محدش يعرف ايه اللي هيحصل بعدها بساعة ولو فضلنا خايفين من اللي جاي عمرنا ما هنعيش دوقتي
وصدقني كل فترة الواحد بيحتاج يفكر نفسه انه لسة بني ادم ولسة عايش وان لسة من حقه يتكلم

بالعكس والله دي مش نصايح ده تشجيع على اني اخد موقف من الحدود والقيود اللي موجودة دي حتى وان بدا للناس انها مش موجودة لكنها بتبقى موجودة جوانا احنا

لو كسرتها هتعرف لوحدك من غير ما اقولك
بس لحد وقتها تعالى نتكلم ونبطل خوف يمكن ده يحل الاشكالية بشكل ما

كل التحية وسعيدة جدا بمرورك ده

مَلَكة said...

إبراهيم

مش عارفة يا ابراهيم يمكن عشان العشب دايما اكثر اخضرارا على الجانب الآخر فمش حاسة اني بعمل حاجات حلوة دوقتي ودايما مستنية اعمل اللي معملتوش او نفسي اعمله ومش عارفة

سلملي على سماح وقولها مش لوحدك

والامتحانات لم تؤثر لا سلبا ولا ايجابا لأنها افقدتني القدرة على الاحساس أصلا

نورت يافندم وخلينا نشوفك

مَلَكة said...

وئــام

فرحانة جدا جدا بزيارتك هنا لأنها غالية أوي عندي والله ربنا يديمها على المدونة بقى:)

هاللو يا حبيبتي وماله قولي كل اللي في نفسك محدش هيقولك لأ

مش عارفة أتأفلك ازاي يا وئام اني سببتلك كل الألم ده لكن المشكلة لسة موجودة
لسة بناخد بالنا من التانين على حسابنا احيانا ولسة بنكبت مشاعرنا علشان منبوظش الدنيا
تفتكري لما سكتنا صلحناها يعني؟؟

وبالنسبة للعالم التاني فمتقلقيش هنلاقي منضمات ومنضمين كتييير
لأن كلنا مكبوتين تقريباً

ربنا يسعدك يا وئام ويقدملك اللي فيه الخير دايما

مَلَكة said...

عمرو

أولاً أهلا بيك لأن دي اعتقد اول زيارة ليك هنا

ثانيا منطقك صح جدا وانا متفقة تماما معاك فيه لكن الحاجات البسيطة دي اللي ممكن اعملها وراها كتير اكبر منها مقدرش اعمله
ومش عارفة صحيح ايه اللي بيخلينا منعملش اللي في نفسنا؟
يمكن تعود على الكبت والمشي حسب ما الارشادات المجتمعية بتقول
يمكن

نورتني جدا وتحياتي دايما ليك

مَلَكة said...

vetrinary

حمد الله على السلامة الأول:)

احنا عايشين حياتنا حسب اللي المفروض مننا نعمله
المفروض نسمع الكلام
والمفروض منقعش في الشارع
المفروض ما نجريش
والمفروض نسكت منتكلمش
كل ده خنقة؟؟
وليه منعملش اللي احنا عاوزينه طالما مفيهوش ضرر؟
مبقولش ان الناس تمشي عريانة لانه ده فيه ضرر طبعا
انا بتكلم على الحياة اللي نفسنا نعيشها بحرية من غير ما نتقيد ب"مفروض" ولا " لازم"ولا حاجات من دي

صدقني أنا عمري ما هفكر أرجع لمرحلة الطفولة تاني لأني أصلا معشتهاش وبالتالي مش عايزة ارجع لها
ولا بحاول اهرب من واقع دوقتي عشان مش هقدر اصلا اهرب منه
ثم ان واقعي دلوقتي فيه حاجات حلوة كتير صعب اوي اتخلى عنها بسهولة كدة
انا عايزة بس الحاجات اللي بتخنقني دوقتي تختفي أو على الاقل الاقي قصادها حاجات تريحني اما اعملها
متفقة معاك ان كل مرحلة ليها بلاويها
وعلى هذا الاساس
انا عايزة اتحرر من بلاوي دوقتي
بس كدة

تحياتي ودمت بخير

مَلَكة said...

أكتب بالرصاص

والله انت اللي طولتها على فكرة:)

مانا عايشاها بالفعل
بس اكتر حاجة بتضايقني وانا عايشاها كلمة"بس"دي
عشان مهما عملت برضو غصب عني لازم متخطاش حدود العادي والمفروض

تحياتي ليك دايما ومش هغيب حاضر

مَلَكة said...

عطشان

لا والله؟قول تاني كدة ان الموضوع عجبك!!
أصل نادراً اما حاجة بتعجبك هنا وعشان كدة لازم افرق شرباااااااااااات على كل زائري المدونة:D

اغنية مجنون دي ملهاش حل بجد
بس شفت علشان بيطلب حاجات في وجهة نظره عادية اتقال عليه مجنون
امال لو مش عادي كانوا قالوا عليه ايه؟؟

وبغض النظر عن جورج وسوف
نورتني بجد:)

مَلَكة said...

محمد ياسر

بحاول يا محمد والله لكن الواحد ساعات بيحس ان صعب تغير اللي انت عايشه والاسهل تعيشه وخلاص

بس لسة بحاول

دمت بكل خير

مَلَكة said...

محمد العدوي

الموضوع خرج من ايدينا فعلا
وبقى في رجليينا
بس احنا معلقين املنا على ربنا:)

بالظبط
كفاية الاحساس باللي حاصل
وبأننا عاوزين نغيره
المهم هنغيره بجد ولا مش هنقدر بقى؟؟

نورتني وتحياتي كتييير ليك

مَلَكة said...

دافنشي

عارف جملتك فكرتني بنقاش انا وصاحباتي كان عن سيكولوجية الحضن(اكيد ياسمين الحرة كتبت عنها)المهم كنا بنقول ان اهم حاجة وقت ما الواحد يحتاج يتحضن يلاقي اللي يديهوله لأن لو الوقت فات اي حاجة بعدها بتبقى ملهاش معنى

أغنية منير دي تحفة على فكرة
اسمها ايه بقى؟

مش فقير خالص على فكرة الفنان ده:)
تحياتي ليك

مَلَكة said...

Purple Rose

رب صدفة خير إن شاء الله:)

والله جوة كل واحد فينا حركة اسمها عايز اعيش لكن مفيش جرأة اننا نخليها حركة موثقة بشعارات بقى وكدة ربما ييجي يوم والناس تعيش حياتها بجد من غير حركات او منظمات!

شاكرة جدا لاطرائك وبجد أتمنى زيارتك دي متكونش الأخيرة بإذن الله:)

مَلَكة said...

bosbos

تعالي نتخيل انهم مش موجودين
هوا كدة لا بيشوفنا ولا بنشوفه
حل حلو صح؟:)

تحياتي ومشكرة كتير ع الزيارة الجميلة دي

مَلَكة said...

kafrawy

ياسلام؟
أحسن حاجة ان الواحد ياخد الستر من ربنا
بس صدقني الستر لوحده مش كفاية حتى لو كان موجود
وغالبا الواحد لما بيبقى عايز حاجة بجد مبيعرفش ليه
بس انا زي ما قلت
عايزة أعيش
وبس كدة!

نورتني

مَلَكة said...

سندريلا

تصدقي بالله؟
أول ما قريت ردك وقبل رد (آخر)عليكي كنت مش عارفة أقولك إيه
يمكن لأن أنا تقريباً نفس الحالة
لكن الرد الرائع لآخر كان كافي وزيادة وقريته كأنه بيحل مشكلتك ومشكلتي معاكي
لكن بما إن حاجات كتير فاتتك زمان وانتي مش واخدة بالك
تعالي نحاول بعد كدة نعمل اللي في نفسنا ونحاول منضيعش حياتنا كلها في حتة واحدة ونخنقها في تفاصيل مملة في دراسة وشغل وبس

ربنا يسعدك يا سندريلا دايما
وبجد والله زيارتك دايماً بتسعدني:)

بالمرة بقى شكر خاص جداً جداً لآخر على رده عليكي ورده من غير ما يقصد عليا أنا كمان
تسلم ايديك يافندم وربنا يخليك لشعب المقهورين اللي عايزين يعيشوا:)

مَلَكة said...

ياسمين الحرة

ياستي ومين قال لك ان كلمة "حق" دي أصلا موجودة ومعترف بيها؟

وبحاول أكون نفسي كتير بس ساعات "نفسي" مبتكونش مقتنعة بكونها هي!

نورتيني ودمتِ بكل خير

مَلَكة said...

شبرا

حفلة وجيه كانت حلوة؟ :D

لا انا لو فضفضت مش هخلص النهاردة اساسا ده بس حتة صغنينة من اللي شايلاه في قلبي وساكتة

مشكريين ع الزيارة والرد وكدة يعني:)

ناردين said...

انك تكوني انتي..
دا المنطقي.. انك تعيشي زي ماانتي عايزة .. دا الصح وهقولها برضه .. حقك..
وحقك هو حقك ، سواء اعترف بيه الاخرون ا و كالعادة انكروه المهم انك تقتنعي وتعيشيه .. وطالما عايزة تعيشي .. عيشي..
وانا معاكي ف موضوع الايس كريم ابقي اعزميني ف يوم وياريت يكون ف الشتا، انا بعشق الايس كريم ف الشتا وبيسيح مني كبيرة وصغيرة مش بيفرق ..
مبسوطة اني شفت المدونة بتاعتك بجد مميزة..
شكراً ليكي

مَلَكة said...

ناردين

صعب أوي أطالب بحق في بلد مبيعترفش أساسا بأبسط حقوق معيشة المواطن
بس بنحاول
على فكرة انا بعشق ايس كريم الشتا برضو
شكلنا هنعمل رابطة محبي الايس كريم اللي بيسيح واللي مبيكونش معاهم مناديل:)

أنا كمان سعيدة جدا بزيارتك المميزة للمدونة وتحياتي كتيير ليكي

Anonymous said...

jaleo

انا كمان عايزة اعييييييييييييييييييييش والناس تبعد عني بقي عايزة لما احس باالاه اصرخ بعلو حسي واقول الااااااااااااه عالية ومحدش يبص ويستغرب او يسال لمجرد انه فضولي مش عايز يخفف عني الااه عايزة لما افرح اجري واتنطط في الشارع وبرضه محدش يبص ويفسر علي مزاجه عايزة لما احب اقول اني بحب ومخافش عشان مش بعمل حاجة غلط عايزة اعيش مش عارفه اقولك ايه انتي خلتيني عايزه اضرب اي حد يختلف معايا في الراي لمجرد انه مش عايز اصغر منه هيه تبقي صح وهوه غلط عايزة اما اقول اخرج اخرج من غير خوف وكلام كتير ورغي مالوش فايدة

Anonymous said...

عارفة حسيت بأيه بعد ما قرأت كلامك حسيت أني عايرة اخرج و الهوا يلمس كل حتة فية و بالذات شعري و رقبتي اللي أنا حرماهم من الهوا بالطرحة اللي أنا لابسها بمزاجي بس مش عارفة ليه لأني مش شايفة إنها لازم لكن بساير الناس اللي أنا عايشة معاهم علشان محدش يبصلي و طول ما أحنا بنحس بكدة حنفضل عبيد لأن الحر هو اللي دايما الناس بتنتقده بس مش بيخاف منهم أو يمكن بيخاف بس عامل شجاع مش عارفة لأن أنا من اللي بيخافوا دي أول مرة أكتب فبها تعليق