Monday, October 27, 2008

اللا مختار من كتاب الحياة 3

-1-

أول مرة الجهاز يتمسح من عليه كتاباتي الأولى

قعدت اكتر من ساعتين

من الصدمة

مش عارفة أتكلم

ماكنتش متخيلة

إني هوصل لمرحلة

في يوم من الأيام

همسح فيها اللي كتبته بإيدي

واقطع ورق كتير مليته كلمات وشخبطة

كان لازم اعرف من الأول

إن مفيش حاجة في الدنيا ممكن تكون غالية

للدرجة اللي إحنا متصوراها!

-2-

لما كانوا في المدرسة بيقولوا لنا

"طلعوا ورقة واكتبوا فيها أسامي الحاضرين"

كان أول واحد دايما يعمل مربع فيه رقم1

ويكتب جنبه اسمه ويمررها للي بعده

وعلى ما الورقة توصلني

كنت ألاقي الورقة اتملت مربعات وأسامي

وتروح الورقة للمدرس فيها 49 مربع

ودايرة واحدة !

-3-

حاجة في منتهى الغتاتة

إني أكون بتخانق

وانا عارفة وكل اللي حواليا عارفين

إني على حق

وإني بطالب بحاجة مشروعة

وفي عز زعيقي وانفعالي

الاقي صوتي خانني وعيطت!

-4-

لما كنت عايزة أخرج في مظاهرة

أهلي قالولي

" لما تخلصي دراسة

ابقي اعملي اللي انتي عايزاه"

ولما خلصت دراسة

رجعوا قالولي

"لما تبقي في بيت راجل

ابقي اعملي اللي انتي عايزاه"

ولما جه الراجل ...

كلهم أكدوا لي

إني عمري ما هعمل اللي انا عايزاه !

- 5-

الراجل اللي بيزعق ويشتم ويضرب ويطلق

عشان كان متنرفز

واللي بيتحرش بأي واحدة

عشان كان مستثار باللي هي لابساه

واللي بيقول إن المرأة عورة

وهو مدمن أفلام بورنو

واللي بيعمل اللي هو عايزه قبل الجواز

بس لو جت الست قالتله انها (حبت) قبله واحد

ويقولها انتي (......) ويسيبها

بصراحة

يستحسن يعمل عملية ويتحول

عشان المشرحة مش ناقصة قتلى!

-6-

كل الناس

بتحب اسكندرية في الشتا

عشان بيهربوا لها

بس لو كان كل واحد عنده اسكندرية جواه

كان ممكن نحب شهر أغسطس

في الصعيد!

-7-

السيد الرئيس

السيد الوزير

السيد المحافظ

السيد رئيس جهاز التعبئة والاحصاء

والله لو كنت أعرف إن وجودي كرقم

هيستهلك ورق الحكومة زيادة

بمعدل 0.1 كل كام سنة

كنت منعت جوازة أمي من أبويا دي بأي شكل!

-8-

بيقولوا اللي يشرب من كباية مكسورة

ينكسر قلبه

أنا بقى هموت وأعرف

فين الحنفية اللي بتنقط من 20 سنة دي؟!

-9-

الراجل أبو شعر طويل

اللي عدى علينا وإحنا بنصور التماثيل

في الأوبرا

وقف وقال لنا هو مش حرام الكلام ده عندكم؟!

مع إنه كان مصري ومسلم مش أجنبي

ومع إننا كنا (بس) لابسين حجاب

رديت عليه بمنتهى البساطة وقولتله

إن الحجاب مش معناه إن الفن حرام

بس كنت غلطانة ساعتها

كان لازم أقول له

لكم دينكم ولي دين!

-10-

لما هموت هسيب لبنتي أو لابني

تركة صغيرة تقيلة

عبارة عن ورقة

هيلاقوا فيها كلمتين بس

" أنـــا آســـفــة "!

- اللامختار من كتاب الحياة 2

- اللامختار من كتاب الحياة 1

13 comments:

Anonymous said...

انااول تعليق
اظن المرة دي ماكنتيش متوقعة
: )))

بصي بقى
موضوع يحب اغسطس في الصعيد
دى مبالغة شوية
بس عادى اصلك ماشفتيناش واحنا بنهرب للقاهرة في الصيف
مش لاسكندرية

موضوع التماثيل حرام
يووووووووووووه
دة المزيكا والشعر واحيانا الضحك
ماتتصدميش كدة

موضوع الراجل اللي مش حيخليكي تعملي اللي انتى عايزاه
يبقى بيحلم

صباح الفل

إبـراهيم ... said...

يمكن كنت هبقى مبسوط لو عديت هنا ف وقت تاني، بس الظـاهر إن فيه حاجات كثييير فعلاً الحياة بتثبت لنا إنها مش زي ما إحنـا متصورينها يا ملكة،،،
وبعدين ما أقدرش أنكر إعجابي بالكتـابة دي فعلاً لأنها جاية من جوَّه قوي ، وعجبتني فكرة (إسكندرية جواه) دي قوي .
.
و إحنـــا آآسـفين قوووي ، دي هنقولها لناس كثييير ، مش لأولادنـا بــس !!

بس تفتكري كفاية ؟؟؟

إبن مصر said...

السلام عليكم

اتكلمتى فى حاجات كتير واهمها وأكتبها ولا تعليق عليها
هى (لما هموت هسيب لبنتي أو لابني تركة صغيرة تقيلة عبارة عن ورقة هيلاقوا فيها كلمتين بس " أنـــا آســـفــة
"!

دمتى متألقه

ana ga3an said...

:)
خواطر جميلة وطريقة عرضها ممتعة جدا
تحياتي

admelmasry said...

تحفة
راااااائع جدا
.
.
.
تاني وتالت ورابع
.
استغلي كل شيء قصادك لاخراج المبدع اللي جواكي
.
.
المبدع الحق
هو من يري من زاوية مختلفة
غالبا ما تكون اعمق
.
.
تحياتي والسلام

Anonymous said...

هاي ملكة وحشاني لسه بحس في كتاباتك انها بتمس وتحرك حاجة جوايا وشايفاكي بتقولي كلام كتير بقوله بيني وبين نفسي اصل انا بعيد عنك بقيت مش بكلم حد الا نفسي ربنا يوفقك في كتاباتك ونفرح فيكي برضه بالمرة jaleo

حدوته مصرية said...

انا كمان عندي لا مختارات كده بعضها زيك و فى غيرها

كل واحد عليه كمية من المفروضات اللى باى حال مش هنعرف نهرب منها كلها

بوست جميل اوي

أحمد جمال said...

49 مربع .. ودايرة واحدة

جميلة اوي

عالم صوفي said...

ايه يا بنوته الرقه والجمال ده
وجعتي قلبي

Anonymous said...

مصطفى

صباح الخير
:)منور


ابراهيم

مش كفاية طبعا،بس هحاول اعمل اللي اقدر عليه عشان لما اضطر اقولها ابقى ع الاقل حاولت
منور :)

ابن مصر

شكرا لزيارتك ومنور المدونة :)


انا جعان

زيارتك اجمل
شكرا جزيلا لك ومنور :)


آدم

بنحاول، على الاقل اللي فاضل هو اختلاف الرؤى والمعالجات مش كدة؟
منور يا احمد وشكرا لردك :)


هبة

فينك؟ يارب تكوني بخير
وبعدين ليه مش بتكلمي الا نفسك؟ حوالينا ناس ممكن يفهمونا لو كلمناهم بس انتي جربي
منورة :)


محمد

طيب ليه ماشفناش مختارات محمد لحد دلوقتي؟ مستنينك تنشرها على بلوجك
منور وكانت فرصة سعيدة اما شفتكم امبارح :)


أحمد جمال

منكم نستفيد يافندم
منور :)


عالم صوفي

سلامة قلبك
شكرا جزيلا لردك :)

Rana Omar said...

ملكة إنتي حلوة كده ليه؟

Dr.Maher Mohamed DPT said...

I read your writing by mistake (unintentionally), I got to conclude that your are confused between westernizations and Islam believes, It seems you do not have a solid base of principles or teaches to shape your thinking and taking. Please think deeply and do not be a judge. GOOD LUCK

غجرية said...

i so loved it
so creative