Sunday, October 05, 2008

تساؤلات منطقية ذاتية

-1-

هما ليه موظفين الحكومة في مصر ما بيشتغلوش إلا لما يتشتموا أو حد يعمل لهم فضيحة ويزعق فيهم؟!

-2-

هو مين اللي حكم بأن اللي بيحصل لنا كمصريين دلوقتي نتيجة لأننا كلنا بقينا كفرة؟

طيب ما اللي في أمريكا وسويسرا مش كلهم عارفين ربنا وفيه منهم مش بيؤمنوا بوجوده أساساً

اشمعنى دول ربنا مش غضبان عليهم ومش باعت لهم حكومة زي بتاعتنا؟!

-3-

ليه الناس في محلات الأكل بيبصوا لغيرهم طول ماهم قاعدين؟!

-4-

هي ليه الست المصرية اللي جوزها بيموت لازم تفضل لابسة أسود لحد ما هي تموت ولو قلعته ولبست ملون حتى لو بعد 3 سنين مش 3 ايام الناس بتقول عليها ست قليلة الأصل؟!

-5-

هو ليه كل لما أسأل حد من الكبار عن مدى حرمانية الرشوة دلوقتي يردوا بأن "الضرورات تبيح المحظورات"؟!

-6-

هو ليه كل لما أركب عربية السيدات في المترو بلاقي كل اللي فيها بيتفحصوني من راسي لرجليا ؟!

وليه بيتفحصوا كل واحدة طالعة ونازلة مع إنهم عارفين إن غيرهم قبلهم كانوا بيتفرجوا عليهم برضو؟!

-7-

ليه فيه موالد في مصر أساساً مع إنها مش حاجة في الدين؟!

-8-

ليه معظم الرجالة العرب ما بيرضوش يتجوزوا واحدة مرتبها أعلى من مرتبهم؟!

-9-

هو امتى بالتحديد ظهر مصطلح "عارف ربنا"؟

ويعني إيه عارف ربنا؟

وهل لو واحد "عارف ربنا" لكن مابيسمعش كلامه تبقى دي معرفة قلتها أحسن ولا إيه؟!

-10-

ليه الناس بتفترض إن أي مكان هو ملكيتهم الخاصة ممكن يلزقوا عليه أي استيكرز زي ماهم عايزين؟

وليه بيكفروا اللي بيقول لهم ماتبوظوش المنظر العام بمبرر إن استيكراتهم عن الحجاب والنار والزنا ودي منفعة للمسلمين؟!

-11-

هما ليه الناس حتى لو مبسوطين لازم لو ماشيين لوحدهم يبقوا مكشرين؟!

-12-

ليه عسكري المرور في أي حتة لما بسأله بيقول لي "ماعرفش"؟!

-13-

هو ليه فاروق حسني لسة وزير لحد دلوقتي؟!

-14-

هو ليه بعض الرجالة عندهم في القاموس كلمة ست معناها شهوة و استباحة؟

-15-

ليه الرجالة لما بيشوفوا بنت لبسها مش على مزاجهم مابيرضوش يقوموا لها في الأتوبيس؟

وعموما ليه لما بقوا بيشوفوا ستات حتى لو كبار في السن بيفضلوا قاعدين؟

-16-

ليه الرجالة المصريين عموماً شايفين إن الست مهما كانت عظيمة فهي عمرها ماهتبقى أعظم منهم لسبب بسيط: إنهم رجالة؟!

-17-

ليه فيه ناس بتتجوز وتخلف عيال بالدستة مع إنهم مش لاقيين ياكلوا؟!

-18-

أنهي قانون صدر وقال إن "الراجل ما بيعيطش"؟

وليه بيقولوا "الراجل ما يتكسفش"؟

-19-

هي ليه المشاكل جزء من الحياة؟

ليه لازم نتقبلها دايماً؟

ليه لازم نرضى بالجزء الاستثنائي من الحياة لحد ما يبقى هو الحياة نفسها؟!

-20-

احنا ليه كمصريين ساكتين على كل ده وليه ساكتين كل ده؟!

-21-

ليه الاسدال أو النقاب لازم يبقى أسود؟

يعني لو الألوان بتفتن وفيها شر مش كان ربنا هيرحمنا منها من الأول؟!

-22-

ليه بعض الناس بيستقووا على الست لما بتبقى لوحدها؟!

-23-

ليه الناس بتحب جداً تتفرج وتسمع الخناقات؟!

-24-

هو احنا ليه كلنا مصيرنا لازم نربطه دايماً بشخص واحد؟

إما الريس أو وزير ما أو مديرنا في الشغل أو حتى زوج أو زوجة؟!

-25-

أنا ليه بطلت كتابة حاجات ترضيني ؟!

23 comments:

مصطفى السيد سمير said...

أسئلة كلها مالهاش إجابة
إلا سؤال واحد
المصريين ساكتين ليه
الاجابة :
لية ؟؟؟؟؟؟؟؟؟؟؟؟؟؟؟؟

M.R said...

1. لأنهم مش بيحترموا الحكومة. و لا الناس، هما بس بيخافو، و علشان عبد الناصر – اللي علمهم الكرامة – مات. ( و طبعا مش كلهم كدا.
2. أي حد عاوز يحكم ممكن يحكم بسهولة، طالما ان في حد هايسمعه، و هايقف يتساءل عن حكمه. و بعدين ما فيش حد ملحد بجد، تماما يعني، و بعدين ربنا ما اداناش حكومة عاملة كدا، احنا استحقيناها بأخلاقنا و صفاتنا و كيانا، زي ما النبي استحق الر سالة لأ[نه عظيم.
3. لأنهم مكسوفين من نفسهم.
4. مش دايما دا بيحصل، و تقدري تقؤلي علشان هيا ما بتحبوش بجد او انها بتحبه فعلا، و علشان الناس بتبص على بعض طول الوقت مش بس ف محلات الاكل.
5. علشان القنوات ( الاسلامية) و عدد الشيوخ المفتين بقى ..... يفرح.
6. بصراحة عمري ما ركبت عربية السيدات، بس اعتقد انه من باب اشمعنى انا.
7. ماحدش ادعى ان الموالد ف الدين، الموالد ف مصر، ف المصريين، و فيها أي حاجة تتخيليها ما عدا الدين ( طبعا باستثناء سب الدين).
8. لانهم عندهم نفس الشيخ اللي فسر لهم ايه ( الرجال قوامون على النساء)، و لان الستات – معظمهم – ما بيحبوش يتجوزوا رجالة مرتباتهم اقل.
9. اعتقد من اول ما بقى في حد يعرف، و المعنى في بطن المخرج المدرس و الأب و كدا يعني، و لو يعرف و ما بيسمعش يبقى زي ابليس.
10. علشان ما فيش حد منعهم، و علشان مبدا الاشتراكية ( المصرية الخاصة جدا )المنتشر من ايام المرحوم. بيكفروا لأن دا السلاح الاكثر شعبية، و الاكثر فاعلية و على فكرة هو مش محتاج مبرر اكتر من (ذقن) محناة و جلابية قصيرة. و هايصدقوه.
11. علشان ما حدش مبسوط بالقدر تالكافي، و علشن كذابين، و علشان الهوا مش مساعد، و المية مش مساعدة و الصحة مش مساعدةو ..... الخ
12. علشان دي نفس الاجابة الي نجحته ف الامتحان. و على فكرة كل الدنيا عارفة ان المفروض ما تسألش عسكري المرور المصري ابدا.
13. علشان نحافظ على صورة مصر المتسامحة - على كل المستويات - من اول حقوق الشواذ لحد حقؤق الوزرا مرورا بيوم اليتم.
14. علشان هيا في (بعض الاحيان) تحمل هذه المعاني، و الرجالة دول هما مجموع التقاطع (س) بين المجموعتين(رجال) و (معاني). عادي يعني.
15. ممكن علشان لما بيتفرج و هيا واقفة بيكون المنظر أحلى. و علشان دي أخلاق اللزحمة الي احنا استحقينا بسببها حكومة ما بتقؤمش لاي حد و لا حتى لو ميت. و من وجهة نظر خاصة لانه رجل بيفهم و متابع و مؤيد لحركة المساواة الحميمة الجميلة الممتعة السخيفة.
16. لو كان سؤالك بخصوص (المصريين) ف لا في على الاقل .... جنسيات كتير عندها نفس الفكرة، اما لو عن (السبب او المبرر) فلأنهم ما عدوش عل ايه (و للرجال عليهن درجة).
17. علشان يحابوا اسرائيل، او عندا ف ماما كريمة و اللي وراها.
18. دا مش قانون دي اشاعة او على احسن التقديرات مشروع قانون، و طبعا ولع خلاص. و لما يقروه هايتحايلوا عليه. برضه عادي يعني.
19. لأنها حياة، و الحياة حياه فأقيموا أو فارقوا
و لأنها اقرارا لـ(لقد خلقنا الانسان في كبد)، و لأنها من غيرها هاتبقى قصيرة زيادة عن اللزوم، و علشان نعرف مين انسان و مين مجرد حيوان.
و مش لازم و لا حاجة، دا احنا بنقؤل كدا علشان نتهرب من الاختيار و مسؤليته. علشان احنا حيوانات بس.
20. علشان ورانا حاجات تانية، جواز و خلفة و تعليم و كدا، و علشن احنا امتداد للراجل المصري الأول العظيم اللي عبد بشري زيه بالظبط، و طبعا علشان الراجل اللي بيعلم الناس الكرامة مات.
21. علشان الراجل حب ما يزعلش حد من البنات اللي عندهم افكار غريبة عن الالوان و عمله اسود من منطلق ان الاسود كل الالوان، و علشان المفتيين الكتييير الجدد مش عارفين ان الاسود لون مكروه ف الدين. و بعدين السبب الرأيسي ان الاسود لون فاتن جدا( دا طبعا من وجهة نظري المريضة).
22. علشان لوحدها، زي ما الراجل بيبقى لوحده زي ما الدولة بتبقى لوحدها زي ما أي حد بيضطر يخرج من المحكمة مذلول لانه لوحده.... الخ، و لأننا ارتضينا ان الحلول تكون فردية و كل واحد و شطارته.
23. علشان لسه معاد المسلسل ماجاش، او مافيش ماتش، و علشان مش فارق معاهم دستة العيال اللي خلفوهم و علشان كارهين مما كريمة بتاعة الحبوب، و علشان المترو حر و الأتوبيس زحمة، و علشان كلنا بنحلم و احنا صاحيين.
24. علشان ما حدش خالص قرأ (وكل آتيه يوم القيامة فردا)
25. علشان عبيطة، بتبصي ع الناس ف المترو و الناس ف الخناقات و عندك مشكلة مع ألوان الإسدال و الست الي بتلبس اسود و مركزة مع موظفين الحكومة و قررتي تقفي عند جلدة الحنفية مع إن النشع ابعد كتييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييير

تحياتي

محمد العدوي said...

هو أنا حسدتك على طول بال ( ليئاتك) جمع ليه

ألاقي الأخ أعلاه أطول منك بالا ومجواب عليها

يا صبر أيوب .

الظاهر أنا اللي نفسي قصير ..



فين دا من ( ليهات أصالة الله يعمر بيتها ) ليه القمر غالي علينا . وليه لما اشوف في السما نجوم كتير

ولا ( ليهات ) دكاترتنا ايام التلمذة الله يرحمها .. متقولش حاجة الا ما يسألك ليه ..

حكمة ربنا .. هنعترض يعني


كل سنة وانت طيبة على اي حال

والعيد الجاي كدة يا اما يكونوا قلوا شوية يا تكوني لقيتي لهم اسباب مقنعة ...

حاتم عرفه said...

هحاول معاكي كدة.. عشان الأسئلة عحبتني الحقيقة..

1) وانا اشتغل ليه.. مانا كدة كدة هما المليمين اللى باخدهم فى الآخر سواء اشتغلت أو لأ.. وبعدين هو محدش فى المصلحة غيري ولا إيه.؟؟ أنا فاضيلكم؟؟

2) يا عم العيب لو جه من أهل العيب مايبقاش عيب.. هما كدة كدة ملاعين مساخيط رايحين جهنم.. انما احنا صعبان علينا بلاد وناس زي الورد زينا يبقوا
وحشين كدة..... بجد بقى.. ربنا بيقيم دولة العدل الآخذة بالأسباب ولو كانت كافرة

3) أمال يعني هابص فين؟.. أما اشوف اللى بياكل هناك ده.. حد ياكل كدة؟؟... يااااى معندوش اتيكيت خالص..

4) الست المصرية ست وفية ومخلصة.. ماعدتش عليكي ايزيس وأوزوريس فى ابتدائي ولا إيه ؟ .. لو إيزيس هى اللى اتقتلت و أوزوريس هو اللى عمل
رشة الجدعنة دول.. كان الموضوع اختلف..

5) و لا يكلف الله نفسا إلا وسعها.. وحبة عليك وحبة علينا.. ويا عم طريها الناس لبعضيها.. وبعدين ده تقدير لمجهودات سيادتك مين قال رشوة.. حد الله
بينا وبين الحرام..

6) والله دى بتاعتك بقى.. أيام الإنحراف كان ممكن أتملى فى وشها لو حلوة
قوى بس مابقاش سقيل يعني.. أنما الحق يتقال.. الأولى لك والثانية عليك..

7) في الكلور شعبي .. حد يكره الفيلكلور؟؟.. وصلى صلى..

8) لا ماتقلقيش.. دلوقتى يوافقوا جدا.. حد لاقي ياكل يا عم.. بس هى حتة الرجال قوامون بس لازم نفهمها كويس.. ماينفعش هى اللى تصرف على البيت.. المفروض أن هو اللى يصرف عليه.. لكن بما أن لا هو ولا هي هايعرفوا يصرفوا على اى حاجة دلوقتى.. يبقى انتى كيس.. وانا كيس.. وانتي مسدس.. وانا مسدس..

9) هو مصطلح فى الموروث الشعبي الناس بتقصد بيه مؤمن بالله وبيؤدي فروضه يعني.. لكن لو جينا ندرسه حرفيا.. نلاقي ان كل الناس عارفة ربنا..
لكن فى الطائعين وفى العصاة.. وفي اللى حبة فوق وحبة تحت.. ربنا يهدي الجميع..

10) أعوذ بالله بلاش نهدي الناس؟ يعني نسيبهم كدة؟ أنا هاعلقلك استيكر فى المدونة بتاعتك.. عشان الكلام اللى بتقوليه ده.. والله لكل مقام مقال.. ومش أى حتة ممكن تبقى مكان للدعوة وهداية الناس..
يعني العقل حلو برضه..

11) محتاجين نوازن بين (الابتسامة فى وجه أخيك صدقة).. وبين ( وَلا تَمْشِ
فِي الْأَرْضِ مَرَحاً ).. تعرفي توازنى بين الاتنين ؟

12) ماعرفشي..!

13) هااااااااااااااااوم.. صباح الخيييييييييييير.. هو لسه هنا؟

14) معلش هى أكبر فتنة عند الرجال يعني.. وأكبر متعة ليهم.. لكن برضه
اكتر حاجة تحسس الراجل باحترامه لنفسه أنه يعاملهم باحترام ويعامل بالمثل
منهن.. سيدنا يوسف عمل إيه؟ ( فَسَقَى لَهُمَا ثُمَّ تَوَلَّى إِلَى الظِّلِّ )

15) هما جايين يزاحمونا فى الشارع كمان مايقعدوا في بيوتهم يعني يبقوا
فى البيت وهنا .. وكمان لابسة قصير طب اتفضلى بقى قفايا وتعبير الاشمئناط
على وشي.. ولا هاعبرك.. شوفي مين اللى هايقوملك .. لا بس لو كبيرة فى
السن دى تبقى قلة أدب قوى يعني..

16) ههههههههه.. ودى عايزة سؤال.. عشان رجالة طبعا.. وبعدين كل برغوت
على قد دمه..

17) يا بنتي العيل بيتولد وبييجي رزقه معاه.. و ان ماجاش كلها كام سنة
ونطلقه فى الشارع ويجيب رزقه بنفسه.. وان ماجابوش يبقى هو نفسه مايجيش......... على رأي المثل.. احسبها صح.. تلاقيها صح..

18) الراجل مايتسألش فى الحاجات دى.. صنف تانى غيره يقولنا وحياتك..
بس اللى أعرفه أن نبينا عليه الصلاة والسلام بكى كثيرا فى مواقف عديدة
وكان أكثر حياء من العذراء فى خدرها.. من الآخر كدة اللى يقولك الراجل
مايعيطش بيبقى عشان اتخنق من عياط الواد فيضحك عليه ويقوله عيب انت
مش راجل.. عشان بيبقى مش عارف يواسيه.. وحتة الراجل مايكسفش دى
دعوة مهذبة للوقاحة والبجاحة مش أكتر..

19) هع؟ هي دي المذيع اللى عملهالك ولا انت اللى عملتها للمذيع؟ مين ده؟
تقريبا كدة اللى فهمته يخليني أقولك مافيش حلاوة من غير نار.. وماحدش
بياكلها بالساهل.. (هي مالها قلبت جو بقالة ليه كدة؟)

20) ...............................

21) لا بصراحة أشيك لون للنقاب أو الإسدال هو اللون الأسود.. ممكن يبقى فيه تطريز أو حركات كدة.. لكن الأسود بيكون أفضل واليق لون فعلا.. وبعدين مش هاتفرق كتير يعني

22) وليه بعض الناس بيستقووا على الراجل لما يبقى لوحده؟ ربنا يهد المفتري يا شيخة

23) أهو نشوف إيه الجديد؟ تغيير..

24) ربنا وحده اللى يجب اننا نربط مصيرنا بيه.. وهو اللى بيبعتلنا السكك أو الناس اللى تساعدنا أو ترشدنا..

25) يمكن انتى اللى بطلتي ترضي عن الحاجات اللى بتكتبيها..

تحياتي ليكي

Son of Egypt said...

السلام عليكم ورحمة الله
بمحض الصدفه دخلت على مدونتك شدتنى كلماتك وتساؤلاتك
الأول ارجوا انى اكون مش ضيف تقيل ولو قبلتى انى ازورك مرا ت ومرات إن شاء الله يكون لى الشرف
فكرت وانا اتفقد الرساله انى اجاوبك على كل نقطه كما فعل اصدقائى من قبلى فى تعليقاتهم ولكنى وجدت اجابه مفيده مختصره تكفى لكل هذه الأسئله

إنتى اكيد فى مصر

تحياتى والى اللقاء الدائم بإذن الله
nageh

L.G. said...

أعجبني تساؤلك فمتى سألنا سنبحث عن الاجابات ومتى وجدناها حتماً ستختفي الأسئلة

راودتني فكرة الرد على سؤال سؤال واشفقت عليك من طول التعليقات ولكن كل سؤال منهم له إجابة

إذا سمحت لي سآخذ تلك الأسئلة كتاج واحاول الرد عليها لا حقاً

تحياتي

qwert anime said...

لماذا نبحث عن اجابات و عن حلول؟

ana ga3an said...

العربي عامة والمصري خصوصا
والرجال تحديدا
العند و الغرور المصاحب بالجهل
هو ما أدي للحال دة

Arabic ID said...

بالنسبة للراجل ما بيتكسفش وما بيعيطش

فأنا مش مكسوف أقولك انى ممكن أعيط بسهولة
وممكن أتكسف بسهولة لو حد مدحنى فى وشى

الحياء شعبة من الأيمان مالوش دعوة براجل وست
========
تحياتى لكى ملكة

مخنوق كيك said...

دي اسئلة سهلة جوي
يا ريت يحطوها في ورقة ثانوية عامة يمكن الطلبة يفلحوا وللا يحسوا بالواقع المرير الاليم

اولا موظفين الحكومة خدوا علي الشتيمة من الحكومة فاصبح ديلهم معووج ولازم يتشد علي طول
ثانيا اللي حكم بكده هما المصريين الكفره اما بخصوص الدول الكافرة اصلا فربنا قال عليهم ايه ؟؟ قال " { أَيَحْسَبُونَ أَنَّمَا نُمِدُّهُمْ بِهِ مِنْ مَالٍ وَبَنِينَ نُسَارِعُ لَهُمْ فِي الْخَيْرَاتِ

ليس الامر ان الله يمدهم بالخيرات لانهم من اهل الخير والسعاده في الدنيا لا انما امدهم الله ليزدادوا اثما في الدنيا فيتوافر العذاب لهم في الاخره
وثالثا للاسف لان معظم الشعب بقي جعان . كله بيبص لغيره حتي لو في ايده اللقمة .. بقت عاده بقي تعملي ايه ورابعا ان الست متقلعش الاسود ده تعبيرا عن الوفاء مش اكتر . لكن طبعا في الاول وفي الاخر ده اختيارها يعني هي لو عايزه تقلعه هتقلعه واللي عايز يتكلم يتكلم واما خامسا بخصوص الرشوه فالرشوه ليست من المحظورات اصلا عشان الضرورات تبيحها انما الرشوه من المحرمات

يبقي المفروض بقي نخترع قانون اسمه .. الضرورات تبيع المحرمات ونمشي عليه

بصراحة الاسئلة كتير وانا مش فاضي لكل ده لان ورايا نوم

بس ان شاء الله لو قفشتك في المدونة بتاعتي وقلمك لعب فيها هيكون ليا رد علي باقي الاسئلة

يللا سلام

Soul.o0o.Whisper said...

السلام عليكم و رحمة الله و بركاته

أول زيارة ألاقى اسأله مالهاش إجابة
ههههههههههههههههه

ياللا هأحاول

1-هما ليه موظفين الحكومة في مصر ما بيشتغلوش إلا لما يتشتموا أو حد يعمل لهم فضيحة ويزعق فيهم؟!
شوفى يا ستى
هو الموضوع مش موظفى الحكومة ، تقدرى تقولى هيا حالة من اللامبالاة و البلادة و كمان الاحباط
و إلا كان موظفى الحكومة فى مختلف بلدان العالم زينا
لكن لاننا فاقدين الامل و الثقة فى حكومتنا فخلاص مابقاش نتحرك إلا بالدفع الخارجى
ههههههههههههههههههههههههههههههه


2-هو مين اللي حكم بأن اللي بيحصل لنا كمصريين دلوقتي نتيجة لأننا كلنا بقينا كفرة؟
طيب ما اللي في أمريكا وسويسرا مش كلهم عارفين ربنا وفيه منهم مش بيؤمنوا بوجوده أساساً
اشمعنى دول ربنا مش غضبان عليهم ومش باعت لهم حكومة زي بتاعتنا؟!
و مين قال إن اللى بيحصل لنا عشان احنا كفرة؟؟؟
اللى بيحصل دا عشان هما اللى مش على حق لكن طلبوا الدنيا صح و سعوا لها بقوة و بذلوا أسباب دا ، و لأن ربنا عدل و مش بيظلم حد فحق عليهم أنه يعطيلهم دنيتهم اللى طلبوها
اما احنا بئا اللى المفروض نسود الدنيا و نطلب الاخرة
لا طلبنا دا و لا دى
فخلاص بئا نفضل حاطين ادنا على خدنا و نقول يارب افرجها من عندك ههههههههه
يااااااااااااااارب


3-ليه الناس في محلات الأكل بيبصوا لغيرهم طول ماهم قاعدين؟!
هههههههههههههههههههه
تلاقيهم بس مستغربين ...هى الناس دى لسه عندها نفس تاكل؟؟
على العموم الحمد لله أنا كافية خيرى شرى و قاعدة فى بيتنا
ههههههههههههههههههههه


4-هي ليه الست المصرية اللي جوزها بيموت لازم تفضل لابسة أسود لحد ما هي تموت ولو قلعته ولبست ملون حتى لو بعد 3 سنين مش 3 ايام الناس بتقول عليها ست قليلة الأصل؟!
3 أيام ؟؟؟ العدة أربعة أشهر و عشرا
بس مش مشكلة .... كلامك صح
مش باقولكو يا جدعان ان كلام الناس بيعمل من الحبة قبة
هى بس خايفة للناس تاكل وشها
انما فى البيت بتلاقيها غيييييييييييييييييير
أسألينى أنا ههههههههههههههه

5-هو ليه كل لما أسأل حد من الكبار عن مدى حرمانية الرشوة دلوقتي يردوا بأن "الضرورات تبيح المحظورات"؟!
سؤال بس عشان تبئا الامور واضحة
كبار مين؟؟ كبار السن و لا كبار المناصب ؟؟
كبار السن هاقولك معلش يا ستى خرفوا..
كبار المناصب هاقولك إذا كانت المناصب تحلل المحرمات ...فعادى إن الضرورات تبيح المحظورات ههههههههههههههه

6-هو ليه كل لما أركب عربية السيدات في المترو بلاقي كل اللي فيها بيتفحصوني من راسي لرجليا ؟!
وليه بيتفحصوا كل واحدة طالعة ونازلة مع إنهم عارفين إن غيرهم قبلهم كانوا بيتفرجوا عليهم برضو؟
دى رغبات مكبوتة يا بنتى ... يعنى اشمعنى هما اتعمل فيهم ؟؟؟ لازم يعملو زى ماتعمل فيهم..
و بعدين بئا يقارنو ..اه لو كنا قدهم كدا ، دا احنا كنا قلبناهم.. هما شايفين نفسهم على الفاضى..انتى عارفة بئا كلام الستات
ههههههههههههههههههههههههه

7-ليه فيه موالد في مصر أساساً مع إنها مش حاجة في الدين؟!
اشمعنا الموالد اللى مزعلاكى
هى الموالد بس اللى مش فى الدين ؟؟
ما نص الحاجات اللى بتتعمل مش فى الدين
المهم إننا نقتنع بدا و منعملوش

8-ليه معظم الرجالة العرب ما بيرضوش يتجوزوا واحدة مرتبها أعلى من مرتبهم؟!
عشان ماتنكدش عليهم حياتهم و أنا مرتبى و انا باصرف عليك و كدا
و بصراحة فى دى بالذات معاهم حق بعد نعرة الحقوق اللى احنا طالعين فيها
ربنا يهدينا ...و يهديهم بردوا ماهو مش كلهم أيديال يعنى
دا إذا كان حد فيهم ايديال
هههههههههههههههههههههه


9-هو امتى بالتحديد ظهر مصطلح "عارف ربنا"؟
ويعني إيه عارف ربنا؟
وهل لو واحد "عارف ربنا" لكن مابيسمعش كلامه تبقى دي معرفة قلتها أحسن ولا إيه؟
ظهر امتى بالتحديد ؟؟؟ والله ماعرف يابيه..مش أنا اللى طلعته
يعنى ايه بئا ...والله ممكن نسأل اينشتاين
اصله اللى طلع نظرية النسبية ههههههههه
لا طبعا ..و لا ليها لازمة ، أصل العبرة مش بالمعرفة ...العبرة أنت عملت ايه بالمعرفة

أنا تعبت ...بكرة أكمل
هههههههههههههههههههههه خالص تحياتى لقلمك المبدع

حاتم عرفه said...

شايفة عملتى فى نفسك إيه ؟؟؟

أحسنلك ماترديش خالص..

هزى دماغك وقولى صح بس..

عشان هاتتعبيش قوى

وإحنا هانقدّر

:)))))))))))))

Soul.o0o.Whisper said...

أنا جيييييييييييييت
هههههههههههههههههه

ياللا نبدأ يا مسهل يارب


10- ليه الناس بتفترض إن أي مكان هو ملكيتهم الخاصة ممكن يلزقوا عليه أي استيكرز زي ماهم عايزين؟
وليه بيكفروا اللي بيقول لهم ماتبوظوش المنظر العام بمبرر إن استيكراتهم عن الحجاب والنار والزنا ودي منفعة للمسلمين؟!

بصى بيلزقوا الاستيكارات ..آدى أنتى قلتى ، عشان فاكرين إن دى ملكيتهم الخاصة ... بس هى مش كدا ، هو مادام ماحدش بيكلمهم خلاص ...أبوا بلاش كتر منه
أما بئا حجة إن الاستيكارات عن الحجاب و غيره .. بصى ماهو مادام الناس بتلزق حاجات مش كويسة يبئا هما يلزقوا حاجات كويسة ... لكن بصراحة فى كلتا الحالتين أنا لا أفضلهم ...يعنى المفروض يبئا فى مكان مخصص للاعلانات أيا كانت

11- هما ليه الناس حتى لو مبسوطين لازم لو ماشيين لوحدهم يبقوا مكشرين؟!
هههههههههههههههههه ...دا بئا مدفعة للحسد ، أحسن حد يحسدهم انهم ماشيين فرحانين
بس هل معنى كلامك انهم لو ماشيين مع حد بيبئوا مبسوطين ؟؟؟ خلاص يا ستى و لا تزعلى ننبه عليهم مافيش حد يمشى لوحده ...ههههههههههههه

12- ليه عسكري المرور في أي حتة لما بسأله بيقول لي "ماعرفش"؟!
ماتقلقيش يا بنتى العيب مش فيكى ... العيب فيه ، أصلهم كلهم بيقولوا كدا ، و مع كل الناس .. الظاهر السياسة الايام دى إنهم يتوهوا الناس أكتر ماهم تايهين ..كبرى كبرى ..إبئى هاتى خريطة احسن ههههههههههه

13- هو ليه فاروق حسني لسة وزير لحد دلوقتي؟!
اممممممممممم ... بالظبببببببببببببببببببببببببط نفس السبب اللى مخللى بابا حسنى – طويل العمر يطول عمره و يزهزه عصره و ينصروا على من يعاديه هاى هى – يفضل فى الكرسى لحد الوقتى ههههههههههههههه

14- هو ليه بعض الرجالة عندهم في القاموس كلمة ست معناها شهوة و استباحة؟
اممممممممممم اعتقد إنك لو عدلتى السؤال هتعرفى الاجابة .... طب نعدله ، هو ليه بعض الذكور عندهم فى القاموس كلمة ست معناها شهوة و استباحة ؟؟.... فهمتى ؟؟؟

15- ليه الرجالة لما بيشوفوا بنت لبسها مش على مزاجهم مابيرضوش يقوموا لها في الأتوبيس؟وعموما ليه لما بقوا بيشوفوا ستات حتى لو كبار في السن بيفضلوا قاعدين؟
؟؟؟؟؟.... اللى لبسها مش على مزاجهم ؟؟ ..والله و لا حتى اللى على مزاجهم ..يا بنتى دا أنا بأكون الساعة 12 بالليل و أول ما تيجى مواصلة أيا كانت بئا باص أو تاكسى ..تلاقيهم بيجروا عليه و يسيبوا البنات و الستات واقفين .. عاااااااااااااااادى ماعدتش فيه شهامة والله
<< هتقوليلى و ايه اللى يأخرك لحد 12 بالليل ..دا باعتبار ان 12 دا متأخر فى الزمان دا ، أصل إحنا لسه محافظين شوية ..هههههههههههه
هأقولك والله حالات اضطرارية ...مش العادى بتاعى يعنى ..هههههههههههههههههه
بالنسبة للستات الكبار ...بأقولك ماعدتش فاااااااااااااارقة

16- ليه الرجالة المصريين عموماً شايفين إن الست مهما كانت عظيمة فهي عمرها ماهتبقى أعظم منهم لسبب بسيط: إنهم رجالة؟!
امممممممممم ... إذا كان دا هيكون السبب الوحيد بسسسسسسسسسس ، فأعذرينى دول فهمهم على أدهم .. إنما ماننكرش طبعا قول الله تعالى " الرجال قوامون على النساء " بس بإيه ؟؟...بما فضل الله بعضهم على بعض و بما أنفقوا من أموالهم ... إنما اللى قاعدين و فاكرين انهم عشان رجالة بس ... فدول فهمهم قاااااااااااااااصر ...


17- ليه فيه ناس بتتجوز وتخلف عيال بالدستة مع إنهم مش لاقيين ياكلوا؟!
هو صحيح علينا الاخذ بالاسباب .. بس النقطة دى بالذات ربنا قال فيها ..و لا تقتلوا أولادكم من إملاق نحن نرزقكم و إياهم ... يعنى لو انتوا فقرا بردوا ماتقتلهمش ..و القتل يشمل الجنين فى بطن أمه .. أنما ممكن ننظم الموضوع ، و دا بردوا لصحة الأم ..

18- أنهي قانون صدر وقال إن "الراجل ما بيعيطش"؟
وليه بيقولوا "الراجل ما يتكسفش"؟
مش عارفة أنا كمان بصراحة .... لما تعرفى قوليلى
" خدعوك فقالو " ههههههههههههه

19- هي ليه المشاكل جزء من الحياة؟
ليه لازم نتقبلها دايماً؟
ليه لازم نرضى بالجزء الاستثنائي من الحياة لحد ما يبقى هو الحياة نفسها
لأن ربنا قال " و لقد خلقنا الانسان فى كبد " ... لازم نتقبلها و بصدر رحب كمان ، و دا لأن كل مشكلة فى حياتنا اختبار ربنا هيشوفنا هنرضى و لا لا .... الجزء الاستثنائى ؟؟؟ أعتقد مافيش فى الحياة جزء استثنائى ، لكن الانسان عنده عقل و على اد عقله بيشوف الحياة و يعيش اللى عاوزه ...


20-احنا ليه كمصريين ساكتين على كل ده وليه ساكتين كل ده؟!
كمصريين ؟؟ .. ماعتقدتش الامر متوقف على الجنسية ..إنما بيتوقف على الشخصية ، ماهو فى ناس مش ساكتة ، لكن عشان خايفين و مستسلمين فساكتين ، فياللا بئا ناخد على دماغنا لحد ما نفوق ... ربنا يسهل ..

21-ليه الاسدال أو النقاب لازم يبقى أسود؟
يعني لو الألوان بتفتن وفيها شر مش كان ربنا هيرحمنا منها من الأول؟!
اممممممممم ... أولا الاسدال و النقاب مش أسود بس ...فيه الوان ، بس دا بتوقف عليكى انتى ، انتى عاوزة إيه أو مقتنعة بإيه ... أنا عن نفسى بأفضل الاسود .. للاسود فى حد ذاته ، أنما مش بأعيب على اللى بتلبس ألوان
انما حكاية إن لو الالوان بتفتن ربنا كان رحمنا منها ... طب كان ربنا رحمن من الامريكان من الاول و رحمنا من اليهود ..و رحمنا من كل الفتن اللى فى حياتنا

22- ليه بعض الناس بيستقووا على الست لما بتبقى لوحدها؟
نفسويات بئا يا بنتى ...عقد مكبوتة بعيد عنك ... ربنا يعينا على الناس و كلام الناس

23- ليه الناس بتحب جداً تتفرج وتسمع الخناقات؟!
يمكن عاوزين يتأكدوا إن الناس بردوا عندها مشاكل زيها ...أو يمكن دا بيأكد لهم أكتر أنهم فى مصر .... على العموم مادام فى مصر يبئا علامة صحية ... ماتقلقيش خااااااااااااااااااااالص
لا تقلق

24- هو احنا ليه كلنا مصيرنا لازم نربطه دايماً بشخص واحد؟
إما الريس أو وزير ما أو مديرنا في الشغل أو حتى زوج أو زوجة؟
هى الحكاية مش حكاية شخص واحد ... بدليل بردوا اننا بنقول الحكومة و الحكومة عبارة عن منظمة تضم العديد من الأشخاص ...و هؤلاء الاشخاص منهم الوزير و منهم الغفير كما تضم العيد من المبانى و الأجهزة ...طب بس يا ماما بسسسسسسس ...سد يا حبيبتى سدددد
هههههههههه ... هو الموضوع إننا دايما بنرمى حملنا على حد تانى ، المهم مانطلعش غلط و خلاص ...على فكرة إحنا احسن ناس نمثل دور الضحية ...مش عارفة بنحبه اوى ليه؟؟؟

25- أنا ليه بطلت كتابة حاجات ترضيني ؟!
دا بئا تسأليه لنفسك ... يا بنتى كبرى دماغك و عيشى حياتك و شوفيها بنظرية نص الكوباية المليان ... هتلاقيكى بتكتبى حاجات بترضيكى و حياتك نفسها هترضيكى

معلش طولت عليكى ... و نفسى اتقطع ...بس و لا يهمك هههههههههههههه ...خالص تحياتى

إبـراهيم ... معـايــا said...

هوا إنتي ليه بتسألي الأسئلة دي ؟؟؟


وليه الناس فاكرة إنك منتظره لها إجابه ؟؟؟

و ليه الصبر ده كله ؟؟؟؟
.
.
وأنـا ليه اللي جابني هنا

قصدي إيـه ؟؟؟

Rana Omar said...

انا دخلت اسجل تضامني معاكي فقط
.
.
.
انتظري اجابتي على الاسئلة

osama said...

اسئلة مشروعة... من نفس ثائرة... ولأنها اسئلة تحمل الإندهاش ولا تتطلب اجابة حرفية .. بل ربما تتطلب اجابة كلية شاملة أول وأنا مطمئن لما أوقول..
ذلك كله بسبب
غياب العقل
وغياب الحرية...


دمت بكل ود...
خالص تحياتي

ملكة said...

مصطفى سمير

امممم...ده استنكار مش سؤال ولا اجابة
ومع ذلك كلنا بنستنى حد غيرنا عشان يجاوب لنا على السؤال..مع اننا المعنيين والله برضو!

ملكة said...

مصطفى رزق

1-اختلافي في نقطة عبد الناصر عبارة عن خلاف بين فئات الشعب كلها لم ولن يحسم..بس ماتقلقش مش هنفسد القضية ولا الود
2- مش مقتنعة!
3- اجابة عظيمة ياراجل والله!حقيقي صح
4-وعشان احنا مجتمع زبالة بيستنقص الست اللي بتتجوز لو مطلقة او ارملة بينما بيستغرب الراجل اللي بيبقى في نفس الوضع لما مابيتجوزش...وماتتكلمش عن الاحتياجات والجسد والطبيعة والحوارات الحمضانة دي ابوس ايدك!
5- مش يمكن عشان الرشوة بقت في يد الجميع؟
6-بنلف ف دواير
7-جربت تقول الله يلعن مولد السيدة زينب واللي بدعوه قدام الناس؟ اوكي جربها واحنا مستنينك تقول رد فعلهم كان عامل ازاي...مش هيفرق عن رد فعلهم لو سمعوك بتسب الدين يا مؤمن!
8-الدين بيتفسر على مزاج المجتمع الذكوري..وكفاية كدة!
9-على الاقل ابليس واضح في افكاره..مش زي اللي "عارف ربنا" وهو ابن ستين في سبعين من جواه!
10- ومن غير دقن وحياتك..اتفرج على مسعود واللي زيه هتعرف وصلنا لإيه
11-حتى لو مبسوط بالقدر الكافي فيه حسد وفيه الناس هيفهموا غلط وفيه هيقولوا ايه المجنون ده او على اقل تقدير هيسمع "يابن الرايقة"طبعا
12-اوكي انا بعرف بعد الناس مابيعرفوا بكام يوم..فرق توقيت :)
13-ياراجل؟امال مصر مش متسامحة مع ولادها ليه؟ يعني المصري يبقى شاذ ومرتشي وحرامي وناقص عشان يبقى وزير ومصر تسامحه وتطبطب عليه؟!
14-هه؟!مش فاهمة وكمان مابحبش التفسير المطلق للجسد انه يساوي الجنس!أيا كان الجسد طبعا!
15-ياعمنا انت جبت من الآخر في الأول..المشهد أحلى وهي واقفة بس هو بيبقى غبي ومابيشوفش مشهده الزبالة وهو قاعد للأسف!
16-مليش دعوة بالجنسيات التانية(طيب ياعم ماناخد منهم حاجة عدلة)بس الاية عدت عليا ومافكرتش فيها بشكل ذكوري..ليهم درجة بس في اييييه؟ وازاي؟وهل عموما ولا في حالات؟وازاي تتفهم الدرجة دي اساسا من الطرفين؟
17-او عشان يقرفوني انا بالعند فيا!
18-اشاعة؟الحمد لله يعني هنلاقي في القريب العاجل رجالة بتنكسف وعندها بقايا دم؟وهنلاقي راجل بيعترف بالمشاعر ومابيتكسفش يبينها حتى في لحظات ضعفه؟احمدك يااارب!
19-كله موافقة عليه بس لما تبقى المشكلة اختزال لفكرة الحياة كلها..لأ بقى فيه حاجة غلط كدة!
20-اه قطعا..ورانا مليون حاجة،حتى انا ورايا غسيل دلوقتي بس المياه قاطعة..هشوف انا الحل ايه اما المياه تيجي وافكر بروقان...بس لامؤاخذة الكرامة محدش بيتعلمها..يا هتتولد وانت محترم ياهتتولد لامؤاخذة قفل مستني اللي ينشك عليه!
21-ماهو ده اللي يغيظ...شوية اسمع ان الالوان بتفتن فالاسود مابيلفتش النظر!!! وشوية عشان لون شيك..هأو!
22-اجابة ارفع لها القبعة اللي تحتها الحجاب احتراما!
23-وعشان لسة المياه قاطعة ولما تيجي هننشغل في غسيلنا اللي لازم يبقى نضيف دايما قدام الجيران..بأي طريقة كانت!
24-قريتها!
25-قلة خبرة..او قلة مزاج!

على فكرة بجد...شكراً جزيلاً :)

ملكة said...

محمد العدوي

والله ان جيت للحق هتلاقينا كلنا نفسنا بقى قصير
بس فيه حاجات لسة بنقاوح فيها..زي الليهات اياها
عموما العيد الجاي اوعدك ميكونش فيه ليه
هيوكن فيه على طول ومن اول السطر
"عشان وبسبب"افتكر اجابات هتيجي مكان السؤال
بس مش كلها احسن منه وكان لازم تتفهم!

منور

ٍSOU said...

من كللللللل التساؤلات دى انا هجاوبك على واحد بس ..ليه الاسدال اسود؟؟
هو فى الشرع انا مرة قريت ان لبس المرأة بيكون السواد من الالوان ..يعنى الالوان الغامقة..فى ناس اعتبروا كلمة السواد دى يعنى الالون الاسود و بس..وفى ناس بتستسهل زى حالاتى لما جبت الاسدال جبتة اسود عشان يمشى مع اى لون تانى و الاهم انى جبتة عشان اسافر السعودية و هناك كلهم لابسين اسود و على راى المثل
(فى السعودية ..خليك سعودى)
:))

ملكة said...

حاتم عرفة

عشان نوفر وقت وجهد هرد على النقط اللي عايزة مناقشة

8- انا ما انكرتش ان الراجل له قوامة في الانفاق على البيت بس ايه المشكلة لو هو بينفق على البيت برضو ومراته بتشتغل بمرتب اعلى منه؟ هو هيصرف هيصرف وملهوش دعوة بمرتبها بقى!!

اما بقية الاجوبة فمشكرة جدا عليها، على الاقل ضحكتني في شوية منها :)

ملكة said...

son of Egypt

شكرا جزيلا لزيارتك واجابتك الشاملة دي
يارب ماتكونش اخر زيارة


L.G

وماله، اللي في بالك اعمليه انا معنديش اي مانع
مشكرة لزيارتك :)

Qwertanime

عشان مش معقول هنفضل نتخبط في الحيطان زي الدبان كدة
ولا ايه رأيك؟


أنا جعان

مش هزود على كلامك حاجة
أصلك قلت كل حاجة!
منور :)


Arabid id

طيب الحمد لله انك قلت كدة
طلعت غلطانة ودي حاجة كويسة جدا بالنسبة لوجهة نظري الأولى
متشكرة ليك ومنور

ملكة said...

مخنوق

good night مقدما
وشكرا على محاولتك الحلوة لاجابة الاسئلة دي
منور :)