Sunday, October 07, 2007

(2) اللامختار من كتاب الحياة

1- طك طااك

لو عديت جنب العربيات الزرقا الكبيرة

بتاعة الترحيلات

متستغربش لو لقيت مكتوب عليها

" أمن مركزي"

ومتستغربش لو لقيت العساكر

باصين من الشبابيك المقفولة بسلك ضيق

زيهم زي المساجين بالظبط

وكمان متستغربش لو لقيت اتنين عساكر

مروحين لوحدهم بعد ما قضوا وقت وردياتهم

وماشيين في خطوة واحدة منتظمة

مع إن مفيش وراهم ظابط بيزعقلهم!

ـــــــــــــــــــــــــــــــــــــــــــــــــــــــــــــــــــــــــــــــــــ

2- قلم جاف

مش لاقية بجد أي سبب لتسمية القلم الجاف

بـ " قلم جاف "

يمكن عشان ساعات بنمسك القلم

ونكتب كلام "جاف" للناس؟

و لا يمكن عشان ساعات بنمسك القلم

ومبنكتبش حاجة خالص؟؟!

ـــــــــــــــــــــــــــــــــــــــــــــــــــــــــــــــــــــــــــــــــــ

3- ساعة تروح وساعة تروح

من يومين ساعتي وقفت

مع إني مكنتش بلبسها كتير لكن جريت

رحت ركبتلها حجر جديد

و أول ما رجعت تمشي تاني

حطيتها في الدرج الضلمة وملبستهاش

هو انا كنت خايفة من ايه؟

إن الدنيا تقف عند 4 ونص وخمسة مثلا؟

ولا إني أتأخر عن بقية العالم؟

غالباً أنا رحت ركبت الحجر عشان إحس إني

قال إيه

عملت اللي عليا!

ـــــــــــــــــــــــــــــــــــــــــــــــــــــــــــــــــــــــــــــــــــ

4- فيل واحد وعشرين أعمى

ساعات بزهق مني قوي لما أكتشف

إني كنت ماشية في الشارع مكشرة و خطواتي حادة

أو حابة أمثل على الناس إني جد زيادة عن اللزوم

مع إني مبحبش الناس الجد دول

ولا بحب اللي بيمشوا مكشرين

ولا بحب الناس الحادة برضو

كان بيتهيألي إني المفروض أروح لكل بني آدم مريت عليه

وأقوله: لو سمحت أنا مش زي ما انت شايفني!

ـــــــــــــــــــــــــــــــــــــــــــــــــــــــــــــــــــــــــــــــــــ

5-الصبر مفتاح من غير كالون

ممكن تقابل واحد يكرهك في نفسك

و يكرهك في حياتك لمجرد وجوده فيها

وتحاول قد ما تقدر تتأقلم مع الوضع

وتقول أهو أيام وتعدي ونصبر برضو أحسن

بس الغريب بقى إن ممكن في آخر يوم تشوفه

و إنت في عز فرحتك إنك هتبعد عنه وتستريح

تفتكر إن بعد كدة هيكون فيه غيره كتييير في حياتك

أسوأ منه بمراحل

واللي مكنتش راضي منه بواحد

هيبقالك منه دستة

وبرضو هتصبر ساعتها وتسلم أمرك لله

وكل مرة يبقى عندك أمل إن أشكاله

يجي تسونامي تاني ويخفيهم من على وش الأرض!!

*********

للمهتمين "إذا وُجدوا" : اللامختار من كتاب الحياة (1)

13 comments:

اخر said...

و رجعت تاني اكون اول المعلقين ..ااول الناس اللي بيقولوا انك بتلاحظي كويس اوي و ليكي فلسفة ما في الحاجات اللي بتلاحظيها .. علي فكرة فيل واحد و عشرين اعمي دي بتحصل معايا كتير و مش في الشارع بس لا في مواقف كتير اوي بس دة بيحصل لما شخصيتك يكون ليها تفاصيل كتير اوي مش ممكن تتشاف او تتسمع او تتحس في وقت قصير و الناس بتاخد الانطباع بالي قدامها و خلاص .. بيتهيالي لازم نلف علي ناس كتير اوي اوي علشان نصحح الفكرة
بالنسبة للصبر بقي .. انا شايف انه مفتاح يستاهل ان نضيعة و نضيع اللي صابرين عليه معاه .. مش ساعات تسمعي حد بيقول عن حد دة البعد عنة غنيمة .. انا بقي بدو علي الغنايم دي و الباب اللي يجي منه الريح نسدة و نستريح و
سلاماتي احتراماتي تحياني

YOTTA said...

"لو سمحت أنا مش زى ما انت شايفنى"

امشى زى ما انتى عايزة يا أستاذة
مكشرة
مبسوطة
بتعيطى
مسخسخة على روحك من الضحك
براحتك
ماحدش له دعوة
المهم انتى شايفاكى ازاى مش هما شايفينك ازاى
وطظ فيهم أصلاً يعنى

مهـــــاب said...

سلام عليكم

جميل كلامك ونظرتك
باحب أنا النوع ده من الكتابة على فكرة .. لقطات قصيرة متجمعة سوا كده
و الأجمل أن كل لقطة جواها فيلم كامل

على فكرة .. حكاية المشي الجاد إياها دي باقع أسيرها أحيانا .. بابقى كشري كده وأنا ماشي .. بس أحيانا باكشر أصلا بسبب الناس اللي باشوفها .. وباكون عاوز لكل واحد/واحدة أه بس مش عشان أقوله أنا مش كده .. بيبقى نفسي أوي أروح أقولهم يا حمقى !! .. ده حقيقي

موضوع الساعة وكداهو .. فكرتيني بأيام امتحانات الميدتيرمات في الكلية .. لما كنت قبل الانتحان أبص بصة مالهاش لزمة أو معنى على الكتاب .. مع أنه مش هايفيدني في حاجة ولا انا فاهم .. بس أهو .. نوع آخر من أنواع تركيب أحجار الساعات الواقفة

تحية ضخمة .. وملحوظة على جنب .. نفسي أستعيد حماس الكتابة اياه

بالتوفيق يا ملكة (:

إبـراهيم ... معـايــا said...

الصبر مفتــاح !!، ولاقـفـل ...
.
.
أخيرًا كتبتي عنهم ،،،،
على فكرة بقى ليكي وحشـــة وحشـة قوووووووي ، و مفتقدينك افتقاد شديد قووووي
أين أنتِ ؟؟؟


هوا إنتي بتختفي ف الصيام، ولا إيه ؟؟؟
**************
من غير تقليب ...
موضوع القلم الجاف ده ، كنت هدخل أقول لك ببساطة لأن الحبر بتاعه ( جاف) ، تخيلي رجعت أكتب بالقلم تاني !!! ، كنت تقريبًا نسيته
.
.
تحياااتي ملــــكـــــــــة

M.R said...

طك طاك.. و لا تسئليهم ازاي مرتبهم 30 جنية ف الشهر ة، و لا ليه بيتعلموا يشتموا أهاليهم لمدة 4 شهور ( تدريب ) أول المدة
------------
قلم جاف.. الموضوع متعلق بإن الراجل اللي ترجم الاسم هو اللي كان موجود مش حد غيره
-------------
ساعة تروح و ساعة تروح.. بيتهيألي انك ركبتي الحجر على أمل انه يكون مختلف و يمشي الساعة ف الاتجاه التاني.. وبرضه هاتروح
-------------
قبل الواح و عشرين اعمي.. ( ليتها قالت أحبك أنت كما أنت، لا أنت في عيونهم )،مع انه مستحيل بس دايما في حد بيشوف من غير ما ترجعي تقؤليله
-------------
الصبر مفتاح من غير كالون... أعتقد لو سجلتي الجملة ( المثل ) بإسمك ممكن ينافس الاخر التقليدي - مع بعض الدعم من الاخوة الحداثيين - دا لو حد فاكر يعني ايه مفتاح
----------
تحياتي

مادو said...

إن بقى
ههههههههههههههههههه
بيعجبني دايما تناولك لصور صغيرة
بتعمليها كويس يا ملكة بجد
تحياتي

ملكة said...

آخر

حمد لله على السلاااامة المدونة نورت تاني بعد ما كانت مضلمة ياعم محمد:)

ما المصيبة إني بلاحظ كويس أوي
معرفش أشوف حاجة غلط واسكت وده عيب-لو تعلم- خطييير جدا في بلد زي بلدنا دي اللي المفروض تمشي فيها سايح كدة لا تشوف ولا تسمع ولا تتكلم

عليك نور، الظاهر لازم تلف كمان على اللي نعرفهم عشان نخليهم يبدأوا يعرفونا كويس

ساعات مبينفعش نسد الباب عشان مبيكونش موجود أصلا
تحس كدة كأنك قاعد في "ملقف هوا" ومفيش حاجة تحميك من تيار "الريح" إياه
يلا إدينا الصبر يااارب

مشكرييين ياسعادة البيه آخر ومتغيبش تاني وإلا بغرامة

ملكة said...

يوتتتتتتتااااااا

الكلام سهل جدا يابنتي
بس جربتي تضحكي وانتي لوحدك في الشارع؟
شوفي الناس هتبصلك بأنهي نظرة ولاحظي بعدها تغير موودك الفوري حتى لو بالكذب
بالمناسبة كمان
نظرتهم ليكي بتحدد 99% من نظرتك انتي ليكي
أو ربما ده بينفع معايا أنا بس يعني:(

أما اللي انا متفقة تماما معاكي فيه هو
"طظ فيهم أصلا يعني":D

منورة المملكة ياحبيبتشي

ملكة said...

مهاب

وانا كمان بحبها بس مش كله بيتكتب فيه كتييير جوا الجمجمة مبيعرفش يطلع لييه؟ معرفش

حمقى؟؟
احم،متستغربش لو لقيت واحد اذبهل وقال لك يعني ايه حمقى يابيه؟؟

متفكرنيش بالامتحانات وايامها،خليها مركونة في الدرج لحد ما اقرر اطلعها والنبي مش طالبة كوابيس بدري كدة:(

وشكر ضخم ،ربنا يعينك وترجع تكتب تاني يافندم:)

ملكة said...

إبراهيم

انت كنت مستني أفكاري ولا ايه ياعم الحاج؟:D
إذا كنت انا شخصيا معرفش هما كانوا هيجوا ولا لأ

آه كنت مختفية في رمضان عشان الصيام بتاعي وبتاع الناس ينفع ههههه:D

القلم الجاف جواه حبر جاف عشان كدة جاف!!!؟
ربنا يحميك لمصر يابني
انزل بتتر رأفت الهجان ياعم!!!

منور كتير وكل سنة وانت طيب

ملكة said...

M.r

مش هسألهم، بيبان على وشوشهم ونظراتهم حتى طريقة بصتهم من ورا القضبان
**

ربما، مش هنختلف يعني:)
**


اللي راح راح
حكمة غتتة بس واقعية أوي
**


حلوة أوي الجملة دي
بس
مش دايما صدقني
**


أو وانت الصادق لو حد فاكر يعني ايه "صبر"!!ـ


بل كل التحية لك على قراءة ما وراء السطوووور:)

ملكة said...

مادو

ربنا يخليك
على الاقل دي الحاجة الوحيدة اللي بعرف أعملها:))

منور وكل عام وانتم بخيييير

ٍSOU said...

جميل اوى حكاية تسونامى دى..فى بنى اديمن موجودين بس عشان يقرفوكى فى عيشتك..و فى بنى ادمين عاملية زى الكركبة تملا الفراغ و السلام و فى بنى اديمن مستحيل الحياة بدونهم..