إيه اللي يمنع إنك تروح لحد بعينه عشان تخرج كل المرارة اللي جواك وتقول له قدام كل الناس وفي وشه:ـ
أنا بكرهك من كل قلبي؟
طيب أنا أفهم اللي يخاف يروح يبوح لحد بحبه يكون مكسوف عشان مش عايز اللي بيحبه يشوفه بنظرة غلط او يقل احترامه ليه
انما واحد انت بتكرهه وبتتمنى حقيقي لو مكنتش عرفته وإنه يتلاشى من على وش الأرض
أو حتى تتلاشى إنت نفسك علشان ما تضطرش تتعامل معاه
هتفرق معاك ايه لو رحت وبكل قوتك وخنقتك منه تقول له أنا بكرهك؟
هتخاف على زعله مثلا؟؟
هتخاف على صورتك قدامه؟؟
مبررات واهية وحجج فارغة كلها بتواجهك بحقيقة بسيطة وواضحة تماما
إنت جبان
ومع إنك عارف تماماً إن هييجي عليك يوم كمان 10 سنين
وتسأل نفسك سؤال أمرّ من كرهك الأولاني
أنا ليه لما كان عندي فرصة أخرج كل اللي جوايا مخرجتهوش؟
وليه لما كان ممكن أزعق سكت؟
وليه لما كان وقت تخليص الحق سبت الليلة كلها ومشيت؟
هو أنا ضعيف؟
هترد عليك نفسك وتقول: لأ مش ضعيف
هو أنا كنت لسة بلتمس لهم العذر؟
هترد برضو وتقول: لأ لأنهم استنفدوا كل اعذارهم عندي
وهتفضل في نفس الدايرة
لا انت خرجت اللي جواك
ولا عرفت السبب
ولا بطلت تكره
13 comments:
السلام عليكم و رحمة الله و بركاته
الله الله الله الله .. بوست عميـــــــق جدا .. و مختصر .. و جايب م الاخر ..
هيه دى مشكلة أغلبنا .. خايفين نواجه نفسنا بحقيقتها .. حضرتك عارف .. لو كل واحد قدر يقول لنفسه انه جبان .. صدقنى حيبدأ بعدها يشوف وسيلة يتغلب بيها على جبنه ده لحاد ما يقدر ياخد الفعل المناسب فى الوقت المناسب ..
يعنى تشخيص المرض أول خطوة فى طريق علاجه :)
الف شكر على البوست المتميز ده :)
معذرة انا ما اخدتش بالى انك بنوتة .. البوست شدنى لدرجة انى ما شفتش الى كاتبه ولد ولا بنت ..
اعتذر عن خطاب المذكر فى التعقيب الى فات :)
دمت بنقاء
u know ... it`s never too late
i really believe in that
دهاء
وعليكم السلام ورحمة الله وبركاته
طيب قولنا لنفسنا اننا جبناء
المشكلة ما احناش عارفين الطريق اللي هناخده بعد كدة ايه
وشكرا ليكي انت على ردك الجميل وزيارتك دي :)
بس يارب متكونش الأخيرة
منورة
كاميليا
وانا بحاول اصدق برضو :)
واحشاني جدا ومنورة
مش عارف ممكن اضحك قد ايه لو اللى فى دماغى صح؟؟؟
- وهو ان سيادتك تكونى اصلا كنت
مخنوقة من حد وبعد ما خلاص استنفذ الاعذار وانت استنفذتى الحجج الواهية
على حد قولك...قمتى بكل جرأه منزله البوست ده
- وده على حد قولك بردة ف نفس الدايرة لانه بعد 10سنين
والعيال مزهقييين سياتك
-طبعا هتهربى منهم وتدخلى على البلوج
اللى انتى ربما تكونى بقالك كتير مدخلتيش عليه
وتفتكرى الشخص ده
-يااااااااه
دواير .. دواير
- اه على حد قولك برده
....
وانا رغيت قوى المره دى
-بس
وائل
اممم نقول جزئياً صح
اللي حصل إن كان جوايا غضب كتير لدرجة اني كنت حاسة بروحي تقيلة اوي وده في حد ذاته خنقة كفاية
وبما إني مش حاسة ان اللي هيسمعني لما احكي وقتها هيفهم حاجة من الكلام اللي مش منتظم والفضفضة اللي يمين وشمال قلت اكتب يمكن اخفف شوية من الحمل اللي جوايا
بس للأمانة والله مفكرتش إن ده يكون الطريقة اللي اعلن بيها عن كرهي
يمكن لأني لو فكرت فيها كدة كنت هأكد لنفسي مبدأ الجبن إياه
دلوقتي مبقتش كارهة زي وقت ماكتبت التدوينة دي
لكن لسة بتضايق كل ما افتكر الأسباب اللي أدت في الآخر لكل المشاعر السلبية دي!!
اطلاقا مطلقا
مرغيتش ولا حاجة،افتكر انا اللي رغيت كدة :)
وبالمناسبة
من قبل العيال بكتير اهو
انا متأكدة ان الدواير اقرب مما نتصور
حتى انا معتبرة الموضوع مسألة وقت مش اكتر :)
دايما منور
أنا بقى ... أختلف
مبسوط إنـك كتبتي الموضوع ده جـــدًا ، وقريته انمبااارح، وكان بدي أعلق لك عليه ساعتها تعليق مختلف، بـــس النت استعصى !
.
.
فكـرة تانية يا ملكة
إحنا ليه بنكره الناس؟؟؟، هل لأنهم "أشرار" مــثلا، ولا لأنهم صدر منهم ما يضايقنا ، يعني بنكرههم، ولا بنكره تصرفاتهم ، خالد كان بيقول لي إن مفيش حد شرير (غالبًا يعني) فيما نعرف، المشكلة في تصرفات معينة، تخلينا نكره، .....ممممممممم و نحـب ..على فكرة برضو
.
.
فينك بقى ؟
ياااه!
انتي كاتمة في قلبك كل ده وساكتة؟!
همممم.. كلنا كاتمين..
أعتقد إننا ساكتين بنوع من القصور الذاتي.. أو يمكن وراثة.. انتي عارفة أجدادنا - طيَّب الله ثراهم - كانوا يصبروا على الجار السيء يا يرحل...!
عارفة يا ملكة انا ممكن زمان ماكنتش احب اعمل كده :s
بس دلوقتى مش بقدر امسك نفسى حتى لو اول مرة اشوف حد و يبقى قرفنى بديهملوا فى وشه يزعل مايزعلش مليش فيه
اقتباس:" إيه اللي يمنع إنك تروح لحد بعينه عشان تخرج كل المرارة اللي جواك وتقول له قدام كل الناس وفي وشه:ـ أنا بكرهك من كل قلبي"
أولا ببساطة لأن جرم هذا الـ (حد) لا يمكن أن يكون قد بلغ (هذا الحد) ، إلا أن يكون الحد الأولاني ينتمي لعائلة شارون عليه من الله ما يستحق
ثانيا لأن مقدار الألم الذي سوف أسببه لهذا الحد الأولاني قد يكون أكبر بكثير من مقدار الغضب الموجود عندي خاصة إذا ما كان على درجة من رهافة الحس
ثالثا (أكره النمطية لكنها الحقيقة) لأننا لا نعيش وحدنا على الأرض وربما تمر عشر السنوات ويصبح الحد مذكور زميلك - أو رئيسك - في العمل الأمر الذي سوف يحول الحياة إلى جحيم
نصيحة أخيرة ، قالت العرب التمس لأخيك ألف عذر
كل الود
الواحد في اعتقادي المفروض يتكسف من الكراهية أكتر من الحب
لأن الكراهية هي اللي ذنب
مش العكس
تفتكري لو ف الحياة دقيقتين، تقؤليل حد كنت مكسوفة - يشوفك غلط - انك بتحبيه، و لا تاخدي حقك من كل الصناديق الزباله اللي مش ف مكانها و تولعي فيها
بعض الدوائر ليست سوى منحنيات، ربما هي فقط أكثر حدة
هى فكرة والله
بس نادراً لما حد يفكر فيها جدياً
فكرتينى بواحده صحبتى امبارح بتقولى انها هتعمل كده مع سيل من الشتايم :D
هى المشكلة من البداية ان الواحد من دول ميكونش عارف نفسه وعارف انه كده
تقبلى مرورى :)
Post a Comment