Monday, March 26, 2007

حادي بادي هنقاطع ولا هنعادي

النهاردة فجر 26/3 يامصريين
من 28سنة السادات راح اسرائيل
واعتبروها نكسة جديدة بعد سبعة وستين
بكرة(صباحا يعني اي حاجة بقى) الاستفتاء/الملوخية على 34 مادة في الدستور
مش محتاجة فهلوة سعادتك عشان تفهم ان مصر كلها رافضاه
ولا عشان تفهم ان المنطق بيقول
بما اني واحدة من الشعب
وبما ان الشعب كله رافض
إذن أنا كمان رافضة
#وهو المطلوب اثباته ياعم الحاج
طب ايه المشكلة دوقتي؟
المشكلة اني معرفش أروح اللجنة بكرة ولا لأ
آه والله شفتوش خيبة أكتر من كدهوة؟؟
بقالي شهر ونص مستنية البطاقة وأخيراً
وبعد ما طلع عين أهلي بسبب موظفين قسم السيدة
استلمتها(زغردي ياأم فاروووق)ـ
وبعدين قريت النهاردة باليل جريدة صوت الأمة وجريدة الكرامة
ودي خطوة غير عادية بالمرة
لأني مقاطعة الجرايد بأنواعها من زمان والحمد لله
ودماغي لألأت(يعني زي البيض الممشش كدة)ـ
و الأسئلة التي تمرح في جمجمة حضرتي الآن بقى هي:ـ
نقاطع الاستفتاء بحكم كوننا لا نرضى ان نساوم على حريتنا كمواطنين ولا يمكن ان نشارك في مهزلة زي دي وان مجرد مشاركتنا معناها موافقتنا الضمنية على التعديلات واللي بيحصل؟؟
ولا نروح ونقول لأ مع اننا عارفين مليون في المية إنها متزورة متزورة ياولدي لمجرد اننا نعمل اللي علينا ونبرأ نفسنا بغض النظر عن النتايج؟؟
هنقاطع ياعباري ولا نستشهد ونروح؟
زيس ايز ذا كويسشن
ولما لم أجد الاجابة عن الاسئلة الحلوة دي لحد دلوقتي مع ان خلاص
كلها كام ساعة والنهار يطلع و يدرك العادلي الصباح
ويسكت الديك عن الكلام المباح لأنه بدأ يدخل في الغويط
قلت أعرض على الساهرين أمثالي وجهات النظر
والمأساة المطروحة ولا مأساة الحاج أوديب وعم سوفوكليس
يمكن تدبروني وتقولوا رأيكم
مع الاخذ في الاعتبار ان الاسباب لازم تكون مقنعة ومستوفية الشروط
وعليها دمغة من اتنين ناخبين مسحولين متظاهرين متقاعدين
وانا من هنا لحد بكرة الصبح هقلبها في دماغي
يمكن اتوصل لحل أخير تالت لم يأت في الحسبان من قبل وهو:ـ
إني أهاجر موريتانيا !!ـ

15 comments:

محمد عز الدين said...

صدقيني وبجد
لو ينفع أسيب البلد دي
كنت سبتها من زمان
وعملت اللي بتفكري فيه بالظبط
بس واضح ان البلد دي فيها حاجه للله
مافيش فايده

إبـراهيم ... said...

مش هنهاااااجر ، مش هنسافر ... مش هنستسلم يا ملكة



الأوغاد والأوباش كلهم نفسهم نسيبهالهم ... يخربوها ويقعدوا على تلها ..... بس والله ( إن شاء الله يعني ) أبدًا ......


بوست حلو على فكـرة


إنتي من الأحرار يا ملكة ....


الاعتصام امبارح كان يكسف !!!

بس المقاطعة هي الحـــــل

Anonymous said...

انا جاليلو بصي انا كنت بفكر في اللي انتى قولتيه وبعدين افتكرت اني مش عندى بطاقة اصلا وانا عندى حساسية من الموظفين ونفضت

وجع دماغ said...

لأا أعتقد أت موريتانيا قد تقبل بنزوح أمثالنا الى أراضيها
موريتانيا الأن من الدول الديمقراطية أحنا فين وهيه فين
لأول مرة أومن أن المقاطعة فى هذه الحالة هى فعل سياسى أيجابى جدا
يبدو أننا داخلون على مرحلة مخيفة
ربنا يستر
وسلمى لى على أم فاروق

Music Gates said...

مع ان خلاص خلصت الحدوته في مصر المشئومه بس كان نفسي انصحيك انيك تروحي و تقولي لا
والف لا كمان لازم نعمل الي علينا نقول لا و لا معناها الرفض مش مقاطعه لاكن معني المقاطعه اننا بنوافق علي المهذله دي علشان سيابنهم علي الاقل يعملوا الي هما عايزينه

مَلَكة said...

عز
أولا اهلا بيك ولو ان الموضوع مش مناسب للترحيبات بس اهو يلا بقى
هو تقريبا الشخصية المصرية معمول لها عمل علشان متقدرش تخرج برة مصر
بس انا زيك برضو اوقات كتير جدا بتمنى اعيش في اي حتة تانية غير هنا
أي حتة اتعامل فيها معاملة آدمية على الأقل
وعلى رايك،مفيش فايدة

نورتني

مَلَكة said...

ابراهيم

سمعت عن الاعتصام وانه برضو كان يكسف
انما اهو حاجة وخلاص
يعني مش مشكلة حتى لو منظر
بس عيب أوي ميبقاش عندنا معارضة كمان
عشان تبقى كملت بقى

على فكرة انا على الساعة 9 الصبح
كنت قررت اني هروح واللي يحصل يحصل
ورحت فعلا وقلت لأ زي ما كنت عايزة

مش خانقني دلوقتي غير حاجة واحدة
الحبر القميء مش راضي يطلع من صوباعي:(

مَلَكة said...

جاليليو

يامراحب اهلا وسهلا
هو حساسية الموظفين دي سعادتك عندنا كلنا
خاصة وإنهم فعلا بينقوا موظفين سواء في القسم او في اللجان في منتهى الغتاتة والاستفزاز
لكن الشيء الجميل في الشخصية المصرية برضو مبدأها هو إن العند بالعند بقى
وللأمانة،مبدأ التناحة ده أعظم مبدأ تتعامل بيه مع شوية الموظفين اللي من النوع ده
أما بالنسبة للبطاقة الانتخابية فليه لحد دلوقتي مش عاملها؟؟
اعملها وخلاص يمكن يمكن يبقالها فايدة في يوم من الايام

نورت

مَلَكة said...

أحمد

آه والله تصدق؟
انا مفكرتش فعلا في احتمالية ان موريتانيا ترفضنا
بس وقتها هيبقى ليها حق يعني
ده احنا في حتة استفتاء لا راح ولا جه لايصين مش عارفين نعمل ايه
ما بالك بالانتخابات الرئاسية بقى

مش عارفة يا أحمد انا لما قعدت مع نفسي وقلبتها في دماغي طب ماشي المقاطعة حلوة وفعل سياسي بس هو احنا كنا بنعمل قبل كدة ايه غيرها اصلا؟
ما كل سنة كنا بنقول هي هي مفيش فايدة
وننفض للاستفتاءات والانتخابات وبتاع
يعني بنقاطع بس بسلبية
طيب دلوقتي نفترض اننا قاطعنا وبمزاجنا فعل ايجابي زي ما انت بتقول يعني
طب ماكدة بنسيبهم يعملوا اللي هما عايزينه بجد
سايبين لهم الفرصة يزوروا براحتهم ويملوا الخانات براحتهم
فين الفايدة بقى؟
عمتاً انا زي ما قلت قبل كدة،قررت اروح واشارك ولو 1%فيه احتمال الدنيا تمشي صح المرة دي

أم فاروق بتسلم عليك وبتقولك عشت يا أمير:D

مَلَكة said...

copa

مانا فعلا رحت وقلت لأ عملت بنصيحتك يعني:)
وبالظبط،المقاطعة معناها اننا بنقولهم اعملوا اللي انتوا عايزينه احنا مش هنتدخل
خاصة وان لا مظاهرات نافعة ولا اعتصامات ولا جنازات ولا اي بتنجان

سيدوفسكي said...

سلام عليكم

شوفي .. انا هانقلك تعليقي عن الموضوع في مدونة أخرى منعا للملل والتكرار .. الخ

موضوع التعديلات الدستورية ماكنتش اعرف عنه كتير برضه .. عرفت عنه قريب بس .. قريت عنه يعني

المشكلة الكبيرة في التعديلات دي ، أنها مرتبطة ببعضها .. بمعنى أنه مثلا اللى موافق على بند س أو ص لازم يوافق على بنود ع و ج ... الخ

يعني .. نظام مزج السم في العسل .. وعشان تذوق العسل لابد تتجرع السم معاه

بيتهيألي الأكثر صحة ، أنه يتم الاعلان عن تعديل مواد الدستور مادة مادة .. ويتعمل استفتاء على كل تعديل منهم بصفة مستقلة .. كده فعلا الواحد ممكن يستشعر مصداقية في التعديلات .. ولكن الوضع الحالي لا يبشر بكده

--------------------------------

وعامة .. أدي الاستفتاء خلص .. وزي مانتى عارفة أنه جاب جيد جدا

ونراك قريبا في الاستفتاء المقبل يا رفيقة

وسالخير

سوكــا said...

هو بعيدا عن فكرة اني اقاطع ولا لا وان في نيتي اني اقاطع والله
بس الله يجازيهم بتوع المشروع خلوا التسليم يوم الاستفتاء فاجبروني اني مش اروح حتي اتفرج
تعرفي يابت ياملكة علي ذكر الحبر
انا كنت ايام الانتخابات اللي فاتت باخبي ايدي طول ما انا بتكلم
كل اللي كان يشوف الحبر اللي في ايدي كان يسأل ايه ده ويقعد يتكلم ليه وعشان ايه وايه اللي وداكي والكلام اللي يخنق ويشل بتاع انتي لسه صغيرة عالحاجات دي
المهم ازيك
مش باينة ليه ... انا قلت اسلم بس
موااااااااااااه

سوكــا said...

اه نسيت اقولك ان البوست بجد رااائع

Anonymous said...

يخرب عكلك ياد يا بوب
لا تستاهل تتحط في الشخابيط
عن التعديلات الفسفورية كان اسلم حل اني انام منعا للإحباط او اني اولع في البرجين اللي فاضلين في المخ

اكتر حاجه تجيب شلل نصفي اللافتات اللي ملت البلد و كلها تأييد للتعديلات
مش فاهم الناس تقريبا الناس دي عايشه في جزر القمر

Yasmine Adel Fouad said...

يابت هيا ايه حكاية موريتانيا
هم بيوزعوا لحمة هناك ؟
كذا واحد بيقول موريتانيا بالتحديد
عموما اعرف واحد منهم عايز يعرف مكان السفاره

:)
ابقى قوليلى و انا اغششه