Sunday, March 18, 2007

نزيهة والانتخابات

نزيهة صحيت الصبح في مرة
لقت الدنيا كلها بتتكلم عنها
في الجرايد
"الانتخابات لابد وان تكون نزيهة"
في التلفزيون
"الاشراف القضائي لتحقيق انتخابات نزيهة"
وحتى في الشارع:ـ
نزيهة استغربت جدا من اللي بيحصل ده
وقالت أنا لازم أفهم هو فيه ايه في البلد وليه سيرتي بقت على كل لسان زي اللبان
نزيهة خدت مكروباص ولسة بتدفع الخمسين قرش لقت السواق بيقولها الاجرة 75
نزيهة بصت له وسكتت وطلع الربع جنيه بأدب واديتهوله
بعد شوية السواق متحركش
نزيهة اتكسفت تسأله احسن يزعل ولا حاجة
سألت الراجل اللي جنبها
قالها انه مستني الأذن من أمين الشرطة عشان يصبح عليه
نزيهة مفهمتش ايه المشكلة يعني لما السواق يصبح على الأمين وهو راجع
نزيهة سكتت وحطت مناخيرها في الشباك جنبها عشان ريحة السجاير بتاعة السواق
بعد ساعتين السواق وصل لحد شارع الجامعة وقال للركاب انزلوا كملوها مشي للجيزة
نزيهة عملت زي الباقيين ونزلت تمشي
نزيهة بصت فوق محل عمر أفندي لقت يافطة بتقول
نؤيد الرئيس
نزيهة بعد نص ساعة لف في الجيزة وبعد عينيها ما اتعمت من كتر قراية يفط النزاهة
نسيت هي كانت رايحة الجيزة ليه
نزيهة اخيراً قررت انها تروح القسم عشان تعمل محضر
للناس اللي اخدوا اسمها ومرطرطينه على كل حتة وكل لون
نزيهة راحت القسم و قالت للظابط اسمها
نزيهة مبقتش نزيهة بعد اليوم ده
نزيهة بقى اسمها دلوقتي:ـ

15 comments:

سيدوفسكي said...

سلام عليكم

ايه يا ملكة .. هو انتي أول مرة تعرفي ؟ .. انا كلمت نزيهة من فترة وهي قالت لي هاتروح تغير اسمها في السجق المدني وهاتخليه كوسة .. بس طمنتني أن الناس لسة هايفضلوا يندهوا عليها بإسمها القديم

زحل الفلكي said...

نزيهة هنا
ونزيهه هناك

وتعرفي
حتى لو كانت نزيهة

ربنا يعافينا ويخليها نزيهة لحد الاخر

وحسبنا الله ونعم الوكيل

معاذ رياض said...

نزيهة جالها عقد عمل وسابت البلد من زمان .. انتي أكيد ما أخدتيش بالك بس . تلاقي اللي انتي بتتكلمي عنها دي اختها التوأم فكيهة.

:-)

Ezzo said...

هههههه
بجد إفيه مش جديدإوي
بس انت عملاه صح
على فكرة هي مش لوحدها
اللي غيرت إسمها
شرف
كمان غير اسمه

Anonymous said...

انتى بنت زى العسل ودمك خفيف موت بس مش الحل انها تغير اسمها انا شايفه انها تولع في البلد احسن مش كده

Anonymous said...

انتى بنت زى العسل ودمك خفيف موت بس مش الحل انها تغير اسمها انا شايفه انها تولع في البلد احسن مش كده jaleo speaking

محمد ياسر said...

لا نزيهة ماتت من زمان الله يرحمها لدرجة انى نسيتها كانت عاملة ازاى نزيهة دى

ملكة said...

مهاب بيه
عليكم السلام

وهكذا هو الشعب المصري الاصيل
ثوري من نوع خاص
كوسة كوسة بس برضو هتفضل نزيهة
بس بلاش حكاية السجق المدني دي
الواحد جعان اصلا مش طالبة يعني
صوباع الخيييير

ملكة said...

زحل الفلكي

يا أهلا وسهلا يامراحب

ربنا يقومها ويقومنا بالسلامة جميعا
وتحيا نزيهة طول ما هي نزيهة
نورتني يافندم

ملكة said...

معاذ

ياراجل؟جالها عقد عمل؟
يا بختها
ماتوصيها علينا ياعم معاذ يمكن تجيبلنا معاها عقد لموريتانيا ولا حاجة واهو يابخت من نفع واستنفع

ربما اللي بتكلم عنها دي فكيهة اه او يمكن بنت عمهم"وطنية":D

نورت يافندم

ملكة said...

الاستاذ عز

مهو الافيه طبعا مش جديد
بقاله كدة بتاع تسع ست سنين بس:D
أو يعني تقريبا بقاله 25 سنة وشويتين
بس صحيح الحاج شرف غير اسمه لايه؟
"موافق"
؟؟

مشكرة على الرد يافندم تسلم الايادي

ملكة said...

جيليو
يارب يخليكي يارافعة معنوياتي دايما
هو انا برضو أرجح نفس الحل
طبقاً للمقولة الشهيرة
اياكش تولع

تسلمي على الرد يابوبة،نورتيني

ملكة said...

محمد
لا والله؟
حدش قاللي يعني انها انتقلت للرفيق الاعلى
يلا كلنا لها
وبعدين ما انت ليك حق برضو تنسى شكلها ايه؟
يابني هي مختفية اساسا من قبل ما احنا نتولد

مشكريين على الرد يافندم،منجيلكش في حاجة وحشة:)

أنـــا حـــــــــرة said...

ايه الابداع ده
طبعا مينفعش اقول كلنا نزيهة
بس اقد اقول ان نزيها بتبوس ايديكى وش و ضهر و بتقولك تسلمى يا فاضحاهم
و لو ان نزيهة ياعينى بعد ما غيرت اسمها كده اتمرمطت اكتر

انا شايفه انها تعمل عملية و تتحول لبرعى يمكن تفلح

:)

ملكة said...

برعي يا ياسمين؟
وتشتغل فين؟وتجييب فلوس تتجوز بيها منين؟وتصرف على البيت منين؟
ياشيخة ده وهي نزيهة أرحم