لأ مش اكتئاب ولا بتاع الحمد لله
ده مجرد مناقشة بسيطة للغاية
هات وخد عادي يعني
ومش هتطلع منها بكالو في نفسيتك
ولا تقليب مواجع ولا أي كولكيعة سيكولوجية
الفكرة في الثقة بالنفس
ممكن مثلا تبقى قاعد في مكان وفيه بنت هتموت وتكلمها
وتروح وانت واثق من نفسك كدة ومالي هدومك
تتحجج بأي حجة عشان تتعرف عليها
معتمد على وسامتك الملحوظة ولا أدهم صبري
وبعد محاولات ترجع مكانك الأول
قفا سعادتك-ولامؤاخذة-بيشجع الأهلي بجدارة
فين ياعم الثقة بالنفس الأولانية؟
الله يرحمها
مش عشان بنت واحدة يعني يبقى خلاص انت وحش
بتدن في مالطة طبعاً ولا حد بيديك ودنه
طيب تعالوا نبص الناحية التانية
بنوتة معجبة بشخص ما
(معلش أصل الناس بتحب على نفسها دلوقتي كتير)
وتقعد تحكي بالساعات على نظراته ليها
وانها بتشوفه في كل حتة بتروحها
وإن مفيش أي شك في إنه واقع في دباديب حضرتها
ثم إذ فجأتن تيجي يوم تلاقيه واقف مع واحدة
والمصيبة لو لقيتهم مرتبطين كمان
وبغض النظر عن الحجج اللي هتبرر بيها موقفها أدام الناس
جواها هي هتدور فكرتين
أنا مش حلوة زيها/أنا مستاهلش واحد زيه يحبني!
فين ياست المزمزيل ثقتك بنفسك؟
طب مش يمكن مكنش فيه حاجة أصلا؟
وكالعادة،تصدير ودن من طين والتانية من عجين
ثقتها بنفسها باي باي،وأهلاً بعصر من الشكوك النفسوية البحتة
والسؤال دوقتي:
ليه بنتعرض لصدمات في صميم جدار ثقتنا بنفسنا وقدراتنا لما نلاقي رفض من الآخرين؟
معنديش إجابة
قد أكون واحدة من الناس اللي سهل يفقدوا الثقة في نفسهم
بس على الأقل كنت بحاول أبنيها بنفسي طالما محدش بيديهالي
بحاول أبان قوية جداً وواثقة في رأيي وفيا ككل كما لا أثق في أي شيء آخر
إنما بقى تيجي لحظة ما زي النهاردة كدة
و بعد محاولات تفحيص وتمحيص جملة علشان أشارك بيها في المحاضرة
وبعد ما راجعت في مخي الجرامر سبعة وخمسين مرة
وبعد ما اتشجعت أخيراً وبعد طول انتظار إني أرفع صوباع سعادتي علشان أقول حاجة
وربنا فتح عليا الحمد لله بالجملة
أسمع رد ما من الصفوف الخلفية صاحبته بتقول:
إيـه الـعـبـط ده؟!!
للأمانة،عمري ما سمعت رد واضح وصريح زي ده أبداً
خاصة وإن مش أنا لوحدي اللي خرم وداني التعليق
وإنما بقية المدرج بأكمله
ويبدو إنها كانت واثقة في وجهة نظرها عن عبط رد سعادتي للدرجة اللي تخليها تقولها بمنتهى القوة كدة
هي دي الثقة بالنفس ولا بلاش!
المهم،وبغض النظر عن إن إجابتي بالفعل كانت غلط
الجملة دي عملت فيا حاجة غريبة جداً
صحتني من النوم الطويل اللي كنت فيه علشان أكتشف إني كنت بتظاهر بالثقة بالنفس
انها مكنتش بالفعل نابعة من جوايا بجد
والدليل:إني لسة فاكرة الجملة لحد دلوقتي و مش قادرة أتخلص من شعور الاحباط الجميل اللي وصلني بعدها!
فأنا وبكل العرفان بالجميل اللي اتعلمته في حياتي
أحب أتوجه بالشكر للآنسة صاحبة التعليق الرائع عن نظرية العبط التي أغرق فيها حتى أذنيّ
لأنها صحتني من نومي الطويل بوسيلة ربما أقل رقة من صوت العصافير بشوية صغيرين
وذلك عن طريق رش ماية ساقعة متلجة فوق دماغي!
***
بي إس:الدرس المستفاد من التدوينة الطويلة العريضة دي على القاريء استنتاجه طبعاً،انا مش هعمل كل حاجة يعني!
19 comments:
عمرك حسيت إنك ولا حاجة؟
طبعا حسيت!.. دي مرحلة أساسية في حياة كل بني آدم!..
الجملة دي هي اللي جذبتني ، لحد ما كملت البوست من غير ما أحس..
الإحباط في موقف زي اللي قلتيه ده سهل جدا.. لكن مش لازم تستسلمي له.. البنت اللي قالت كده إما مغرورة أو لامؤاخذة عبيطة.. وفي الحالتين هي تفكيرها سطحي.. أنا كنت من محترفي المناقشة في المحاضرات.. في البداية عانيت كثيرا من أمثال زميلتك الفاضلة دي.. لكن هدفي من المشاركة في المناقشات لم يكن الاستعراض ولا إثبات براعتي في الخطابة.. لهذا لم أتوقف كثيرا عند كل طوبة حجر تعثرت به قدمي...
اممممممممممممممم
جيت علجرح ياجميل
الثقة في النفس
شيء صعب جدا تكوينه اسألني انا
وخاصة اني ببروز الجمل اللي بتتقالي طول الوقت حتى لو كانت هزار
لدرجة دفعت صديقة ليا ان تنصحني بالعلاج النفسي لان دا من بوادر المرض النفسي
وطبعا صدقتها
ماهي واثقة جدا من رأيها
بس الموضوع دا بدأ يخف كتير مع الاصرار على الاستمرار
والتفكير ان كل الناس لا تملك ميزان تقسي به الاشياء وتصدر على اساسه الاحكام
الحل اللي لسه ما قدرش اقولك ايه هو
انك تستمري في المحاولة
في يوم هتلاقي نفسك واثقة فيها
تحياتي
أرد إيه ؟؟؟
اللي قلتيه ...كان كفاااايـــة :)
بس حلو اللف حوالين الموضوع لغاااية ما توصلي لمربط الفرس
على فكـرة بتعجبني ثقتـك ف نفســك :)
تحيااااااااتي
زمان
كان ممكن أقعد أعيّط أسبوع وأرفض الخروج من البيت لمدة شهر بسبب موقف زي ده
بس اتعلمت أكبر
أعلا عن الحاجات دي
وبمنتهى البجاحة أقول طظ
علشان لو وقفنا عند كل كلمة وصدّرنا حساسيتنا المفرطة دي
مش هانعرف نتحرك
ويكفينا فخراً اننا مش ممكن نجرح حد
أو نهز ثقة حد في نفسه
زي ما الأخت المذكورة عملت
تحياتي
شعور كلنا بيمر بيه ياملكة .. الفرق بس ان مش كلنا بنعترف بيه
وأحيانا ، والغريب .. أن كلمة صغيرة ممكن تبوظ على الواحد أيام كتير من تفكيره فيها .. وبالفعل بتضيع ثقة الواحد تماما
بس انا فاهم شعورك اللى دفعك تتكلمى فى المحاضرة .. كسر الخوف التقليدي من المواجهة لإثبات الثقة بالنفس
عملت شيء مماثل فى مرة .. بس مش فى المحاضرة .. كان فى زى مؤتمر كده أو اجتماع ما وكان فى العميد وكده .. ورحت قايم ومتكلم شويتين
المشكلة أن الواحد في مواقف المواجهة دى غدد اللعاب بتتوقف عن افرازه مش عارف ليه .. والواحد بيفضل واقف وريقه ناشف ومش عارف يتكلم
بس من الحين للآخر .. الواحد بيحتاج يشعر أنه "أحمق" بشكل ما
بصراحة حسيت كتير انى ولا حاجة
و حكاية الثقة بالنفس دى مهتزة جدا عندى برضه حتى ان لاقيتها فى اوقات بترجع تانى تروح
دافنشي
أهلا بيك أولا
هو المشكلة إن الموقف عرفني إني لسة سهلة الانكسار بسبب أي كلمة أو أي حاجة،ده اللي زود من احباطي بالاضافة طبعا لكلمة البنت اياها
هي ممكن متكونش لا مغرورة ولا عبيطة،احتمال كبير يكون ده كان رأي الباقيين برضو انما الفرق انهم كان عندهم شوية ذوق ومأعلنوش رأيهم اللي يجرح ده على الملأ
ووالله انا كان كل هدفي اني عايزة اشارك في المحاضرة فقط،اتناقش واتعلم مش لحاجة غير إني في كلية وده المفروض اللي يحصل يعني العادي
فكرتني بجملة نيوتن"وقفت على كل الاحجار التي قذفني الناس بها فاستعطت أن أرى ما لم يروا"
تسلم على الرد الجميل ده وشكراً لأنك شجعتني بكلامك ده بجد
هدهود الجميلة
بتضايق اما باجي على الجرح،بيوجع أوي
على فكرة أنا زيك في حكاية الجمل اللي مبتتنسيش دي
ومش قادرة اتخلص من فكرة ان الهزار دايما وراه جانب كبير من الحقيقة
بس معتقدش مرض نفسي زي ماصاحبتك قالت
اعتبريه عيب في الشخصية
زيه زي حد مبيقدرش ينسى أي حاجة غلط عملها وبيفضل طول حياته يأنب نفسه عليها
اسيبك انتي واستنتجي مين كدة بقى
المهم
الاستمرار في المحاولة مهم جدا
بس لما يكون بجد محاولة نابعة من جوة الانسان،مش مجرد قناع بيقنع الناس ونفسه انه هو حقيقته
هنا النقطة الأهم
نورتيني-كعادتك-وعايزة اشوفك قريب
ابراهيم
"بتعجبني ثقتك بنفسك"
أنهي ثقة؟
اللي هي مش موجودة ولا اللي كانت موجودة ومش موجودة بجد؟
عمتاً أنا اوعدك اما يكون فيه واحدة بجد وبحق وحقيقي،اخليك تعجب بيها زي ما انت عايز!
مشكريين على الرد،منتحرمش يافندم
أميرة
كلامك مليون في المية تمااام
بس متقوليش عليا متشائمة شوية
لما اقولك ان الواحد غاااالبا مبيلاقيش نفس المعاملة من الناس
ده في حد ذاته بيفقده الثقة في نفسه قبل الناس والله
عامة،انا فرحانة جدا بزيارتك دي،تسلمي على الرد يا أميرة:)
سيدوفسكي بيه
ازيك يارفييق،والعود أحمد(أو مهاب اللي يجيبه ربنا كويس)
مهو انا مكنتش بعترف بيه ودي المشكلة
يعني زمان اه كنت عارفة اني معنديش ثقة في نفسي
بعدها حاولت اقنع نفسي والناس بشتى الطرق إن لأ فيه ثقة وان الأمور كويسة
ثم أكتشف إذ فجأتن ان لأ الامور زي الزفت وكدة مش نافع اني اكتئب بسبب كلمة من واحدة
وادي الموقف اهو
بس للأمانة،وزي ما زعرورة الجميلة قالتلي،عدم الثقة بالنفس بيعدي
الناس اللي حواليك بتحس بيه وبالتالي بتتعامل على هذا الاساس
وطالما انت مش واثق في نفسك،عمر الناس ماهتثق فيك
1+1=2
وطبعا انت عارف اني اصلا في المواقف اللي فيها كلام ادام الناس ببقى اييه؟
سأسأ مأمأ بببب
حاجة كدة يعني
وطبيعي سعادتك ان الانسان يشعر بالحمق وقت ما بس مش على طوول يعني عشان كدة مش كميل اطلاقا
نورت وابقى تعالى كل يوم
محمد ياسر
ايه يابني حمد الله على السلامة محدش بيشوفك ليييه؟
زميييل يامحمد،نفس الموضوع
طب ما تشوفلنا داكتور نفسوي نروحله سوا يمكن ربنا ينفخ في صورتنا وترجع لكل واحد فينا ثقته تاني
تسلم على الرد يافندم،ومتغيبش تاني
الدرس المستفاد فى رأى هو
عدم حضور المحاضارات مع شخصيات سمجه وغبية ذى اللى قالت التعليق
الثقة بالنفس تنبع من أحساس الأنسان الذاتى بقدرته على الفعل (كلام كبير مش كده...بس حقيقى)
باكرة النوع دة من البشر اللي حاسيت بالتعالي وشايفين كل الناس التانية بالنسبة لهم تحت
حتى لو كانت جملتك غلط من الناحية الجرامارية تلزمها ابسط قواعد الذوق و الادب ان تلزم الصمت كي لا تربكك بتعليق صفيق تصفعك بة وتزيد من توترك
كان يجب عليها ان تتذكر انها في مدرج جامعي في الاساس كي تتعلم وانك انت الاخرى بذاك المكان لنفس السبب فهو ليس قاعه لمؤتمرات الامم المتحدة
تحياتي
أحمد
حمد الله على السلامة يافندم بقالك كتير مختفي لعل المانع خير :)
ماهو لو أنا محضرتش محاضرات مع شخصيات من النوعية دي
يبقى ان شاء الله كدة هقعد السنة كلها في بيتنا!
أنا بقترح إن أي شخص بيحاول يسفه من الآخرين ويقلل ثقتهم بنفسهم يتحط في اماكن يكون فيها نفس نوعيته عشان يدوق اللي بيدوقه للناس
هو ده العدل ولا بلاش!
وكمان فيه نقطة مهمة
مش كفاية الاحساس بالقدرة على فعل الشيء فقط علشان تتولد الثقة بالنفس
عمل الشيء فعلا بطريقة ترضي الانسان نفسه بيديه ثقة بنفسه كبيرة
نورتني يا أحمد تسلم على الرد
الحصان الأسود
يبدو إن التدوينة دي فاتحة خير على المدونة، كل الناس الغايبين بقالهم كتير بيرجعوا أهو، ياكريم يارب:D
هو الجملة اللي قلتها مكنتش غلط من الناحية الجرامرية إنما لأنها مش الإجابة على السؤال المطروح وقتها
بس الغريب إني يادوب قلت الجملة من هنا ودي لاقيتها طلعت بالرد مرة واحدة وقبل حتى ما اشوف اجابتي صح ولا غلط
ولو على مسألة الذوق فدي أنا تقريباً بترحم عليها من ساعة ما دخلت الجامعة
نقرالها الفاتحة بقى!
ميرسي جدا لردك ونورتني
ساعات باقول علي نفسي عندي ثقة في نفسي فزييييييعة
وكتير باقف عند مواقف وتقابلني مواقف
الاقيني فيها بطة بلدي
حلو الموضوع ياملوكة
هلا حبيبتي
مدونتك أعجبتني جدا
أعجبني فيها الروح الحماسية الواضحة والشفافية و(( خفة الدم ))
بالنسبة لهذا الموقف .. من الطبيعي أن نصاب بالاحباطات الشديدة خااااصة بعد أن نكون قد تيقنا بنسبة 85بالمئة من النجاح
لكن .. بفضل الله ,, سرعان مانستعيد توازننا بعد فترة لابأس بها من الراحة
سنة الله تعالى في الكون
وإلا ماشعرنا بقيمة الابتلاء ولاتعلمنا فلسفته .. في مثل هذه المواقف تكون التمحيصات ويعرف المرء قدر نفسه وقوته الحقيقية ومدى صبره على أذى الناس ,,
وفقك الله وحماك بنيتي ^^
هلا حبيبتي
مدونتك أعجبتني جدا
أعجبني فيها الروح الحماسية الواضحة والشفافية و(( خفة الدم ))
بالنسبة لهذا الموقف .. من الطبيعي أن نصاب بالاحباطات الشديدة خااااصة بعد أن نكون قد تيقنا بنسبة 85بالمئة من النجاح
لكن .. بفضل الله ,, سرعان مانستعيد توازننا بعد فترة لابأس بها من الراحة
سنة الله تعالى في الكون
وإلا ماشعرنا بقيمة الابتلاء ولاتعلمنا فلسفته .. في مثل هذه المواقف تكون التمحيصات ويعرف المرء قدر نفسه وقوته الحقيقية ومدى صبره على أذى الناس ,,
وفقك الله وحماك بنيتي ^^
Post a Comment