Saturday, February 03, 2007

تاج ، يتيج ، فهو متدبس

سالخير عليكوا
.
لسة عارفة امبارح بس بالصدفة البحتة إن الباشمهندز ياسر مرر لحضرتي تاج محترم وطبعاً عشان عيب يعني أكسفه وأكسف الجمهور الحبيب اللي متشوق يعرف عني خمس حاجات من أسراري العسكرية الأمنية فأنا هتدبس واعمل التاج...هيصوا بقى يلا
.
أولا:جدير بالذكر واللي محدش يعرفه لحد دلوقتي إن التاج المتين ده هو أول تاج يوصلني من ساعة ما عملت المدونة وده إن دل فيدل على إن أصبحت شخصية مشهورة في المجتمع التدويني أو يدل على إن ياسر غاوي أذية لخلق الله اللي يعرفهم:D
..
ثانياً:امممم الواحد برضو مش عايز يسيح لذاته أوي يعني،بس ممكن مثلا تعرفوا إني مبحبش مادة اللغويات اللي عندنا في القسم والسبب بسيط إني مبذكرهاش أساسا وطبيعي إني مبجيبش فيها أكتر من مقبول كل سنة،زيها برضو زي الرياضيات في كل مراحل حياتي كنت فاشلة فشل ذريييييع فيها ولحد دلوقتي لو ركبت مكروباص وحد اداني الم الاجرة بدبس اللي جنبي فيها بدون نقاش، المعلومة دي بتوضح طبعا إن العباقرة لازمن يبقى عندهم حتة كدة يعني الاستثناء الذي يؤكد القاعدة مش أكتر
...
ثالثا:أنا فاشلة برضو في الطبيخ("مبعرفش أطبخ" يعني عشان زعرورة متزعلش) ،بعرف يعني أعمل حاجات بسيطة إنما المحاشي والبشاميل والحاجات الحلوة دي ولا ليا فيها، بس انا ناوية اتعلم يعني اما يبقى اسمه ايه ده ييجي هتطحن في المطبخ بكامل إرادتي الحرة المستقلة جدا فياريت لو حد عنده أمل يتجوز واحدة بتعرف تطبخ من بتوع دلوقتي يروح يجيب له واحدة فليبينية أفيد له
....
رابعاً:أنا فوضوية غالباً بس ساعات بيطلع في دماغي وأوضتي تبقى نضيفة لمدة يومين كدة ولا حاجة وبعدين ترجع لعادتها القديمة تاني يعني ساعات الفوضوية وعدم النظام بيحسسك بألفة بين المكان اللي انت عايش فيه ده غير إنه بيقوي حاسة البحث عندك عشان تطلع شيء ما من بين أنقاض الهدوم والمذكرات وما إلى ذلك
.....
خامساً:السر الأخطر بقى،أنا مبحبش أتواجد في أي نوع من الاجتماعات او الزحمة،بتوتر جدا و باخد اي ركن على جنب لحد ما اروح بيتنا،تقدروا تعتبروني متناقضة لأن أحياناً وانا قاعدة لوحدي بتمنى اكون مع ناس ووانا مع الناس ببقى هموت واقعد لوحدي واسيبهم
.....
هييييييييييييييييه خلصتهم خلاويص،وحان الوقت إني أضحك ضحكة من نوعية "نياهاهاها" وأمرر التاج لحد غيري بقى
والتاج مفتوح لأي حد غاوي تسييح لذاته عشان يعمله نحن نؤيد هنا الديموقراطية بشدة وتحتها كسرة،فوتكم بعافية

5 comments:

إبـراهيم ... said...

هههههههههههههههههههههههههههههه


بجد نفاجأة فزييييييييعة ، هوا غالبًا علياء ( بتاعة المرتفعات ) هيا اللي هتتيج ع التاج الدواااااار ده ، أحب أقول لك زي ما قلت للباشمهنز ياسر إن نفس التاج جه اتبعت لي من بيسو ، وقلت لها مش هعرف أرد عليه !ّ!!!! ( حتى الآن يعني ) ، ومن ياســــر ( وبعدين بنباهتك كده ماهو باعتهولي ف نفس الصفحـة ) إنتو متفقين عليا ، ولا إيه ؟؟؟؟


هوا أنا أبدو صاحب أسرار كثير للدرجة دي ؟.؟؟


بس الحق يتقال إجابات ذكية جدًا ، وفتحتي نفسي إن أجاوب ع الأسئلة ، يعني مش أسرار قوي ولا حاجة !!!
على فكـرة ده ذكاء إبداعي يا ملكة


جوووووووووو أون


تحياتي

حدوته مصرية said...

حاسس انك ضحكتى على الناس والقراءبالخمس حاجات بتوعك دول
لا هو مش احساس ده اللى حصل فعلا
ينفع كده؟؟

مَلَكة said...

ابراهيم اللي معاه
هو اكيد انا مخدتش بالي ان ياسر متيج حضرتك
العتب على الحول زي ما بيقولوا
بس اه تصدق انا شريرة وحبيت برضو ادبسك في التاج اشمعنى انا يعني؟
ومادام فتحت نفسك تجاوب عليهم
امال انا مشوفتش النفس دي لحد دلوقتي؟
لسة مقفولة ولا ايييه؟
وبعدين ذكاء ابداعي ايه بس؟
ده انا كدة افشيت اهم اسرار دولتي يعني المخابرات بتاعتي هتروح تبيع فجل ع الناصية بعد كدة
مشكريين على الرد يافندم


محمد ياسر

لا مينفعش خالص بتاتا
كلا الفتة
أنا أحتج
وأطالب ب
أطالب باييييه؟اطالب بايه يابت ياملكة؟؟؟(سمايلي بيهرش في دماغه)اممم
اطالب ان اللي مش عاجبه الردود بتاعة التاج ده يعمله هو ويوريني الاسرار تبقى ازاي:D
منور يامحمد ابقى تعالى كل يوم

shady said...

بذمتك دي أسرار دي .. ما علينا .. بالتأكيد أنا متفق مع محمد ياسر .. لسه في حاجات كتير متدراية .. اطالب بإعادة التصويت وإشراف هيئة محايدة علي الأسئلة

مَلَكة said...

شادي
ده بمناسبة الانتخابات ولا ايه النظام؟
عموما انا هجيب لجنة من ال"قلل"المتحدة تشرف على اجابة الاسئلة بتاعة التاج الجاي
ده لو فيه تاج أصلا
فوتك بعافية ياريتشارد،سلملي على فرجينيا بقى:D