Tuesday, February 20, 2007

في الغالب..هتعود

خبرتي في الحياة لو قيسناها من عشرة هتطلع3/10

منيش كبيرة في سني وساعات بكون طفلة في كل حاجة،في أحلامي وفي احزاني وفي افكاري حتى في طريقة تعاملي مع الدنيا

كل اللي شوفته ومريت بيه بالنسبة لي كتير

لكن بالنسبة للدنيا واللي فيها ميعديش عشرها

بس اللي انا متأكدة منه وعندي الشجاعة أراهن عليه بحياتي

إن الحزن ما بيدومش للأبد

الاكتئاب مرض أيوة،

لكنه مش غريزة ولا عضو في جسم الإنسان علشان يفضل معاه لحد ما يموت

لو في يوم حاجة ضاعت منك متزعلش

ولا اقولك ازعل بس مش أوي

وعيط كمان لو طلب الأمر البكا بيريح كتير

بس متكتمش الحزن جواك

متعتبرهوش اخر الدنيا أبدا

مش يمكن اللي ضاع منك يكون مش ليك من الأصل؟

مش يمكن لما ضاع كان افضل؟

ويمكن ويمكن ويمكن مين يقدر يجزم بحاجة ميعرفهاش؟؟

لو منجحتش في حاجة برضو مهياش اخر الدنيا

الحياة مش دايما عادلة زي ما انت فاهم

ومش المفروض تباركلك كل خطوة بتمشيها

مرة كدة ومرة كدة

ليه لما بتنجح بتفرح دقيقة

ولما بتفشل بتحزن كتير؟

ليه لما بتقع مبتفتكرش انك من دقيقة واحدة بس

كنت واقف على رجليك وبتمشي؟

لو فقدت حد عزيز عليك

قول"انا لله وانا اليه راجعون"،قولها كتير

قولها علشان تفتكر اننا مش دايمين

وان الأصل في الآخرة مش في الدنيا

وإن ربنا أرحم من البشر بكتير

قولها علشان تقول لربنا إنك مش معترض على حكمه

وإنك عارف إنه غفور ورحيم وعادل في كل شيء

لو عايز تبكي ابكي

بس افتكر ان دموعك مش هتمنع شمس تاني يوم انها تطلع

ولا هترجع اللي مات

وافتكر كمان ان بعدها بسنة

يمكن تكون بتضحك على مشهد صغير من قلبك

كل شيء يبدأ صغيراً ثم يكبر إلا الحزن فإنه يبدأ كبيراً إلى أن يتلاشى

افتكر كمان ان مهما بلغ حجم حزنك

فيه غيرك صابر مع ان همومه اكبر بكتير

أما لو الأمل ضاع منك في يوم

اوعى تبات ليلتك من غيره

دور عليه في أي حاجة حواليك ورجعه

أي حاجة مهما كانت صغيرة

اي حاجة مهما كانت سهلة

لو في ابتسامة،في كلمة حلوة من حد

في ذكرى حلوة منسيتهاش

في نكتة حتى سمعتها وضحكت من قلبك عليها

متسيبش الأمل يتسرسب من بين ايديك أبدا

لأنك مش عارف بكرة فيه ايه

لأنك متقدرش تشوف الناحية التانية من كف ايديك في نفس الوقت

اما لو اتظلمت في يوم

متنساش ان ربنا مبيرضاش بالظلم

وان الحق مهما اتأخر لازم يرجع لاصحابه

متنساش أبداً ومهما حصل إن ربنا مبيسيبش الظالم على طول

***

أنا عارفة إن أي حد متضايق لو قرا الكلام ده هيعتبره كلام انشائي أو كلام من بتوع الجرايد لا بيودي ولا بيجيب وهيقول اصل اللي ايده في المياه مش زي اللي في النار بس صدقوني الحاجة الوحيدة اللي بنتشابه فيها كلنا الإنسانية والبوست ده مش حكم ومواعظ لأني بكره الحاجتين دول جدا ،البوست ده علشان افكر نفسي قبل أي حد تاني إن ربنا موجود دايما،موجود جوانا وان الحياة مهما عملت فينا لازم هتتأسف لنا ولو مرة واحدة، لازم هترجع لنا سعادتنا اللي اخدتها مننا في يوم من الايام لأن اللي بيعوز حاجة أوي وبيتمناها بكل مشاعره لازم تتحققله في الآخر اشمعنى يعني بنصدق بس ان اللي يخاف من العفريت بيطلعله؟؟؟

دمتم بكل ود وسعادة:)

***

13 comments:

متغيرة شوية said...

طب كلامك جميل ، لكن زي ما انت قلتي صعب تطبيقه
تعرفي حتى ساعات لو حصلتلك حاجة تزعل وانت مزعلتيش بتعتبري نسك عديمة الاحساس
يعني ساعات الحزب بيبقى صحي علشان تعرفي تفرحي.
كان نفسي اسمع الاغنية لكن انت عارفة كارت الصوت الله يحرقه

.:.-=- ELGaZaLy-=-.:. said...

وإن ربنا أرحم من البشر بكتير

قولها علشان تقول لربنا إنك مش معترض على حكمه

وإنك عارف إنه غفور ورحيم وعادل في كل شيء

لو عايز تبكي ابكي

بس افتكر ان دموعك مش هتمنع شمس تاني يوم انها تطلع

ولا هترجع اللي مات

وافتكر كمان ان بعدها بسنة

يمكن تكون بتضحك على مشهد صغير من قلبك

كل شيء يبدأ صغيراً ثم يكبر إلا الحزن فإنه يبدأ كبيراً إلى أن يتلاشى


---------------------------


بجد حطيتى ايدك على الجرح...ممتاز


الاهم من دة كلة لما تفشل اعرف انك فى اول المشوار وانة مش هايخلص لازم تفشل علشان تحس بطعم النجاح

قيم نفسك وشوف اية مميزاتك واية عيوبك وحاول تتلاشى عيوبك او تحبها

ابداء بنفسك

اتغير

وعجبنى الجزء الايمانى الى فوق دة اوى بجد

إبـراهيم ... معـايــا said...

طبعًا أشكرك
بشدة على هذا الموضوع الذي كتبته بقلبك وإحساسك الصادق جدًا ....

مش عارف عندي بس تعليق على فكرة الخبرة ف الحياة ، وطريقة قياسها !!!

susan said...

من اهم النعم وافضلها على الأطلاق هو وجود ربنا في حياتنا ده بيخلي قلبنا مطمن انه معانا، بيحمينا حتى من نفسنا وبيدينا كل الي في خير لينا و لو ضعفنا بيقوينا
اشكرك يا ملكة على كلامك الإيجابي الي يمكن ما نقدرش نطبقه كله بس وجوده قدامنا دايما بيخلينا نحاول نطبق ولو جزء منه

مادو said...

أنا و لأول مرة ( تحسب في التاري يعني) أوافق غبراهيم في إن ليا برضو تحفظ في فكرة الخبرة
كلامك صح تماما لكنه السهل المتاح سهل ف نطقه صعب جدا في تنفيذه
أعتقد ان الحزن تراث مصري تتوارثه الأجيال ( عايزة إيه من شعب محتل من أيام لفراعنة لحد دلوقتي ؟؟؟!!! )

shady said...

طبعا أول حاجة شكرا علي النصايح

ثانيا .. أهم حاجة ما تنسيش نفس الجمل دي لما تكتأبي انتي شخصيا

ودمتم

Hamed Ibrahim said...

كلام جميل يا ملكة
أنا شدني العنوان طبعا خصوصا إنه بتاع وجيه عزيز
بالمناسبة أنا هاعمله موضوع قريب جدا ع البلوج .. إن شاء الله يعجبك

أنا رأيي إن كلامك ده سليم جدا ..
بالعكس ياريت الكل يعرف يطبقه
بس ده في حالة واحدة لو ماكنش التقصير مننا
لو الدنيا فقط هيا إللي لعبت بينا
لكن موضوعك ده ياريت ما يكنش دعوة للتواكل على الظروف وعلى القدر
نأخذ بكل الأسباب .. ونجتهد وما نيأسش
علشان ممكن نوصل
ولوما وصلناش
نبقى حاسين من جوانا إننا عملنا اللي علينا
!!

تحياتي

هدى said...

عارفة ياملكة احلى حاجة في الموضوع دا ايه

ادراكك ان احيانا الكلام مش بيبقى هو المفتاح السحري لحل مشكلة الحزن والالم جوانا

اقولك حاجة احلى

كتير حزننا بيعلمنا ازاي نعيش حياتنا بطريقة صح

تحياتي

ملكة said...

سلمى
اللعنة على كارت الصوت للمرة المليون
ماعلينا
الحزن يبقى صحي لما يكون حالة طارئة وتستدعي فعلا الحزن
انما ميكونش ملازم للانسان طول حياته على الفاضية والمليانة
ميرسي على الرد ياسلمى
...

الغزالي
كلامك صحيح مليون في المية،التغيير أهم شيء
انك تتغير عشان انت عايز تبقى احسن
مش علشان ترضي حد او تغيير يكون مؤقت
نورت ومشكرة جدا على الرد
...

ابراهيم
طيب مقولتش اعتراضك ليه؟
عامة مستنية وجهة نظرك في موضوع لخبرة الحياتية ده
وتسلم على الرد
...

سوزان
بالظبط وأهم حاجة لما نحزن نلجأ لربنا
على الأقل مش هيخذلنا لو دعينا انه يقوينا ويدينا لصبر
ميرسي سوزان ونورتيني
...

مادو
أولا مبروك على المدونة:)
ثانيا يبدو إن دوري في التاريخ آن أوان تسجيله باعتباري وفقت بينك وبين ابراهيم في رأي ما(ألف ألف مبروك)

اما بالنسبة للتطبيق
فهو صعب طبعا مأنكرتش
بس زي ما د.هالة(دكتورة في القسم عندنا من القلائل اللي بحبهم) قالت لنا قبل كدة
Nobody can make you sad without your consent
مينفعش تحزن من غير ما يكون عندك الاستعداد انك تدخل في حالة الحزن دي
والعكس صحيح
الواحد يبقى عنده الاستعداد يتخلص من حاجة بجد وأكيد هيقدر في النهاية عليها
ولو محاربتش علشان سعادتك الشخصية طب هتحارب ليه ولمين؟
مشكرة محمد على الرد والزيارة نورتني
...

شادي
العفو بس دول مش نصايح

بالمناسبة انا كاتبة ان البوست ده كتبته علشان أفكر نفسي قبل أي حد تاني
تسلم على الرد يافندم
...

حامد
ماهو انا اما اتكلمت في البوست كنت بقول عن الحاجات اللي لا يد لنا فيها والقدر هو اللي بيتسبب فيها وبتضايقنا
انما لو المشكلة فينا احنا
ماخلاص بقى يبقى احنا السبب واحنا ادرى حد بحلها
وأهم حاجة(في الحالة الأولى)زي ما انت قلت
نعمل اللي علينا
يمكن يكون ده السبب في اننا نرتاح في الآخر

وبما ان وجيه جه في الموضوع
يارب تكون الأغنية عجبتك:)
شكرا جزيلا على المرور الرد ياحامد
...

هدى
الكلام بيحط ايدينا على جرس الباب بس
صوابعنا بقى دورها انها تدوس عليه
لو بالكلام بس يبقى عمرنا ما هنسمع صوت
اما بالنسبة لان الحزن بيعرفنا ازاي نعيش حياتنا فدي اختلف معاكي فيها
أقولك مثال غريب شوية
الحزن ده عامل زي الجزمة القديمة اللي اتعودت عليها مع انها مبقتش عاجباك
ولما تروح تقيس جزمة جديدة حلوة(السعادة)
يمكن تضايق حتى وانت لابسها وترجع بسرعة للي اتعودت عليه
وصلت؟
تسلمي على الرد ياهدهود

منشورات ممنوعة من النشر ! said...

Life is Not fair i agree 100 %
bas el 7agat elyb et2oleha dy el wa7ed bayktsbha ma3a el wa2t we dah 7asb 7asasyt el ensan

هيما said...

مكنتش أعرف إن ( ف الغالب هتعود ) أغنية لوجيه عزيز !

ملكة said...

صاحب المنشورات(هتودينا في داهية ياعم)

شوف،هو مادام بنكتسبها مع الوقت يبقى كل ما نتعود عليها اكتر وكل ما نحاول نطبقها في كل موقف مهما بلغت درجة سوءه فده بالتأكيد هيكون بالنسبة لنا افضل
يعني،بالتعود الواحد يتعلم يتعامل مع مشاكله صح
من غير اكتئاب ولا اعتزال الدنيا وكدة
انا مش بقول انه مش هيحزن
إنما مش هيموت من الحزن،وصلت؟
نورتني يافندم

ملكة said...

هيما

زورونا تجدوا ما يسركم:D