Monday, December 04, 2006

هانهار ع الكرسي يا مورسي

بيقولك ايه بقى ...شر البلية ما يضحك

وكما قال المتنبي -ربنا يبشبشها تحت راسه-"وكم ذا بمصر من المضحكات ولكنه ضحك (إهيء) كالبكا" و"إهيء"دي من عندي لزوم المؤثرات الصوتية يعني:(

من كام يوم طلعوا لنا في الكلية إذ فجأتن بفكرة غريبة،قال إيه عايزين يعملوا لنا امتحان"ميد تيرم"في مادة غريبة عجيبة اسمها الكمبيوتر واللي له عنين وعدى على البروفايل بتاع حضرتي هيلاقي اني في كلية اداب

يعني كلية نظري،يعني ملناش في حوارات الميد تيرم دي،يعني الامتحان ده استعباط

وسمعنى سلام"استهبال واهي ناقصاه"يا جدع

المهم

حاولنا نقولهم ان اللايحة"اللي هما كانوا مصدعينا بيها ليل ونهار"بتقول ان معندناش امتحانات اسمها ميد تيرم وان طالما متمسكين باللايحة حتى لما بنشتكي لكم من قلة الحمامات في الكلية(لامؤاخذة)يبقى تطبقوها في كل حاجة بقى

كالعادة

وعشان اللي فيه داء مبيغيروش

تم تطبيق نظام"التنفيض التام أو الموت الزؤام"،وبفضل خصائص مستحدثة في الجنس البشري المصري بالتحديد تم تصدير الطارشة بودن من طين وودن من عجين

جدير بالذكر يا بشر وبعد أن حطيناها في بوقنا وسكتنا(عارفينها طبعا) لقينا إن مفيش كتاب للمادة أو فيه والدكتور لسة ملمش فلوس كفاية عشان يطبعه او الجمعية لسة دوره مجاش فيها عشان بيقبض الرابع باين المهم تعددت الاسباب والكتاب...مفقود مفقود ياولدي

طب هنمتحن في ايه ولامؤاخذة؟!(وش واحد مذبهل)

وعشان منرغيش كتير بقدرة قادر حصلنا على الكتاب قبل الامتحان بيوم و ناس أخرى بمعجزة ما حصلت عليه قبل الامتحان بساعة واحدة فقط لا غير

دخلنا المدرج لقينا خير اللهم اجعله خير أمة لا اله الا الله!!!

البشر دي كلها انبثقت منين؟!!ده بالتيلة ايام المحاضرات كان المدرج فيه بتاع 100 واحد من 3 اقسام!!كله بقى قال امتحان يبقى نحضر ونشوف الليلة فيها ايه بالظبط

وبسبب هذه الأعداد الغفيرة المدرج كان على آخره ومفيش مكان لوزة عرجة حتى تقعد فيه

طب وبعدين؟هنقعد فين؟على الارض؟!!ويبدو أن الواقفين فكروا في نفس المكان الاستراتيجي ده في وقت واحد فكله بقى بيحاول يطلعله بحتة من البلاط يقعد عليها وكأنها إنجاز

ولأننا معتبرين إن مسألة وجود مكان لينا نقعد فيه دي مسؤولية الدكتورة(سذج احنا والله) قولنالها مفيش مكان نقعد فيه

أول مرة عملت نفسها مش سامعانا،تاني مرة قالت لنا شوفولكوا حتة اقعدوا فيها،تالت مرة قالت لنا هاتوا كراسي من برة اقعدوا عليها

خرجنا كالملهوفين ندور على كراسي هنا وهنا..مفيش،بدأنا ندور جوة المدرجات واخيرا لقينا مدرج فاضي جواه كراسي،لسة بنجر كرسيين لقينا الساعي بيزعق وبيشخط و"لأ مش هتاخدوا الكراسي"!

ياعم طب هنقعد عليهم ونرجعهم والله،وده راسه والف سيف انه ابدا مش هناخدهم،زي ما يكون حالف طلاق تلاتة ماهو مفرّط في رجل كرسي حتى!

طب نعمل احنا ايه؟ لقيته بيقولنا روحوا خدوا كراسي من العميد!....نعم يا خويا؟؟!!!! (واحد مذبهل وبوادر البلطجة عليه)

عشان نلاقي مكان نقعد فيه نروح للعميد يدينا كراسي ازاي يعني؟!

نعمل يعني طلب احاطة وعليه دمغة بجنيه ونص وختم النسر وامضاء اتنين مطحونين اننا عايزين كراسي نقعد عليها في المحاضرة؟؟؟!!!!

وده مفيش تفاهم نوهائي معاه،اخد مننا الكراسي ومتبت عليهم بايديه تقولشي ولاده!

مع إن أبسط حقوق الطالب-ده لو كانت البلد دي بتعترف بكلمة حقوق اصلا-انه يلاقي مكان يتعلم فيه،وانه يلاقي مكان يقعد فيه براحته علشان يعرف يتلقى المعلومة(مش بقولكم سذج؟)

ياعم ده احنا رضينا بالارض وملقينهاش طب نعمل ايه بعد كدة؟نشتري للمدعوقة الوزارة كراسي على حسابنا بقى ولا ايه؟اهو ده اللي ناقص يا وزارة مفيهاش كراسي! (نظرة ازدراء واشمئناط)

موقفه ده فكرني بالست اللي حكيت عنها في موضوع بريزة الاتوبيسات لما قالت للسواق"روح فك من المحافظ وهاتلي ال15 قرش بتوعي"

في الاخر رحنا بحثنا ومحصنا عن خرم ابرة يلمنا نمتحن فيه ونروح بيوتنا وتتحرق المحاضرة باللي فيها بقى!

بس بالذمة مش دي حاجة متتعقلش يعني؟ماهو لو اللي بيعملها مجنون فانا بقى لسة فيا ربع مضربش ومش مستوعب المنطق والميكانيكية وراء هذه الاستعباطات اللي بيعملوها!يعني رضينا بالهم (التعليم)والهم مش راضي بينا!؟!

منكوا لله يابعدا خليتوني أفرج الخلق عليا عشان كرسي يتيم،ولا خلاص الدعا عليهم مبينفعش، من كتر ما الناس بتدعي وبرضو مبيجراش حاجة هضطر أقول لكل واحد بعد كدة "ابقى اتوضى قبل ما تدعي يا شيخ عب باري"!!

9 comments:

إيمان الميهي said...

ههههههههههههههههههههه

قولي : حسبنا الله و نعم الوكيل يا ملكة
و الله أعلم السبب من مين بالظبط بقى " وش بيغمز "
ابقي شوفي لي مع المحافظ فكة جنيه :)

Yasmine Adel Fouad said...

ههههههههههههههههه
على فكرة يا موكى
الأسام دى هتبقى أحلى أيام بعد كده
مش هتقولى ياريت ترجع بس هتضحكى لما تفتكريها و على فكرة احنا عندنا ساعات كانت بتحصل ازمات رغم الكراسى والمدرج الكبير والأرض و تلاقى ناس واقفة بس ده فى المواسم و امتحانات المدرجات المسماة quizz

صلى ع النبى
والله الموضوع كوميدى بلاش النرفزة دى
علشان ما يطقلكيش عرق
الا صحيح انتى لسه عندك عروق ما طقتش يا شابة ؟

متغيرة شوية said...

طب يا بنت يا ملكة ، بعد كل العصبية اللي انت فيها دي اذكري الجزء المملوء من الكباية
الامتحان طلع هايف بصراحة، وحتى اللي خدوا الكتاب قبل أقل من ساعة من الامتحان ( انا طبعا) عرفوا يحلوا

لأ والذيذ ان الامتحان كان عشر دقايق بس بعد كده رمينلها الورق ومشينا ..قعدت تتحايل علينا نعد شوية نشو حلنا صح ولا غلط قمت انا بصيتلها شذرا وقلتلها لأ خلاص
يعني ذليتهالك اهو يا كوكي

صــ خ ـــب شـــيماء said...

هههههههههههههههههههههههه
يااااااااااه يا ملكه انتى مدايقه علشان كدا... انتى أكيد مش فى جامعة إسكندريه علشان كدا مستغربه الوضع .. والله الحاجات دى عندنا عادى جدا

على فكره انا كمان اداب فىا لليسانس خلاص بس اتعودت من سنه اولى يمكن فى البدايه استغربت وبعدين أصبحت متعووووووده

يعنى انتوا مدرجوا شكلوا كبير .. إحنا ولله الحمد الكليه كلها على بعضها مافيهاش غير مدرجيين يوما مانأخد محاضره فيهم يااااااه بيكون ولا كإنه فرح لكن فى العادى بنأخد بالظبط فى قوضه صغيره كدا تقريبا 10 متر فى 10 متر بالكتير اوى يعنى وبابها صغيييييير ومن ضمن ال10 متر دول ان ماكانوش أقل احسبى مربع كدا حوالى مترين فى متر لطربيزه معفنه كدا وكرسى للدكتور !!!

بنقعد على كراسى عاديه ونكتب على رجلينا!! ( ده العادى والطبيعى) فيه بنات لو مالاقتش اماكن عادددددى تتعلق على الشباك وتقعد عليه ( حب للعلم بقى )المهم ان الاماكن ضيقه جدا أفتكر كنت زمان لما كنت بحضر واكتب وكدا كنت بروح قبل المحاضره بساعه كامله او اكتر علشان ألاقى كرسى يوحد ربنا أقعد عليه

مممممممم نظام الميد تيرم ده مطبق عندنا من زمان اووووى من قبل ما ادخل الكليه تقريبا لأنى من سنه أولى وأنا بمتحن ميد تيرم شفوى بيكون فى مادتيين وبيكون يوم صعب جدا لأنك بتكونى ولاكإنك رايحه تحضرى الدكتوراه والدكاتره بترخم اوى وبيسألوا أسئله رزله زيهم كدا بس ربك بيسترها والحمد لله

مممممممممم العملى ده بردوا موجود عندنا ( انا علم نفس ) وبنأخد سكاشن معمل وغياب وحضور ونظام يقرف ده غير التدريب اللى بيكون بره الكليه

مممممممممممممم أفتكر كمان وانا فى سنه أولى كانوا قالوا فيه مقابله بين العميد والدفعه ولغوا المحاضره ونزلنا للعميد وقعد يرغى يرغى يرغى لحد ما صدعنا عن الكليه واتبنت ازاى وكانت ازاى وعلى ايده بقت ازاى وعن امجاده العظيمه ...وفى الأخر قالنا مين مقابله مشاكل فى الكليه ... طبعا تنكتب المشكله مش تقومى تتكلمى معاه واللى بيوصل المشكله بيقراها فى السكه ولو وحشه وتزعل مش بيديها للعميد ..

أفتكر واحدهصحبتى انسحبت من لسانها واخدتها الحماسه والتسخين اللى كنت بسخنهولها واحنا قاعدين وقامت وقالت انا عاوزه اقول سؤال ( وياريتها ما قامت) قامت تقولوا على الاماكن والقوضه الصغيره اللى تجيب المرض وعلى وقفتنا مستنيين الدكتور اللى بيتأخر بالساعه عن معاد المحاضره .. هى حكت من هنا وقالها احييك على صراحتك يا بنتى وان شاء الله حنحل كل ده بأسرع وقت واخد إسمها ......( انتى اكيد فاهمه اللى حصلها ولو ماتعرفيش أقولك انا ان البنت عادت السنه )

يعنى أعتقد تبوسى إيدك وش وظهر كدا وتحمدى ربنا على انك الحال عندكم كدا
ولو على الكرسى هاتيلك واحد واديه للفراش يخليه عنده وابقى اديله اجرة مكان !!

مَلَكة said...

إيمان
يابنتي انا طول مانا ماشية في الكلية وانا بدعي على اللي كان السبب
ويبدو إن"اللي كان السبب"سيظل مجهولا لسبب لا اعرفه للأبد:D

مَلَكة said...

ياسمين
فال الله ياشيخة،انا لسة شوباب وعروقي
متطقتش
يعني اما يطقوا دلوقتي بقى
امال لما اوصل لسن ابويا هيتفضل فيا ايه عشان ينفجر؟؟
سيبك إنتي
احلى ما في الكلية عندي هو البت سلومتي والاوقات اللي بنبقى فيها مع بعض:D

مَلَكة said...

سلومتييييييي
يابت وربنا انا مش عصبية
بس يعني
كدة كتييييييير:(
يعني عاوزاني اشوف كل ده وابقى هادية والحياة حلوة ومفيهاش منغصات؟؟!!
أنا برضو عاجبني الجزء الاخير
اول ما خلصنا رحنا سايبين الورق ومشينا
مش عارفة حسيته عقاب بشكل او بآخر يعني بنخلص تارنا :D
ربنا يخليكي ليا وتذليلي العالم المستفزة يا سلومتي

مَلَكة said...

شيماء
يالهوتي يا شيمو ده انتي شكلك شايلة ومعبية يابنتي
وبعدين اقولك بقى
جامعة القاهرة ولا جامعة اسكندرية
يابنتي اسمهم جامعات"حكووومية"يعني ولا مؤاخذة الهم طايلني وطايلك:(
بس عارفة فكرة الكرسي بالاجرة دي حلوة
بس الاجرة مش هتكون فلوس
هبقى ارشي الراجل بكوباية شاي وسندوشت طعمية:D

مَلَكة said...

epitaph
وانتي تعيشي وتردي يا قمر:D