Monday, September 04, 2006

أتوبيس وبريزة وأشياء من هذا القبيل!ـ

النهاردة كنت راكبة أتوبيس، لااا مش أي أتوبيس معلش،ده كان أتوبيس أخضر واللي بيتبهدلوا في المواصلات عموماً وفي الأتوبيسات تحديداً أكيد عارفين الأتوبيس الأخضر ده شكله ايه،والاهم عارفين تذكرته بكام الاتوبيسات دي كانت تذكرتها من حوالي شهر تمنها جنيه واحد،وبعضها كان ب150 قرش عشان مكيف لحد هنا ومقولناش حاجة،ماحنا بنركب السي تي ايه وبنكع من جيوبنا اتنين جنيه ومبنتكلمش عااادي خالص القضية بقى مع الأتوبيسات الخضرا دي بدأت من بعد البنزين ولّع..قصدي غلي ...حد يسألني ليه؟ أقولكم بقى وزارة المواصلات بكافة طوائفها(اللهي يورينا فيهم أسبوعين)ـ قررت إنها ترفع تمن تذاكر الأتوبيسات دي عشرة قروش-بمعنى بريزة للي تعليمهم تشيكوسلوفاكي ـ يقوم الاتوبيس اللي بجنيه يبقى بجنيه وبريزة،واللي بجنيه ونص يبقى ب 160 قرش وهي البريزة دي هتعمل ايه يعني بالله عليكم؟هي دي اللي خلاص هتظبط تمن البنزين مع ميزانية الوزارة مثلا؟ولا هي اللي هتقبض الموظفين؟ وشوفوا بقى تداعيات البريزة دي على جميع طوائف الشعب المصري اللي يحصل بقى في الاتوبيسات إن واحد يطلع ويدفع فميلاقيش معاه بريزة فكة فيدفع ربع جنيه مثلا بانتظار 15 قرش،والسواق دايما وأبدا مش هتلاقي معاه فكة،مع ان المفروض البرايز كتير يبقى فيه فكة إنما هو لو عملتله ايه برضو هيقولك مفيش فكة وبكدة يكون الراكب المسكين(اللي هو احنا)دفع للحكومة 15 قرش زيادة فوق الزيادة الموجودة أساسا اللي هي البريزة فيه في الدنيا سرقة وبجاحة أكتر من اللي الحكومة ووزارة المواصلات بالذات بتعمله ده؟؟ أو تلاقي حاجة تانية اللي بتحصل المثال اللي فوق من الراكب ده مستسلم وماشي جنب الحيط إنما إفرض واحد صمم إنه ياخد فلوسه الباقية على داير مليم هو هيفضل مستني الباقي والسواق-كالعادة-معهوش فكة النتيجة الطبيعية والمنطقية إن كل 10 دقايق بالظبط هيكون فيه خناقة في الاتوبيس إما بين الراكب والسواق عشان باقي الفلوس وإما بين الراكب وبقية الركاب عشان هو معطلهم مصالحهم بالبريزة بتاعته!ـ شفتوش في الدنيا حكومة سادية ومؤذية وفقرية زي اللي موجودة دلوقتي دي؟ أنا مشفتش ومش عايزة أشوف،كفاية اللي احنا شايفينه دلوقتي المهم أنا إيه فكرني بالموضوع ده؟مانا كل يوم تقريبا بركب الاتوبيس الأخضر ده،اشمعنى النهاردة يعني؟ اللي حصل موقف خلاني مقدرتش أمسك نفسي من الضحك النهاردة واحدة ست طلعت من محطة العتبة عشان تنزل باب الشعرية،يعني هي محطة واحدة بس اللي هتركبها،والظاهر إنها مكنتش تعرف إن الأتوبيس بجنيه وبريزة أول ماعرفت لقيتها بتزعق في السواق بتقوله"بريزة؟اشمعنى يعني؟ماهو يا جنيه يا جنيه وربع ايه بريزة دي؟"ـ طبعا السواق كان واضح إنه متعود على الدهشة والاستنكار من الركاب فمردش عليها المهم دفعت جنيه وربع وقالتله عايزة الباقي وطبعا قالها مفيش فكة(عادته ولا هيشتريها)؟ قالتله طب وهو حد قالك تزود بريزة علي التذكرة وعشان الراجل عبد المأمور طبعا فرد عليها إن المحافظ هو اللي قايل كدة وكانت دهشة الركاب والسواق ملهاش حدود لما الست ردت عليه وقالتله:خلاص،خلي المحافظ يفكلك ويديني بقية فلوسي!ـ الناس قعدت تضحك طبعا،واضطر السواق-نظرا لانه لقى الست شرانية ومش هتنزل الا اما تاخد بقية فلوسها-انه ينزل بنفسه يفك من محل في الشارع!ـ وبصراحة أنا مع اللي يطالب بحقه حتى لو كان شلن،إذا كانت الحكومةـ اللي هي الحكومةـ بتفرق معاها البريزة،يبقى إحنا ولا مؤاخذة بقى يفرق معانا الشلن واللي مش عاجبه يروح يفك من المحافظ!ـ ربنا ع الظالـم

9 comments:

Captain L.J.Silver said...

wallahy el 3azeem mafeesh 7okoma fe el 3alam betatafannan fe el "NASB" we "ELE7TEYAL" 3la sha3bha zay 7okometna el mowakkara !!!

سلمى صلاح said...

وانا في ثانوي كنت بركب مكروباصات كيت كات كل يوم..
زمان بقى( أيام العز) كانت ب35 قرش رايح ..وبربع جنيه راجع( متسألونيش ازاي)

المهم بقى كنت أي حد الاقي معاه بريزة في البيت لازم اخدها منه ودايما تلاقي محفظتي مليانة برايز علشان الموقف ده..

بنصحك تعملي كده

Anonymous said...

ملوكة كنت معدية قلت أمسي
keep on girl

ملكة said...

captain silver
بالظبط كدة،يبدو إنهم بياخدوا كورسات سرقة قبل ما يمسكوها


سلومتي
ياماما أنا بقيت بمشي أشخلل بالبرايز اللي معايا
بس اليومين دول مبقتش بلاقي برايز خالص الظاهر بقوا بيلموها من السوق وبيبعوها في السوق السودة:D


نمنماية
ياسلام بس كدة؟والنبي تعالي مسي ليا كل يوم يا نونة
keep in touch ba2a

أُكتب بالرصاص said...

سؤال
ايه السي تي ايه ده؟

وبعدين الست دي باين عليها مصرية اصيلة
والله ضحكت من خفة دمها

الحكومة عايزة كده
هي تولع الدنيا وتخلي الحرافيش يتخانقوا مع بعضها

احنا نتخانق مع محصل النور
مع انه مش هو الي بيحسب
نتخانق مع السواق والكمسري
مع انه مش هو اللي بيزون البيرزة

يالا
..
رمضان كريم

ملكة said...

إكتب بالرصاص

السي تي ايه ده أتوبيس طلع من فترة والمفترض إنه مكيف ونضيف زي الاتوبيسات السياحي كدة،بس طبعا مفيش حاجة من دي فيه
بتطلع كدة تدفع 2 جنيه تذكرة وبتقعد في اتوبيس مزيت ومشحم وخنيق بس أهو المضطر بيركب بقى

وعلى رأيك،رمضان كريم وربنا يدينا الصبر

BEBO said...

والله يا ملكة الدنيا بقت صعبة جدا
بيزودوا عشان البنزين زاد
يا سلاام
طب و ليه مبيزودوش مرتبات الموظفين الغلابة
اللي الدنيا كلها عليهم!!
أول مرة اعرف ان المترو غلوه هما كمان
جيت بادفع الراجل قاللي جنيه استغربت
قلت جايز موسم و لا حاجة
باسأل واحدة ست قالتلي أصلهم هيعملوا خط جديد فبياخدوا مصاريفه مننا
قلت لها طب و بعد ما الخط يتعمل
بصت لي بصة كده و ابتسمت و كان لسان حالها بيقول : هي الحداية بتحدّف كتاكيت !!

ملكة said...

إيمان الميهي
واضح يابنتي إن الشعب كله بقى بيقول حكم بسبب اللي الحكومة بتعمله فيه
مهو الواحد اما بيتخنق في البلد دي...بيتكلم
وسلميلي ع المترو والخطط الخمسية ومحدودي الدخل

الحصان الأسود said...

السواق مالوش ذنب
والراكب مالوش ذنب
الذنب ذنب الحكومة المتخلفة اللي حاكمة البلد وقراراتها العشوائية اللي جابت اجلنا

انا على فكرة برضة ركبت الاوتبيس الاخضر الميمون من اسبوعين لمشوار في العتبة نظرا لكرهي لسواقة وسط البلد والزحمة والركنة وتزنيق واحتكاكات الميكروباصات يعني المشوار واقف بخسارة على سمكرة ودهان السيارة
المهم انا اتفاجأت طبعا من الموضوع بتاع الجنية وبريزة دة اصلا لان حتى الربع جنية منقرض والناس مش بترضى اصلا تتعامل بالبريزة والشلن الورق وبيقولوا انهم ملغيين
يقوم يطلع فهلوي من حكومة العبقري اللي هيه الذراع الطويلة للسيد "الحسيس" اللي كابس على انفاس امتنا من نيف ربع قرن (وللعلم نيف دي كلمة غير أبيحة) ههههه

دة الجنية اصلا حايخلوة كوين (عملة معدنية شبة وردة الصامولة) وابن المفترية بيخللي التذاكر بجنية وبريزة؟؟؟؟

بس عاوز اقولك بصراحة انى اديت سواق الميني باص (ودة غير الميني جيب بالمناسبة وان كان هناك شك في صلة القرابة) ورقة فئة خمسة جنيهات (حتة بخمسة بالعامية لامؤاخذة لاصحاب التعليم المجاني) قام السواق اداني اربعه جنية وعليهم التذكرة, انا مش في بالي وقعدت على كرسي وبارجع الباقي المحفظة وبابص لقيت التذكرة ب110 قروش؟؟؟ يالهوة مين ابن الغبية اللي عمل العملة دي

واستغربت من السواق اكت ر المهم وانا نازل باقولة انت نسيت تاخد البريزة وانا ماعييش فكة قاللي يابية ولا يهمك حانعمل اية مانا كمان ماعييش فكة وما معناه ان موضوع البريزة دة كمان بيخللي الناس يا ليها يا عليها ومش فارقة بقى
اديتة جنية وقلتلة طيب خد ربع وهات خمسة وسبعين قرش ماهو مش معقول تبقي سايب من تمن التذاكر من جيبك
الراجل ابدا ودماغه والف سيف يابية ولا يهمك عادي ياما ناس ليها ومافيش فكة

المهم انا نزلتلان الحوار طال ومحطتي جت وانا متعجب من موقف الحكومة الغبية وجهلة القرارات البيروقراطيين

وكذلك من تصرف السواق