Thursday, November 23, 2006

سؤال،استطلاع،مناقشة،أي حاجة المهم ترد

سؤال بسيط جدا جدا
لكن محتاج إجابة
يعني ياريت كل واحد عدى هنا يسيب رأيه
وده طبعا مش إلزامي يعني
بس من المفروض لما تزور حد تاخدله في ايدك حاجة
وأنا مش عايزة كيلو برتقان ولا يوسفي عشان مبحبش أغرم حد
أنا عايزة رد أو تعليق على السؤال ده
هل من المفروض اللي يحب حد يقبله زي ماهو؟
ولا يغيره على حسب ماهو عايز؟
وهل فعلا من الحب إنك لما متحبش حاجة في حد تحاول تغيرها؟
ولا إنك تتقبلها وتتقبل الإنسان كما هو؟
من الآخر وعشان منطولش
مستعد تتغير وتغير ولا مادام بتحب هتتقبل ال"بيعة"باللي فيها وزي ماهي؟
مشكرييين مقدماً على التعليقات
ده على اعتبار ان حد ذوق هيعدي ويعبر حضرتي
ويرد عليا
المناقشة بعد استطلاع الآراء
نراكم قريباً

29 comments:

إيمان الميهي said...

هل من المفروض اللي يحب حد يقبله زي ماهو؟
المفروض يقبله في أغلبه بمعنى إن مميزاته تغلب على عيوبه و اللي بيحب أصلا ما
بيشوفش عيوب

ولا يغيره على حسب ماهو عايز؟
ممكن يحاول يغير فيه حاجات مش عجباه لكن الأصل التقبل يعني الحاجات دي لو متغيرتش ما يقعدش يدعي ع اللي كان السبب :)

وهل فعلا من الحب إنك لما متحبش حاجة في حد تحاول تغيرها؟
ولا إنك تتقبلها وتتقبل الإنسان كما هو؟
من الآخر وعشان منطولش
مستعد تتغير وتغير ولا مادام بتحب هتتقبل ال"بيعة"باللي فيها وزي ماهي؟

صلي ع النبي
قريت من قبل ف كتاب فلسفة اسمه " مشكلة الحب " إنه اللي بيحب بيتقبل المحبوب زي ما هو حتى بيحب عيوبه و بياخد البيعة على بعضها على رأيك

و المحبوب من نفسه بيتغير عشان يصبح صورة مثالية تستحق حب المحب
حد فاهم حاجة ؟

لكني عن نفسي فيه حاجات مثلا ممكن تتغير هي صعبة لكن ممكن بشرط أكون كرهاها و مقتنعة بتغييرها
لكن حاجات تانية زي بعض الطباع و العادات صعبة حبتين
و ف الاخر هو بيكون على حسب
و بما إن العرسان التفصيل غاليين فالواحد ممكن يشتري الجاهز على عيبه

أي استفسار تاني أو نقاش
يسعدني مناقشة عقل و روح زيك يا ملكة

Captain L.J.Silver said...

hmmm....el post da 2alleb 3la elwa7ed el mawage3 wallahy ..: )))..Ana kont faker en el wa7ed lamma ye7eb ...bey7wael ye3`ayyer feeh el 7agat elly mesh 3agbah 3shan yewsal lel "picture : perfect" elly fe dema3`o ...but when I tried to do this long time ago ...the reaction was like " ma7ddesh bey3`ayyr 7ad lamma ye7ebbo ...elwa7ed bey7eb elly 2oddamo za mahowa " ......bas u know what ..neither i nor this someone was right ....I guess when u r truely in love u will change the things that u guess ur partner will never like ...without him asking ...and with complete Convincement from u ....

حدوته مصرية said...

بصى الى حب حب من الاول كده الانسان على بعضه بعد كده ممكن يشوف كل واحد عيوب التانى ويحاول يغيرها بس باسلوب كويس وكل انسان بيتغير فيه حاجات


لو هقدر اغير راح اغير لو مش قادر انا لازم اغير واتغير

ody911 said...

ملكة
إللى بيحب بيعمل أى حاجة بجد علشان حبيبوا
ويستحسن إنوا يغير إللى مش عاجب حبيبوا فية يغيروا للأحسن
ودى وجهة نظرى


على فكرة
أنا كنت معدية
قلت آخد الجمعية
وعادى بقة
أودى

Yasmine Adel Fouad said...

ملوكة مش هزود كتير عن اللى اتقال
" ومصلحة وفرتى تمن البرتقان "
المفروض تتقبلى الحد سواء بتحبيه سواء لا زى ما هو لان كل واحد فيه عيوب و مميزات
يعنى ماتعمليش حسابك انك هتغيريه بقى و بكرة يبقى احلى علشان التغيير صعب جدا
كان انيس منصور مرة قال
ان تكتسب عادات جديدة اسهل من ان تغير عادات قديمة
فانتىتحسبيها هل عيوب الشخص ده تخليكى تقدرى تتغاضى و تستحملى علشان المميزات
و بكرر تبصى للعيوب مش المميزات لان المميزات عندنا كلنا بس العيوب مختلفة يعنى ممكن حد يكون تحفة فى كل حاجه بس كداب و انا مقبلش الكدابين فيبقى مينفعش و ده كلام عام مش مقصود بيه علاقة عاطفية
نيجى بقى للتغيير فانا اعتقد لو الحد ده فيه عيب مضر جدا و يسيئ ليه او يديله سيئات فانتى حقك تحاولى تغيريه حبا و سندا وواجب عليكى لكن لو حاجه فى ضخصيته انه عصبى مثلا وانتى بقى عايزة تغيريه فالمحاولة حقك لكن مش فرض انه يتغير
والا هيوصل لنقطة انه يصطنع شخصية ترضيكى قدامك و كده نبقى بنمثل


الخلاصة يعنى لو انتى عايزة تغيريه يبقى خدى حد متغير جاهز بقى الانسان مش تفصيل و لا كامل من غير عيوب

n said...

ع المستوى النظري .. احنا بنحب بعضتشينا و ملناش غير بعضتشينا و قابلين عيوب بعضتشينا
انما ع المستوى العملي _ و دا رأيي شخصي_ فالإنسان الذي لا يحاول ان يغير اللي بيحبه للأفضل فهو إما جبلة أو لا يبالي بهذا الآخر لان مفيش حد كامل الأوصاف
و اسمحيلي اقول ان لو كل واحد كان حريص ان يريح الطرف الآخر (يريحه مش يسنجه علشان محدش يفهم غلط)فبالتأكيد لن تنشأ محاولات التغيير من الاساس
بمعنى اني زي ما عاوزاه يكون كذا اللي بيبسطني فطبيعي أوي هو كمان يتمني ان أكون كذا اللي بيسعده
احنا مش عايشين فالكون علشان ندي لبعض ضهرنا و نقول انا كدا
و علاقة الحب و الشراكة في الحياة في الأصل علاقة تكامل و ليست تطابق ،، يعني لازم هيبقي فيه حاجات برده يجب التغاضي عنها طالما نقدر نستحملهاو نتكيف معاها(بجميلة يعني )و طالما مش هتؤثر في سير الحياة
لكن المهم ان تكون محاولات التغير من اجل الآخر حقيقة و نكون مقتنعين بضرورتها علشان متبقاش المسألة تمثيل و ليس لها معنى

Lion king said...

انت جاوبتي يا ملكة
بيحبة
يعني على قلبه زي العسل :)
ومش هيبقي تغيير
هتكون اختلاف في الطباع والعادات ودي
بعد كدة بتزول بالتعود المهم يكون حب من طرفين
ويكون في اتفاق ان كل من الطرف يرضي التاني
فا هتزول كل الحجات دي
تحياتي

غادة الكاميليا said...

بصي بقى يا جميله شيلي منى الأول سبت المنجه ده مهو مش معقول يعنى أجيلك أول مرة وإيدي فاضيه يبقى عيبه في حقي
اللى يحب حد ممكن يحاول يغيرة أو يتغير هو علشانه أو يتغيروا علشان بعض بس اللي يحب حد قوى ممكن يبقله كده
واللي يحب حد قوي قوي ممكن يتغير هو علشانه مثلا واحدة زيي كده معرفتش أغيره مش مشكله
قبلناه على بعضه مهوأنا بقيت في مرحلة قوى وبعيدين كنت مستعدة أتغير 180درجه المهم قلنا نتغير 180 درجه
بردة بردة خدت استمارة 6
ناولينى بقى سبت المنجه مهو مش معقول أجيلك أول مرة ومتعمليش معايا الواجب يلا صباحك عسل

Anonymous said...

رماني القدر قدام بيتكم ، ده على اعتبار إن البلوج بيت، مادمت مش هدخــــل بإيدي فااااضيـة ! ، لكن واضح إن فيه قبلي سبت منجه ، وكام قفص برتقان ، بس أنا بحب التِفاح ، ما علينا ، واضح إن الناس اللي هنا قالت كل حاجة !! لا سيمـا بعد ( ياسمين ) مفيش كلام يتقال !!! ، أيوة بيحبه يبقى يتقبله ، يستحمله ، ممكن التاني يتغير عشانه ! ، بس برضه منكن ما يتغيرش ( تحريف متعمد للغة ) !

تحيااااااااااتي ليكي ، و ابقي خلينـا نشوووفـك

Ahmed Rashwan said...

للأسف لم نتربى من الصغر ولم نتعلم في مدارسنا فكرة قبول الآخر
ليس فقط على مستوى الحب ، بل بداية من الأسرة ، الجيران ومرورا بالأصدقاء
رأيي أن موضوع تغيير الحبيب درب من دروب العبث ، ولكن إذا أرادا الأثنان أن يكملان طريقهما سويا فعليهم إيجاد حلول وسيطة لكي يتمكنا من التعايش ويحفظان على هذه العلاقة
تحياتي

من انا said...

على فكره كنت ناوى اجيبلك معايا شيكولاته ولا بنبون ولا مصاصه بس بصراحه احترت لانى مش عارف انتى بتحبى ايه ؟


انتى كمان مطحونه فى كلية الاداب ....ربنا يكون فى عونا والله احنا لينا الجنه


على فكره بخصوص الموضوع بقى اللى انتى نشراه احب اقولك ان الحب نفسه ممكن يغير الانسان وانى انا شخصيا لو حبيت انسانه وفي حاجه فى شخصيتها مش عجبانى او مختلفه معايا هحاول بكل الاساليب الممكنه انى اغيرها
وانا كمان لو حاسس ان فى حاجه جوايا لازم تتغير هاسمح للانسانه دى انها تغيرها
عارفه ليه
لان احنا الاتنين مراية بعض ولاننا هنكمل بعضينا يعنى اللى ينقص من هنا نزوده من هنا وكده
يلا بقى سلام
وشدى حيلك الامتحانات قربت ولسه مفيش كتب نزلت

Hamed Ibrahim said...

أنا بلخص إجابتي في جملة بسيطة
لو انتا بتحب شخص (حاول)تقبله زي ماهو .. وهو لو بيحيبك (هايحاول) يتغير علشانك !

عامة النظرية دي بسهولة حد ينتقدها ويطلع فيها القطط الفطسانة .. وأنا نفسي أقول إنها ناقصة لأن فيه حالات تانية على حسب كل شخص وكل حالة حب .. بس ده كلامي هنا بشكل عام !
وعامة الكلام ده كلام أي كلام ! لأنه ما بيحصلش دلوقتي !

ما علينا

إيمان الميهي said...

وحشتيني جدا يا ملكة و وحشتني كتاباتك قوي

Yasmine Adel Fouad said...

فين البنت اللى عايزة اجابة و منفضالنا دى و للا فاكرنا هنقول بتذاكر
لا احنا عارفين اللى فيها يا اختى

مَلَكة said...

راجعة لكم والله بس أروق كدة وأرد على كل واحد نفر نفررررررر

إيمان الميهي said...

ERShttp://www.boswtol.com/mastaba/bahebak_122_01.html

مَلَكة said...

وأخيراً جييت ومتأسفة جدا جدا للناس على تأخيري في الرد على تعليقاتهم
بجد أسعدتوني بانكم رديتوا واهتميتوا بالبوست ده
يلا نبتدي بقى

Bebo
لخصتي الليلة كلها يا ايمان بردك ده
وبالظبط فكرة ان الواحد ممكن يحس إنه عاوز يكون مثالي علشان يرضي الانسان اللي بيحبه
وده مش عيب
لكن العيب في وجهة نظري إن حد تكون علاقته بحد تاني مبنية على أساس التغيير فيما بعد
وده شيء مستحيل تقريبا فالعلاقة وقتها بتفشل تماما
على فكرة اللينك اللي بعتيه فعلا تحليل كامل للموضوع
شكرا جزيلا يا ايمي على ردك وياريت ياريت متحرمنيش منه ابدا


مهاب
هات يارفيق البرتقان،بس متعملهاش تاني
انت عارف مفيش بين الرفاق حاجات من دي:)
موافقاك تماما على اسلوب انتقاد العيب في الطرف التاني
طبيعي إني لما أحس إن اللي ادامي بيوصلي وجهة نظره اللي مش عاجباه فيا بطريقة مهينة
أكيد هتضايق لان هحس ان اللي ادامي ده كارهني او خلاص مبقاش يحب يتعامل معايا بالتالي هاخد جنب في علاقتي معاه ومش هستجيب لاي حاجة طالما اني حسيت بعدم قيمتي معاه
أما العيوب البسيطة فدي مش مشكلة خاصة لو كانت عيب في مناخير(no offenceخالص)أو أيا كانت الحاجات دي يعني:)
ميرسي كتير لردك يا مهاب،ابقى تعالى كل يوم

مَلَكة said...

captain silver
first i'm sorry 4 recalling your(mawage3)but you know,none hasn't some.anyway i totally agree with you that if there r things 2 b changed,there must be convincement
but i think that as long as we decided to love,this means simply that i loved him with both his good and bad things or else if i just can't accept them,the whole matter ends.
thx so much 4 your nice comment:)

مَلَكة said...

محمد ياسر
صح كدة،البيعة كلها مادام رضيت بيها وحبيت يبقى خلاص
وطبيعي ان بعدها العيوب بتبان
لكن المفروض اتقبلها زي ما تقبلت مميزات الانسان ده من البداية
متشكريين يا محمد على ردك المختصر المفيد:)

مَلَكة said...

أودي
ياستي ابقي عدي هنا كل يوم بس خلي بالك مفيش جمعيات عشان الحالة ض ج اليومين دول:D
وجهة نظرك على العين وعلى الراس
بس لو حاولنا نغير اللي بنحبهم يمكن ميتغيروش وده طبيعي علشان من الصعب تغيير حد طب ساعتها هنحس إن مينفعش نكمل العلاقة دي تاني يبقى الحل ايه وقتها؟

المرة الجاية يا اودي تجيبي معاكي انتي الجمعية:)

مَلَكة said...

أنا حرة
ياسمين كعادتك تحللي الموضوع من الالف للياء بكل احتمالاته
ومش عارفة اناقش ردك في ايه ولا في ايه
نتناقش مناقشة مطولة اول مرة اشوفك ان شاء الله
ميرسي يا احلى سمسمة:)

مَلَكة said...

نمنماية
مقتنعة برأي التغيير بس مش لازم يكون تغيير عشان يناسبني أنا
المفروض لو هيكون فيه تغيير فعلا
إنه يكون عشان اللي هيتغير
وبالنسبة لنقطة التغاضي فدي برضو نقطة مهمة جدا
خاصة وان لو وقفت لحد على كل حاجة
هبدأ احس ان العيوب كتير وبدل ما أدور على الكويس اللي موجود هلاقيني بدور على كل اللي مش موجود
وده معناه ان برضو العلاقة مش هتستمر

نمنمايتي العزيزة
ربنا يخليكي على ردك الجميل ده ومتنسيش تشأري هنا عليا كل كام يوم كدة:)

مَلَكة said...

lionking
والله انت ردك زي العسل
حسستني ان الحياة سهلة ومهياش بالتعقيد اللي فاكرينه بيها ده
ميرسي كتيييير ليك:)

مَلَكة said...

غادة الكاميليا
ياعم ياعم
سبت منجة بحاله؟ده المدونة اتمنجهت اوي ياولااااد:D

والله ياغادة حسستيني إن لا كدة نافع ولا كدة نافع
عمتا سيبك من استمارة 6 دي عشان بالتاكيد مكنش الموضوع هيناسبك فيلا مش مهم احمدي ربنا انك خرجتي بحاجة
حتى لو باستمارة

متنسيش تاخديلك منجاية من السبت وانتي ماشية بقى يا قمر:)

مَلَكة said...

ابراهيم
يا اهلا بيك يا فندم نورت المدونة
ومشكرة ع الرد ال"محرف عمدا"ده
نراك قريبا ان شاء الله:)

مَلَكة said...

film69
الموضوع فعلا لا يتطرق للحبيب فقط وإنما للآخر-كما قلت-بوجه عام
وأساسا أي علاقة موجودة في الحياة بتكون قائمة على مبدأ التسوية
لأن طول ما كل واحد واخد جنب ومصر على إنه مش هيتنازل يبقى مش هينفع يكون فيه تواصل اصلا

متشكرة جدا ليك

مَلَكة said...

أحمد حسن
طيب بما انك طلعت كريييم اوي كدة
فشوف يا سيدي
أنا بعشق شيكولاتة جالاكسي
وياسلام ياسلام لو كانت سادة
يعني متقوليش بقى هعزك أد إيه ساعتها
وبما إنك زميل في كفاح كلية الآداب
فياسيدي تعالى ندعي ربنا سوا يخلصنا منها على خير
وربنا معاك ومعانا في الامتحانات اللعينة دي:(
بالنسبة لردك الشافي الوافي ده
عاجبني تعبير"احنا مراية لبعض"وده معناه ان طبيعي هنشوف عيوب بعض زي ماهنشوف مميزات بعض
المهم كل واحد فينا يتقبل التاني
بل ويكمله-زي ما انت قلت-لانه المفروض عارفه اكتر من اي حد

متشكرة على ردك الحلو ومتنساش الشوكلاتة المرة الجاية ها؟:)

مَلَكة said...

حامد
يااه بجد سعيدة إنك زرت المدونة
يارب متقطعش الزيارة بقى:)

لخصت اللي عايزة اقوله في جملتين وبرضو الحياة مش نماذج واحدة فطبيعي الموقف يتغير تبعا للحالة نفسها
وبالنسبة إلى إنه مبيحصلش دلوقتي فده مش معناه إن هو مش صح
كلامك صح لكن التطبيق مبيبقاش كدة
وعموما اي حاجة اسمها"المفروض"غالبا مبتحصلش فعادي بقى

شكرا ليك كمان مرة على ردك

مَلَكة said...

خلصت أنا أخييييرا ردود
وياريت محدش يزعل مني علشان اتاخرت في الرد بس اهي مشاغل الدنيا بقى
دلوقتي أقول لياسمين أهو اديني رديت بطلي دوشة بقى:D
ومتشكرة جدا جدا لكل اللي اهتموا وردوا
نردهالكم في الافراح ومدونتاكم يارب:D