Tuesday, November 21, 2006

حيطة دافية

يعني إيه تكون وحيد؟
افتكر كدة وانت صغير،دايما قاعد في البيت لوحدك،بابا وماما اما مش موجودين أو موجودين ومش معاك
مش لاقي حد تلعب معاه ولا تكلمه أو حتى تتخانقوا سوا
كل يوم الصبح تصحى لوحدك،تلبس لوحدك،تحضر شنطتك لوحدك،تنزل من البيت لوحدك عشان تاخد طريق المدرسة وانت رايح لوحدك
وبعد ما تخلص يومك تخرج من المدرسة لوحدك،وتركب الأتوبيس لوحدك وبرضو تروّح لوحدك
في يوم الأجازة،بابا راح يصلي في الجامع وماما في المطبخ وانت بتتفرج على التلفزيون..لوحدك
لو بابا قال تعالوا نخرج هتروحوا الجنينة سوا،هما هيقعدوا وانت عايز تلعب،بس انت لوحدك،مفيش حد معاك عشان تلعبوا سوا،بتقعد جنبهم مبتعملش حاجة
بتكبر شوية،عايز تخرج بس هتخرج ازاي وانت لوحدك؟كل الناس اللي في الشارع بيبقوا ماشيين مع حد،وانت معندكش حد تخرج معاه،شوية بشوية هتتعود تفضل في البيت..لوحدك
في الجامعة،نفس الحدوتة الوحيدة،نفس المشوار رايح جاي،نفس الوحدة اللي اتوحدت معاها،بس انت لسة عبيط
لسة عبيط عشان بتدور على حد"تلعب معاه وتتخانقوا سوا"مع انك عارف ان مفيش،مع انك عارف ان مينفعش تلعب وانت عندك 20 سنة،مينفعش عشان وقت اللعب عدى،وقت الجري والتنطيط والخناقات عدى،عارف كان وقتهم امتى؟
وقت ماكنت بتقعد لوحدك في البيت !ـ
بس انت كبرت والمفروض تبقى اتعودت،والمفروض لما تكون لوحدك متعيطش وتقول أنا خايف،والمفروض تتصرف زي الكبار،الكبار بيقولوا دايما لازم تعتمد على نفسك،بس الكبار لما كانوا بيكبروا..مكانوش لوحدهم زيك
ليك أصحاب وليك قرايب بس لساك لوحدك،بس متسألش كتير ليه،أصل برضو هما يمكن مش حاسين،أو مش عارفين
ماهما برضو جنبك ساعات،وساعات بيكونوا بعييييييد كتير كتييير أوي،بتخاف زي زمان؟ولا بطلت تبين انك بتخاف؟
عارف انت بتضايق ليه؟عشان محتاج تحس ان فيه حد بيسندك،حيطة وراك لو وقعت تحوشك
بس انت تعبت من التدوير،خلاص ابقى العب مع نفسك،واتخانق مع نفسك،اخرج مع نفسك وارغي وقول كل اللي عايز تقوله لنفسك على الأقل نفسك مش هتتضايق من كلامك ولا هتزهق ولا هتفضل تقسى عليك مع كل كلمة تقولها ولا هتقاطعك في كلامك،جرب كدة ولو زهقتوا من بعض او حسيت بالغربة شوية
روح البيت وجرب تقعد لوحدك زي زمان واطلب من حيطة أوضتك متبقاش باردة على ضهرك لما تسند عليها0

17 comments:

saso said...

مش ده بس اللي يخليكي وحيدة
ما يمكن تبقي في وسط مليون حد ولسه حاسة انك لوحدك
ووقت اللعب عمرة ما يعدي لما توصلي عشرين يمكن لعبك تتغير بس هتفضل لعب
مشكلة اننا واحنا صغيرين كنا بنحاول نبقي جد اوي زي الكبار ودلوقت بنستغرب احنا ليه ماكناش اطفال عادية من اللي بيلعبوا ويناموا من التعب علشان يصحوا يلعبوا تاني

احلي حل تتكلمي مع اكتر حد فاهمك "انتي"احكي معاكي كتير ..احساس الوحده مالوش دعوة بالناس له دعوة بس بمدي اتفاقك مع ضلك..مع البنوتة اللي جواكي يا ملكه
:)
يارب عمرك ما تحسي وحده

أُكتب بالرصاص said...

اولا
السلام عليك

ثانيا
وانا باقرا قعدت اتخيل..

ازاي الواحد ممكن يكون لوحده في كل هذه الاحداق

اروح المدرسي لوحدي..
مدرسة فيها 300 طالب ..؟
اركب الاتوبيس لوحدي..
فيه ما لا يقل عن 50 طالب
اقعد في البيت لوحدي..

طيب وبياعين الخضار والانابيب والبصل....راحوا فين

حتى لو قعدت في غرفتي..

بابا وماما والمجتمع والناس.




يا ريت الواحد يقدر يعيش لوحده!!!

في جزيرة بعيدة
بعيد عن اي مسئوليات !!!


اجييك على اسلوبك

نمنماية said...

يا بنتي الوحدة خير من جليس السوء :D
عموما ربنا ما يكتب الوحدة علي حد
صحيح ساعات الواحد بيبقي نفسه ياخد اجازة من الحياة بحالها انما برده الوحدة قاتلة
و مبروك يا جميل النيولوك و التحديث اللي حاصل في المدونة

BEBO said...

و الله يا ملكة ( أحيانا ) باتمنى الوحدة دي
لأنه الأصعب منها لما تكوني فعلا مش لوحدك طول عمرك و فجأة تبقي كده
الوحدة بتعلم الاعتماد ع النفس برضه و الصلابة و بتحسسك بقيمة الناس
لكن لكل شئ حدود

محمد ياسر said...

بوست جميل و كنت هقول نفس رد ساسو ان الوحدة ساعات بتبقى فى وسط مليون واحد كمان

و رد ساسو كله جميل

أنـــا حـــــــــرة said...

يمكن ده احساسك علشان انتى بنت وحيدة وو مالكيش اخوات
بس صقينى حتى لو ليكى اخوات ده لا يشكل فارق كبير
يعنى ماناعندى اخين ولدين لكن كلنا اهتمامتنا مفيش بينها وجه تشابه

بس الوحدة مش باللى حواليكى
الوحدة باللى من جواكى


صحيح مبروك النيو لوك

ملكة said...

saso
جميل أوي كلامك بجد وقريب من القلب

مشكلة الوحدة فعلا لما يكون الانسان بين الناس
لما يحس بينهم بالاغتراب
زي بالظبط اللي بيحس في بيته بالخوف رغم إن ده أكتر مكان المفروض يحس فيه بالأمان والدفء
وعارفة كمان المشكلة ايه؟
اني من كتر الوحدة بقيت بتكلم معايا
واحنا الاتنين زهقنا فعلا وعايزين منحسش بالوحدة كدة كتير
ربنا يسمع منك وماحسش بالوحدة تاني

ملكة said...

أكتب بالرصاص

أوقات بحس اني عاوزة ابعد عن كل حاجة فعلا
بس دايما بحتاج احس اني مسنودة واني مش لوحدي واني لو وقعت هلاقي حد يقف جنبي

عموما متشكرة جدا لزيارتك وكلامك الحلو ده

ملكة said...

نمنمايتي
الله يبارك فيكي يا جميلة
ابقى تعالي هنا دايما ونوريني


بيبو
مش عارفة يا ايمان هل الوحدة بتعلم الصلابة فعلا؟
بس شعور انك تعبانة من انك تشيلي هم نفسك لوحدك برضو مش حلو
وزي مانتي قلتي لكل شيء حدود
ميرسي يا ايمي على ردك


محمد ياسر
متشكرة كتير لردك يامحمد
ابقى زورني دايما


ياسمين
مش هنكر فعلا ان كوني من غير اخوات مأثر عليا جدا
وجزء كبير من وحدتي بسبب الموضوع ده
عارفة فكرة ان البيت ميكونش صامت طول الوقت
فيعني بتفرق برضو
والله يبارك فيكي يا سمسمة ميرسي

shimaa said...

يمكن انا أول مره أرد على حاجه فى مدونتك ياملكه .. لكن مش أول مره أزورها او أقرى حاجه فيها

المهم... بخصوص موضوع الوحده ده فأنا كلامى مش حيختلف كتير عن ساسو ... لأنها تقريبا شملت الموضوع

والوحده مش بعدد الناس اللى حواليكى .. يعنى انا عندى البيت دوشه كتير وخالى ساكن معانا فى العماره ودايما مع بعض بس دايما حاسه انى لوحدى .. فبالتالى الوحده مش وحده أفراد ولكنهاوحده مشاعر وفهم .. يعنى انك تلاقى اللى يفهمك وترتاحى فى الكلام معاه ..

اللجوء إننا نحكى لنفسينا حلو ولكنه فعلا مش حل لأن كدا وكإن الواحد بيكبت فى نفسى وفجأه حيحس بإختناق ووحده بلاحدود وحيحس بكل شئ ممكن يوصل انه خلاص أصبح شخص يعانى من الاكتئاب واصبح مريض نفسى... ولا كتابه ولا حيطة القوضه ولا مناقشه مع العقل ممكن تفيد

بجد أتمنى ان الاحساس بالوحده يتلاشى منى ومنك ومن أى حد لأنها حقا معاناه

مهاب said...

سلام عليكم ..
ازيك يا ملكة ..

انا قريت الموضوع من فترة .. يمكن من أول ما كتبتيه .. ولكنى ماردتش عليه ..

ربما عشان حاجة زى دى مش لاقي لها رد مناسب ..

غير أنى آخر واحد ممكن ينصح فى حاجة زى دي .. ربما عشان باشعر بما تشعرين أحيانا .. وربما غالبا ..

لكن .. هوني عليكي .. وخدى الأمور ببساطة .. انا باعمل كده على كل حال .. يمكن الحل ده ينفع معاكى ..

طيب هاتاخديها ببساطة ازاى .... مش عارف لأن ده بيختلف من حد للتانى ..

شكلى كنت باخرف والا ايه ..
طب افلسع بقى قبل ما أزودها

ملكة said...

شيماء
الوحدة فعلا مش بعدد الافراد اللي حواليكي
لكن تصوري كدة إن طول حياتك عايشة لوحدك،مفيش حد عايش معاكي
عارفة كلمة"الونس"ده اللي اقصده بالنسبة لاني وحيدة معنديش اخوات
زاد على كدة لما كبرت بقى
اللي انتي قلتيه عن ان الاقي حد ارتاح معاه
وده-مش عندي بس-نادر الوجود اصلا
فلازم احس بالوحدة اكتر
منكرش ان عندي اصحاب ربنا يخليهم ليا كلهم مبيحسسونيش بالوحدة ابدا وانا معاهم
لكن لما بكون من غيرهم وده ممكن يبقى كتير لاني مش هعيش معاهم يعني
وقتها بتكون الوحدة بقى
ووقتها مبينفعش اتكلم مع نفسي
بتعب كتير اما مبيكونش فيه غيرها عشان اتكلم معاه
ميرسي على ردك يا شيماء وياريت اشوفك هنا دايما بردودك الحلوة دي:)

ملكة said...

مهاب
أهلا وسهلا يارفيق
تعرف إنك لفت نظري لفكرة اني اخد الموضوع بسهولة اكتر من كدة؟
من الواضح فعلا اني محتاجة اخد الحياة ببساطة ومتضايقش بالطريقة دي دايما
أوعدك أحاول أبسطها واعمل بالمثل القائل الشهير(كالعادة)الحياة أبسط من كدة بكتيييييييييير

مشكرة يا رفيق على ردك

shimaa said...

مممممممم بصى يا ملكه .. انتى تقصدى وحدة الأخوات مش أكتر .. يعنى وحدة البيت وانك لوحدك .. محرومه من الدوشه من اخ او اخت يشكيلك وتشكيله.. من سند بمعنى أصح يخاف عليكى ومن غيرة الاخ وكدا يعنى

مادام كدا يبقى اتبعى كلام مهاب بسطى الموضوع لأنك ماتقدريش تغيريه .. يعنى كشكشها ماتعرضيهاش ( ما اعرفش مين صاحب الكلمه دى بس دايما بسمعها من ناريمان صحبتى )المهم .. أكيد حتلاقينى فى مدونتك دايما ..

واتمنى اقابلك فى مدونتى

سوسكــا said...

تعرفي اني فعلا باخاف من كده
يمكن لاني عندي 4 اخوات وبابا وماما ربنا يخليهوملي يارب
وصحابي ومعارفي وزمايلي الحمد لله ميتعدوش
بس برضه خايفة من يوم اجي الاقي نفسي لوحدي

علي الرغم اني بحس ساعات كتير اني اتخنقت من الناس واني نفسي ابقي لوحدي في جزيرة بعيدة متكلمش خالص - انتي عارفة الرغي وسنينه يااوختشي - ومحدش يكلمني ولا يقول حاجة وساعات بحلم اني ابقي في البيت لوحدي ودايما باقول لصحابي اللي معندهومش اخوات يابختكم عالهدوء والراحة اللي هما فيه في البيت .. نفسي اروح واجي الكلية لوحدي احضر وامشي
وبعد ده كله ارجع والاقي انها حاجة مش حلوة لاني مقدرش اعيش كده
بصي في جميع الاحوال محدش عاجبه حالة

يلا مش مهم اهي تكملة لحالة الشيزوفرينيا اللي انا عايشة فيها

بوست جميل ياباشا حسيت اوي بيكي فيه خدي دي موااااااااااااا

ملكة said...

شيماء
ماشي يا ستي نتبع نصيحتك انتي والأخ الرفيق مهاب
وناخد الحياة "أبسط من كدة"بكتيير:)
ميرسي على ردك كلاكيت تاني مرة يا شيمو

سوسكا
إزيك يابت؟وحشاني والله انتي كمان مووت
المهم نيجي لردك بقى
كلنا ساعات بنحس اننا مش طايقن حد وعايزين نعيش وحدنا
بس برضو لو عشنا كدة هنزهق والحياة هتبقى لا تطاق فعلا
احيانا الانسان بيحتاج وقت لوحده يقضيه ويكلم نفسه مفيش مانع
لو متخانق معاها(مع نفسه يعني)يتصالحوا
يرتب اوراقه وما الى ذلك
لكنه برضو مهما قعد لوحده مش هيقدر يستغنى عن الناس في حياته
عارفة الجملة الغتتة اللي كنا دايما بندرسها في المدرسة
الانسان اجتماعي بطبعه
أهو هو كدة
مهما كان انطوائي وبيحب العزلة
الا انه برضو بيرجع ويحتاج الناس في حياته تاني

وعن الخوف من الوحدة مستقبلاً
فبلاش نقلب مواجع بعض بقى:(

ميرسي على ردك يا سوكة
ياريت أشوفك قريب إن شاء الله

Anonymous said...

This is such a nice addition thanks!!!
عرب كول
شات صوتي شات
شات مغربي
دردشه صوتيه
شات صوتي
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه
مدونة بعثرة اقلام
بعثرة اقلام