Saturday, November 18, 2006

عايزة أجازة فيها إيه دي يعني؟

أنا:عايزة أجازة
أنا التانية:آه وماله؟بس أجازة من إيه إن شاء الله؟
أنا:كل حاجة،من البيت،من المحاضرات المملة،من الجامعة،من الدراسة عموما،من النت كله كله،من التفكير اللي مش بيخلص،من القلق،من الاكتئاب،من زحمة الشارع وبهدلة المواصلات،من الدوشة والخنقة،من الخناقات مع أي حد
أنا التانية:ياحلاوتك يا اختي،يعني هتعيشي في صحرا مثلا؟
أنا:هو ينفع طيب؟ماهو لو ينفع كنت اتنيلت عملتها من يوم ما شفت وش الست الدكتورة اياها وهي بتقول لمامتي مبروك على البنوتة بتاعتك،يعني لو قررت أعتزل العالم واروح اعيش في الصحرا أكيد برضو هبقى عاوزة اخد من الصحرا اجازة
أنا التانية:هو انتي لا عاجبك ده ولا ده؟
أنا:أصلا أنا مبيعجبنيش حاجة،عادي بقى
أنا التانية:يعني إيه عادي بقى؟
أنا:وانا مالي يعني ايه،أنا شفت سواق عبقري ودماغه عالية جدا كان كاتبها على ضهر المكروباص بتاعه ومن ساعتها معلقة معايا،والله ساعات بحس إن سواقين المكروباصات دول دمااااااااااااااااااااااغ
أنا التانية:أيوة صح،دماغ بتسمع مصطفى كامل والأخ التاني اللي بيقول"شرب الحشيش مزاج"ـ
أنا:طظ بقى،يعني هي جت عليهم؟ ما يسمعوا اللي هما عايزينه،ده حتى أنا عاوزة أجازة من الأغاني اللي بسمعها
أنا التانية:طب ودي عملتلك ايه هي كمان عشان تاخدي منها أجازة؟
أنا:معملتش،هي غتاتة وخلاص،أو يمكن زهقت منها وكمان مبقتش أحسها زي زمان،أنا لو سمعت أغنية"مقدرش أنساك"دلوقتي هقعد أضحك على الاهبل اللي بيعيش في الاغنية دي مع إن سبحان الله من سنتين كنت بسمعها كل يوم من غير ما أزهق
أنا التانية:يمكن حاسة إنك نضجتي؟أو طريقة تفكيرك اتغيرت؟كبرتي بقى والحاجات دي؟
أنا:نضجت؟!!يابنتي أنا زي ما عمو نظيف بيقول"لم أنضج حتى الآن"ربما تكون النار خسعة شويتين ومعرفش يعني ايه خسعة بس أكيد قليلة يعني أو هادية
أنا التانية:انتي عندك 19 سنة وشايفة انك مش ناضجة كفاية؟
أنا:مش أنا اللي بقول،ده هما اللي قالولي
أنا التانية:مين دول اللي قالوا؟
أنا:اللي عاوزة آخد منهم أجازة هما كمان
أنا التانية:أنا اتلخبطت وبرضو اللي هيقرا العك ده أكيد هيتلخبط
أنا:اشمعنى أنا اللي هكون مفهومة يعني؟ثم مين قالك إن أنا نفسي مش متلخبطة؟!ياعزيزتي ما الحياة إلا طبق مسقعة من اللي البت سلمى صاحبتي بتحبها
أنا التانية:طب ما علينا،عايزة تاخدي من "اللي قالولك"دول أجازة ليه؟
أنا:اتخنقت بصراحة،وهي مرارة واحدة يعني مش هتطلبهم بقى هما كمان،يعني ايه حد طول الوقت يقولك انتي عيلة؟ يعني ايه حد يقولك لسة ادامك كتير وانتي مش فاهمة الدنيا صح وانتي ساذجة وانتي عايزة كل حاجة مثالية وانتي وانتي،بلا وجع دماااااااااغ
أنا التانية:طب ما انتي كدة تقريبا
أنا:تؤ تؤ،أنا أحيانا فيا حاجات كدة لكن أنا برضو مش عيلة ولا ساذجة للدرجة اللي بيصوروني بيها وبعدين ايه المشكلة اني اعيش أفكار سني واتمنى ان كل حاجة تكون شبه مثالية؟أذنبت؟
أنا التانية:يابنتي الواحد بيعيش حياته مذنب ومجني عليه(حبة فلسفة عشان الحبايب والضيوف)ـ
أنا:أيوة ماهي طالبة فلسفة كمان!!بقولك عاوزة أجااااااااااااااازة،مش عايزة اقعد اتفلسف ولا حد يتفلسف عليا،مش عاوزة منطق ولا جنان،مش عاوزة مبررات وأسباب وموضوعية وحيادية وتحليل وماوراء النفس وما يتطلبه العقل وما تتطلبه الحياة،أنا عاوزة أجازة من كل الحوارات دي
أنا التانية:خلاص ما علينا
أنا:كلمتييييييي دي،مكنتش أعرف إني مأثرة عليا للدرجة دي!
أنا التانية:طبعا يا ست الأمورة مع إنك مش أمورة أوي يعني ولا حاجة
أنا:هنغلط بقى ولا ايه؟مانا برضو عارفة اني مش أمورة ولا نيلة بس مش لازم تفكريني بيها كل شوية يعني
أنا التانية:طيب نرجع لموضوعنا،الأجازة اللي انتي عاوزاها من كل حاجة دي هتنفذيها ازاي والامتحانات قربت؟
أنا:يادي النيلة على الامتحانات وسنين الزفتة الامتحانات،مانا مش طايقة أبص في كتاب ولا أبيض محاضرات ولا حتى أحضرهم،ده أنا بعصر على نفسي 4 كيلو لمون -مع إنه غالي اليومين دول-كل يوم عشان انزل من بيتنا اروح المدعوقة الجامعة
أنا التانية:ليه؟مع إن الناس بتروح تعيش حياتها في الجامعة مش بتكرهها كدة
أنا:أيووووة عليكي نور بيروحوا يعيشوا في الجامعة،كل واحد بيعيش على التاني،حوارات فاشلة فاشلة،بنات تنرفز وولاد مينفعش أقول عليهم رجالة أصلا،والله بحس اني ارجل منهم مع اني مش مسترجلة يعني،الأمن بقى الحلو في كل حتة لما تحسي إنهم طابقين فوق نفسك ومش قادرة حتى تتنفسي منهم،دكاترة يفقعوا وبيتحكموا فينا،لايحة زبالة ومتخلفة وعقيمة ولازم تتطبق علينا،ونلاقي دكتورة داخلة تقولنا هي دي اللايحة واذا كان عاجبكم،ولا ياسلام على شباب مصر بتوع الحزب اياه عايشين اخر صهللة،والاخوان شغالين على ودنه وياعيني علينا احنا ياغلابة اللي ملناش في دول ولا دول،من الاخر جامعة حقيرة
أنا التانية:شكلك هتتحبسي النهاردة
أنا:لا ليييييييييه؟مانا بطلت أروح مظاهرات،وبطلت أتكلم في السياسة وماشية في خطة التفاهة ولله الحمد أهو بنجاح،ألا صحيح ما تعرفيش أخبار ميريام فارس إيه؟
أنا التانية:كدابة عشان لسة بتفكري اذا كان ده الصح ولا لأ،لسة حيرانة ومش عارفة تقفي على بر،لا انتي عارفة تمشي تبع القطيع ولا ضده
أنا:انتي أدرى،بس انا عاوزة اجازة من كل ده،مش عاوزة افكر انا صح ولا هما صح ولا كلنا غلط،ومش عاوزة افكر او تعبت من التفكير في الاختيارات اللي المفروض اعملها،عاوزة اجاااااااااااازة يا ناااااااااااااس
أنا التانية:طب يا ستي خلاص متزعقيش بدل ما تلاقي الجهاز هنج وقفلها في وشك
أنا:جهاز حقير برضو زيه زي الجامعة كدة ماهو يلا بقى السيئة تعم
أنا التانية:خير خير،هل لديك فضفضات أخرى تصدعيني بيها؟
أنا:بعدين بقى عشان عاوزة أنام دلوقتي،مشكرييين على جلسة الصراحة دي، هنعملها تاني قريب إن شاء الله،يلا بيتك بيتك ومحدش ينقر في اخوه الكتكوت وهو ماشي

12 comments:

مهاب said...

سلام عليكم .. مرحبا أيتها الرفيقة 0

أتدرين يا فتاة .. انا كمان عندي حالة مشابهة كتير لحالتك ، يعني حتى فكرت تفكير من نوع ( جوة - جوة)_في دماغي فقط _ أنى أعمل تأجيل للسنة دي ، لأنى بصراحة فقدت أي حماس مصطنع أو رغبة مختلقة أنى أعمل أي حاجة متعلقة بالمجال اللى رميت نفسي فيه ده .. بس المشكلة بقى أنه الواحد كمان مش عاوز يعمل شىء غيره في الفترة دي، يعني ياخد أجازة _تعبير عبقري على فكرة _ من كل اللي بيحصل ده..0

صحيح .. مش معنى أنك تتمنى كل حاجة تبقى مثالية تبقى مخطئة، بس الفكرة كلها في رد فعلك لما تلاقيها ماهياش مثالية .. عارفة أفضل شىء _ من رأيى وزي مانا باعمل _ تمني كل شىء يكون مثالي، لكن لا يخيب أملك لما ماتلاقيش ده بيحصل _ وغالبا مش هايحصل _ ، عيشي على الأمل ده بس ماتعيشيش فيه _ يعني ايه ؟!!_ فاهمة ازاى ..0

انا كمان حاسس أني مانضجتش بالقدر الكافي على الرغم أني 21 سنة .. يعني أكبر منك _ الكلام ده موجه لانتى التانية على فكرة _ ومجرد الشعور بده فده دليل كويس على النضج .. كلام متناقض بس تلكم هي الحقيقة 0

تعبير عبقري آخر عجبني في كلامك .. " جامعة حقيرة" .. والله يا فتاة أصبتي .. نفس شعوري لما بادخل الجامعة _ المنصورة _ وبابقى مش عاوز أبض على حد واقف والا ماشي والا قاعد، بابقى عاو اخد بعضي واروح واسيب الجو المهبب ده لمن يريده0

على فكرة كونك تزهقي من حاجات بتحبيها فده عادي يعني، زمان انا كنت مهووس كورة _ مهووس بالمعنى الحرفي _ دلوقت فقدت أى حماس أو صلة بالكورة،لا فرجة ولا لعب واهتمامي تغير لأشياء أخرى .. فعادي بقى !!!!0

للأسف تعليقي ماغطاش كل حاجة موجودة في المقالة الحوارية الجميلة دي، بس معلش بقى ..0
(ملحوظة .. انتظري قريبا مقالتي الجديدة على المدونة " طارد الأرواح الشريرة")0

ولنا لقاء آخر عزيزتى 00 سلام بقى _ زى عادى بقى كده _ 0

مصطفيتش ابن حفصوتشا said...

ايه ياعم مهاب
اتدرين يافتاه
والله يافتاه اصبتى
انت منين يابنى

بصوا يا جماعة
انتوا تجيبوا متر جاز
متر واحد علشان التكاليف
وروشوه على نفسك وولعوا
وشوفوا المتعة
اولا ريحة الجاز وهى على جتتكم
ثانيا احساسك بانك قذر
فوبيا القذارة على رأى العايدى
ولما تولع فى نفسك شوف الدفىء وتطوره الى حرارة وتطوره الى لسعة وتطوره الى نار
حريقة
حريقة
وشوفى التحول من النار الى تشط مية ترميه عليكى الوالدة وتقول الحق يابوا ملكة البنت ولعت فى نفسها
وابوكى يقول ماتغيريش الموضوع
طابخة الاكل اورضيحى ليه؟
وكدة يعنى

والله اسهل من انا وانا اللى مش انا

على رأى المثل
حاجة تخنق
ليا سلام علشان اكل
باى

BEBO said...

و مين سمعك يا بنتي
ممممممم...
أنا بادور ع الاجازة دي من زمااااااااااان و نوعا ما أخدتها بس مش بشكل كامل
احنا ف سن النضج بنتغير لسة أعتقد هنفضل نتغير مع نفسنا و اللي حوالينا لحد مثلا 25 سنة و بعدين نتصالح مع الكون
ملكة
عيشي حياتك

FrEe.PhArAoH said...

ملكة
اختيار حلو .. تعرفى خدى اجازة منه وانضمى للشعب

هرووووووووووووووووووووووووب

اول مره اعلق لكن اعذرينى فرأيى بقا
البوست دا عباره عن هروب .. طبعا انتو اتنين بتتكلموا وف الغالب بتبقوا مختلفين
تقولى ايه فى اللى جواه 60 بنى ادم فبعض ومحاولش ياخد اجازة
حاولى تدورى ع الممل والغيه للابد انما متخديش اجازه من حاجه مش بتضرك .. دورى ع الممل ايوا بس هقلك كلمة ممله
بلاش تحطى الجامعه والمحاضرات ضمن الممل اللى هتلغيه لأنك لو حاولت هتفشلى والفشل ممل اكتر .. متهربيش لكن حددى امكانياتك بقلم وورقه وحددى انتى مش عايزه ايه بالظبط مش معقول مش عايزه كل حياتك
تحياتى ليكى لو مهربتيش .. وتحياتى لانتى التانيه اللى مش حابه تهرب
سلام

ملكة said...

مهاب،أو الرفيق مهاب رغماً عن أنف أي حد بقى
فقدان الحماس مش من الباب للطاق،أكيد فيه غلط في اللي بيحصل
يعني أنا مبقتش بحب الكلية والجامعة لأن اللي مش عاجبني فيها كتير أووي
عشان كدة بقيت مش متحمسة أروح ولو رحت ببقى غاصبة على نفسي عشان أكمل اليوم للآخر0
أنا مش بقول عايزة أعيش في يوتوبيا إنما كمان من حقي لو شفت حاجة غلط أعترض ولا بيتهيألي الاعتراض دلوقتي الناس بقوا بيعتبروه نمردة وتبطر على النعمة
متفهمش ايه النعمة في كدة
تلاقي حد بيقولك
هو انت مفيش حاجة عاجباك؟
ما علينا
متحرمناش من دخلتك علينا أيها الرفيق
ويجعله عامر عندك وعندنا إن شاء الله:D

ملكة said...

مصطفى
بقولك ايه؟
اما تتخنق متبقاش تعدي على المدونة هنا
عشان مش ناقصين والنبي
ثم بيني وبينك كدة
الجاز بيتباع ب(اللتر)مش بالمتر يا عم
بلاش فضايح أكتر من كدة بقى
وعلى رأي المثل
عالم مجنون مجنون يا(...)أي حد بقى

ملكة said...

bebo
ياه يا ايمان بقالي كتير مش بشوفلك تعليقات جميلة هنا يارب متقطعيش بينا تاني:)

هو الفكرة في التصالح مع الكون هو إنه هو نفسه يتصالح معانا الأول
أصلي بصراحة ممكن مثلا تكون حالتي النفسية كويسة جدا جدا(ومتصالحة مع نفسي أهو)والاقي مثلا حاجة ضايقتني في الجامعة،أو في الاتوبيس،أو في البيت
يعني كلها عوامل خارجية بقى
ربنا يعيننا

ملكة said...

Free.pharoah
سعيدة جدا بزيارتك وتعليقك ويارب متكونش الأخيرة

أقولك بصراحة أنا مش شايفة إنه هروب،عارف زي ما تكون بس محتاج فرصة تبعد فيها عن كل حاجة وتفكر فيها براحتك من غير ضغوط أو مشاكل
وبعدين ترجع تاني فتكون الرؤية بالنسبة لك بعد الأجازة دي أوضح
أو زي ما انت قلت
أقدر بعدها أجيب ورقة وقلم وأشطب على كل الملل والحاجات اللي بتضايقني من قايمة حياتي
وأكيد الدنيا بعد الأجازة دي(مش الهروب)هتكون أروق وألذ بكتيييير:)

أنـــا حـــــــــرة said...

ملكة

بصى يا بنتى
الاجازة مش شئ صعب زى ما انتى متصورة لو عايزة تاخديها و المصحف هتاخديها
انا اخدت اجازة قبلكده بس مش من كل الحياة لا من حاجات معينة رئيسية و قعدت مع نفسى و اعدت ترتيب اوراقى و حتى الآن اعتقد ان ده احسن ترتيب للاوراق رتبته فى حياتى

انا مش شايفه ان ده هروب بس هتقعدى مع نفسك تقعدى صح تتكلمى بصدق ماتغنيش و تردى على نفسك
ربما انتى فى مرحلة بين طورين و بتتغيرى فعينك على المرحلة اللى قبل كده و المرحلة اللى بعد كده و محتارة و فى نفس الوقت نفسك تدخلى اكتر الشرنقه اللى تريحك من وجع الدماغ


احسبيها كويس و كونى نفسك و سيبك من اى حد تانى

اما بخصوص انك عايزة كل حاجه شبه مثالية فانتى مش مذنبة بس ساذجة

المثالية موجودة لكن بحدود و صدقينى لو الحياة مثالية كانت هتبقى ماسخة
امشى صح و ماتبصيش ع اللى حواليكى علشان لو استنيتى كل حاجة تبقى تحفه هتستنى كتير
و صدقينى لما توصلى لدرجة من الصدق م ع الذات والايمان بنفسك عن قناعة
هتلاقى انك هتبقى متفائلة و قوية و هتكلمى ببساطة جدا
طول عمرك هتسمعى نفس الاراء الحمضانه اللى حواليكى لكن يوم ما تقفى و تسندى نفسك بنفسك ولا هيفرق معاكى حاجة

وكلامى عن تجربة مش فلسفة و طق حنك يعنى

ملكة said...

كلامك جميل ومقنع جدا
محتاجة شوية حاجات تتغير فيا عشان اقدر اطبقه
لكن أنا متأكدة إني قريباً،قريباً جداً هاخد الاجازة اللي انا عايزاها دي

تسلمي على زيارتك وكلامك يا سمسمة

سوسكــا said...

وانا كمااااااااااااااان عايزة اجازة ... وحشتيني يابت كتييييييييييييييير

ملكة said...

سوسكتي
شكلك يائسة يابنتي من الكلية وخنقتها
ربنا يخلصك ويخلصنا ويخلص كل الناس منها على خييييييييييييير

امتى الأجازة تيجي وأشووفك يابنتي بقى
بس هتبقى أجازة فعلية من الكلية والدراسة وإلخ إلخ