Friday, October 13, 2006

شوية فضفضات مضيقاني

بقالي أكتر من 3 شهور مكتبتش،مش قادرة أفهم ليه كل ما بمسك القلم بحس إن كل اللي هكتبه ملوش لزمة وألاقيني بقفل الأجندة وارمي القلم وأحس إني مش عاوزة أكتب،أو مش عارفة أكتب إيه حتى لو مجرد خواطر
المشكلة إن "الجفاف الأدبي"ده عاملي أرق،الكتابة كانت أكتر حاجة بحبها في حياتي،كنت بجد لما بكتب بستريح كتير وأوقات كنت بستمد قوة وثقة بنفسي ملهاش حدود لما أكتب قصة جديدة أو خواطر أو حتى شخابيط
دلوقتي،مفيش كتابة..مفيش حاجة بقت بتشدني للورق رغم إن جوايا مليون حاجة نفسي أحكي عنها وأطلعها!ـ
بعض الناس بيقولولي دي مجرد فترة وهتعدي،لكن أنا مش مقتنعة،3 شهور مفيش حرف كتبته!3شهور هجران كامل للكتابة أو حتى للاشتياق للقلم!3شهور ومش قادرة أحس إني هكتب تاني
أصلاً أنا عارفة إني مش مؤثرة في الأدب العربي كدة يعني لكن فكرة الكتابة بالنسبة لي هي نفسها فكرة الحرية،التخلص من الأحمال الزيادة علشان أرتاح،وأعتقد..3 شهور كتير أوي على إني أفضل شايلة كل الحاجات اللي جوايا دي
أنا تعبت

7 comments:

Anonymous said...

انتى محتاجة احساس قوى يسيطر عليكى علشان تكتبى
اى احساس ويارب يكون احساس حلو ..

لكن الحل انك تمسكى الورقة والقلم وتكتبى

اى حاجة وكل حاجة..اكتبى زى ماكتبتى البوست ده واكتبى حاجة جت على بالك فجأة (ذكرى او آيه قرآن او موقف عدى عليكى حلو او وحش او حتى كوبليه من اغية..اكتبى اكتبى اكتبى وفى لحظة الفكرة هاتيجى والكلام هايشد ديل بعضه وهاتوصلى للحرية اللى مفتقداها.

إيمان الميهي said...

على فكرة يا ملكة
دي فترة و تعدي
حقولك ليه
قبل ما أكتب أكتر قصيدة ليا أثرت على الناس و باعتبرها بدايتي الحقيقية قعدت حوالي 6 شهور مش باكتب خالص لدرجة إني شكيت ف موهبتي
و كنت باتكلم مع صديقة ليا شجعتني كتير و الحمد لله اتولدت القصيدة
عارفة يا ملكة
اللي يطمنك انه فيه حاجات جواكي
تأكدي حتخرج في وقتها بعمل يفاجئك
و تخيلي
أكتر بنات متميزين من صحابي ما كتبوش لمدة سنة كاملة و بعدها كتبوا أعمال روووعة
و بكرة تقولي إيمان قالت
لكي مني كل محبة و كل احترام:)

Yasmine Adel Fouad said...

انا مع زعرورة تماما

مَلَكة said...

زعرورة
جربت طريقتك وجابت نتيجة،صحيح مكنتش نتيجة سريعة إنما في النهاية كتبت وده أهم شيء
ليكي مني ألف تحية ووردة:)

مَلَكة said...

إيمان الميهي
عارفة يا ايمان انا دلوقتي اتاكدت إن الفترة اللي فاتت دي كانت مجرد وقفة لالتقاط الانفاس مش وقفة للأبد يعني
شاكرة مرورك الجميل دايما

مَلَكة said...

أنا حرة
خلاص يا سمسم،ابقى لووكي على ردي على أختك زعرورة بقى:)

مَلَكة said...

ياعم مهاب عريس ايه وسبوع ايه بس؟
مرحباً بك في كل وقت

هو فقدان الحماس عنصر فعلا لكن فقدان احساسك بالكتابة أصلا هي دي المشكلة
وبعدين ماله البطيخ بقى؟حد لاقيه دلوقتي؟!!ـ

ياعزيزي كلنا بطيخة بشكل أو بآخر،فقط تتفاوت المواسم:D