Thursday, October 05, 2006

وسط الزحمة

وسط الزحمة بننسي أصحاب
بننسي ذكريات حلوة قديمة
صحيح قليلة
لكن حلوة،تستحق نفتكرها
تستحق ماتضيعش
وسط الزحمة
بننسى الحاجات الحلوة اللي جوانا
الحاجات اللي بتخلينا نبقى بشر
مش مجرد تروس في آلات بتلف
الحاجات اللي بتخلينا نقول كلمة"إحساس"ـ
اللي بتلغي كلمة"منطق"وماديات0
وسط الزحمة بنخاف
عشان بنلاقي الناس قاسيين
ممكن يدهسونا وهما ماشيين
ومش هيحسوا إنهم قتلونا في طريقهم
وسط الزحمة بنشوف وشوش كتير تعبانة
مستنية ترتاح ومبترتاحش
عايشين و مش عايشين
بس برضو مكملين الطريق
وسط الزحمة يمكن نشوف وش جميل
يغري إننا نقرب منه
بس ما بنقربش
يمكن خوف
من كتر الزحمة ما خدعتنا بوشوش
بطلنا نصدق حتى الصدق
وسط الزحمة
لو بكيت
محدش هياخد باله من دموعك
ولو ضحكت
هيلوموا عليك عشان مفيش مكان لضحكتك
ولو اتكلمت كلامك هيضيع وسط الدوشة
ولو سكت
هتضيع إنت نفسك
وسط الزحمة
لو حاولت تمشي عكس الناس
هتقع ويدوسوك
وسط الزحمة
إلقالك رصيف يحميك!ـ

9 comments:

Anonymous said...

الـــقالك حد :

http://songs2.6arab.com/angham..elaalak-7ad(dubi2003).ram

اسمعى واتمزكى

سلمى صلاح said...

وسط الزحمة بيكون جرحك ملهوش معنى
علشان كلنا مجروحين... وجارحين

ملكة said...

زعرورة
الأغنية تحفة بجد
أول مرة أسمعها لكن عجبتني جدا
روحي اشتري ورد من المحل اللي قولتلك عليه براحتك بقى على حسابي:)

ملكة said...

سلمى صلاح
عندك حق يا سلمى،لما الجرح يكون زيه زي غيره يبقى الحديث عنه ملوش لازمة
لكن عمرك شفتي فرخة بتندبح من غير ما تعمل دوشة قبل ما تموت؟!

shimaa said...

ملكه... حلوه فعلا الخاطره وواقعيه لأبعد حد

ممممممممممم وفعلا أصبح غريب ان حد يبقى ماشى بيضحك.. بجد مش بهرج دلوقتى انا لو شوفت حد بيضحك بقول ده عبيط / عبيطه ولا ايه بيضحكوا على ايه وليه.. وايه ممكن يضحك من القلب.. ولو لاقيت حدزعلان وكئيب لدرجة انه ماشى مبلم كدا ببقى عاوزه اعيط مش عليه لكن عليا لأنى بحس انى وشى يشبهه اوى

وفعلا حاجات كتييييير بتضيع وسط الزحمه

&HEBA& said...

الله عليكي تجنني بجد

ملكة said...

شيماء
آسفة اتاخرت عليكي في الرد بس انا اكتشفت تعليقك بالصدفة والله

تعرفي من كتر ما اتعودنا على حاجات معينة مع انها مش العادي يعني تلاقينا استغربنا واستنكرنا العادي لما يحصل ميرسي لردك ياشيماء
متتأخريش عليا بزياراتك بقى

ملكة said...

Heba
ميرسي ليكي كتيير يا هبة
يارب اشوفك في المدونة هنا دايما:)

joseph maged said...

ملهاش حل ......جمدا جدا