Thursday, December 13, 2007

خلاص يا "شعب" هتنزل المرة دي

من فضلك ركز في المشهد ده :

حنفي بقوة : أنا قلت كلمة وأنا كلمتي لا يمكن تنزل الأرض أبداً

الزوجة بنظرة متحدية: حنننننننفففففففي!!

حنفي وهو باصص في الأرض: خلاص هتنزل المرة دي،إنما اعملي حسابك المرة الجاية لا ممكن تنزل الأرض أبداً!!

****

السيد وزير المالية - ضع ما تريد هنا- الذي أرغى وأزبد وعمل زي كابتن ماجد من يومين وهو بيرفض الامتثال لمطالب موظفي مصلحة الضرائب العقارية بزيادة مرتباتهم أسوة ببقية المصالح التابعة للضرائب. عم عنترة (الوزير يعني) وقف يوميها وقفة أسد هصور -ألا يعني ايه هصور؟- وقال أنا محدش يلوي دراعي يامنطقة وخليهم قاعدين عاملين الاعتصام بتاعهم في البرد ع الرصيف انا مش خسران حاجة ومفيش حاجة هتزيد ولا هتتغير ولو ملموش نفسهم هسلط عليهم ولاد عمي اللي في لاظوغلي يشوفوا شغلهم واهو بالمرة الضرب بيعمل شغل زي الفل في الشتا!!

وهكذا ياحبة عيني فضلوا موظفين الضرائب العقارية وعددهم 7 آلاف موظف -اللهم لا حسد- معتصمين ومضربين عن العمل في ميدان ضريح سعد زغلول وهما مقيمين اقامة دائمة في الشااارع لحد ما مطالبهم تتنفذ . و رغم تدخل ولاد العم بتوع لاظوغلي بكل غالي لديهم ورخيص من عصيان وعساكر(بيبقوا شبه بعض على فكرة) ومن خراطيم مياه في عز التلج وضرب وأشياء من هذا القبيل لكن فكرك يا مواطن اتهز للموظفين شعرة من كل ده؟؟ أبداً فضلوا قاعدين مكانهم وسايبين أهاليهم وعيالهم علشان بس بيطلبوا يتعاملوا معاملة بني آدمين..

النهاردة بقى حنفي الوزير كلمته نزلت الأرض ومبقاش لا أسد ولا هصور ولا بتنجان، رجع وقال الضرائب العقارية تنضم لوزارة المالية وتتعامل زي بقية مصالح الضرائب التانية مش أقل منها وكان ناقص يقولهم أنا آسف يا معلمين وحقكم على رقابتي واللي عاوزينه هو اللي هيمشي وعندك سحلب للبهوات ياولا!

...

واللي لسة فاكر حوارات الأسبوع اللي فات بتاعة هرتلة الحكومة برضو لما اتهفوا في دماغهم وفكروا يلغوا الدعم ويحننوا علينا بقرشين الدنيا قامت وماقعدتش، وناس تشتم وتزعق وتهلل وتهديدات بإضرابات واعتصامات ومظاهرات وكانت هتبقى شغلانة لحد ما الأسد الهصور -الحكومة المرة دي- رجع نملة ورجعت الجملة العتيدة تتردد في أنحاء الصحف الحكومية المباركة "لا مساس بالدعم و سيصل لمستحقيه" الله أعلم بقى مين مستحقيه دول اللي الحكومة بتدور عليهم بقالها 30 سنة ومش عارفة توصل لهم الدعم لحد دوقتي المهم إن الدعم مش بح وهنفضل ناخد زيت وسكر من الحكومة ياولاد (زغرودة للحبايب)!!

ومن ده كله نستنتج إن:-

1# الحكومة بأطرافها المعنية نفر نفر بيشتروا صنف مغشوش و في أغلب أوقات تصريحاتهم بيكونوا مونونيين (ابحث عنها في معجم عبمجيد الحشاش(

2# المصريين بطلوا يشتروا من نفس الصنف المغشوش ده والحمد لله بدأت عمليات الصحيان تؤتي ثمارها

3# الاضراب أو الاعتصام مش حاجة قبيحة لا سمح الله ولا هو حرام شرعاً ولا يسبب الحساسية

4# ليس على الحكومة حرج بل ويعتبر أفرادها فاقدين الاهلية و من الآخر متاخدوش على كلامهم

5# من حقك كمصري أن تُضِرب ومن حق الحكومة أن تَََضرَب إنما في النهاية .. "تجدوا ما يسركم" !!!

16 comments:

Mustafa Rizq said...

احنا ممكن نستفيد، أو نستنتج شوية حاجات تاني، مثلا

1- الوزرا ف مصر قراطيس جوافة، و متخيلين نفسهم عناقيد عنب، يعني كبيرهم و على رأي وزير الشباب الأحير لما الأمور تبقى بجد ( و أنا مالي ) يعني من الأخر قفف

2- ان هايجيلك يوم كدا كدا هاتفوق فيه لأن الحشيش هايبقى أغلى من انك تشتريه، و ساعتها هاتضطر تفتح عنيك.... و شوف بقى

3- انك لما تفتح عنيك، مش معناه بالضرورة إن اخوك المواطن في وزارة الدفاع الشقيقية فلوسه خلصط و اضطر يفوق هو كمان، ف انت هاتفتح عنيك لوحدك، و هاتوقف ع الرصيف لوحدك و هاتنداس لوحدك، و طبعا أخوك في أي مكان تاني هو اللي هايقوم بالمهمة، لأنه أخوك و مش ممكن يسيبك لغريب، و لأن المصرين دوما في رباط

4- ان الحكومة زيها زي اي ست بيت ف مصر، عندها الضغط و تصلب الشراين و انفصام ف الشخصية ، و .. و ... و مضطرة تلاقي حاجة ترغي فيها، تضيع وقت يعني، و طبيعي و لادها _ الشعب _ لازم يشارك لأنه مش ابن حرام

5- ..................ء

6- ...................ء

7-..................ء

19984 - ان المشهد دا أكيد بيتكرر من عصور ما قبل السيد عبد الفتاح القصري... و لسه

Anonymous said...

سعيد ان انا عترت على مدونتك بالصدفة البحتة
قبل ما انسى
انتي موهوبة بالفعل
بالنسبة للموضوع
انتي جريئة برضه
بس كلامك صح
عشان كدة عندنا امل

اتمنى تشرفيني

a Dreamer with feet on the Floor said...

dear>>> U have reflexed what happened in a very good way and funny words.., while it is all real..
this nation needs 2 wake up...we r not weak if we R together...
Best Regardes

R..R said...

بعيدا عن الموضوع عايزة اقولك اني مدونة جديدة ودخلت مدونتك و20 مدونة تانية
مفيش ولا مدونة وصّلتني لدرجة انى اقراها كلها غير مدونتك
اسلوبك جميل وروحك خفيفة ..يعني شبه المطر
اتمنى اشوفك تاني

Anonymous said...

ازيك ياملكة عاملة ايه بصي يابنتي انا برضه كنت بقعد افكر واقول دعم ايه ومين المستحقين ولا مساس بايه بالظبط
اكتشفت بقي ان فعلا لا مساس دي موجودة وبتحصل والدعم بيصل لمستحقيه بس احنا اللي فاهمين الناس دي غلط
وده عشان المستحقين دول هما العالم الهليبة وبتوع الرقص علي السلالم والكبار اوي وولاد العم ربنا يكفينا شرهم والدعم ده عبارة عن الرشاوي والتنازلات التي بتم في نظير العكش وتغميض العين عشان البلد تتباع ياولاده وهيه دي نظريتي عن الدعم والمستحقين ولا مساس
وحسبي الله ونعم الوكيل

JALEO

السـيد شبـل said...

والله ..هى دى المرة الاولى لدخولى مدونتك ... وهى تستحق بالطبع الزياره اكتر من مرة
سعيد انى لقيت بنت بتكتب سياسى
فى موضوعات سياسيه كتير هتلاقيها فمدونتى... تحياتى واتمنى انك تستفيدى منها

مدونتك اكثر من رائعه وتمنياتى بدوام التوفيق

إبـراهيم ... said...

حمد لله ع الســلااااامـــة ... يا ملكـة ...، موضوعاتك المصريـة وحشتني اصصراحـة، وأنا لولا إني واخد على نفسي عهد ما اكتبش عن مواضيع الساعة، والساعتين ، كنت وافقتك ف الرأي ....


من الحاجات اللي تـفرِح


كل عيــدِ ,,, وأنتِ بفرح

وائل فتحي said...

- يمكن دى اول مرة

- اعلق على بوست بعيد عن الذاتيةاو الشعر
بس البوست قوى

-واسلوبك حلو مش رغى زى مانا متعود
من ناس كتير بيكتبوا فى السياسة

- اكيد كلنا عارفين ان البلد
صحتها مش ولابد والكلام ده
واكيد معنديش خلق اقرا لحد بيرغى وخلاص

-بس بجد البوست حلو والمدونة جميلة

- بس

Anonymous said...

مصطفى رزق

1- انا موافقة عليها تماما

2-معتقدش حتى لو الحشيش علي الناس هتبطل تشتريه،ماهم مابيلاقوش ياكلوا ياعمنا وبتلاقي الواحد فيهم قاعد بيلعب بنوكيا 6630 !!

3-عليك نور،والمصريين أهما جيل بعد جيل مسحوليييين

4-احم،بغض النظر وبمنتهى الحيادية..أنا أحتج!!قطعاً يعني!

5- منور يا عم مصطفى بردودك الجامدة دي :)

Anonymous said...

مصطفى سمير

والله أنا أسعد خاصة إنك بتفكرني بأيام الطفولة :)

موهوبة وجريئة؟؟!!

ثواني طب أروح أنده على العائلة الكريمة اللي شايفين اني هوديهم وهودي نفسي في داهية بال"كلام الفارغ" اللي بكتبه
ربنا يكرمك يابني زي ما بتديني انا كدة شحنة أمل :)
منور دايما

Anonymous said...

dreamer

Absolutely right. The thing is that we all know the clue to get out of what we're stuck in now but none of us is ready to take the smallest step!

Thnx a million for the nice visit :)

Anonymous said...

r.r

ردك بجد اسعدني جدا جدا بدرجة لا تتخيليها
والأسعد إني عرفتك وعرفت مدونتك بالصدفة :)
يارب متكونش اخر زيارة يا رانيا ودايما منوراني

Anonymous said...

هبة

ازيك انتي؟لعلك بخير :)

جبتي من الآخر
وفكرتيني بوزير تموين كان هو اول واحد طلع جملة "لا مساس" دي ومن بعده مسكوا فيها لحد النهاردة
هييييييييييه الله يرحم الجميع بقى

منورة

Anonymous said...

السيد شبل

أهلا وسهلا بيك ويارب الزيارة تتكرر للمدونة وتفيدها بتعليقاتك:)
بالنسبة للسياسة فأنا مش بكتبها باحتراف بس بتبقى مجرد مواضيع خفيفة بعبر فيها عن رأيي مش أكتر

شكرا ليك على ردك ونورت المدونة :)

Anonymous said...

إبراهيم

الله يسلمك يافندم ربنا يخليك
مش موضوع ساعة،هو الواحد بس فرحان بخيبة الحكومة مرة بدال ماحنا كل مرة بنطلع الخايبين يعني :S

وكل عيد وإنت أحسن من اللي قبله :)

منور يافندم

Anonymous said...

وائل

وانا سعيدة انك لما قررت تقرا حاجة بعيد عن الشعر وقعت في مدونتي :)
كلامك أسعدني أكتر بس يارب متكونش دي آخر زيارة

منور كتير :)