Tuesday, October 30, 2007

تأملات في البتنجان

تلاجة وقعت على ايدك ببساطة هتحس بوجع في صوابعك لمدة ساعة.. قوول ساعتين أو يوم بحاله حتى وبعدين هتنسى الوجع عادي يعني بمرور الأيام. هو إنت مش هتنسى ان التلاجة وقعت على ايدك ولا حاجة ، إنت بس هتطنش وتستعبط. ليه بقى هتتناسى وتطنش وتستعبط؟ عشان ايدك متكسرتش حرفيا وبالتالي ملكش علاج في مستشفى أو غيرها. ساعات هييجي عليك وقت هتبقى موجوع وفي نفس الوقت ملكش علاج عشان الوجع يفترض إنه بسيط فتتمنى وقتها لو مكنش الوجع بسيط عشان يبقى ليك حق إنك تصرخ وتجري على المستشفى وحد يلحقك. والمهم في الآخر إن الحمد لله التلاجة بخير!!

حقيقي واحشني من زمان إني أهرتل كدة على المدونة اللي بدأت تبقى مهجورة ياعيني ولا كأن ليها اصحاب. وحشتني الكتابة اللي هجرتني روخرة من شهور طويلة وباينها مش هترجع زي ما حاجات غيرها زيووو راحت إذ فجأتن واستندلت وحطت ايديها في وسطها وطلعت لي لسانها وحلفت يمين تلاتة ماهي معتبة عندي تاني. مش مهم الكتابة أصل يعني طالما حد مش مقتنع إنه بيعرف يكتب أساسا والله لو مين حاول يقنعه لازم هيفشل. المهم إن حتى القراية انضمت لاختها وهجرتني يعني بقيت رسمياً جاهلة. لا قراءة ولا كتابة ولا بحضر ندوات ولا جلسات ثقافية ولا لقاءات ولا أي بتنجان، الحقيقة أنا بتسائل جدياً أنا لازمتي ايه دوقتي بالظبط؟ معلش يا مصر، بقى فيكي نفر زيادة زي قلته!

اكتشفت فيا اليومين دول بقى صفة حلوة أوي. تقريبا مكنتش موجودة بس بالتعود والتدريب والمثابرة –أحمدك يارب- بقت موجودة. انا بقيت بعرف أسكت!! آه وربنا اتعلمت اسكت لما حد يتكلم قدامي حتى لو بيقول حاجات مش عاجباني او حاجات مستفزة ودي صفة كنت مفتقداها جدا ليه بقى؟ عشان انا طول عمري اللي جايب لي المصايب كلها هو المدعو لساني إنما الظاهر حد حسده و خلاه يسكت. يعني الاقي حد بيتكلم في موضوع وبيقول رأي غلط بقيت أبص بنظرة حكيمة جدا و أسكت على اعتبار إن "مفيش فايدة"، أو لو حد قال فيا رأي مش عاجبني برضو مبحاولش أصحح ولا أعترض ولا أتكلم ولا أيتها حاجة، أصل أتكلم ليه؟ مهو "استك منه فيه" أو بمعنى أدق راجع بند المغفور له سعد زغلول المذكور من قبل.يعني بقيت بفكر جوة-جوة مفيش ردود فعل بتطلع، مفتقدة للرغي الحميم بيني وبين اصحابي، مفتقدة أكتر لشوية ثقة بأن حد هيسمع بجد والحقيقة عشان مبقاش ظالمة ومفترية انا شخصيا معرفش لو لقيت اللي هيسمع هبقى حابة أرغي ولا هسلك طريقة "وششش" بتاعة آخر الليل. أما السؤال حاليا بقى، لما انا بقيت ساكتة إلى هذا الحد، أمال إيه كل الرغي العقيم اللي انا برغي فيه ده كله دوقتي؟؟! يلا خلاص بيتك بيتك هنرجع لبياتنا الشتوي الصامت تاني ونشوفكم على خير الهرتلة الجاية إن شاء الله!

22 comments:

Ahmed Al-Sabbagh said...

شاركنا الشعب الأمريكى أحزانه على ضحاياه فى ذكريات سبتمبر/أيلول الأليمة

لكن دعونا نُذّكر العالم بالجرائم الأمريكية التى أرتكبتها الولايات المتحدة ضد أبرياء وأطفال ومدنين

شارك وأدعم فكرة تخصيص يوم 30 أكتوبر يوما للجرائم الأمريكية


أحمد الصباغ

إبـراهيم ... said...

هم يضحك، وهم يبكي ....


شكرًا أحمد الصبـاغ!!

ــــــــــــــــ
شفتي يا ملكة، موضوعك فكرنا بالجرائم الأمريكية، اكمالاً للتهييس ، والعلاقة المرتبطة الأكيد ـ و لاشك ـ بالبتنجـان
******
أشاطرك التفكير فإن الواحد بيوصل ف فترة لإن مفيش فايدة، بس مش عارف ده ليه علاقة بإيه ااصراحـة

حتى عندنا ف الشغل ، بقى الواحد ما بيدخلش ف حوارات زي زمان

السكوت راااحـــة !!

آه، أنا كنت مرة كتبت ف المسحوق والأرض الصلبة(2) لو تفتكريها ، أبيات الأسيوطي :

الصمت في اليابان فنٌ
في الصين ..مفتاح الفضـيـلة

الصمت في هذي البلاد ..ضرورةٌ ..
لكن .. ثقيـلـة

......
كويس إنك تخلصتي من هذا الثقل


تحياتي

YOTTA said...

هو مينفعش ماردش شان لسه النهاردة الصبح وانا راجعة من بره ف الميكروباص وسرحانة عمالة أسألنى هو فيه ايه
أنا بقيت ساكته اوى كده ليه
باتجنب اى موقف يخلينى أرغى أو أدخل فى مناقشة ما ف أى موضوع مع أى حد
ده أنا كنت بأمشى أتكلم مع طوب الأرض
كنت بأتصاحب على الناس ف المواصلات
ونقعد نرغى ف مواضيع حيوية والذى منه
..
ومع معظم أصحابى كمان، بالذات السنة دى لأن اهتماماتى اتغيرت كتير
وكل واحد بقت له دماغ لوحده وكل واحد له أفكاره
يمكن مش بألاقى حاجة مشتركة نتكلم فيها
..
أما بأه حاله تجنب الدخول ف مناقشات خصوصا لما يبقى رأيى مخالف وعارفة ان اللى قدامى مش هيقتنع
اتعلمتها من زمان وريحتنى كتير أوى
بدل ماكنت بأتنرفز وأتزرزر شان أوصل وجهة نظرى بقيت أخليها لنفسى ويكفينى انى مقتنعة بيها
..
رغيت كتير أوى
براحتى بأه
(وش مطلع لسانه)

الأستاذ said...

من حقك تهيسي "طالما أستك منه فيه" لكن الحمد لله فعلاً إن التلاجة بخير
مع أطيب تمنياتي بإن الأكل اللي في التلاجة مباظش لما وقعت
تحياتي

Masry said...

يا لهوي

Masry said...

لا يا ملكة بلاش
السكوت اللي انتي بتتكلمي عليه دة فقدان امل و فقدان هدف و يأس
لا انتي واثقة في نفسك ولا واثقة في اللي هيسمعك ولا عايزة تتعبي نفسك و تتكلمي علشان الله يرحمة قال مفيش فايدة..
طب انا ارغي بقي و قوليلي مفيش فايدة في ايه؟؟
مفيش فايدة فينا ..طبعا محنا بطلنا نشتغل من كام سنة و هنبطل نتكلم دلوقتي شوية شوية هنبطل نبقي بني ادمين و من هنعرف حتي نفول مفيش فايدة علشان مش هنبقي عارفين كلمة فايدة
ولا مفيش فايدة في مصر .. كل ما نقول هتتعدل من حتة نلاقيها باظت من حتة تانية و كل منقول اهي هتفرج نلاقيها بتتعقد ماهي برضة المشلكة فينا كا شعب مصر العظيم مش عارفين ننضف او مش عايزين ننضف مش عارف بس ماهو بسبب اننا سسيبنا القراية من كام سنة و سبنا السمع بعدها بشوية و حاليا هنسيب الكلام
بصي يا ملكة .. زعقي اشتمي قولي كلام اهبل قولي كلام قوي يمكن اي حاجة في دول تهز اللي قامك و بما ان مفيش فايدة يبقي مش هتخسري حاجة لما تعملي كدة
بس بلاش سكوت

محمد العدوي said...

أمال إيه كل الرغي العقيم اللي انا برغي فيه ده كله دوقتي؟؟!


دي حلاوة الروح .

Anonymous said...

أحمد الصباغ

وماله بس احنا محتاجين 365 يوم نسميهم 30 أكتوبر للاحتفال بجرائم الحكومة الأمريكية في خلق الله
هو صحيح اشمعنى 30 اكتوبر يعني؟؟

Anonymous said...

إبراهيم

أنا برضو بقول كدة
بس أهو يعني معروف علمياً إن البتنجان داخل في كل حاجة وكدة بقى

ملوش علاقة بحاجة
ممكن تقول كذا مرة اتكلم وقلبه وجعه ومكنش فيه فايدة فقرر يرتاح وبس
فاكراه وفاكراهم
وجايين في وقتهم

شكرا كتير واكيد انت عارف ليه يعني :)

Anonymous said...

يوتا

the same old story :)

أبوس ايديكي كل ما تحبي ترغي انا موجودة والمدونة موجودة وكفاية ان لسة فيه لسان وصوابع نقدر نتواصل بيهم :D

دايما منورة ودوسي في الرغي ولا يهمك

Unknown said...

الاستاذ

اه الحمد لله التالاجة والأكل بخير
تعالى كل بقى :)

Unknown said...

آخر

حلو الكلام وجميل وزي الفل
بس مبقاش له لازمة خلاص
حتى الكلام اللي بيشجع على الكلام بقى السكوت احسن منه
تفتكر بخبرتك النفسوية
دي حالة اكتئاب مثلا؟؟

بقولك ايه
متتخضش يعني كدة مش مستاهلة
يوم ما احس ان لساني ملوش لازمة بجد هقطعه وارميه بلا وجع دماغ يا راجل

منور :)

Anonymous said...

محمد العدوي

كااااك :D

Mustafa Rizq said...

أنا بس هاقؤلك حاجة بمناسبة موضوع السكوت دا

1- مبروك على امتلاك (اوبشن جديد)ء
2- خلي بالك لو استخدمتيه طول الوقت هاتبقي شبهي، و صدقيني دي حاجة مش هاتسعدك


اه.. الكلام لما بيكون طالع بالشكل دا بيكون زي الدموع... يعني جسمنا مش قادر يحتويها ف بيطردها.. الامتلاء بأحاسيس و فكار بالشكل دا مش مفيد خالص إلا لو هايتبعه انفجار... و خما تنسيش، على قد تفردك و ابداعك هايكون انفجارك


و من غير حلفان ( الندوات، الجلسات ، الكتابات، الفراءات...) مش ألذ بكتير من البتنجان


سلامي.. جدا

معاذ رياض said...

بعض الناس رغيهم وهرتلتهم أدب رفيع ، وبعض الناس أعمالهم الأدبية مجرد رغي وهرتلة
أعتقد أن صاحبة السمو الملكي التي تكتب في هذه المدونة من النوع الأول
علشان كده باقولك استمري في التأملات .. بس بلاش في البتنجان علشان أنا مش باحبه قوي.

إيمان الميهي said...

انتى مالكيش حل يا بنت انتي
عاوزة شيكولاته كبيرة على كلامك الحلو
و عاوزة أشدك من شعرك جاااااااامد
مين دي اللي متعرفش تكتب يا بنت انتى
انا حاسة بجد جدا جدا انه شخصيتنا قريبة يللا خير
و نفسي اشوف وشك الجميل ع الماسنجر
يا بنتي عبريني
لكِ سلام مربع
انا ايه اللي باقوله ده ملوش اي علاقة باي حاجة بس تمام يعني
سلام يا ملوكة

Unknown said...

مش عارف إزاي ما علقتش لى البوست التحفة ده قبل كده!
أول بوست أقرأه أكتر من مرة من فترة كبيرة قوي!
أقولك.. إذا كنتي موهوبة في البتنجان كده ما تقلبي المدونة بتنجان أحسن!
لا.. بجد رائع يا برينسيس!
تحياتي

Anonymous said...

مصطفى

طلع فشنك،لسة لساني موديني في ربعميت داهية ولسة بفتح بوقي عمال على بطال بدون داعي غالبا وبداعي نادرا :(

وبالنسبة للانفجار
احيانا بيكون نتيجته حبة دخان رمادي بيخنق اكتر
مش بالضرورة الرؤية بعديه توضح يعني

هاخد كلامك ثقة واديني قاعدة في بيتنا بحمر بتنجان رغم اني مبطيقش طعمه اصلا

منور يافندم

Anonymous said...

معاذ

والله ولا انا كمان بطيقه بس احيانا بنضطر نتعامل معاه
وبالنسبة لرفعك روحي المعنوية بكلماتك
روح ياشيخ اللهي يجبر بخاطرك :)

منور كتير يافندم


دافنشي

طب والله انا فرحانة جدا ان البوست عجبك رغم امتلائه بالبتنجان
ثم ازاي اقلبها بتنجان والخضار غلي يا سيد دافنشي؟
ينفع املاها حب العزيز ودوم؟ :)

منور

Anonymous said...

ايمي

والله كلامك كله شيكولاتة من غير ماتجيبيها
انا حاسة نفس الاحساس
بتساءل
هو انا بقيت بحس بكدة كتير ليه اليومين دول؟
انا كمان عاوزة اشوفك قريب بس ربنا يسهل ان شاء الله
تسلمي على الزيارة ياايمي وماتغيبيش

كريم said...

بحييكى بجد ع مدونتك الجميلة جدااااا دى واكون سعيد http://chaos-sniper.blogspot.comلو تشرفتى بزيارة مدونتى

كريم said...

http://chaos-sniper.blogspot.com