Sunday, October 14, 2007

مصر محتاجة سوبر ناني

من يومين وانا بتناقش مع أحد أفراد الجيران مناقشة عقيمة عن أهمية مراعاة الآخرين والأدب والذي منه، جاتلي لحظة تجلي سريعة جدا مفادها هو : الشعب المصري مش متربي
آه والله هو كدة بالظبط، يعني مصر معرفتش تربي ياحضرات!! تخيل كدة لو إنت عندك ابن صغير وقررت تسيبه يعمل كل حاجة هو عايزها، يرمي زبالة في الشارع،يدوس على رجل الناس، ميعرفش ينطق كلمة "آسف"،يشتم بأقذر الشتايم حتى لو بالهزار، يشغل التلفزيون والكاسيت والكمبيوتر على أعلى صوت ،يركب اتوبيس ويزاحم الركاب ولو كرسي فضي يزق ويجري يقعد حتى لو فيه ناس كبار واقفين، يضايق البنات وهما ماشيين،يكسر كل حاجة ليها علاقة بكلمة"نظام"، يتف على الارض ويكتب على الحيطان ويكسر الخشب بتاع دكك المدرسة والأدهى إنه يعمل ما بداله في أي حتة!!ـ
إيه رأيك؟ لما يكبر ابنك ده هيبقى عامل ازاي؟ ها ؟ تخيلته؟ يشبه لناس كتير بتشوفهم كل يوم صح؟ الحلو بقى إنه هو نفسه لما يكبر هيتعامل معاك بأسلوب زي الزفت، بمعنى أدق هيتعامل معاك بنفس الأسلوب اللي إنت ربيته عليه وهتيجي إنت أول واحد بعد كدة تشتكي للناس من ابنك وتقول لهم يرضيكم اللي بيعمله فيه ده وأنا أبوه؟؟
أهو بالضبط كدة موقف مصر، معرفتش تربي وجاية دلوقتي تشتكي من قلة أدب ولادها، الخوف بقى في إيه؟ لا تكون مصر نفسها هي اللي معرفتش تتربى عشان اللي مسكوها مكنوش متربيين!! حد فهم حاجة ياخوانا؟؟

18 comments:

Anonymous said...

سلام عليكم

مش شرط على فكرة يكون مش متربي .. هو بس لَفَظ تربيته .. طنشها .. نفضلها

و بعدين يافندم .. التصرفات دي كلها هي ألف باء الأنانية .. التطبيق العملي لأنا ومن بعدي الطوفان

و كل سنة وانتي طيبة وكداهوات

مَلَكة said...

مهاب
وعليكم السلام ورحمة الله وبركاته
اتفضل كابشتينو يافندم

اللي بيلفظ حاجة لازم يكون ابتلع منها ولو حاجة بسيطة يا مهاب،انما اللي انا شايفاه دلوقتي إن مكنش فيه تربية اساسا عشان يلفظوها
والمثل بيقول فاقده لا يعطيه

وبالاضافة للأنانية بقى إن ثقافة احترام الآخر مفقودة تماما

وانت طيب وبخير وكداهوات برضك:)

منور يافندم، بيتك ومطرحك

Anonymous said...

عموما هو انتي عندك حق.. بس خدي بالك.. هما مش متربيين.. بس ده سر.. مصر كلها بس هي اللي عارفاه!

ومين ناني دي حضرتك؟
دي اللي هاتربي المصريين؟
والله تبقى جامدة قوي..
صحيح دي ورطة.. واحد مش متربي عايز يربي ولاده.. ممكن يعرف؟
كده هانفضل كده على طول..
عيد سعيد يا ملكتنا :)

Anonymous said...

هو فى كلمة قالها أحمد _ وجع دماغ
شبه موضوعك يا ملوكة ..
" الشعب المصرى محتاج يتربى من أول و جديد " ... ربنا يعينا على مصر

YOTTA said...

أهو انتى جبتيها م الآخر

هو شعب مش متربى

وبما انه مش عارف يربى نفسه

فممكن ف الحالة دى نستعين بخبرات أجنبية

يعنى نجيبله نانى فلبينية مثلاً

ولو انى ماعتقدش انه ممكن يتعدل

ياستى سيبك انتى هى خلاص باظت

Mustafa Rizq said...

ليه بس كدا... مش متربي مرة واحدة...ههههههه لالالا

كده يبقى فعلا مافيش أمل.. بيتهيالأي الامور أبسط من كده

هو مش مافيش تربية..هو في، بس كمان في اتفاق رسمي انه لازم تخليك ف حالك و تاكل عيش - مش أي حاجة تانية لا قدر الله- دا طبعا لو عرفت تجيب عيش ..دا بجانب قانون الزحمة و الواد الملحلح الكسيب اللي الست الحكومة بتحاول تأكد على شرعيته ف الفترة الأخيرة بشكل سافرو واضح و وقح جدا... و طبعا انت عارفه طبيعةالاحترام المتبادل بين الشعب المصري و مواد الدستور، اللي ولد نوع رائع من المجافاه بين الكائن الهلامي اللي اسمة المواطن المصري و بين الخزعبلة اللي اسمها الوطن مصر، و طبعا هايكون تصرف غير طبيعي تماما لو تعاملنا - احنا و مصر - من منطلق الوطن و المواطن، و بالتالي ف اللي انت شايفاه دا طبيعي جدا بل و هو المطلوب اثباته و إقراره و تفعيله و.... إلى اخر المصادر الصناعية المستحدثة... يعني ببساطة في كائنات أقرت شكل معين لكائنات تانية و الكائنات التانية وافقت عليه و بس.
يعني الناس تمرت فيها التربية، و بعدين فين الديموقراطية و الايمان بالتعددية، مش تتقبلي التعريفات المختلفة للتربية، و لا ايه.... دا الشعب اللي.... ما علينا


احنا محتاجين وطن زي ما هو محتاج مواطنين .

و اللي مش سامع صوت الندا يبقى مش من هنا

سلامي

mera said...

السلام عليكم ورحمة الله وبركاته
أولا : مدونتك جميله جدااا يا ملكه وبسمع شكر فيها كتيير
ثانيا: بالنسبه لموضوع انه مش متربى ...احنا ممكن نقول ما بقاش متربى
عشان انتى لو رجعتى مثلا لافلام زماان او سمععتى كلام من حد كبييير هيقولك ان ده مكنش بيحصل كان فيه ادب واحترام
نوعا ما على الاقل

وزى ما yottaقالت ان بما انه مش متربى هل ممكن نستعين بخبرات اجنبيه

انا اعتقد انها من اولها لاخرها سياسه عليا
يعنى ايه اللى جد عن زماان عشان الشعب ما يبقاش متربى ؟؟حاجات كتيير جايالنا من برة
عشان تبوظ عقول شبابنا اللى هما اساس اى بلد عشان فى الاخر نستعين بنفس البلد اللى بوظت عقول الشباب عشان تيجى تصلحها.. طب إزاى؟؟
موضوع رائع وحتاج مناقشه كتييير ...و أسفة لو طولت عليكى

محمد مصطفى said...

أفتكر سورب ناني هتعتذر

shady said...

نسيس الموضوع شوية ونخرج عنه بعض الشئ ونعدي الخط الأحمر .الخ ..(دا هزار ..).. انا غلبان

بس بجد جملة مصر معرفتش تربي وجاية تشتكي مش بس عشان التدهور العام .. فكري في نقطة يا ملكة .. في جملة بتقول (كل شعب يستاهل اللي بيحكمه .. افتكرتخا لما قريت البوست دا .. مش الراجل اللي بنشتكي منه متربي بينا ولا برهمصر .. واحنا اللي ساكتين عليه .. ؟

خاطر بسيط مر علي بالي

بوست جميل

Anonymous said...

كان نفسى وانا فى مدونتك انى اكون مؤدب على مقايس الادب عندك
بس بصراحة مش قادر امسك نفسى

انتى بيضان

Unknown said...

دافنشي

والسر في أتوبيس!! يعني محدش هيعرف خاالص

ايه ده؟متعرفش سوبر ناني؟
بتاعة الام بي سي فور يابني
ما المهم نجيبها الأول وبعدين هي تتصرف بقى
ربنا يستر والشعب ميعلمهاش قلة الأدب بقى!!

عيد سعيد عليك كمان ولو انها متأخرة:)

Unknown said...

مهموهتي

أحمد عنده حق تماما
بس الظاهر الشعب محتاج يتربى للمرة الأولى أساسا عشان زي ما انا شايفة فيه جيل بحاله ميعرفش اصلا يعني ايه تربية!!

أو يعينها هي علينا!

منورة يا مها :)

Unknown said...

يوتّا العزيزة

آه عملاً بمبدأ اللي أهله مربوهوش تربيه الناني!!
مفتكرش باظت كلها لسة فيه جزء مظبوط وده بقى اللي بنحاول احنا نجيبله ناني تانية تحافظ على تربيته المتبقية من آثار العدوان الشامل:(

منورة كتير يا آية

Unknown said...

m.r

شكرا عشان كلامك جاب من الآخر
طب اما هو فيه ناس كدة وبتفهم بجد في مصر
امال حالتنا بالبلا لحد دوقتي ليه؟؟!!

ابقى تعالى كل يوم"بجد" يافندم :)
منور

Unknown said...

mera

انا معاكي ان فيه مليون عادة سخيفة جدت علينا ومكنتش موجودة لكن لو بصينا لزمان برضو هنلاقي ايامها كان الناس بتقول الجيل الجديد وقلة الأدب ومفيش احترام ونفس الكلام بالظبط الي فرق دلوقتي ان المعايير اختلت تماما
دلوقتي بكل الدرجات احنا أسوأ من أي وقت فات والجميل إننا مدركين لده وعارفين اننا بننزل اكتر لتحت كل شوية
طب بنعمل ايه؟
بنروح نشجع مصر ضد تونس في النهائي!!!
والخبرات الأجنبية دي بنستعين بيها عشان نظبط فيديو كليبات ومسلسلات حلوة كدة تفرحنا وتدينا الريادة اه امال مش مصر ام الدنيا ولا اييييه؟

عموما انا بقى شعاري اليومين دول
"انا مش م البلد دي" تررم تررم !!


ميرسي بجد على كل الكلام الجميل ده يا ميرا شاكرة جدا للزيارة وللرد الرقيق :)

Unknown said...

مادو

غالبا :D

Unknown said...

شادي

صح كدة يا دكتور
وبعيدا عن الموضوع شويتين كمان
"كيفما تكونوا يول عليكم"
وده معناه اننا بقينا بجد
زي الزفت!!

ردك أجمل ومتغيبش كتير :)

Unknown said...

مجهول

مش فاهمة! والنبي لو دي شتيمة حد يقولي عشان أمسحها لو سمحتم، أو الأخ المجهول اللي مكسوف يقول اسمه عشان داخل يشتم يدخل يفسر معنى كلامه وله الأجر عند البلوجر!!