Sunday, August 19, 2007

أنا أرغي .. إذن أنا موجودة

تاج متخفي في صورة عشرميت تاج اتمرر لي بوساطة الإنسان والروائي الجميل محمد كمال حسن

يارب إجاباتي متندرجش تحت بند "السمن البلدي" والحاجات التقيلة دي نبدأ بقى:ـ

أول حاجة حساب لدرجة إدماني للتدوين ودي الحمد لله طلعت 55% يعني لسة فيه أمل إن ربنا يتوب عليا من التدوين وأعتزل في قمة مجدي وآدي شهادة الإدمان موقعة من اتنين مدونين وختم البلوجر عليها

ـــــــــــــــــــــــــــــــــــــــــــــــــــــــــــــــــــ

التاج التاني ياااا مسهل:

ـ مين أكتر 6 أشخاص بتحبهم؟

طيب هما أكيد أمي وأبويا آدي أول اتنين

ناخد التالت للنص التاني اللي في حياتي:)

والرابع والخامس والسادس موزع على أصحابي المقربين للغاية وهما أكيد عارفين نفسهم

ـ هل أنت سعيد؟

آه الحمد لله حالياً سعيدة بدرجة فزيعة فزيعة يعني(اللهم لا حسد) يارب أفضل كدة على طول بقى

ـ لو اجتمعت مع حسني مبارك في مكان واحد هتعمل إيه؟

عندي احساس إن حد من إخوانا الأمامير بتوع لاظوغلي هو اللي ورا السؤال ده بس عموما هقوله اللي بيتقال له كل يوم "حسبي الله ونعم الوكيل"

ـ بتحب مصر؟

مصر كمعنى مجرد وأماكن ليا فيها ذكريات آه بحبها غير كدة لأ

ـ إنت مسلم؟

ايون الحمد لله، مع اضافة (ة) عشان مراعاة المؤنث اللي هي أنا يعني

ـ ليه؟

زمان كان لمجرد إن أبويا وأمي مسلمين إنما اما كبرت ودورت وفهمت لقيت إني مش عايزة أكون غير مسلمة،ببساطة كدة

ـ مين أكتر شخصية متقدرش تستغنى عنها؟

أول 3 في الكشف الأولاني :)

ـ أكتر موقف محرج؟

اللي جاي في دماغي دوقتي موقف حصل لي في سنة أولى كلية كنت مخنوقة من دكتورة عندنا بشكل بشع يعني وواقفة على باب القسم مع شوية بنات بقطع في فروتها بصوت عالي وبغل واضح وبعدين اكتشفت انها -كالعادة- احم واقفة ورايا، أكيد هي كانت حطاني السنة كلها في دماغها بسبب الموضوع ده يلا بقى اهي راحت وراحت ايامها الله لا يعودها بتاتا

ـ الأمنية التي تتمنى تحقيقها؟

ممكن أقتبس من الرائعة برايد جملتها الشهيرة وأقول "عايزة أتجوز"!!

ــــــــــــــــــــــــــــــــــــــــــــــــــــــــــــــــــــــــــ

التاج التالت والأخير هييييييه

ـ اسم مدونتك؟

مملكة واحدة من الشعب

ـ لماذا اخترته وماهي نيتك من وراء اختياره؟

هو أنا هفجر ال"قلل المتحدة" ولا إيه؟؟

كل الموضوع إني حسيت إن لكل واحد فينا ركن بيعتبره مملكته الخاصة،ركن صغير أو كبير ، حلو أو وحش مش مهم إنما ده اللي بنحس فيه بالأمان عشان بتاعنا احنا وبما إني مجرد واحدة من الشعب فمملكتي هي المكان اللي بكون فيه على طبيعتي وبمارس فيه هوايتي/ حياتي المفضلة : الكتابة، بمارس فيه طقوس الرغي المحببة إلى، وطقوس الرثاء لو فيه اكتئاب وهكذا

ـ هل فكرت في اغلاق مدونتك؟ والسبب؟

أينعم فكرت أكتر من مرة في بداياتها عشان كتير كنت بحس إني بكتب حاجات ملهاش لازمة ومتستحقش تتقري وهراء من ذات القبيل إنما دوقتي الوضع اتغير تماماً للنقيض

ـ صورتك في المدونة رمزيتها؟

لفترة طويلة كانت صورتي بنوتة صغنيينة ماسكة وردة زرقا لأني بعشق اللون الأزرق دوقتي غيرتها بصورة بنوتة برضو واقفة ادام البحر بتحلم في مشهد غامض، معرفش ليه الصورة دي كل ما اشوفها بتفكرني بفيلم روائي قصير رائع اسمه "بروفة البحر" للمخرج محمد كامل، بالمناسبة حد يعرف الفيلم ده؟؟

ـ لماذا دخلت عالم التدوين من الأساس؟

دخلته بسبب تعليق عند سلمى وكملت تدوين هنا لأني كنت في حاجة إلى مدونة ماتجيبش ليا الشلل زي الاسبيس اللي كنت بكتب فيه قبل كدة

ـ أحلى جملة قيلت لك في وصف مدونتك؟

إيمان الميهي دايما بتقول إنها بتستريح لما بتيجي مدونتي ودي أكتر حاجة تسعد أي حد إنه يسمعها :)

وكان فيه جملة على نص نشرته هنا كانت عبارة عن كلمة واحدة سحرتني من سيد العارفين : كانت "الله" !

ـ التعليقات بالنسبة لك أهميتها؟

أهمية قصوى لأني من خلالها باخد الدافع اللي بيخليني أكمل كتابة هنا وأول حاجة بشوفها وبهتم بيها واقراها مليون مرة وبتعرفني على مدونين تانيين كان مستحيل أكتشفهم لو مكنوش سابوا خيط ليهم هنا:)

ـ أحلى بوست كتبته مع اللينك ولماذا؟

صعب أوي أحدد واحد خاصة إني بحس إن كل حاجة كتبتها فيها جزء مني لكن التدوينة اللي كتبتها مباشرة على النت ونشرتها من غير ما أعدل فيها ولا حرف وكنت فعلا مكبوتة وحسيت بعدها براحة كبيرة كانت اسمها "عايزة أعيييييش" ويبدو إن الناس حست نفس احساسي وعلقت عليها علشان تكون بكدة أكتر تدوينة اخدت تعليقات طوال مدة خدمتي كمدونة بكسر الواو أو النون(أيهما أصح)

ـ أفضل مدونة قرأتها؟

صعب أحدد برضو لكن معظم الموجودين في قائمة "الجيرة والعشرة" على يمينك وانت داخل يندرجوا تحت أفضل المدونات التي أتابعها

ـ أفضل بوست قرأته وضع لينكه؟

بما إني مش فاكرة حقيقي أفضل تدوينة لكن تدوينة ولد مواليد واحد وتمانين يقابل بنت مواليد سبعة وتمانين لمحمد كمال عجبتني لدرجة إني قريتها لحد دوقتي أكتر من 5 مرات

المشكلة إن فيه تدوينات حلوة جدا بجد لكن واحدة زيي عندها فقدان ذاكرة مؤقت هيبقى مستحيل تفتكرها معلش بقى

ـ لو حد قل أدبه في التعليقات إيه رد فعلك؟

لو شتيمة بمسح التعليق لأني مش فاتحة مدونتي عشان أجرح مشاعر الناس اللي بيتابعوها وقروا تعليق من النوعية دي إنما لو نقد لمحتوى المدونة أو ليا في حدود المسموح بسيبه عاتشي أنا متقبلة الأمر تماماً بس برضو من غير شتيمة وقلة أدب

ـ أسوأ مدونة؟

فيه حاجات بتخنقني في بعض المدونات زي المدونات الهابلة اللي بتتكلم عن الاسلام بشكل مسيء وعبيط في نفس الوقت أو اللي بتتكلم عن حاجات بتخدش الحياء لمجرد كسر التابووه و لفت الانتباه بس .

فيه برضو الناس اللي عايشة الدور وفاتحاها أسامة منير وكل كلام الحب اللي بيكتبوه بيكون ساذج ومن نوعية "أنا بحبك ليه إنت لأ" ودول بيرفعوا ضغطي فبيظبطوه و لهم جزيل الشكر فعلاً

ـ أسوأ بوست أسوأ مدون؟

أكيد مش ههتم واحفظ مكانه طالما هو سيء بس انا فاكرة تدوينة كريم عامر عن رمضان وكانت الدليل الواضح والصريح عن إنه إنسان مش فاهم أي حاجة في أي حاجة فعلاً!!

ـ إيه اللي هيحصل لايميلك لما تموت؟

هيعيش بعدي فترة لا بأس بها وبعدين يموت، من عادة الأشياء أن تخون أصحابها وتحيا من بعدهم (مش فاكرة قريت الفكرة دي فين)

ـ إديت الباص وورد لحد قبل كدة؟

تؤ

ـ اسمك؟

ملكة

ـ المشهور بيه وسط أصحابك؟

ملكة برضو لكن المقربين بيستخدموا ملوكة وموّكا

ـ عمرك؟

لسة 19 سنة لحد الشهر الجاي ما يشرف

ـ برجك؟

الميزان

ـ مجال دراستك؟

كلية الآداب ، قسم اللغة الإنجليزية وآدابها (هما بيكتبوها كدة و ربنا)ـ

ـ شخصيتك نوعها إيه؟

متناقضة، متأملة، مبحبش العلاقات الاجتماعية لأني مملة نوعاً ، خوافة للغاية ، مبتعلمش من أخطائي غالباً، مترددة أحياناً، وطبعاً عندي فوبيا من الحشرات والزواحف والقوارض وفصيلة العنكبيات

ـ السفر بالنسبة لك؟

اضطراب مشوب بمتعة التجديد

ـ الأكلة المفضلة؟

مبحبش الأكل أساساً بس ممكن أستحمل ورق العنب كاسثناء

ـ الصفات اللي أخدتها من بابا؟

الدماغ وحب القراية والكتابة والعصبية و الخوف المريع من الفشل

ـ الصفات اللي أخدتها من ماما؟

عقدة ارضاء الآخرين بأي ثمن، العصبية، سرعة التأثر، الطيبة والسذاجة أحياناً

ـ أكتر 6 حاجات بتكرهها؟

الكبدة أو السبانخ

وزارة الداخلية أو إني أشوف أي واحد لابس شرطة

الأنانية والبخل(شروة على بعضها كدة)

اني اشوف حد بيرمي حاجة في الشارع

الصوت العالي حتى في مجرد كلام

وأخيراً سواقين المكروباصات

ـ أكتر ست حاجات بتحبها؟

وسط البلد

خروجاتي مع اصحابي خاصة لما تتضمن وسط البلد برضو

حكايات مامتي وبابايا عن طفولتي المشردة :)

النيل صباحاً

الشوكلاتة

فيروز

ـ الانترنت بالنسبة لك؟

وسيلة للتعبير عن الرأي و التواصل مع الناس ومعرفتهم بشكل أفضل

أمرره لـ

مهاب

و

مهموهتي العزيزة

و

آخر ويارب يحن علينا ويعمله
و
دمـتـم

7 comments:

إبـراهيم ... said...

و أنا برد عليكي ... قصدي بعلق عندك ،،، يبقى كـلللله ... تمااااااام .
.
مبارك اجتياز الاختبار / التاج بنجاح

.
.
تحياتي

Masry said...

اهو ابراهيم اخد مكاني كمعلق اول اهو .. لالا انا كدة مستوايا قل :)
المهم اولا اوعدك ووعد الحر دين عليه و انا احب اوفي بالدين اللي عليا اني هعمل التاج علشان خاطرك :)
ثانيا انتي بتحبي فعلا اكتر 6 حاجات تتحب .. مش كدة و بس دي من الركائز الاساسية للحياة و خصوصا وسط البلد
و بتكرهي فعلا 6 حاجات لا تطاق بس انا معنديش مشاكل مع الكبدة .. الحقيقة السبانخ هية اللي واخدة كل المشاكل

اما الصفات اللي اخدتيها من باباكي و مامتك فدي محتاجة نقاش طويل عريض عميق مركز علشان انا عندي تعليقات اكبر من المساحة المتاحة ليا هنا
و في النهاية اهديليك اغنية مشربتش من نيلها للمطربة شيرين
و الي القاء :)

مَلَكة said...

إبراهيم

الله يبارك فيك بس للأسف النجاح في الحاجات دي ملوش جوايز كدة
نورت


آخر

بعت لك جايزتك كمعلق أول على ايميلك بس الظاهر موصلتش معرفش ليه
إنت هجرت جوجل ولا إيه طيب؟؟

ميرسي يامحمد علشان معت الكلام وجبرت بخاطري وجاوبت عليه ياسلام ع المدونين المثاليين دول كنز والله:D

أنا برضو بقول كدة
وسط البد وكوبري قصر النيل تحس ان الحياة هيبقى طعمهل ماااسخ جدا من غيرهم

ومن الكبدة للسبانخ لوزارة الداخلية مش هتفرق كتير
اهي كلها حاجات توجع البطن

مستنية تعليقاتك على الجزء للي محتاج نقاش ده بس ياريت متطنش

وتعليقي على اهدائك بقى:
جررررر...الللعنة!!

Anonymous said...

سلام عليكم

على فكرة مش ناسي أني هاخد اللعنة .. قصدي التاج و أردعليه وأمرره لحد تاني كي تكتمل الدائرة ويصاب غيري باللعنة .. بس يعني .. كما هو معروف أني المعتاد بتاعي الشعور بالملل والحاجات داهيات .. بس "وربنا" قريب هابدأ التعامل في الأخ التاج .. خاصة أنه الأول يعني وبالتالي له رائحة الأشياء الجديدة المغلفة وكداهوات

ومشكرين ربنا يخليكي [:

إبراهيم السيد said...

:) شكرا

مَلَكة said...

مهاب

عليكم السلام ورحمة الله وبركاته
اتفضل شاي ياعمنا

لعنة ايه ودايرة ايه؟
واضح انك متأثر برفعت اسماعيل زيادة عن اللزوم يا فندم:)
عموما انت اتدبست في التاج وخلاص
مستنيين تعمله حتى لو اجاباتك سخيفة وكداهوات:)

منور يا رفيق مهابوف



سيد العارفين

ممكن أستلفها أنا طيب الكلمة دي؟:)
متغيبش على المدونة كتير
نورت كثيراً يافندم

Anonymous said...

يابنتي انا بموت فيكي والنعمة بجد بحب كلامك واسلوبك في التعبير بحب سخريتك اللاذعة اللي بحسها بجد قريبة مني وربنا يارب يوفقك ويحقق ليكي كل احلامك بس انا زعلانة كده متجيبيش سيرتي خالث
ووحشاني ياقمر والله بس خلاص انا جيليلو بالمناسبة