Tuesday, August 07, 2007

أنا مش قصير أوزعة

فاكرين الفيلم ده؟ دكتور نفساني اسمه دكتور خشبة وعنده عقدة عشان مفيش ولا واحدة ست بتبص له والمطلوب منه كدكتور نفساني إنه يعالج الناس، اللي حاسس إنه قصير يقنعه إنه طويل بالجملة العتيدة "انا مش قصير أوزعة أنا طوييل وأهبل" وطبعا كان صعب أوي الراجل يقنعنا إنه طويل وأهبل زي ما هو بيقول وكان أصعب إننا نقتنع إن دكتور خشبة ده دكتور نفساني أساساً، السؤال بقى: عمركم فكرتوا تروحوا لدكتور نفسي؟
الإجابة أنا متأكدة إنها هتكون "يووووووووه مليون مرة فكرنا في ده" طيب نغير السؤال شوية بقى:ـ

عمركم روحتوا فعلا لدكتور نفسي؟
الصراحة معتقدش حد عملها قبل كدة طيب ليه عمرنا ما عملناها؟ وليه أول ما بنقول لحد إننا محتاجين نروح لمعالج نفسي بيبص لنا شزراً وبعدين يرمقنا (حلوة دي) بنظرة استخفاف على اعتبار إن اللي احنا بنطلبه ده نوع من أنواع الرفاهية!!ـ
تعالوا نقعد نتحسر شوية على ثقافة مجتمعاتنا اللي بتعتبر إن الطب النفسي ده ملوش لازمة وإن دكتور الباطنة أهم بكتير من دكتور الأمراض النفسية وكمان نتحسر على نظرة المجتمع للإنسان اللي بيفصح عن نيته في إنه يتعالج نفسياً على إنه مجنون لكن بيكون ساعتها على المجنون ده ألف ألف حرج!!!ـ
فكرتوا وإنتوا ماشيين تبصوا على يفط الدكاترة وتشوفوا كام واحد فيهم دكتور أمراض نفسية؟ أنا شخصياُ عملتها طول الأسبوع اللي فات ودورت في وسط البلد و باب اللوق و في منطقة المنيرة و القصر العيني و الجيزة وكانت النتيجة بالظبط اتنين دكاترة بالعدد اليفط بتاعتهم صغيرة ومش باينة كأن الدكتور في حد ذاته مكسوف يفصح عن تخصصه والنتيجة إن عيادة الاتنين مفيهاش نفر، ياربي حتى مكنش في عيادة الاتنين حتى حشرة واحدة توحد ربنا وكأن الحشرات روخرة خايفة يتقال عليها كلمة كدة ولا كدة!!!ـ
نيجي للنقطة التانية اللي ممكن تخلي اي حد يتراجع عن إنه يروح لطبيب نفسي غير إنه تخصص نادر الوجود في عيادات الدكاترة في مصر إن سعر الكشف بيكون مبالغ فيه حبتين، يعني فيه من 80 جنيه وانت طالع لحد 250 جنيه وإنت وحظك بقى الدكتور يقعد معاك عشر دقايق ويكتبلك مهديء للقلق ومضاد للاكتئاب وخلاص على كدة يلا هوب إنت خفيت شفت ازاي؟؟
طيب انت عايز حد يسمعك تتكلم معاه والحاجات اللي بتشوفها في الأفلام دي وشيزلونج بقى و تبدأ تسرد كل عقد طفولتك بداية من إنك مكنتش بتحب السبانخ مروراً ببنت الجيران اللي نفضتلك واخيراً وليس آخراً بفشلك في التعليم والشغل والجواز إلخ إلخ إلخ
طيب ممكن نفترض إنك هتدفع تمن الكشف هتضمن منين إنك ترتاح للدكتور علشان تحكي معاه؟ ده إذا هو أساساً اداك الفرصة عشان يسمعك فتلاقيك في النهاية بتزدري فكرة الدكتور النفسي وتاخد ال80 جنيه تروح تشبرأ نفسك بأكلة كباب من برة وتنسى كل حاجة عن كلاكيعك باعتبار إنها "رفاهية ودلع" وإن الكباب أكيد أفيد لك من الرغي وتقليب المواجع
خلاصة القول يعني عشان ما اطولش عليكم (قولوا طولي) إني اكتشفت إننا بحاجة إلى متخصصين نفساويين محترمين كدة(يمسيك بالخير ياعلاء يامرسي) ويكونوا كتيييير، أظن إحنا اكتر شعب عنده عقد وكلاكيع بسبب اللي بيشوفه كل يوم ومع ذلك احنا اكتر شعب بنستنكر ونستنكف ونشمئز ونشمئنط ونزدري جدا جدوى الطب النفسي(عادتنا ولا هنشتريها)؟
آه بالمناسبة هتسألوني أنا عرفت كل المعلومات اللي فوق دي منين؟هقول وبكل شجاعة إني عرفتها لمجرد المعرفة مش اكتر يعني انا مش مريضة ولا محتاجة اتكلم ولا عندي عقد ولا كلاكيع ولا حاجة خااالث أنا زيي زي غيري ميت فل وخمسة وعشرين(عشان الحسد بس) حد عنده اعتراض يا بشر؟؟

14 comments:

الديليكون said...

والله يا بنتي مش عارف اقولك ايه

انا لاحظت الحاجات دي قبل كده ونفضت وكبرت دماغي باعتباره ترف

بس انا اعرف داكترة نفساوين ميت فل وحياتهم ميت فل برضه وكشفهم هو المشكلة كالعادة أكلة الكباب أحسن

في النهاية انا ريحت دماغي انا ميت فل حد عنده اعتراض

تحياتي علي البوست الرائع
اللي معرفتش اعلق عليه بالفعل

محمد

مادو said...

احم احم
شايف صف كده رافع ايده
طبعا ان باهدي النفوس
ازيك يا فندم
:D

اخر said...

انتي كدة عملتيلي عقدة نفسية و خلتيني لاول مرة احتاج لدكتور نفسي
ازاي انا مش اول تعليق :(

vetrinary said...

يوم قلت اه
سمعونى قالو فسد
ده كان جدع قلبه حديد واتحسد
رديت انا على اللايمين وقلت اه
لو تعرفو معنى زئير الاسد

coca said...

في ميت سبب يخلي الشعب المصري ميروحش للدكتور النفسي
اولا طبقه كبيره جدا بتعتبر ان الطب النفسي مبني علي نظريات حرام زي علي سبيل المثال نظريات قرويد
فبيرجع يقول ان الدين والرجوع لربنا احسن من الكلام الفارغ دا ودي شريحه كبيره
تاني حاجه اتعرف من زمان ان الطب الفسي ظهر عشان يعالج المجانين
الغير اسوياء نفسيا فبالتالي عيب ان واحد الناس تشوفوا وهو داخل عياده دكتور نفسي

ثالثا ثقافه مجتمعتنا العربيه من زمان
مفهمتناش ايه هي بالظبط وظيفه الدكتور النفسي

تحياتي

Davinci said...

درست في الكلية فرع غريب كنت أول مرة أسمع عنه من علم النفس اسمه "الإرشاد النفسي".. إيه ده بقى.. ده عشان التعب النفسي نوعين.. النوع الأول اضطرابات نفسية.. ده بيجيلنا كلنا من وقت للتاني، ومش معناه مرض نفسي.. لما يتطور النوع ده بيقلب مرض نفسي.. ده محتاج للطبيب النفسي.. يعني النوع الأول مش محتاج للطبيب النفسي؟
لا.. مش محتاج.. محتاج للمرشد النفسي.. والمفروض إن مراكز ومستشفيات الإرشاد النفسي - في الخارج طبعا مش عندنا - منتشرة وشائعة وعادي إن الواحد يروحها من وقت لآخر بنفس البساطة اللي بيروح بيها لدكتور الأسنان.. طبعا إحنا مش بنروح لدكتور أسنان أصلا!
كنت جاي أقولك إيه بقى؟
آه.. أنا فعلا - والله - مش قصير أوزعة!!

Camiseta Personalizada said...

Oi, achei teu blog pelo google tá bem interessante gostei desse post. Quando der dá uma passada pelo meu blog, é sobre camisetas personalizadas, mostra passo a passo como criar uma camiseta personalizada bem maneira. Se você quiser linkar meu blog no seu eu ficaria agradecido, até mais e sucesso.(If you speak English can see the version in English of the Camiseta Personalizada.If he will be possible add my blog in your blogroll I thankful, bye friend).

ملكة said...

محمد

أهو!! مبروك يابني إنت مواطن مصري أصيل
المصري هو الوحيد اللي بيعرف يفكر بمنطق الكباب ده والأدهى إنه بيقنع نفسه بيه كمان
تحيا مصر ياعم!




مادو

مين اللي جرؤ ورفع صوباعه؟
العالم دي متعلمتش في المدارس بتاعتنا ولا إيه؟؟
هديها يافندم واحنا ورانا غير كدة؟
ابقى تعالى كل يوم بقى





آخر

تستاهل
إتأخرت ليييييه؟
بس بذمتك(وبعيدا عن سيرة الأساتك هنا)بقى دي أول مرة تحتاج فيها لدكتور نفسي؟؟(نظرة متشككة)هه؟





vetrinary

وعـجـبـي!!
انا بيتهيألي حتى الأسود اللي في الجنينة قربوا يبقوا بجع من اللي بيشوفوه!!

ملكة said...

Coca

فرويد فرويد هو احنا لاقيين اصلا؟
ثم لو مش عاجبهم فرويد ممكن يروحوا يوزنوا برة يعني مش هنختلف

بجد بقى
فيه حالات كتير الرجوع لربنا هو الحل الوحيد لكن مينفعش ننكر احتياجنا في حالات تانية لدماغ تانية تسمعنا وتفكر معنا وتحل لنا كلاكيعنا وترسباتنا اللي بتسبب مشاكل في السلوك وعدم تأقلم مع البيئة المحيطة بعد كدة

أما النقطة التانية فدي تراكمات ثقافية في المجتمع
صحيح مش هتتغير
إنما مين فينا أصلا يقدر يجزم إنه سوي نفسياً؟؟

نورتيني برأيك الجميل:)

ملكة said...

دافنشي

سلامات يافندم:)

أول مرة على فكرة أعرف الحاجات دي
أعتقد معظمنا محتاج الارشاد النفسي ده مش العلاج بالمعنى التجاري المفهوم
فكرتني بدكتور السنان متعرفش واحد معندوش البتاعة اللي بتعمل زززز دي؟؟(تعاطفك لوحده مش كفاية لو سمحت)

ومتزعلش إنت مش قصير أوزعة
لو حد قال لك كدة
ابقى عضه وريح دماغك:D

Davinci said...

طيبون يا باشا :)
فعلا.. معظمنا بحاجة للإرشاد النفسي ده.. بس مفيش في مصر كلها مستشفى أو مركز للإرشاد غير بتاعة أبو العزايم اللي هي أصلا لعلاج الإدمان!
دكتور سنان؟
هممم.. آخر واحد رحت له فتح لي خراج صغنن جنب ضرسي، ونضفه وكله تمام.. بس من غير بنج!
ينفع ده؟
فيه واحد حداد برضه عنده بتاعة بتعمل ززززززز.. لكن ما أظنش جربها في السنان قبل كده.. بس هو صنايعي تمام.. ما تخافيش.. تجربي؟
حلوة فكرة العض دي على فكرة.. هاجربها ;)

إيمان الميهي said...

كان بيدور ف بالي نفس اللي فكرتي فيه من كام يوم
المشكلة مش انه الواحد ياخد خطوة
البني ادم لو من جواه قرر حيروح
بس المشكلة الحقيقية هل الدكتور هيتعب نفسه معاك ف اكتشاف عقد الطفولة و حلها و يخليك تعترف بيها و الكلام اللي بنشوفه ده رغم انك دافع مبلغ محترم
ولا هيقلبك و يكتب لك كام علاج و يقولك كلمتين اتقالوا لك 100 مرة من صحابك القريبين
فيه كمان نقطة مهمة جدااااااااا
لو بصينا للقرآن و السنة حنلاقي فيهم ما يمنع أي مرض نفسي بمعنى مقومات الإنسان السوي
مثل حديث الرسول صلى الله عليه و سلم " لا يحقرن أحدكم نفسه "
و كان عندي مقال عن ده
الحمد لله إننا عارفين ربنا
وحشتيني يا ملوكة بشدة و وحشني شغلك يا ريت تبعتي لي الق\صص الجديدة ع الميل

ملكة said...

دافنشي

فكرتني بواحدة كان طموحها في سنة أولى كلية إنها لما تخلص كليتها دي تدخل أي كلية فيها تخصص علم نفس وماجستير ودكتوراهات بقى وبتاع
كانت هتعمل اول مركز للارشاد النفسي في مصر
إيييييييييه الله يمسيها بالخير بقى


عمل كل ده من غير فنج؟؟
استنى طب يمكن ما اذبهلش كدة!!
لأ مينفعش اطلاقا مطلقا
ولا الخراط بتاعكوا ده
لو فيه سباك ينفع
بس يعقم ايديه الأول لو سمحت:D

جرب العض وقولي النتيجة
لو منفعش
يبقى احنا عملنا اللي علينا
والباقي على ربنا يابني
"سنيف"

ملكة said...

إيمااااااااان

عاش من شافك يابنتي هو الشغل بيخلي الناس مشغولة كدة؟؟
عموما ربنا معاكي ويوفقك يارب
ميرسي ياجميل على رأيك الحلو
ومتغيبيش تاني كتير كدة
بس عايزة أقولك إن القريحة ماأنتجتش أيتها حاجة من آخر قصة قريتيها
ادعي لي بقى والوحي يشتغل وانا ابعتلك اللي تحبيه كله:)