Friday, May 04, 2007

جربت تشوفها كدة؟

جربت تصحى الفجر وتخرج تشم الهوا نضيف وتملا كيانك كله بيه؟
جربت تصلي وانت حاسس كل كلمة بتنطق بيها وإن جسمك مش موجود على الأرض؟
جربت تختار أحلى لبس بتحبه وتبص في المراية وتحس إنك أحلى مما كنت متخيل؟
جربت تخرج للشارع الزحمة وتبتسم في وش كل اللي متعرفهمش وفي سرك تقولهم كلهم صباح الحياة؟
أو جربت تقوم من على كرسيك علشان غيرك يقعد وتاخد منه ابتسامة بتقولك شكرا علشان حسيت بيا؟
جربت تحب وشوش الناس وتشوفهم كلهم حلوين مهما الدنيا كانت زحمة وحر؟
طب جربت تقابل اصحابك وتاخدهم في حضنك واحد واحد؟
أو جربت تقدّر تعب اللي أدامك لدرجة إنك تقرر تشكره وتفهمه ان تعبه مبيروحش هدر زي ما هو فاكر؟
جربت تحس أد إيه بكرة هيبقى حاجة عمرك ما حسيت بجمالها قبل كدة ولا تقدر توصفها؟
جربت ترّوح بيتك وتحس بريحته المميزة جواك وانت عايز تحضن حيطانه ؟
جربت تبص للسما وتشكر ربنا على إن هداياه ليك عمرها ما بتنتهي؟
طب جربت تقاوم النوم لأنك خايف تنام و تصحى تلاقي الكون اتغير؟
...
جربت تشوف الدنيا باللون اللي بتعشقه ؟؟

20 comments:

YOTTA said...

MALLOUKA,
عايزة أقولك انى حاولت كتير أشوفها كده وللاسف ماعرفتش
ببساطه لانى ماينفعش أشوفها كده "لوحدى"

الا لو كنت فرحانه اوى بابقى عايزه اعمل اى حاجة من اللى قلتى عليهم
المهم بأه الكلام ده فكرنى بابيات بحبها اوى:لناصر رشوان
عمرك سهرت الليل لحد نور الفجر
عمرك عملت الخير ولا طلبتش أجر
عمرك داريت الحزن بالضحكه
وسقيت غريب وعطشت ف السكه
عمرك سهرت الليل00عمرك عملت الخير؟
عمرك خليت بالكلام للبدر؟؟

Anonymous said...

السلام عليكم

انا طبعا برد لاول مرة بس انا متابع تدويناتك من فترة
وكانت عجبانى جداااا
فقررت انى ارد المرة دى لان البوست دة هايل

ولحسن حظى كنت مشغل موسيقى تيتانيك
وفجاة لاقيت نفسى عايش الجو دة
حاسس انى قاعد بشم هوا نضيف
حست انى عايز اضحك وعايز احضن حطان البيت
حسيت للحظات ان الدنيا لسه بخير



بس فجاة النور قطع
هههههههه

حسيت ان هاتقلب فى الاخر
اعلان لبن رايب بتاع شريف منير
ههههههههه

بهزر


بس بجد البوست دة عجبنى اوى
وتحياتى ليكى ولقلمك المبدع
واعتبرينى متابع دائم ان شاء الله

معلش طولت عليكى
سلاااااااااام

إبـراهيم ... said...

الله عليكي ياااا ملــكـــة ، ف الأول واااضح إنـك حسدتيني ، لأني بقيت آآآجي متأخـــر أهه ., . . . ، ثانيًا ماااا أجمـــل الكون .. حينما يراه إنسان جميل ... و عاوز أقول لـ يوتااا إن حلوووة قوووي أبيات ناصر دي ...

وعاوز أقول لك كون ..كأنتِ .. تري الوجود جميلاً ....

حقيقي أسعدني هذا البوست في هذا الصباااح الجميــل ، وياااارب على طوووول شايفاها كده . وبخير وسعادة ...

بث ..خلااااث

Camellia Hussein said...

وانا بقرا البوست ده دلوقتي حسيت علي لساني طعم الحياة



انتي كدة قلبتي اليوم 360 درجة
thaaaaaaaaaaaaanks a lot

Unknown said...

ساعات باجرب..
جربت بعض الأشياء دي..مش كلها..
وحتى دي.. باجربها.. بس باجربها..
لكن اني أعملها كتير.. أكررها.. أتعود عليها.. صعب..
الحياة زحمة.. زحمة جدا على كل ده..

شكرا يا ملكة على أفكارك الجميلة..
أكيد هجربها
:)

مَلَكة said...

يوتا

بصي انا معاكي ان 90%من سعادتنا بتكون بسبب الناس
بس كمان فيه عشرة موجودين ممكن نسبب بيهم احنا سعادتنا لنفسنا
ده لو عايزين فعلا

جميلة اوي اوي الابيات دي بجد انتي خليتيني اكتبهم عندي وادور كمان على اللي كتبهم ده
تسلمي يوتتي على ردك ومنتحرمش ياجميل:)

مَلَكة said...

فارس

سعيدة جدا جدا بمتابعتك وردك الأول واللي ان شاء الله ميكونش الأخير

عايزة اقولك ان عز الطلب ان حد يحس الحالة كدة
وده اكيد بغض النظر عن قطع الكهربا واعلان الرايب طبعا:D
بس لعلمك بقى
النور اما بيقطع بيعمل جو رومانسي مووووت
خاصة مع شمع بقى يبقى ايه
وياسلام لو نفس الموسيقى برضو
مفيش أحلى من كدة

نورتني يافارس وبجد هيسعدني جدا اشوفك هنا دايما

مَلَكة said...

ابراهيم

وانا اسعدني ومازال ان يكون صباحك باللون الذي تعشقه
واضم صوتي لتحياتك ليوتا على الابيات الرااائعة اللي هي كتبتها هنا

ومتتأخرش تاني يافندم
المواصلات مش حجة هنا هه؟

تسلم وصباحك دايما جميل:)

مَلَكة said...

كاميليا

أول مرة أحس إني بعمل فرق للدرجة دي

يارب كل أيامك وصباحاتك تكون باللون اللي بتعشقيه

صباحك حياة،نورتيني

مَلَكة said...

دافنشي

متتعودش
علشان لو اتعودت هتمل
اللون هيبقى عادي
مش هتحس بفرق
مش لازم كل يوم
على الاقل مرة في اليوم
ايوة الحياة زحمة
ورخمة كتييير
بس العند بيجيب نتيجة والله
جرب في مرة والدنيا زحمة ومش طايق نفسك انك تدور على حاجة حلوة
انشالله حاجة حلوة تفتكرها
اعند مع اليوم وقول له انك برضو هتشوفها حلوة ولو دقيقة

والله لو صممنا على اننا تعيش لحظة حلوة زي ما بنصمم على حالة اكتئاب تلازمنا شهور وايام هتبقى الحياة احلى بكتيييير

نورتني يافندم وتسلم الايادي على الرد
متغيبش بقى:)

هدى said...

ياصباح الانتعاش

ايوة كدا

انا جربت

إيمان الميهي said...

جربت و لكن ...

ما علينا

مش عاوزة أحبط حد



ميرسي يا ملوكة :)
وحشتني بلوجك جدا

Anonymous said...

تدوينة جميلة و مدونة اجمل

مبروك عليكى مدونتك و لو انها جاءت متاخرة

تحياتى

مَلَكة said...

هدى

صباحك سفن أب :D
جربي يكون ده صباحك كل يوم بقى
هتدعيلييي

نورتي ياهدهود

مَلَكة said...

إيمان

جربي تاني يا إيمي
مش هتخسري حاجة
بجد حاولي تعندي مع الاحباط وصممي انك تعيشي لحظة حلوة
لازم تجيب نتيجة

انتي واحشاني أكتر
أشوفك على خير قريب إن شاء الله يا إيمايتي:)

مَلَكة said...

poet mad

يبارك فيك يافندم
المرة دي هسامحك ع التأخير
بس بعد كدة لا ممكن أبدا:D

نورتني وتسلم على الرد

فتاة عشوائية said...

ازيك يا ملكة
أنا جربت قريب النقيض من كل اللى انتى قولتيه ووصلت لدرجة انى اعيط وانا ماشية فى الشارع
كنت بحاول اشوف وش بيبتسم كنت فى مشوار طويل جدا بتاع ساعة ونص فى الشارع والزحمة وعمالة ادور على الوشوش بنت الناس اللى تشرح القلب وتبهج
لكن الناس كلها بؤس وفقر وقذارة
لدرجة انى حسيت للحظة انى ماشية فى عصور أوروبا الوسطى ونزلت فى حى من أحياء الرعاع
حتى وشوش الأطفال بقى كلها ضعف ومرض وقلة براءة

Anonymous said...

هاي ملكة....انا واحده متابعة بس انهاردة قررت أكومنتلك ... لأن الحقيقة انا فعلا جربت أغلب اللي أنتي قولتيه .. انا بموت فالون الأحمر ..بس هو لون قوي شويه لكني قررت أشوفها بمبي بمبي بمبي بمبي ..الحياة بقا لونها بمبي.... ميرسي عالبوست الجمبيل ده و ربنا ينعنش أيامك كلها

مَلَكة said...

لولي

طب وليه يابنتي تعملي في نفسك كدة؟
ابقى بصي على مصر من فوق
من فوووق اوي
لو عايزة متتخنقيش يعني
انما لو حابة تعذبي نفسك
امشي تحت في شوارعها بقى

وربنا أنا أؤكد ليكي إن أوروبا في عز عصورها المظلمة
مكنتش اكثر اظلاما مننا احنا دوقتي
ماعلينا
نورتيني يا لولي وفكيها الحياة ابسط من كدة بكتيييير
بس اما تقرري انها تكون كدة فعلا

مَلَكة said...

ياسمين

وانا فرحانة جدا انك قررتي تعلقي بعد المتابعة لأن بجد رأيك يهمني
بس يارب متكونش اخر زيارة

وبعدين ماله الأحمر؟
مش بتحبيه؟
خلاص انتوا احرار مع بعض بقى:D
ربنا يخلي أيامك كلها بمبي أحمر زي ما تحبي
نورتيني يا قمر وتسلمي على ردك الحلو ده