أنا بحب الشعر ... وربنا بحبه واللي يقول غير كدة يبقى كداب في أصل وشه
وسواء كان شعر عربي أو انجليزي فأنا لسة بحبه ولسة باقية على العشرة
إنما أنا أشجب وأحتج وأستنكر وأدين بشدة وعنف للغاية جدا اوي خالص يعني
طريقة تدريس الشعر في قسم انجليزي عندنا
بل وكيفية اختيار القصائد اللي بندرسها كمان
مهو عشان الضرب في الميت حرام
والله حرام وميرضيش ربنا وكفااااااااااااااية بقى(احم لا مساس بنظام الحكم هنا خاااالص)ـ
سؤال للدكاترة بقى
ليه تكرهونا في الشعر واحنا اصلا مفيش بينا وبينه تار بايت؟
يعني الشعر ده حاجة جميلة خالص ونميسة وابن حلال كمان
مقولناش اي حاجة (قال يعني هنقدر)ـ
بنفهم الشعر(اه وربنا بنفهمه ساعات)ـ
وساعات بيعجبنا منه وناخد اقتباسات وحاجات حلوة زي دي كدة(عدانا العيب اهو)ـ
ده احنا كمان والله ساعات بنكتب حاجات شبه الشعر (وان كره الكارهون)ـ
انما برضو اسمه شعر يعني بنقدره حق قدره تالت ومتلت(حد عنده اعتراض يابشرية؟)ـ
إنما يبدو إن قسم انجليزي صعبان عليه يسيب الطلبة بتوعه يحبوا الشعر براحتهم
لازم يخرجهم منه كارهين الشعر وكارهين الشعراء
و بيدعوا إن ربنا مايبشبش طوبة (كوليردج) مطرح ماهو قاعد
وإنهم يبطلوا يكتبوا شعر لو بيكتبوه
ويبطلوا يقروه لو صادف وقروه
ومبقولش ان كل القسم كدة بيكرهنا فيه
لأ وربنا ساعات ونادرا دكتورة تحببنا فيه بطريقة تدريسها
وده بعون الله محصلش غير مرة واحدة من 3 سنين
وكان ترم واحد بس اللي استمتعنا وفهمنا فيه الشعر كاملا(حدث بالفعل وصدق او لا تصدق)ـ
انما الغالب والاعم والاشمل-والاشول احيانا-هو ان الاغلبية يكرهونا في عيشتنا قبل الشعر
كل حد بكلمة في الامتحان
اكتبوا خلفية الحركة الرومانسية في اجابة السؤال
لأ متكتبوش ولو كتبتوا هتنقصوا في الدرجات
وبعدين يابشر حرام علييكووووا ده احنا طلبة
يرضي مين ان الواحد يذاكر الشعر طول السنة ويحضر محاضرات وايده تتكسر من الكتابة ورا الدكاترة
ويقضي اليوم بحاله بيذاكر في قصيدة تلاتين صفحة نصها شوية هلاوس وفي الاخر نجيب مقبول بالعافية ده إذا نجحنا أصلا؟؟
طب ليه وعشان ايه؟
والنبي ده لو الحاج (كيتس) بنفسه جه يحل الامتحان وصححتوه له مش هيجيب اكتر من ال11 العتيدة
راعوا اننا بنتعب في المادة و في غيرها واننا مش شوية رعاع جم القسم غلط ومكانهم في المدبح مثلا
واننا بني ادمين وبنفهم ولينا وجهات نظر محناش شوية حفيظة وكتبة
فياريت متتعامولش معانا على اساس اننا خسارة فينا الدرجة اللي بتدوهالنا في الامتحان
وبعدين احتمال كبير جدا اننا كمان سنة هنقف بدالكم وندرس لأجيال تانية نفس الشعر ونعقدهم في عيشتهم بالظبط
زي ماعقدتونا في عيشتنا لمجرد ان الشعر على ايامنا كان بيتدرس غلط لحد ما كرهناه
الرحمة ياجدعان مانتوا كنتوا زينا في يوم من الأيااام
18 comments:
مش مشكلة شعر إنجليزي بس..
لو فكرتي هتلاقي الحكاية دي في كل المواد اللي يندرسها من ابتدائي لحد ما نتخرج..
لكن القاعدة ان اللي بيدرس لك يكرهك في مادته.. غالبا لأنه بيكرهها من قبلك.. أو لأن نظام المادة كده..
ساعات بيبقى فيه استثناءات يحببوكي في المادة.. لكن دي استثناءات.. فماتنسيش نفسك.. ها؟
السلام عليكم
ازيك يا ملكة
مش قولتلك هابقى متابع دائم ان شاء الله
انا معاكى فى الموضوع دة
الله يكون فى عون اى حد بيدرس شعر انجليزى
او بياخد مع دكتور بيدرس شعر انجليزى
انا افتكر مرة كان بيدينا
دكتور من اداب مادة اللغة
واحنا تجارة انجليزى اصلا
ايوة اللغة
اللى المفروض سهلة جدااا
والمفروض نجيب فيها امتياز
طلع عنينا
كل دة علشان واخد دكتوراة من امريكا
الله يقطع امريكا واللى يجى منها
والله يسامح عم شكسبير بقى اللى فلقنا بيه طول السنة
يلا معلش
انا عارف انك بتدنى فى مالطة وموزبيق
بس هاتعملى اية
قدرك وعلى فكرة كلوا بيعدى
ركزى انتى بس
سلااااااااام
أهلا ملكة
المشكلة يا ملك والله أنهم بيعتبروا الطلبة دايما رعاع وأوغاد ويستحقوا يعدموا في ميدان عام كمان.. هما بيقتلوا الشعر بالسخافات دي ..بس المهم لما تبقوا مكانهم متبقوش زيهم أبدا..
ربنا معاكي يا ملكة يا رب
وإن شاء الله إنتي قدهم وقدود..
والله عندك حق
انتى عارفه انى باعانى زيك
ولسه والله كنت بافكر فى الموضوع ده امبارح لما بدات اذاكر شعر!!
وسألت نفسى
rhetorical question:
هو ايه اللى احنا بناخده ده؟
هما بيعملو فينا كده ليه؟
وقعدت أفكر هو أنا استفدت ايه من كل الشعر الملعبك اللى درسته السنتين اللى فاتو واكتشفت انى اصلا مش فاكره غير تلت أربع قصايد عمى
وانتهى بى الحال انى قفلت الشعر امبارح وفتحت الحضاره النهارده وغالبا هاسأل نفس ال
rhetorical question
وهاقفلها كمان شويه
ايه رأيك تيجى نحتج ونقاطع الأمتحانات زى الاستفتاء كده؟؟
!!!
يلا فوتك بعافية وخلى بالك من ال
sublime
الابنة العزيزة ملـكـة : مساء الخير ، وصلتنا شكواكي واكي واكي ( ده الصدى) من هذا الأمـر ، وذكرتيني بالذي مضى ... مضى .. مضى .. يا بنتي ، من مشاكلي العتيدة معاكي إنـك بتلعبي ف الذكريات .... باحتراف .....
.
.
ما علينا ، يعني مش مهم أفتكر معاكي إمتى أول مـرة حبيت الشعر و، ولا مين أستاذ ( مش دكتور) حببني فيه ( كتبت حاجة من كده ف تعليق ليا عند أحمد شافعي ) ، ولا إن الواحـد حاسس فعلاً إنه كان نفسه يدون وهوا ف سنكم كـدهون !!! .......
عن التعليم واللي بيتعلومه مآسي على مقاسك وعلى مقاسي ّ!!!، الموضوع كبييير يا بنتي ، وربنا يكون ف عونكم
.
.
أنا رأيي تعملي بنصيحة البنت (يوتااا) وتقاطعوا الامتحانات ، عاوزك إنتي وسلمى و آيات مثلاً ، وكم بنت واعدة ( حلوة واعدة دي ) وهقول لشيماء ، والدكتورة سحـر .. نعملوا ثورة آداب قسم إنجليزي على الامتحانات ...........
نفسنا حد يعمل حاجة أي حااااجة !!
سكتنا كثييييييييير
....
أكيد ما قريتيش مقال هويدا طه ف الدستور العدد الأخير ، تزعم فيه إن مصر البلد الوحيدة الذي يغضب فيها الواحد من فقره ( وامتحاناته) فيقتل نفسه وأولاده ، ولا يثور ....
....
بالمناسبة فكريني أكتب حاجة عن ( عبثية) الامتحانات ، بما إني نجحت :)
وعقباااااالكم جميعــ(ن) ههه
أنا شفت ده كمان واحنا بندرس الشعر باللغة العربية
بصفتى خريج لغة عربية
وكنت بهرب من محاضرات الشعر والرواية والقصة والمسرح
يعنى كنت بهرب من حضور المحاضرات اللى بحبها
عشان افضل أحبها
النظام التعليمى فى مصر بارع جدًا فى إفقادك لذة الأشياء
وحشتينى يا ملكة
ومبسوط لأنى بكتب تعليق على بوست ليكى
تحياتى
تعرفي يا بت والله أنا داخلة عندك النهاردة وأنا متأكدة انك كاتبة عن الموضوع ده
أصل احنا لما يطلع دين أبونا وفي الاخر نبقى زي الحمير ونتعامل زي الحمير يبقى نقوم ننتحر أحسن بقى.
عموما أنكل كوليردج ووردث وورث وكيتس وأم كيتس نفسها بيسلموا عليكي وبيقولوليك والنبي يا اختي متعمليش في نفسك كده
، اه ، وبالمرة بيقولولك اشمعنى شيلي تاخدوله 4 قصايد
( هو مش كان شلي برضه اللي مش هنعرف نكمل حياتنا من غيره؟والله كله خل في بعضه ومش عارفة مين عمل ايه)
دلوقتي انا بقيت أنام وانا بخرف شيلي كيتس ابو جلمبو وأحلى سلام لبوووووووووب اللي كان بيكتب استظراف وفاكرنا هنضحك بتاع اقتحم الباب عنوة ده:)
امشي يا بت قبل ما أهيس أكتر من كده
واه..ابقى حطي في امضائك على الفورم لينك الموضوع لعلهم يشوفوه.
مش عارف اقولك ايه يا ملكة فكرتيني بالهم ربنا يستر في امتحاناتي السنة دي
أصل عندنا دكتور حب يتفذلك في مادة الترجمة فبيقولنا انه هيبص في التكست اللي هنترجمه كله علي خمسكلمات هو اللي حاططهم والدرجة بتاعة السؤال عي الخمس كلمات دول لأنهم أهم كلمات في النص
ولا التاني اللي بيقول لازم في الترجمة اللي هنكتبها (هجم مسلح وقتل بالرصاص)
واللي مش هيترجمها كده مش هياخد الدرجة
عادي جدًا والله متاخديش في بالك
كل أقسام انجليزي علي مستوي الجمهورية وعلي مستوي الكليات مبتفرقش في الدكاترة بتوعها
أفتك دكتور الشعر الترم اللي فات اللي قالنا ان اللي مش هيكتب نسخة من اللي في الكتاب مش هياخد الإمتياز أنا قلت كفاية عليا الجيد جدًا جبت مقبول وواحد بس في الدفعة جاب امتياز واتنين جيد جدًا
واربعين واحد من 104 شالوا المادة عادي بصي انا لو فضلت أحكي مش هخلص
يالا بلا وجع دماغ
سلام وشدي حيلك وسلميلي علي كيتس واي حد من طرفه
تحياتي محمد
دافنشي
بالظبط عليك نووور
هو ده النظام من زمان يعني مش جديد عليهم التعقيدات والحشو والملل ده كله
لكن أنا يبدو إني لسة ساذجة بحيث أتخيل إن بعد 3 سنين في الكلية
ممكن نتعامل على إننا بشر مش شوية قطيع نكتب ونحفظ ونرمي ع الورق في الامتحانات وخلاص
وعندك حق
الظاهر الواحد اما بيقابل حد من الاستثنائيين دول الدنيا بتبقى بمبي أدامه لدرجة إنه يتصور وهماً إن الباقي ممكن يكون بنفس البمباوية دي:S
أشوف في اللي ف بالي يوم
بس متقولش لحد ان انا دعيت عليهم!
فارس
أيوة بحب انا الوعود اللي بتتنفذ دي
أهو يبقى اي حاجة في البلد دي واقعية وخلاص:D
هما كلهم استمبات واحدة ولا ايه؟
وبعدين ايه يعني دكتوراة من أمريكا ده يديه الحق إنه يطلع عين الناس اللي ملهاش ذنب وبيدرس لهم؟
وبعدين شكسبير اللي مزعلك ده
واللي كان قارفنا في سنة اولى وبندعي عليه
والله طلع أرحمهم
ياسلام!هو فيه زي شكسبير؟
على رأي المثل
"يا ناكر خيري بكرة تشوف زمني من زمن غيري"
ماعلينا
أيووووون عليك نووور
رغم ان مالطة بقى فيها مسلمين والله
إلا إننا سنظل ندن فيها وفي موزمبيق وجز القمر كمان وبرضو محدش هيسمع
طبيعي يعني هي عادتهم ولا هيشتروها؟
على رأيك كله هيعدي ان شاء الله
ومسيري اتخرج واروح اطلع لمكتب شؤون الطلبة لساني واسيبهم وامشي:)
نورت يا فارس وتحياتي ليك
إيما
بالظبط يا إيمان كدة
تعرفي من سنة اولى و هما معظمهم بيتعاملوا معانا على اننا ما نستاهلش النعمة اللي احنا فيها
النعمة دي اللي هي دخولنا قسم انجليزي
هما شايفين اننا دون المستوى
بمعنى أدق عالم رعاع جم القسم غلط ولازم ينتقموا مننا شر انتقام
وبعدين عايزة أقولك إن مش الشعر بس اللي بيتقتل
ده حتى مادة العربي اللي كنا بناخدها لحد سنة تانية وبطلوا يدوهالنا كانوا بيدرسوها بطريقة عقيمة لدرجة اني كرهت العربي رغم اني خارجة من ثانوية عامة بعشقه
فتحسي انهم بيبذلوا اقصى مساعيهم(كتر خيرهم يعني)انهم يكرهونا في كل حاجة بنحبها
وبعدين مين بعد كوووول ده يفكر يعمل دبلومة وماجيستير وبعدين دكتوراة؟؟
ده أنا ما هصدق اخلص عشان مكرهش نفسي اكتر من كدة:(
ربنا يسترها معانا كلنا بقى
نورتيني يا ايما تسلمي على ردك
يوتتي
أيوة يا حبيبتي والله
الحياة كلها وخاسة الدراسة ملياااااااانة بكويسشنات من هذا النوع
حاجة تخنق
والله أنا لحد دلوقتي برضو بتساءل وبصوت عالي احيانا للدرجة اللي بتخلي الست الوالدة هي راخرة تتساءل عما إذا كان الربع الفاضل عندي طار ولا لسة
طب انا بذاكر حضارة مثلا الاربع سنين وبقعد احفظ واصور وادش واكتب واكتب واكتب وفي الاخر بعد الامتحان بربع ساعة بنسى كل حاجة
طب يبقى على ايه؟
على ايييييييييييييه؟
ولازمته اييييه؟
لما انا لو اشتغلت مش هستفيد بكل ده
وحتى كله بيروح من غير فايدة ولا بفتكر منه حاجة
والشعر برضو نفس النظام
ده حتى التلات اربع قصايد دول حاجة والله ما اقدر افتكرها بعد الامتحان مباشرة مش السنة الجاية
طب ليه وعشان ايه؟
يعني ننتع في قلبنا الاربع سنين ونستحمل كل البلاوي دي وفي الاخر كله ملوش لازمة
يمكن نشتغل في مكان يتنطط علينا واحد خد له كورسين انجليزي وكان مقضي حياة الجامعة سنكحة وعيشة
وربنا حراااااااام
طب تفتكري لو احتجينا وقاطعنا الامتحانات(وهو ما لن يحدث قطعا)هما كمؤسسة حكومية هيمارسوا الديموقراطية بأسلوب متحضر؟
اللعنة على ال
sublime
و
Coleridge
و
French Revolution
و
كله كله كله:(
ابراهيم
والله انا شكلي مش بلعب في الذكريات بقدر ما انا بلعب في عداد درجاتي في الكلية دي
ياراجل؟
فيه حد حببك في الشعر؟
طب ده انت محظوظ بقى ولازم احقد عليك
قال ثورة قال
امال انت كنت فين وانت لسة في الكلية؟
معملتش الثورة دي ليه يا عم الثوري؟
وبعدين شيماء ود.سحر واضح انهم سلموا امرهم لله واستسلموا للواقع الأدبي الانجليزي القاهري والقهري في نفس ذات الوقت
ماعلينا
حلوة اوي الجملة بتاعة هويدا دي
بجد الواحد عمره ما فكر فيها كدة
وانا اقول ياربي بييجوا من برة يطلعوه فوق دماغي انا ليه؟
وانا اجي من الجامعة ابقى عايزة اكسر قزاز البيت كله على دماغ حد لييييه؟؟
سيكولوجية الازاحة
عبثية التعليم هيبقى من العبث الكتابة عنها بعد كل هذه السنوات من القهر والظلم والقمع والديكتاتورية والغباء والخنقة
ده التعليم طبعا مش حاجة تاني
محمد كمال
ياسلاااام على الناس المختفية انترنتيا وواقعيا وكمان أدبيا
فينك يافندم؟عاش من شافك:)
ياريتني والله أقدر أفلسع من كل المحاضرات اللي ممكن تكرهني في المواد اللي بحبها
بس ده معناه اني مش هروح الجامعة من اساسه!
سعيدة جدا بتعليقك هنا يا محمد
متغيبش كدة يابني بدل ما نبقى ندور عليك بقى
نورتني
سلومتي
مهو عشان احنا الاتنين مخنوقين سوا يا حبيبتي
ثم إذا لم نكن نجرؤ على الانتحار
فنتكلم على الاقل
مش هيبقى موت وخراب بيوت يعني
شيلي ناخد له 4 قصايد عشان عييييييييب نكون خريجي قسم اللغة الانجليزية ودرسنا شعر انجليزي ومنعرفش قصيدة مش عارفة ايه لشيلي وقصيدة ايه التانية بتاعة نفس البني ادم
اهو شفتي؟
اجابة نموذجية زي ما الحاجة قالت بالظبط
عييييب دي سمعة القسم يابنتي
هههههههههههههههههههههه
لسة برضو اقتحم الباب عنوة كنت بحكي للبت هينار عليها النهاردة
والغريبة انها برضو بتقولي تصدقي دي احلى من كتلة الشعر اياها؟
على الاقل ليها معنى:D
وبعدين بووب يستظرف ليه؟
وربنا ما ناقصاااااااه
لأ وعلى اييه؟
ما بقولك الطيب احسن
لو حطيت اللينك مش بعيد اشيل المادة ويعملولي بلوك للمنتدى
أو بلوك من القسم اساسا
خليهم اللي يطاوعه صوباعه ويجيبه هنا يتصدم بنفسه بقى
محمد عبد السميع
هيستر ان شاء الله
ربنا يسترها معانا كلنا السنة دي تحديدا يعني
ترجمة ويبص على خمس كلمات؟
على راي اللمبي
ده عبيط ده ولا ايه؟
هي الترجمة بتبقى نص محدد ميتخرجش عنه؟
امال فين دماغ اللي بيترجموا بقى؟
ياربي حتى في الترجمة كمان حفظ؟؟!
الله بقى؟!يعني دي مؤامرة على كدة
أصل احنا برضو عندنا فيه كتير بيشيلوا مواد محددة
شعر
دراما
رواية
واحيانا حضارة
والمحظوظ اللي بيجيب فيهم مقبول اما الخرافة بقى ان حد يجيب جيد فيهم
ده يبقى يعني عبقري واللي بيصحح له اكيد كان عنده دم
المشكلة انهم في التصحيح بيبقى صعب جد ان اجابة ترضيهم
ولو كتبت احسن حاجة بجد ووفيت كل شروط السؤال وشروطهم كمان
عمرهم ما يدوك الدرجة النهائية ولا اللي قبلها بدرجة حتى
على الاقل ينقصوك درجتين
لنفس السبب اللي هو ازاي طالب ياخد درجة نهائية او درجة قريبة منها؟
لييييه؟عبقري؟!!
والسلام لكيتس يوصل يافندم
مش عايزني اسلم لك على طنط فيكتوريا بالمرة؟
المشكلة مش في الشعر الانجليزي نفسه , المشكلة في القصائد اللي بيدرسوها ..
في المدرسة ايام الاعدادي والثانوي عندي كنا بندرس الشعر الانجليزي , قصائد لكيبلينج ولسومرست موم وناس تانيين اساميهم راحت خلاص من دماغي , وكنا بنستمتع بالقصائد دي وخصوصاً اذا قارنا بينها وبين القصائد العربي اللي كانوا بيدرسوهالنا ..
كالعادة نظام التعليم العقيم وطبعاً طريقة التدريس اللي ان دلت على حاجه بتدل على ان اللي بيدرس نفسه كاره مادته..
محمد
الأول أهلا بيك
ثانيا ندخل في الموضوع
بالظبط طبعا اختيار المادة العلمية اللي تتدرس غلط عندنا هنا في مصر مليون في المية
يعني أنا مثلا وبعيدا عن الشعر الانجليزي كنت أتمنى ندرس في الرواية السنة دي جين اير
اللي حصل اننا درسنا مرتفعات وذرنج اللي انا شايفاها خنيقة لأقصى درجة
طب ما كانوا يدونا جين اير باعتبارها اتكتب في نفس فترة الرواية التانية بل بالعكس احسن بكتير من مرتفعات وذرنج دي
انما نقول ايه بقى اشمعنى ده اللي هيمشي صح يعني؟؟
عايزة أقولك وعلى خلاف العادة انا كنت بحب العربي وخصوصا الادب والنحو في الثانوية العامة
تعالى اسالني في حاجة منهم دوقتي بقى
ولا الهوا
كمان انا كنت في مدرسة حكومة مدرسناش قصايد ولا روايات عالمية
وعليه
كنت داخلة الكلية أبيض ياورد
وسبحان الله بقى الواحد ربنا بيكرمه يعني :)
نورتني وتسلم ايدك على تعليقك الجميل
Post a Comment