نظرية

When you dim your light so that some one else can shine,

the whole world gets darker !

حادي بادي هنقاطع ولا هنعادي

النهاردة فجر 26/3 يامصريين

من 28سنة السادات راح اسرائيل

واعتبروها نكسة جديدة بعد سبعة وستين

بكرة(صباحا يعني اي حاجة بقى) الاستفتاء/الملوخية على 34 مادة في الدستور

مش محتاجة فهلوة سعادتك عشان تفهم ان مصر كلها رافضاه

ولا عشان تفهم ان المنطق بيقول

بما اني واحدة من الشعب

وبما ان الشعب كله رافض

إذن أنا كمان رافضة

#وهو المطلوب اثباته ياعم الحاج

طب ايه المشكلة دوقتي؟

المشكلة اني معرفش أروح اللجنة بكرة ولا لأ

آه والله شفتوش خيبة أكتر من كدهوة؟؟

بقالي شهر ونص مستنية البطاقة وأخيراً

وبعد ما طلع عين أهلي بسبب موظفين قسم السيدة

استلمتها(زغردي ياأم فاروووق)ـ

وبعدين قريت النهاردة باليل جريدة صوت الأمة وجريدة الكرامة

ودي خطوة غير عادية بالمرة

لأني مقاطعة الجرايد بأنواعها من زمان والحمد لله

ودماغي لألأت(يعني زي البيض الممشش كدة)ـ

و الأسئلة التي تمرح في جمجمة حضرتي الآن بقى هي:ـ

نقاطع الاستفتاء بحكم كوننا لا نرضى ان نساوم على حريتنا كمواطنين ولا يمكن ان نشارك في مهزلة زي دي وان مجرد مشاركتنا معناها موافقتنا الضمنية على التعديلات واللي بيحصل؟؟

ولا نروح ونقول لأ مع اننا عارفين مليون في المية إنها متزورة متزورة ياولدي لمجرد اننا نعمل اللي علينا ونبرأ نفسنا بغض النظر عن النتايج؟؟

هنقاطع ياعباري ولا نستشهد ونروح؟

زيس ايز ذا كويسشن

ولما لم أجد الاجابة عن الاسئلة الحلوة دي لحد دلوقتي مع ان خلاص

كلها كام ساعة والنهار يطلع و يدرك العادلي الصباح

ويسكت الديك عن الكلام المباح لأنه بدأ يدخل في الغويط

قلت أعرض على الساهرين أمثالي وجهات النظر

والمأساة المطروحة ولا مأساة الحاج أوديب وعم سوفوكليس

يمكن تدبروني وتقولوا رأيكم

مع الاخذ في الاعتبار ان الاسباب لازم تكون مقنعة ومستوفية الشروط

وعليها دمغة من اتنين ناخبين مسحولين متظاهرين متقاعدين

وانا من هنا لحد بكرة الصبح هقلبها في دماغي

يمكن اتوصل لحل أخير تالت لم يأت في الحسبان من قبل وهو:ـ

إني أهاجر موريتانيا !!ـ

شكراً بهاء طاهر

كل مآسي اليوم النهاردة وخنقته عوضهم عني ساعتين معاه .. .. حبيت ابعت رسألة صغيرة إليه مع إنه مش هيشوفها ولا يعرفنيش:ـ

.

Bahaa Taher,Thanks A Million,You Made My Day! Bahaa,Mahinor(my friend),and me

البقاء لله يا مصريين

مظاهرة من طلاب التيار الاسلامي احتجاجاً على التعديلات الدستورية،مكنتش مظاهرة وإنما جنازة!جنازة بكل تفاصيلها،شارات الحداد، اليفط السودا،الموسيقى الجنائزية وأخيراً نعش وعليه علم مصر علامة على إن اخر مسمار في نعش البلد اتدق بعد تمرير التعديلات الأخيرة،في الوقت نفسه ظهرت مجموعة من البنات واضح اوي على شكلهم انهم مش اكتر من اعدادي او ثانوي ولابسين قمصان بيضا وبنطلونات رمادي وقفوا فوق سلم مبنى المسرح الشهير علشان ميسيبوش مكان للمتظاهرين التانين،وبدأ واحد يلقنهم هتافات من نوعية التأييد لمبارك ونشيد بلادي بلادي وأخيراً نعم للتعديلات!،جدير بالذكر ان اشكال اللي كانوا واقفين معاهم آخرهم بلطجية ومأجورين! وده لينك للفيديو http://www.youtube.com/watch?v=EFNXEDJBE0w

نزيهة والانتخابات

نزيهة صحيت الصبح في مرة

لقت الدنيا كلها بتتكلم عنها

في الجرايد

"الانتخابات لابد وان تكون نزيهة"

في التلفزيون

"الاشراف القضائي لتحقيق انتخابات نزيهة"

وحتى في الشارع:ـ

نزيهة استغربت جدا من اللي بيحصل ده

وقالت أنا لازم أفهم هو فيه ايه في البلد وليه سيرتي بقت على كل لسان زي اللبان

نزيهة خدت مكروباص ولسة بتدفع الخمسين قرش لقت السواق بيقولها الاجرة 75

نزيهة بصت له وسكتت وطلع الربع جنيه بأدب واديتهوله

بعد شوية السواق متحركش

نزيهة اتكسفت تسأله احسن يزعل ولا حاجة

سألت الراجل اللي جنبها

قالها انه مستني الأذن من أمين الشرطة عشان يصبح عليه

نزيهة مفهمتش ايه المشكلة يعني لما السواق يصبح على الأمين وهو راجع

نزيهة سكتت وحطت مناخيرها في الشباك جنبها عشان ريحة السجاير بتاعة السواق

بعد ساعتين السواق وصل لحد شارع الجامعة وقال للركاب انزلوا كملوها مشي للجيزة

نزيهة عملت زي الباقيين ونزلت تمشي

نزيهة بصت فوق محل عمر أفندي لقت يافطة بتقول

نؤيد الرئيس

نزيهة بعد نص ساعة لف في الجيزة وبعد عينيها ما اتعمت من كتر قراية يفط النزاهة

نسيت هي كانت رايحة الجيزة ليه

نزيهة اخيراً قررت انها تروح القسم عشان تعمل محضر

للناس اللي اخدوا اسمها ومرطرطينه على كل حتة وكل لون

نزيهة راحت القسم و قالت للظابط اسمها

نزيهة مبقتش نزيهة بعد اليوم ده

نزيهة بقى اسمها دلوقتي:ـ

عن زهرة وقطعة حلوى

...

هو يوم ما من الأسبوع الطويل،أقرر بلا مبرر أن أعود سيراً.المطر مذبوح أرضاً تمتليء به ثغرات الأرض وعثراتها. أمضي بخطى شبه مستهترة غير عابئة بتحول أطراف ثيابي للون طيني قاتم.أتعمد أن أتمهل فوق جسر لايبدو منه في عتمة الليل سوى انعكاسات المصابيح الضعيفة فوق بقع المياه.أعود لأسرع في خطواتي بعد انتهائه،أعبر الطريق متحدية وأفكر في خاطر كئيب عن حال هؤلاء الذين تحتضنهم السيارات لحظة ثم تطرحهم أرضاً من جديد.أعود لأتنقل بين ملامحي بتعبير قوي دون فرشاة أو ألوان "أنا لست ضعيفة".." أنا لست ضعيفة ".."أنا لست"!

أتوقف فجأة،شعور عام بالانهاك يشمل أجزائي،أنظر إلى جانب الطريق بانتظار شيئاً يحملني،على الأقل أعرف أن في ذلك العالم ما يستطيع.طويلاً انتظرت ولم يأتِ ،أدرك أن الاستسلام للقدر ليس مؤلماً دوماً فأقرر المضي قدماً إلى النهاية.أتسمر لحظات أمام البائعة ثم أقول أخيراً "شوكلاتة". بطفولية أتناولها ببطء غير عابئة بما أسمعه أو أراه.هبوط،هبوط،هبوط ثم صعود مرة واحدة،تبدو لي مسافة طريق واحد وكأنها عمر بأكمله،لهذا السبب تبلى أحذيتنا سريعاً،لكثرة ما تتحمله معنا! أصل لبائع الورد المفضل لدي، لوهلة ألمح انعكاس وجه مألوف جواري فوق الواجهة الزجاجية لكنه يتلاشى سريعاً.أحتفظ بأشكال الزهور المعروضة في ذاكرتي قدر ما أستطيع،أعرف أن وقتاً سيمضي دون أن تواتيني الظروف كي أقف هنا وأتأملهم ثانية.أشعر أني أبدو كبلهاء قررت أن تحدق في مجموعة زهور ليس لها أي معنى وهي تمضغ قطعة شيوكلاتة،لذا أقرر أن أرحل.

أنا سعيدة أن لدي ملايين الأفكار والهواجس والهلاوس التي تصحبني منذ استيقاظي وحتى نومي مرة أخرى،تصحبني في رحلتي من وإلى الجامعة،الطريق يقصر دائماً حين يكون لديك صحبة.أصل لوجهتي أخيراً ،أرمي الكتب على أول مقعد يقابلني وأذهب لأعد شيئاً ساخناً يدفيء يديّ الباردتين بينما أحاول في استماتة مقاومة شيء يتسلل داخلي. أهدهد نفسي و أردد بصوت خفيض " أنا لست حزينة "..

! إيه العبط ده؟

عمرك حسيت إنك ولا حاجة؟

لأ مش اكتئاب ولا بتاع الحمد لله

ده مجرد مناقشة بسيطة للغاية

هات وخد عادي يعني

ومش هتطلع منها بكالو في نفسيتك

ولا تقليب مواجع ولا أي كولكيعة سيكولوجية

الفكرة في الثقة بالنفس

ممكن مثلا تبقى قاعد في مكان وفيه بنت هتموت وتكلمها

وتروح وانت واثق من نفسك كدة ومالي هدومك

تتحجج بأي حجة عشان تتعرف عليها

معتمد على وسامتك الملحوظة ولا أدهم صبري

وبعد محاولات ترجع مكانك الأول

قفا سعادتك-ولامؤاخذة-بيشجع الأهلي بجدارة

فين ياعم الثقة بالنفس الأولانية؟

الله يرحمها

مش عشان بنت واحدة يعني يبقى خلاص انت وحش

بتدن في مالطة طبعاً ولا حد بيديك ودنه

طيب تعالوا نبص الناحية التانية

بنوتة معجبة بشخص ما

(معلش أصل الناس بتحب على نفسها دلوقتي كتير)

وتقعد تحكي بالساعات على نظراته ليها

وانها بتشوفه في كل حتة بتروحها

وإن مفيش أي شك في إنه واقع في دباديب حضرتها

ثم إذ فجأتن تيجي يوم تلاقيه واقف مع واحدة

والمصيبة لو لقيتهم مرتبطين كمان

وبغض النظر عن الحجج اللي هتبرر بيها موقفها أدام الناس

جواها هي هتدور فكرتين

أنا مش حلوة زيها/أنا مستاهلش واحد زيه يحبني!

فين ياست المزمزيل ثقتك بنفسك؟

طب مش يمكن مكنش فيه حاجة أصلا؟

وكالعادة،تصدير ودن من طين والتانية من عجين

ثقتها بنفسها باي باي،وأهلاً بعصر من الشكوك النفسوية البحتة

والسؤال دوقتي:

ليه بنتعرض لصدمات في صميم جدار ثقتنا بنفسنا وقدراتنا لما نلاقي رفض من الآخرين؟

معنديش إجابة

قد أكون واحدة من الناس اللي سهل يفقدوا الثقة في نفسهم

بس على الأقل كنت بحاول أبنيها بنفسي طالما محدش بيديهالي

بحاول أبان قوية جداً وواثقة في رأيي وفيا ككل كما لا أثق في أي شيء آخر

إنما بقى تيجي لحظة ما زي النهاردة كدة

و بعد محاولات تفحيص وتمحيص جملة علشان أشارك بيها في المحاضرة

وبعد ما راجعت في مخي الجرامر سبعة وخمسين مرة

وبعد ما اتشجعت أخيراً وبعد طول انتظار إني أرفع صوباع سعادتي علشان أقول حاجة

وربنا فتح عليا الحمد لله بالجملة

أسمع رد ما من الصفوف الخلفية صاحبته بتقول:

إيـه الـعـبـط ده؟!!

للأمانة،عمري ما سمعت رد واضح وصريح زي ده أبداً

خاصة وإن مش أنا لوحدي اللي خرم وداني التعليق

وإنما بقية المدرج بأكمله

ويبدو إنها كانت واثقة في وجهة نظرها عن عبط رد سعادتي للدرجة اللي تخليها تقولها بمنتهى القوة كدة

هي دي الثقة بالنفس ولا بلاش!

المهم،وبغض النظر عن إن إجابتي بالفعل كانت غلط

الجملة دي عملت فيا حاجة غريبة جداً

صحتني من النوم الطويل اللي كنت فيه علشان أكتشف إني كنت بتظاهر بالثقة بالنفس

انها مكنتش بالفعل نابعة من جوايا بجد

والدليل:إني لسة فاكرة الجملة لحد دلوقتي و مش قادرة أتخلص من شعور الاحباط الجميل اللي وصلني بعدها!

فأنا وبكل العرفان بالجميل اللي اتعلمته في حياتي

أحب أتوجه بالشكر للآنسة صاحبة التعليق الرائع عن نظرية العبط التي أغرق فيها حتى أذنيّ

لأنها صحتني من نومي الطويل بوسيلة ربما أقل رقة من صوت العصافير بشوية صغيرين

وذلك عن طريق رش ماية ساقعة متلجة فوق دماغي!

***

بي إس:الدرس المستفاد من التدوينة الطويلة العريضة دي على القاريء استنتاجه طبعاً،انا مش هعمل كل حاجة يعني!

العلم نورن

مش لازم تدور فوق رف مكتبة علشان تقرا

يكفي إنك تمشي في الشارع علشان تلاقي ملايين الكتب مجاناً

بس حذار تضيع وقتك في كتاب ميستاهلش أو يأثر عليك بالسلب

وحذار أكتر

تضيع عينيك في قراية غلاف من غير كتاب

وغالبا هتلاقي الكتب اللي تستاهل اهتمامك فعلاً

جوة ومش باينة وسط كتب كتير عايزة الحرق