Friday, January 26, 2007

بنحبك يا ريّس

أنا بحب الريس!!ـ
إيه مالكم مستغربين كدة ليه؟هو مش العادي برضو إن المواطن يحب رئيس بلده؟مش هو ده ولي الأمر اللي ربنا قال نطيعه؟
طيب ايه المشكلة اني اقول اني بحبه يعني؟فيها حاجة دي؟
عشان أفهمكم أنا قصدي إيه هقولكم:ـ
...
أنا بحب الريس لما بيهتم بشؤون المواطنين اللي هو راعيهم وبيحكمهم بالعدل
.
بحب الريس لما بيدي لكل واحد حقه ومبيسيبش حد يبات مظلوم ولا له مصلحة مش مقضية
.
بحب الريس لما بيسمع شكوى كل واحد بصبر ولو حقه ضايع بيجبهوله
.
بحب الريس لما بيهتم بولاده في المدارس والجامعات وبيحققلهم تعليم كويس ومفيد ومهواش بيضايقهم
.
بحب الريس لما بيوفر لكل خريج جامعة شغلانة محترمة بمرتب محترم يكفل له إنه يفتح بيت ويتجوز فيه
.
بحب الريس لما كل مواطن بيبات في بيته باليل شبعان ومستريح وعارف إن بكرة أحلى من النهاردة عشان مصر بخير
.
بحب الريس لما بيعاقب كل المذنبين والحرامية والفسدة و المرتشين واللي بيمصوا دم الشعب
.
بحب الريس لما مبيترفعش عن المواطن العادي وبيعيش زيه بالظبط وأكتر
.
بحب الريس لما بيسيب كل واحد يقول رأيه بحرية من غير ما يخاف أو يتراجع عن رأيه ده حتى لو ضد الريس نفسه
.
بحب الريس لما بيذلل لكل المواطنين كل المتاعب اللي ممكن تواجههم في أي مؤسسة حكومية
.
بحب الريس عشان لما المواطن بيفكر ياكل بيلاقي ياكل لأن الاسعار مناسبة وفي متناول ايديه
.
بحب الريس لما بيهتم بالثقافة في مصر وبيهتم أكتر بالدين وبيهتم بزيادة واستقرار الإسلام في مصر
.
بحب الريس لما بيسيب كل واحد يعمل كل اللي هو عايزه ونفسه فيه لأنه مؤمن بالحرية المطلقة
.
وأخيراً بحب الريس لأن المواطن في بلده عارف إن مستقبل أولاده في إيد الريس نفسه..وده اللي مطمنه!ـ
.....
عرفتوا ليه بحب الريس؟يارب تكونوا فهمتوا!ـ
..
عايزة أوجه له كلمة شكر وأقوله :شكراً ياريس على كل اللي عملته واللي لسة بتعمله فينا ولينا بس أنا شايفة إن كدة كتير عليك، والله كتير أوي بجد، احنا مش عايزين نتعبك بمسؤولياتنا اللي مبتخلصش أكتر من كدة ،كفاية بقى عشان أنا بفكر أتجوز وأخلف ومش حابة أشيلك هم مستقبل ابني اللي هجيبه، ده انا كمان بفكر ما اتجوزش خالص عشان مش عايزة ابني يتربى في عهدك ويضايقك بمسؤليته الكبيرة دي . مشكريين أوي ياريس وربنا يكرمك زي ما كرمت الشعب المصري كله ،يديلك زي كرمك ده من وسع ، ربنا يدي كل واحد حقه واللي يستاهله دنيا وآخرة...قولوا آميين

4 comments:

dandana said...

اااااااااااااااااه

لو كدا يبقى انا كمان بحبه....
انما اى حب من اى نوع اخر....
اسفة...ماقدرش....

وااااااااااااااااامين

اسم مؤقت said...

انتي مدعوة

لافتتاح مدونتي

يوم السبت

الساعة 2 ظهرا

ويا جارتي خبري جارتك

ما تنسي الهدية
:p

إبـراهيم ... said...

هوا أنا ف الأول تنشنت ( هوا أصلاً ملكة معانا ، ولا معاهم ) ،،، وبعدين ابتسمت ، وقلت لأ ، دي بتستدرجنـا ، ده أنا شايفها بنفسي ف . . . . ف .... فــ .. الكلية يعني !


ممممممممممممممممممممممممم


على فكـرة أنا بحب الرئيس ، لو بيعمل نص اللي بتقوليله عليه
بس إيه عدوى الكتابة عن السيد الرئيس دي ؟.؟؟؟ ، يعني سمرا ، وبعدين إنتي ؟.؟؟؟ ، أنا كنت نسيت إن المدونات فيها سياسة



تحياتي يا ملكة ، وشوفي حتى بالليل بيبقى البوست حلو

بالمناسبة كتاب المغامير الأول ( عندما يتمرد الصدى ) هيكون ف المعرض إن شاء الله الاثنين ، ويباع في دار ميريت ، ودار ليلى ( صالة 4 ) ، وبمبلغ زهيد جدًا 4 جنيه

ودي مش دعاية على فكرة

مَلَكة said...

دندنة
اااه الحمد لله وصلت أهي:D
أنا شايفة تقريبا الشعب المصري كله بيحبه بنفس الطريقة دي
مشكرة على زيارتك وردك ودعواااااتك


اسم مؤقت
ماشي وماله،مبروك الافتتاح
بس ياترى فيه مشاريب وأكل وكدة ولا إيه النظام؟:D


إبراهيم..اللي معاه
فكرتني بالنكتة بتاعة اللي اتسأل: انت معانا ولا مع الناس التانين قام قالهم انا معاكم راحوا قتلوه وقالوله اصل احنا الناس التانين
:D
مشوفتش بتاع سمراء لأني اساسا مبروحش عندها الا نادرا بس عادي يعني حبة حب حبة سياسة حبة تهييس حبة ولا حاجة
ميضرش،هي المدونة هتعترض وتقول لأ مثلا؟
كنت قفلتها من اول يوم
منتهى الديموقراطية طبعا زي ما سيادتك شايف أهو

مبروك على الكتاب للمرة الألف بعد المائة،بس أنا رحت هناك وملقيتش ميريت اصلا شكلك هتتدبس برضو في الاخر وتجيبهولي
ومتقلقش ياسيدي هدفع تمنه انا عارفة ان الشعب المصري بقى ماشي بمبدأ عم عشم مات والمعاملة هات وخد
نورتني يافندم