Thursday, January 25, 2007

اللامختار من كتاب الحياة

ساعات كدة وانا بسمع أم كلثوم أغني معاها
وأعلي صوووتييي أوي
وأندمج في الأغنية وكلامها ولحنها
مع ان صوتي مش حلو يعني خالص
بعدها الاقيني فقدت احساسي بالاغنية تماما
والسبب:طبعا اني مغطية على الست بجاعورة حضرتي
اسكت،وانبه على أمي متكلمنيش عشان اسمع
اكتشف اخيرا
ان "الست" متتسمعش إلا بالسكوت التام
متتحسش إلا وإنت حاطط سوليتيب على بوق الدنيا
أموت وأعرف
اللي كانوا بيهيصوا في حفلتها دول
بيسمعوها هي نفسها ازاي؟؟؟
_________________________
2
رخمة أوي تكون بتكلم حد ويسيبك ومينتبهلكش
أنا بتنرفز من الحركة دي جدا
بحس ان اللي بكلمه وتاعبة نفسي وانا برغي معاه ده
مش مهتم بيا ولا بكلامي
ساعات بحسها أنانية واستهتار منه
اخر يوم امتحان واقفة مع اتنين صاحباتي
وانا وواحدة منهم بنتكلم في الحب
أصلنا حسينا ان الامتحان خنقنا للدرجة اللي خليتنا
محتاجين نتكلم في حاجة رقيقة زي دي
جت واحدة تالتة سلمت عليها
وسألتها عملت ايه في الامتحان
ورغيت معاها شوية وبعدين مشيت
رجعت ابص لصاحبتي الاولانية
افتكرت اني سبتها تتكلم لوحدها!!!!ـ
________________________
3
راكبة المكروباص وصادف اني قعدت بين اتنين رجالة
كنت حاسة اني اتفعصت
وقاعدة تقريبا برة الكرسي خالص
قلت اهي توصيلة والسلام وكلها عشر دقايق وهنزل
شارع نوال كله كان واقف
العشر دقايق بقم ربع ساعة
وانا قربت أطق
فكرت انزل اخدها مشي بس ده كان معناه اني هوصل بيتنا الساعة عشرة
وبعدين بقى؟
طب انا ليه مقولهمش اتاخروا شوية؟
ساعات الواحد وهو مخنوق بيفكر في حاجات غير منطقية أبدا
جربت أعمل زي ما بيقولوا
وافكر في حاجة كويسة في وسط السلبيات
لقيت مفيش غير إن احمد ربنا
ان محدش منهم بيشرب سجاير
بعد ما نزلت قولت نفسي
والله انتي عبيطة!!ـ
_______________________
4
أمي طيبة أوي بس اما بتبقى عصبية
مبتلاقيش غيري عشان تستريح بعد ما تزعقله
وانا بتضايق اوي من الحكاية دي
وساعات بعد ما نتخانق خناقة كبيييرة
أسمعها بتعيط في أوضتها لوحدها
بتصعب عليا أوي وقتها
بس معرفش ليه مبقدرش أدخل أعتذرلها واخدها في حضني
النهاردة رجعت من برة متنرفزة
بغض النظر عن المكروباص والمواصلات اللي تنرفز
بس بجد مكنش فيه حاجة مستاهلة اتعصب عليها
زعقت كتير وساعات كنت بحس ان فيه حاجات بتلكك عليها
الغريبة
لقيتها بتهديني وبتهاودني على كل حاجة
لحد ما انا نفسي هديت
لما عيطت لقيتها مع اني ضايقتها جامد
جت وخدتني في حضنها وبتسألني متضايقة من ايه
هو أنا ليه كدة؟؟؟
ــــــــــــــــــــــــــــــــــــــــــــــــــــــــــــــــــــــــــــــــ
5
أوقات-زي النهاردة-بحس ان الدنيا واسعة عليا
واسعة أوي
واسعة زي الصحرا
واني محتاجة حد يقف جنبي عشان يملاها معايا
يقف جنبي بالمعنى الحرفي للكلمة
زي الواحدين دول(11)كدة
بتضايق أما بكتشف في نفسي
احتياجي اوقات الوحدة لحد
أي حد!!!ـ
_______________________
6
امبارح باليل روحت البيت مش شايفة ادامي
كان بقالي اكتر من 24 ساعة منمتش
مسكت كتاب قريت صفحتين ومش فاكرة حصل بعدها ايه
بس فاكرة الحلم بتاع امبارح/النهاردة أوي
حلمت إني كل اللي بتمناه في الحقيقة اتحقق
كله كله اتحقق وزي ما انا عايزاه بالظبط
انا فاكرة اني وانا بحلم كنت متأكدة إني بحلم
عشان اللي بيحصل مكنش منطقي
المهم اخر حلم اتحققلي كان اللي بتمناه دلوقتي بس مش هحكيه
ليه صحيت بعدها على طول؟
معرفش،مع ان مكنش فيه لا صوت ولا حاجة تصحيني
بصيت للساعة لقيتها تسعة الصبح
رجعت نمت تاني عشان أكمل الحلم
الساعة تسعة زيها زي أي ساعة تانية
ملهاش الحق إنها تصحيني من أحلى حلم في حياتي
طظ في الساعة تسعة!!!ـ
____________________________
7
السؤال اللي في بالي دلوقتي
أنا ليه بكتب الكلام ده على المدونة؟
واي حد في العالم ماله ومال التهييس والهرتلة دول؟
متفهمش بقى غرور بشري ولا فضفضة ولا وقت فراغ ولا ايه
احتمال امسح البوست بعد كدة
طب وليه مامسحهوش دلوقتي؟
معرفش
بس حاسة ان الكلام اللي كتبته بقى صعب يتمسح
مش نافع امسحه من الاخر
يمكن عشان كلام بجد من جوايا
وهيصعب عليا امسح حاجة مني؟
ممكن برضو وليه لأ؟
_________________________
8
كنت أنا وسلمى في وسط البلد
عدينا على محل ورد ولقينا عنده الورد اللي بحبه
ديزي
أخدت المبادرة وقلت ادخل اشتري منه وردتين تلاتة من النوع ده
بقول للراجل عايزة"دايزي"بصلي بهبل وقالي"هه؟نعم؟"
راح نده لواحد عنده بيقوله شوفها عايزه ايه
جه قلتله برضو اذبهل وتنح
روحت شاورتله على اللي انا عاوزاه
قالي عايزة اد ايه؟
قلتله اتنين تلاتة
بصلي بشبه قرف وقالي اتنين تلاتة؟؟
قلتله هي الواحدة بكام
من غير ما يبصلي المرة دي قال لي 3 جنيه
ومع ان كان معايا اكتر من 5جنيه
لكن اني اشتري وردة معناها اني اركب اتوبيسات معينة عشان اعرف اروح
وده معناه اني هستنى على المحطة ما يقرب من نص ساعة
عشان اتحشر في اتوبيس بالمعنى الحرفي للكلمة
بصيت لسلمى وجريت ناحية الباب وانا بقوله شكرااااا
خرجنا نضحك انا وهي من الاحراج
واكتشفت حاجة غريبة اوي
ان اللي اقترح مبدأ "بدل ما تشتري لقمة رغيف إشتري وردة"ده
كان راجل عبيط ومش عايش في الدنيا!!!ـ
_________________________
9
الحياة غتتة
دي مش حكمة دي شتيمة
أصل أنا عارفة إن محدش هيدافع عنها
أما يعرف إنها مش راضية تفرحني بحاجة بسيطة أوي نفسي فيها
من ييجي أكتر من شهرين
مع إنها مش هتكلفها حاجة يعني
بس الغتاتة بقى
ياحياة،انتي غتتة وانا مش هكلمك تاني
ولا هحبك ولا هكلمك ولا هعيشك زي ما انتي عايزة
بس هاه يلا،مخصماكي لحد ما تصالحيني
بالمناسبة انتي بخيلة كمان،بخيلة وغتتة!!!ـ
____________________________
10
واحدة قالت قصة النهاردة،قصتها جميلة وعاجباني
أقوم ألاقي واحد بيقول إنها في رأيه : أدب الأنثوي
والقصة ملهاش أي علاقة بالأدب الأنثوي ولا جابت سيرة المرأة أصلا
ولا هي بتتكلم عن حاجات رقيقة ولا بتتكلم عن ورد واطفال وطبيعة ولا حاجة
طيب أسأله ليه قلت كدة؟
يقولي علشان الأديبة بتاخد عنصر صغير وبتعظمه علشان نتعاطف معاه
صباح الفل ياعمنا
ماهو ده تعريف القصة القصيرة أصلا
بتاخد شريحة من الحياة أو عنصر أو فرد وبتتكلم عنه تقريبا
زي ما بتعمل تكبير لحاجة في لوحة بكل تفاصيلها
و في عز مأنا بكلمه وبقنعه او بحاول يعني
ببص على رواية في ايدي لعائشة عبد النور
لقيت مكتوب عليها(ابداع المرأة)ـ
والسؤال بقى للأخ الأولاني أو لمكتبة الاسرة اللي نشرت كتاب عائشة
ياترى لو كان الكاتب راجل كنتوا برضو هتقولوا عليها
ابداع الرجل؟؟؟؟
________________________________
11
بتنرفز أوي لما حد بيتكلم ادامي بطريقة
مش رحت،مش عرفت،مش عملت،مش سويت
من غير سبب بتنرفز
بالذات اما تقولها بنت ادامي
يالهوي ببقى هاين عليا اديها بالقلم على بوقها واقولها اعدليه
عنيفة أنا صح؟
عشان بحس انها ركة(مش رقة)مفتعلة بصراحة
وقال ايه يقولولي اتعودنا
لا والله؟اتعودتي؟امال قبل ما تتعودي كنتي بتقولي ايه ان شاء الله؟
ما بالكم بقى اني بلاقي ولاد مش بنات اللي بيتكلموا كدة
طب اعمل ايه ساعتها والنبي؟
اقوله روح استرجلك شويتين من عند البقال؟
ولا اعمل ايه دبروني؟
يخرب بيت كدة واللي بيحبوه!!!ـ

7 comments:

إبـراهيم ... said...

واضح إن الجهاز بيجي له زهايمر !!1، ما علينـا ، كنت كاتب إنه فعلًا مفيش أظرف ، ، ولا أجمل ، ولا أحسن،ولا أحلى ،ولا ألطف من إنك تكتبي كل اللي ف بالك ......

جمييييل قوووي ( اللا مختار بتاعك ) من كتاب الحيـاة ، عجبني قوي تفكيرك ف الحاجة الكويسة ف الموقف الوحـش ، ....مممممممممممم

ابقي فكريني أفكر بالطريقة دي ،ـ قد تجدي نفعًا !!!

، إيه كمان ، طبعًا ( وعلى طريقة لما كل الأدباء الحلوين دول ف البلد البلد دي حالها ما بيتصلحش ليه ) ، البوست بتاعك فيه مواضيع كثييير مما يؤهله لإن الواحد يعدي عليه مرة


و اثنين

و ربما سلااااســــة



سلاامة بقى :)

إبـراهيم ... said...

حلووووة قووووي كمان ( الحيـاة غتتـة ) دي ، لأنها فعلاً غتتة ، وبخيلة ، ولو زودتها أنا هشتكيــها !!!!


هشتكيها لربنـــــا :)
ـــــــــــــــــــــ

و إنتي قلتي ( مش رقة ) ، ما تقولي ( ما رقاشي )

هيهيهيهيه

Anonymous said...

دي اول مره ارد في اي بلوج في حياتي بس بجد انا قريت سطرين استفزوني جامد

بالنسبه لطريقه الكلام الي هي: مش رحت،مش عرفت،مش عملت،مش سويت

في الاول كده علشان متفهمنيش غلط انا مش جاي ارد هنا علشان اني مثلا ممكن اكون بتكلم كده.. لا خالص انا بس شايف ان انتي محمله الموضوع زياده عن اللازم.
مظنش ان لو ولد اتكلم بالطريقه دي ممكن ده يقلل من رجولته او كده علشان يسترجل شويتين من عند البقال. او لو بنت اتكلمت كده ده هيخليها بتتدلع او كده يعني كمان لو بتدللع او بتصطنع.
كل انسان حر تماما في الطريقه الي يتكلم بيها سواء كانت بنت او ولد بيصطنع الكلام او لا.
و كمان انتي ليه متقوليش مثلا ان هما حاسين انك انتي كمان بتتكلمي غلط و عايزين يضربوكي بالقلم علي بقك و يقولولك "اعدليه"
و بالنبسه للي بيقولو انهم اتعودا... انتي مش من حقك تكدبي ده بل بالعكس لازم تصدقيه لان ده الي قدامك و ده الي بيقولوه. كمان اما حد بيتعود علي حاجه مش مطالب انه يرجع للي كان بيعمله قبل اما يتعود علي السلوك ده ولا يتسال كان بيعمل ايه او كان بيعمله ازاي قبل كده

كفايه بقي كده علشان مش فاضي انا للكلام ده و الحمدلله اني رديت اصلا

و معلش بقي سامحيني لو في اي اخطاء املائيه في العربي بتاعي و يا رب اكون كاتب املائيه دي صح

سلام
Addams

مَلَكة said...

إبراهيم..اللي معاه
أهلا يافندم مرحبا بك دائما

الحمد لله ان البوست عجبك وإن كنت وانا بكتبه مفكطرتش انه لازم يعجب الناس ولا لأ،ربما لاعتباري إياه فضفضة بشكل أو بآخر يعني
إنما فضفضة على طريقتي الخاصة هه،واخد بال حضرتك انت هنا؟

وبعدين انت تعدي ان شالله كل يوم هو الزيارة بضريبة يعني؟:D
نورتني يافندم
وم(تنساش)الزيارة الجاية تسيب بطاقتك:D


addams scott
الأول أهلا وسهلا بيك
ثانيا من غير نرفزة ولا عصبية بالراحة كدة ناخد وندي في الكلام مفهاش حاجة يعني:)
شوف يا استاذ ادامز،انا فاهمة كويس ان كل واحد حر يقول اللي نفسه فيه بالطريقة اللي تعجبه ببساطة لأني مش هنصبلهم المشنقة يعني
الفكرة في إيه
أنا كنت بتكلم عن حاجة منرفزاني،يعني مثلا كوني متنرفزة من طريقة الكلام دي فده مش معناه اني بحجر على حرية الآخرين في انهم يتكلموا بيها،زي بالظبط ما بتكون بتضايق من لبس بعض البنات-لو بتضايق انت منه يعني-لكنك مش هتروح لكل واحدة وتجبرها تلبس اللي على مزاجك انت،ومع ذلك تبقى فكرة انك مش حابب اللبس ده موجودة

ثم أنا بالفعل بلاحظ حاجة،إن الواحد اما بيعوز يتعود على حاجة-واخد بالك من بيعوز دي؟-بيفضل يغصب بقه انه يقولها لحد بالفعل ما يتعود عليها لأنه شايف انها بتجذب الناس مثلا او محببة بطريقة ما في الكلام
وبالتاكيد يعني انا شايفة ان الاصل في الكلام مهواش طريقة"مش يقول..."وده برضو رأيي وانا حرة فيه يعني
بالنسبة الى ان فيه كلام بيضايق اصحابي مني لو سمعوه فأنا على الاقل هراعي شعورهم وهحاول وانا معاهم مقولهوش ،مش صعبة يعني

متشكرة على ردك اللي انت "أصلا"مكنتش فاضيله ده وبالمناسبة املائية بتتكتب كدة صح مش غلط
والعربي بتاعك حلو وزي الفل بس بالله عليك اما تيجي تكتب ردود تاني متتنرفزش كدة،الموضوع مش مستاهل يعني:)

Anonymous said...

والله اللامختار ده حاجة جامدة جدا.

ولو بعتّيه للدستور حينشروا منّه حاجتين تلاتة ع الأقل في ضربة شمس.

الفضفضة دي جامدة جدا، ومُعبّرة، ولذيذة.

مَلَكة said...

أحمد

بيني وبينك أنا بطلت أبعت للدستور حاجة أصل الواحد ملوش غير مرارة واحدة ولامؤاخذة:D

نورتني يافندم زورونا تجدوا ما يسركم إن شاء الله:)

Anonymous said...

ازيك يا ملكة .. مختفية من مدة يعني ..شكلي كده هأدمن دخول مدونتك مع إني غريب عن عالم التدوين .. جميل اللي قريته جدا .. بصرف النظر عن أنه بالعامية .. بس إحساسه عالي .. بقالك مدة كده .. طبعا هاتقولي يعني انا (اللي هوا انتي )مكانش عندي إحساس قبل كده .. هاقول لك هيا جت كده .. عموما يا بنتي .. نتكلم بالفصحي (هي الحياة .. للأسف حين يستغرقنا الحزن نراه كبيرا جدا ملئ الحياة .. وعندما يلفظنا حزننا نراه في حجم ذرة او أقل .. )شكلك كده في حالة حزن او للدقة شجن ودا للأسف من الحاجات الملازمة لكل هواة الادب (علي الأقل الي في امل انهم يبقوا أدباء فعلا يوما ما .. ابقي افتكرينا وقتها )شادي