Saturday, September 02, 2006

يافتاح ياعليم ! احنا اصطبحنا بخلقة مين النهاردة؟

صباح الخير إذا كنت في مصر دلوقتي حيث إذا بصيت على شمال جهاز سيادتك هتلاقي الساعة 2 ونص صباحاً
ومساء الخير إذا كنت في نص الكرة التاني حيث إذا بصيت على شمال جهاز سعادتك هتلاقي الساعة مش اتنين ونص صباحا(بديهي يعني)!ـ
أنا بالفعل عندي مدونة علي ام اس ان،وبصراحة الاسبيس التاني جميل وهادي وابن حلال وبيني وبينه عشرة بتاع ست سبع شهور مشفتش منه حاجة وحشة والحق يتقال،يعني الاسبيس عداه العيب وجري كمان
هتسألوني طب ومادام مرتاحة هناك ايه اللي خلاكي تتجنني وتيجي تقرفينا هنا؟
وعلى رأي الآنسة يوكّا(صاحبتشي)ده سؤال بيطرح نفسه،المهم السبب الوجيه جدا اللي خلاني اعمل مدونة هنا هو اني كل ما اروح ارد على مدونة سلمى(صاحبتشي برضو)ألاقيه يحرجني وإحم ويقوللي بمنتهى الذوق اني لازم يكون عندي مدونة هنا،عشر مرات اطنش واقول اهو هيخذي الشيطان ويبعت التعليق بأدب ألاقيه برضو يقولي لازم ساين أب!ـ
ولأن شخصيتي قوية جدا،ولأني إنسانة صعب إنها تستسلم بسهولة للمهاترات دي،ولأني كنت مقررة إني مش هعمل هنا بلوج،ولأن قراراتي من المستحيل إني أتراجع فيها..احم..اضطريت اعمل المدونة في النهاية!ـ
عشان مطولش،بصراحة بعد ما عملت المدونة صعبت عليا تفضل فاضية كدة ومفيش ولا كلمة فيها توحد ربنا قلت أدخل اكتب قصة دخولي عالم المدونات من بوابة البت سلمى اللي هي برضو مدونة(سبحان الله وله في خلقه شئون)!ـ
وبعدين وانا في نص المقال(على أساس إني معتبرة نفسي كاتبة مقال بجد يعني)قلت يابت طب وماله؟مايضرش اما تحطي هنا كمان مقالات وبلاوي من اللي على الاسبيس التاني(عالم فاضية بقى)وعلى هذا الأساس ومن هذا المنطلق وطبقاً للمعايير والمبررات الموضحة أعلاه(حلوين الكلمتين دول أهو عشان يبقى مقال بجد)قررت أبقى أجي أشقر على المدونة هنا كل كام يوم كدة واجيب في ايدي حاجة وانا جاية وعلى رأي المثل(يازاير وجاي من غير حاجة ف ايدك بلاها زيارتك ومش عاوزينها الحاجة دي أصلا يعني)!ـ
ماعلينا

7 comments:

سلمى صلاح said...

مبروك عليكي المدونة يا مضروبة...والله وكبرتي وبقيتي من ذوات المدونات

بصراحة انا فخورة بنفسي اني السبب اللي جاب رجلك للمدونات...أنا طبعا خيري عليكي دايما وجايبة رجلك في كل حاجة كويسة يعني..

وبما انك عملتي نفسك كاتبة مقال والكلام التقيل ده ، عايزاكي تكتبي مقال عن حياتك قبل ما تعرفيني وحياتك بعد ما عرفتيني..وبقترح عليكي تسميه

المقال الكامل لخيرات سلمى هانم

وعقبال ما أشوف مدونتك مشهورة كده وكلها تعليقات

ملكة said...

هو من أولها كدة بلطجة ياسلمى؟
بس يلا أهو الواحد بيعمل مدونة ويرميها للنت
لعلها تنفع

ابقي تعالي كل يوم بقى

محمد ياسر said...

عشان خاطر المثل اللى قلتيه فى الاخر بتاع اللى يجى لازم يحط حاجة فانا بكتب كومنت وخلاص

اما بالنسبة للاخت سلمى اللى خلتك تعملى مدونة مخصوص عشان تردى عليها فهى كانت ممكن تعمل خاصية غير المدونين انهم يقدروا يردو زى ما انتى عملاها كده وكانت ريحتك
على العموم مبروك على المدونة وانا متابع برضه

ملكة said...

مانا لو كنت أعرف إنك هترد علي المدونة كنت عملتها من زمان يا محمد

ابقى تعالي كل يوم بقى:)

Anonymous said...

نورتى المدونات ياست الكل

كل سنةوانتى طيبة وعقبال ماالعمر يكررر وانتى اجدع كاتبة مقالات فى الدنيا

هابى بيرثداى تو يو ;)

شقلوطة said...

مبروك يا ماى توينز

أنـــا حـــــــــرة said...

اسمى مكتوب ... هييييييييييييه