Tuesday, May 20, 2008

سيكولوجية الأومليت

هي بقت كدة يعني؟

ده السؤال اللي بيتفسح في بالي بقاله شهور. السؤال ده مش موجه لزوار المدونة الكرام، ومش موجه للأهل والأقارب ونينة وجدو بمناسبة عيد الجلاء، السؤال موجه وبصفة شخصية للأخت الحبيبة : مـصـر!

أنا أحترم قوي اللي يبقى واضح وصريح معايا كدة، يعني لو صاحبت واحدة وهي مش عايزة مني إلا مصلحتها أعزها قوي لو جت قالتلي كدة في وشي، لو واحد مبيفهمش حاجة في الأدب وقلتله يقولي رأيه في نص أنا كتبته وقال لي معلش أصل أنا حمار أدب ومليش فيه هقوم أبوس دماغه واطلبله سحلب كمان إنما تيجي الأخت مصر تقول لي أنا كويسة وبنت حلال وعندي ضمير ومش قاسية على ولادي والعيشة فل الفل وعشرة على عشرة لأ بقى معلش الحكاية مش طالبة أكتر من كدة يا ست المزمزيل، ده انا قفايا ورم من كتر اللي بيشوفه وبلاش كمان تقلبي لي وشك لما اقولك بأعلى صوت "هي بقت كدة يعني"؟؟

بصي يا طنط مصر، أنا دلوقتي بقيت كل ما أبص في المراية ألاقي بيضة! آه والله بيضة، حاجة كدة زي اعلان مولدي المستفز ده اما كان التحش ابو أصفر ده شايف الواد خفيف الدم عبارة عن بيضة كبيرة. البيضة بتلبس هدومها الصبح وتنزل من بيتها تصبح على كوم الزبالة اللي على أول شارعها وتقف تستنى الأتوبيس زي بقية البيض اللي واقفين على المحطة. ركزي معايا شوية ياحاجة والنبي في السؤال اللي جاي ده:

علل لما يلي:-

عندما اشترت الست مصر 100 بيضة وحطهم لها البقال في شنطة واحدة روحت الست واكتشفت ان الشنطة تحولت إلى عجة.

هو ده اللي بيحصل، الحكومة (عزز الله قدرها ورفع عنا بلائها هاي هيء) حولتنا كلنا في المرحلة الأولى لخطتها الخمسية (على طريقة أربعة اتنين أربعة) إلى مجموعة من البيض، قطعاً فيه مننا بيض بلدي وبيض من الكبير ده (معرفش اسمه ايه) وبيض بصفارين(مش عِلة واحدة دول اتنين) انما في النهاية الاحتمال الوحيد اللي اصبح متاح لينا كمصريين هو اننا نتحول لعجة وبالهنا والشفا.

أما المرحلة التانية من نفس الخطة الحكومية هو إننا لما نتحط في نفس ذات البوتقة مع بعض قوم إييييه؟ بدل ما نطأش في الحكومة اللي هي سبب بلوانا بقينا نطأش في بعض. يعني مثلا حضرتك تطلع الأتوبيس من هنا يقولك جنيه ونص التذكرة يا أستاذ، ترد وتقول له ياعم ما انا راكبه امبارح بجنيه وربع يقوم الراجل عشان حافظ الحوار ده يقولك وانا مال أهلي تروح انت قايل له "ياعالم ياولاد ال(تيييت) ياحرامية" أو تروح تقبض معاش حد فتكتشف انك بدل ما تاخد العلاوة اياها (حاول تمسك لسانك لو سمحت) تلاقي المعاش اللي بتقبضه مخصوم منه، تسأل الموظفين يقولولك واحنا مالنا تقوم ترد بنفس العبارة السابقة "ياعالم يا ولاد ال... إلخ إلخ"

المشكلة إن الفعل "طأش يطأش فهو أومليت" مش بس بينطبق على حاجات زي دي. ممكن تسأل دكتور الجامعة بتقبض كام حضرتك؟ أو تسأل حد بيحضر ماجستير او دكتوراة سعادتك بتصرف على رسالتك من أنهي زكيبة فلوس؟ أو ليه مبقاش عندنا مدرس بيشرح في الفصل؟ أو ازاي كل دول بيتخرجوا من الجامعة ونصهم دماغهم وقفت لحد اعدادي اساسا؟ ومنين تبقى خريج معاك تقدير محترم وتاخد كورسات بكام ألف جنيه وتيجي تشتغل تلاقي رئيسك معاه دبلون(مع الاعتذار للدبلون طبعا) وبيبهدل في أم اللي جابوا حضرتك؟يعني بأمارة إيه سعادتك عشان تشتغل وتجيب فلوس لازم يبقى معاك فلوس الأول عشان تشتغل؟؟!! بأمارة إيه تروح تحضر ماجيستير وانت عندك أمل إن حال ام الجامعة العقيمة بتاعتك ينصلح فتلاقي واحد زبالة بيتحكم فيك وبيطفشك كأنها عزبة أبوه؟ وليه تفتح الجرايد تدور على شغل - أي شغل هو حد لاقيه يعني- وانت خريج انجليزي زي حالاتي ووصلت للحضيض ومستعد توافق على شغلانة مدرس حتى فتلاقيهم كلهم كاتبين "مطلوب خريجين الجامعة الأمريكية او نيتف سبيكرز"؟! ليه أنا أقعد أسمع عن واحد على قلبه ملايين قد كدة من افلام الهلس والمسخرة وبيتعالج على نفقة الدولة و عيل تاني صغير ممعهوش حتى تمن غسيل كلوي بيعمله كل اسبوع يلف بيه اهله على اللي يسوى واللي ميسواش كأنهم بيشحتوا بيه؟ ليه بدل ما يعملوا حمامات نضيفة او يعملوا حمامات اصلا في الكلية راحت الجامعة دفعت كام وميت ألف على شاشة كل اللي بيتعرض عليها مانشيتات حكومة وصورة رئيس الجامعة المستفز و تسبيح بحمد السيد الرئيس والخالة أم علاء وجيرانها وقرايبها واللي يحبهم ميضربش نار؟؟!

لامؤاخذة ياخوانا الأومليت اتلسع مني شوية المرة دي، مبقيناش بنعمله بسمن زي الأول نظراً لاعتبار السمن رفاهية وكمية الزيت كانت روخرة شحيحة في الطاسة بما إن عقبال أملتكم القزازة بقت بتلاتاشر جنيه... أنا طبعاً عارفة إن الست مصر هتلجأ للحل الجذري وهتسلق البيض، بس ياريت والنبي ياحاجة تبقي تهدي النار ع البيض وهو بيتسلق عشان ميفرقعش!

9 comments:

mostafarayan said...

عزيزتي اميرة المملكة احب ان اخبرك ان البيض فرقع هو كمان .. والأخت مصر بتقول مافيش اكل ياولاد ......
سلاموز

- تحياتي لهذا البوست المعبر عن واقع كثير من الشباب انا منهم

إبـراهيم ... معـايــا said...

آآآه، وااضح إن نصائح الأخ محمد كمال آتت ثمارها .........

إزيك يا ملكة؟؟ هااا ، إزيـــك ؟؟
.
.
مش عاوز أقول لك كلام مكرر ومعاد، بس على فكرة إنتي أول حد عارف إن المشكلة فمش ف مصر، سيبك من القضية والممشكلة، والأبعاد الماورائية، بما إننا لسه راجعين من الجلسة إياها ، سؤالي إنتي كتبتي الكلام ده كلللله إزاي ، وبالحلاوة دي إزاي ؟؟؟
...............
يعني أفهم لما يتكتب نصد أدبي بإحساس يكون عالي، لكن حتى التهييس بقى بالعلو والعمق ده ؟؟؟ ده أكيد أمر محير ، وبعدين التدوينة مكتوبة بدماغ
.
.
تحياتي يا ملكة ....
سلام

om yassein said...

شوفي يا حبيبتي إحنا عايشين قي بلد لا تحترم لا إنسان و لا حتى حيوان يمكن تكون مبتحترمش إلا الفلوس و لا حتى البيض يرضى يعيش في ظروفنا دي غحنا مستحملين حاجات لا يمكن يستحملها إنس و جان و على رأي الأغنية (أهي ماشية و بتعدي صادمة في لطمة في قاطمة

M.R said...

خير ان شاء الله

و الني لو الاخت ال... مصر عدت ممكن تساليهالي: وديتهم فين؟.. علشان وحشوني جدا.

سلامي

Bella said...

جميلة جدا التدوينة

وكمان المدونة هايلة

ح اتمشى فيها براحتي بقى

انا احب التدوينات المتكلفة

مش عارفة احييكي ازاي على التدوينة الجميلة دي

المصيبة بقى ياحبيبتي لما العجة تتعمل ويكون فيها بيض ممشش

يعني مش كفاية اننا كلنا ح نبقى اومليت او عجة محروقة من انعدام السمنة وقلة الزيت

الكارثة بقى ان بيضة ممششة واحدة كفيلة بجعل العجة غير صالحة حتى لشمها

ههههههههههههههههههههههه

شوفي بقى كام بيضة ممششة موجودة في عجتنا

تديونة تحفة

ح اروح اشوف شغلي بقى واقرا بمزاج باقي المدونة

تحياتي وسعيدة جدا باكتشاف هذه المدونة الجميلة

مؤنس فرحان said...

بوست رائع

بلاش تظلمى مصر .. انتى قصدك مصر مين بالظبط ..؟؟
مصر الحكومة والنظام والشلة اللى حواليه ..؟؟
ولا مصر الشعب الغلبان اللى اتهرس اكتر من مرة من حكامه على مر السنين ..؟؟
ولا مصر الشعب اللى بيطلع الحكام دوول .. ماهم الحكام دوول موش مستوردين دوول مصريين بردو طالعين من نفس الشعب دا .. لكن ايه اللى حصل ..؟؟

أحييكي على البوست الجميل

ملكة said...

مصطفى ريان

مانا عارفة انه فرقع بس مش كله
كان عندي أمل يعني ننقذ اللي فاضل حتى لو كام بيضة
كام مواطن نطلع بيهم من غير عاهات أرحم من بلد كلها أومليت!
منور


إبراهيم

أنهي نصايح سعادتك؟

أيوة انا عارفة ان المشكلة مش في مصر
المشكلة في اللي ماسكين مصر ولا في اللي ممسوكين في مصر؟؟!
جربت اقعد اشتم الحكومة ولقيت الناس كمان عايزين يتشتموا
بأمارة "البيضة اللي بتصبح على كوم الزبالة اللي على أول شارعها"

وانت الصادق التدوينة دي مكتوبة بغل
وبخنقة
وبحرقة دم بعيد عنك
ولا بعيد ليه؟
هو انت مش بيضة زينا ولا ايه؟اقصد مصري زينا يعني
منور


أم ياسين

تصدقي؟
انا برضو بقول كدة
مشكلتنا اننا شعب بيستحمل لحد الآآآآآآخر
لو مكناش بنستحمل كدة كان زماننا أحسن من كدة بكتير
منوراني واهلا بيكي


مصطفى

مليش دعوة
اللي عايز يطلب حاجة من حد يروح يقول له
وبعدين يا سيدي المواطن
"مصر بتتقدم بينا"
يعني لو انت مش هتتكلم
مين هيتقدم بدالها؟
هتبوظ لنا الجوازة ياعم الحاج
منور وقول لي عملت ايه في الامتحان


بيلا

مخدتش بالي منها دي
عشان اكيد اكيد هيكون فيه بيض ممشش
بس عارفة؟
عادي بقى
ماذا يضير الشاه أصلا
منورة ومتغيبيش عن المدونة كتير


مؤنس

كلهم يا مؤنس بيعملوا نفس النتيجة في الآخر
الحكام والشلة اللي عايزين الحرق
واحنا عشان سايبينهم يحرقوا فينا
منور ومتغيبش كتير عن المدونة

أفندينا said...

مدونة جميلة
حلف براحتي هنا شويتين
وبعد كده لينا كلام تاني
لكن الأول على سيرة البيض والعجه
عجبتني جداٌ فكرة أن الحكومه عايزانا نطقش في بعض علشان نبعد عنها
... ههههه
لكن وغلاوتك وراها وراها حتى لو أتحرقنا في الفرن
راجع تاني هنا بإذن الله

.:.-=- ELGaZaLy-=-.:. said...

الأخت مصر تقول لي أنا كويسة وبنت حلال وعندي ضمير ومش قاسية على ولادي والعيشة فل الفل وعشرة على عشرة لأ بقى معلش الحكاية مش طالبة أكتر من كدة يا ست المزمزيل، ده انا قفايا ورم من كتر اللي بيشوفه وبلاش كمان تقلبي لي وشك لما اقولك بأعلى صوت "هي بقت كدة يعني"؟؟
-----------------------

يا سيدتى ليست سيكولوجية الاوملت فحسب هى ما تحكمت فقد تداخلت جنبا الى جنب...مع الكوسة الباشامل واشياء اخرى

المشكلة ان الخنقة واضحة اوى فى المقال يعنى لولا الملاة كنت شتمتى الشعب واحد واحد

امشكلة مش فى الشعب تماما ولا فى الحكم ولا فى الناس الى بتحك

لا المشكلة فى سيكولوجية الذل الى بتحكمنا والى مش عايزيزن نتخلص منها اصلا

والشعب دة مش عايز يبطل ادمان ذل...الشعب دة عايز حد يحررة ويعملة كل حاجة وهو يقول الله والله الراجل دة بيقول كلام زى الفل

سيدتى عن سيكولوجية البطاطس بالصلصة نتحدث...