Thursday, September 27, 2007

سبتمبر بتاعي ... بالعافية

بما إني النهاردة بقيت 20 سنة ("هييييييييه" احم) وبما إني معرفش الواحد بيعمل ايه اما بيتم 20 سنة (متمتهمش قبل كدة كما هو واضح يعني) فكل سنة وإنتي طيبة يا أحلى ملوكة في الدنيا وعقبال كدة اما السنة الجاية تكوني متخرجة بامتياز ومتستتة في بيتك وعندك رواية مكسرة الدنيا في المكتبات و مع الباعة :)

وبهذه المناسبة أحب اقولك إني فرحانة لك عشان دي كانت أحلى سنة في حياتك وإني مزأططة لك برضو عشان دي أول مرة تكوني فرحانة بكونك "ملكة" بجد، بكل عقدها وكلاكيعها وجنانها وشقاوتها وفرحتها وكل حاجة فيها. امممم فيه ايه تاني يابت ياملوكة؟

بفكر كمان إني أشتريلك تورتة نصها شوكلاتة ونصها كريمة،واجيبلك رواية ماركيز هدية وأشتريلك عشرين شمعة ملونين وأخليكي تتمني أمنية لكل واحدة فيهم بس ياريت متتعوديش على كدة عشان الميزانية متخرمش مننا لآخر السنة!

أخيراً هقدر أصحى بكرة الصبح وأغني بعلو صوتي "امبااااااااااااااااارح كان عمري عشرين تررم ترررم"!!

أيوة صحيح قبل ما أنسى... و من هذا المنبر اللي مليان بلالين وتورتات وحاجات حلوة وكدة يعني احب أقول للبت هبهوبة والبت مهموهتي ربنا يخليكم ليا يااااااارب وميحرمنيش منكم اطلاقا مطلقا.

33 comments:

Anonymous said...

كل سنة و أنتى طيبة يا غالية
:)
عشرين سنة يا بت مرة واحدة
البت سمر هاتحصلك كمان شهرين
بتكبروا يا عياااااال
...
كل سنة و أنتى بخير ..و السنة الجاية أشوفك ..كده بقى
و بقولك إية
جيبى تورتة فور سيزون أحسن
هاتعجبك ..ياسلام بقى لو من لابوار
يا جمااااااااله
...
كل سنة و أنتى ملكة ..و أحلى و أحلى

Ensan said...

كل سنة , وعقبال سبتمبر اللى جاى و بس ياريت مايجيش بسرعة علشان تتمتعى بسن العشرين
وسمعنى اغنية امبارح كان عمرى عشرين :)
عقبال 100 سنة , وعاوزين عزومة كدع بعد الفطار

إيما said...

كل سنة و وانتي طيبة يا ملوكة
:)
كل سنة وانتي بالف خير يا جميلة ويا رب تكون سنة سعيدة عليكي وتحققي كل اللي بتحلمي بيه
عقبال 100 سنة يا أحلي ملكة في الدنيا
:)

إيمان الميهي said...

كل سنة و انتي أجمل و أحلى و أنضج
و موهبتك تنمو و تكبر و توصلي الخير اللي ف قلبك لكل الناس

و دي بقى هدية فظيعة شنيعة مريعة ف الرابط ده ليكي و بسسسسسس


http://www.basketsbyrita.com/images/Valentine_love_basket.jpg

إيمان الميهي said...
This comment has been removed by the author.
Anonymous said...

يمكن تطلع هنا لو دوستي على اسمي

Anonymous said...

كل سنةوانتي طيبة.. شادي

Anonymous said...

ياختشي خلتيني حسيت انى بقيت عجوزة ايييييييييه دنيا كل سنة وانتى طيبة يااحلي ملكة في الدنيا وبالمناسبة انا هاخد تورتة من النص اللي بالشيكولاته.

jaleo

Anonymous said...

هــــــــــانت

كلها 10 سنين ويتوقف الزمن بالنسبة ليكي باعتبارك امرأة .. انتي عارفة أن الستات لا تتجاوز ال 29 أبدا

و بما أني مابعرفش أشارك في المناسبات والحاجات داهيات وكداهوات .. فلنكتفي بال كل سنة وانتي طيبة الشهيرة

و اسمعي كلام صاحبتك وهاتي التورتة من الوابور اللي بتقولك عليه ده .. هو انا ماعرفش ايه ده .. بس انتي عارفة أنه أكيد يعني .... ولاد حلال يعني

بس عندي اقتراح .. بدل أغاني سنة حيييييلوة يا جميل .. الخ الخ .. أقترح عليكم أغنية .. العجل هد المصطبة .. من فيلم اللي بالي بالك الشهير

بايني نكتفي بهذا القدر من الرغي بقى وأفلسع

محمد مصطفى said...

هههههههههههههههه
ما بيعملوش حاجة لما يتموا عشرين سنة
كل سنة و انتي طيبة يا ملكة
و عقبال ما تتمي سن الرشد
هههههه

إبـراهيم ... said...

الله عليكي يا مَلَكــةَ ....
.
.
.
اسمحي لي أنا كمان أهني (ملوكتك)، أولا: بإنها ملكـة .. بكل ما عرفته عنها .. من ... ممممممممممممم ، و ..... ، و ....... ... ، وثانيًا بإني أعرفها أصلاً ...

وكل عشرين سنـة و إنتي أحلى ، بس بيني وبينك كده ، المره الجاية ابقي فكريني :) ، لأن ذاكرتي مش فوتوغرافية للدرجة :)

تحيااااااااااتي

حدوته مصرية said...

كل سنة وانتى طيبة ياملكة و عقبال كل سنة ما تبقى اسعد من اللى قبلها كده وتحققى كل اللى تتمنيه

Mohamed Kamal Hassan said...

كل سنة وانتى طيبة يا ملكة
بقى كده اسافر والبنت عمرها 19

ارجع ألاقيها 20

ده اسم كلام

وش ياهو وعلامة استغراب ودهشة

عقبال الجاى يا بنوتة

Unknown said...

مهموهتي العزيزة

وانتي طيبة وبالف خير
عشرين بحالهم تحسي ان الواحد مش متعود عليها، لسة متعودة على ال"تاشر" اللي في الاخر:)
بكرة تكبري وتحصلينا يااختي مستعجلة على ايه؟
تورتة فورسيزون؟
ساعات بقعد اتسائل والله هي البت دي متعرفنيش لحد دوقتي ولا ايه؟
ياماما هما حتتين جاتوه وقزازة حاجة ساقعة وكان الله بالسر عليم على كدة:D

ميحرمنيش منك يابنوتة انتي ربنا يخليكي ليا:)

Unknown said...

إنسان

وانت طيب ميرسي جدا ليك
انا مش عايزاه يعدي بسرعة خاصة اما اكون فعلا مستمتعة بالمرحلة اللي بعيشها دوقتي
ممكن لو فكر يعدي بسرعة أكعبله:D

عزومة بعد الفطار؟
مائدة فتحي سرور جامدة جدا ايه رأيك؟
ولا أقولك بلاش نضيع صيامنا وناكل من حاجة مشكوك فيها

منور يافندم وتسلم على الرد الحلو ده

محمد العدوي said...

كل عشرين سنة وانت طيبة ..


:)

Unknown said...

إيما

وانتي طيبة وبألف خير يا ايمايتي
يعني عيد ميلاد في دار ليلى وهنا بجد ميرسي كتيييير ليكي مش عارفة أقولك إيه والله

نورتيني هنا وهناك:)

Unknown said...

إيمي التانية

كل سنة وانتي صاحبتي وكل سنة وانتي كمان أطيب من اللي قبلها:)
الهدية وصلت وبجد عجبتني جدا ربنا يخليكي يا ايمي ميرسي كتير جدا اوي خالص يعني:)

منورة دايما

Unknown said...

شادي

وانت طيب بس الزيارة السريعة دي متنفعش كدة
وبهذه المناسبة متأسفة جدا عشان لقاء القصة اياه بس النت الله ... بقى

منور يافندم وتسلم على الرد

Unknown said...

هبهوبتي

كبيرة؟
ليه ياماما العقد دي؟
خليكي ماسكة في 18 سنة بإيدك وسنانك وانتي تفضلي صغيرة لآخر العمر:)
انتي تؤمري يابنتي خدي التورتة كلها لو عايزة بس ابقى قوليلي كانت حلوة ولا لأ:)

مشكرة كتييير ع الرد والزيارة ياهبة

Unknown said...

مهابووف

ياعم "رفعت" ابوس ايديك حاول تلون الصورة حبتين
يعني واحدة داخلة تحتفل بعيد ميلادها العشرين تقوم تفكرها بمأساة التلاتين
عموما انا اما اكون 30 سنة هبقى اعلق يافطة على ضهري واقول انا 30 سنة اه فيها ايه يعني ولامؤاخذة؟؟


هما ولاد حلال آه حتى بيسلموا عليك وبيرشحوا لك مسلسل"رصيف نمرة 5" العينيف اياه:D

بتجيب الاغاني ال"راقية" دي منين يامهاب؟

مشكرين يافندم على الرد والزيارة والفلسعة برضو وماله

Unknown said...

مادو

ياراجل؟
امال كانوا بيتموهم ليه اساسا؟؟
وانت طيب وبخير يافندم
وعقبال ما اتم سن الرشد وسن الفيل كمان وماله:D

منور دايما

Unknown said...

إبراهيم

الله يكرمك التهنئة وصلتها وفوقيها باكو لبان
أفكرك بإيه؟
بأن عشرين كمان عدوا ولا بأن ذاكرتك مش "فوتوغرافية" :D
منور كتييير وميرسي ليك أكتر

Unknown said...

محمد ياسر

وانت طيب وبألف خير يامحمد
ربنا يسمع منك:)

ميرسي كتييير ليك ونورتني

Unknown said...

محمد كمال

ياسبحان الله انا برضو إذ فجأتن صحيت من النوم لقيتني بقيت 20!!

ايه بقى سنة الحياة(وش عواجيزي)

ميرسي يامحمد ومنورني دايما

Anonymous said...

تصدقي بقى إنها هزلت!
آه طبعا هزلت بالثلث!
يعني هو أي حد كده يبقى من مواليد سبتمبر ولا إيه؟
وكمان كبرتي وبقيتي 20 سنة؟
هممم.. طيب.. عقبى للواحد وعشرين .. ودي أهم طبعا..
كل سنة وانتي طيبة.. بس حقي محفوفي الجاتوهات والذي منه، وإلا هاحقد عليكي، تلاقي نفسك ثبتتي على 20 سنة ومش هاتكبري تاني!
تصبحي على خير!

Coca said...

كل سنه وانتي طيبه

عطشان said...

كل سنة و أنتى طيبة ( f )
خلاص كبرتى يا ستى و محدش حيقولك تانى انتى صغيره .... يا بختك :p

و بما أن انا واد جيبى كبير فأنا حعزمك على كباية عصير قصب زى ما قولتيلى من الراجل المعفن اللى بعد الكربيجى و انتى بمناسبة عيد ميلادك تجيبلى بيتزا من عند المهندسين او اى عصير من عند تفاحة :d

admelmasry said...

كل سنه وانتي طيبة

Masry said...

ايه دة بقي .. جيه عليااليوم اللي اكون فيه المعلق رقم 30 .. علي فكرة فرحتك فرحتني جدا جدا بس يعني متنسينش في التورتاية دي :)
هعمل بقي اني مكنتش هنا يوميها و اقولك كل سنة و انتي طيبة تاني و مرتين :) مرة بمناسبةعيد ميلادك و مرة بمناسبة اعياد النصر :)))

مَلَكة said...

دافنشي

نععععم؟
وانا اي حد يعني ياعم الفنان ولا ايه؟
هو انا اقل من سبتمبر ولا اقل منه يعني؟ها؟ها؟
خلاص انا قلت بتاعي يعني بتاعي والملكية واليافطة اتمسمروا عليه واللي كان كان
اللي عايز قدامه 11 شهر غيره محبكش في ده ولامؤاخذة
احم
ومش هنختلف ممكن اسيبلك فيه اول اسبوعين عشان الجيرة والعشرة بس:D

هو صحيح الناس اما بيبقى عندهم 21 بيعملوا ايييه؟
بيفرحوا ويزأططوا ولا بيقولوا يادي الغم؟؟
هنشوف
المهم الجاتوه انا حافظهولك عندي في الأمانات متقلقش
مشكرة كتيييير ومتنساش تغسل سنانك قبل ما تنام عشان التسويس:D

مَلَكة said...

coca

ميرسي كتير وانت طيب وبخير:)



عطشان

وانت طيب بس مين قال إنهم بطلوا يقولولي انتي صغيرة؟؟
انا شخصيا لسة شايفاني كدة ومبحبش حد يعاملني على اني كبيرة الا بمزاجي يعني

ومش لاقي غير الراجل ده؟ يعععع
طب انا هرضى بكوباية شاي حتة بس بلاش عصير من ده
والبيتزا خليها اتنين ونشوف حد تالت يحاسب عليها:))

منورر كتير

مَلَكة said...

آدم

وانت طيب وبألف خير
شكراً ع التهنئة الحلوة دي:)


آخر

شفت المتأخر بقى بنقعده في الدكة الأخيرة ازاي؟ المرة الجاية هتتاخد غياب:))

ميرسي أوي أوي عشان فرحان لي كدة بجد
و وانت طيب مرتين مرة عشان أخيرا جت عبرت المدونة ومرة عشان اعياد النصر برضو:))