Friday, July 13, 2007

فُقد ذات لحظة

عمرك حسيت بالتوهة؟

التوهة غير التوهان

احساسك إنك .. فاضي من جواك

خواء ذاتي وفراغ ملوش حدود

لأنك بتكون وقتها فاقد كل حواسك

فاقد كل اتجاهاتك و رؤيتك

اللي ممكن تدلك ع الطريق

الاتجاهات ضاعت أو مشوشة قدامك

وكأنك تهت لما حد كبير قرر يسيب ايدك

فجأة وسط الزحمة

تخيل كأنك واقف بين مليون واحد

وانت بس اللي مش عارف تمشي ازاي؟

مش عارف تروح فين وليه؟

مينفعش تسأل حد من اللي واقفين

عشان محدش فيهم هيقدر أبداً

يديلك الحاجات اللي انت فقدتها مرة واحدة دي

محدش فيهم هيقدر يحسسك بالأمان

أو هيقدر يخليك تثق في ارشاداته

كل اللي انت بتتمناه في الوقت ده

إنك تلاقي الإيد

اللي انت كنت ماسكها من شوية

الإيد اللي ضاعت منك

أو اللي انت ضعت منها

لأول مرة تتوه جواك

وانت لسة واقف في مكانك !

17 comments:

shady said...

أجمل حاجة قريتهالك يا ملكة .. لدرجة اني سعيد إني أول رد

عاوزين نشوفك يا بنتي .. فينك ؟

Masry said...

اه حسيت بالتوهة و لسة حاسس .. و موقفتش مكاني و مش عارف اقف مكاني و عمال اجرب و اجرب بل مش علشان فاضي من جوة لا .. علشان مليان جدا لدرجة اني ممكن امشي في 100 اتجاه و مش عارف امشي فيين .. دي مش حيرة لا بس توهة لاني مش عارف اي حاجة عن اي اتجاه
و مش بدور علي الايد اللي سابتني .. انا بدور علي ايد انا سبتها

Masry said...

ملكة متكتبيش حاجة جديدة بقي الا لما ياسمين تيجي تقولك انتي مبتنشريش ليه و تطول لسانها :)
ادينا مستنينها :)

Masry said...
This comment has been removed by the author.
Yasmine Adel Fouad said...

اللهم طولك يا روح
محمد بيه
انت مالك اصلا بيا
بأقول ايه و ما اقولش ايه
كنت لسانى انت يعنى
انا داخلة كافيه خيرى شرى
الاقى لسه الناس بتجيب فى سيرتى

سمعتى يا جدعان

Yasmine Adel Fouad said...

ملكة

بالنسبة لى المشكلة الأكبر لما تختارى الطريق اللى تمشيه و تلاقيه حد بيشدك من شعرك علشان يجيبك وراء و يقولك لا
ممنوع
فتقوليله فى ناس مشيت قبلى اهى
فيقولك هى كده

_________________

غمضى عينك
خدى نفس
و ركزى أوى
هتشوفى

نا تخافيش
مدى ايدك
ده الطريق زحام

Masry said...

ياسمين هانم :)
متأخرتيش الحقيقة .. كويس كدة ملكة تقدر تكتب اكتر و اسرع :)
و بعدين تتحسدي المرة دي سيبتي ملكة في حالها و لا وجودي خفف اللي كنتي هتقوليهولها :)
و بعدين متقلقيش محدش يقدر يجيب في سيرتك الا بكل خير .. ولا ايه
انتي تشكي اني ممكن اعمل غير كدة

مَلَكة said...

شادي

ربنا يخليك يا فندم
بس حاول تحافظ على مكانك في أول رد بقى:)

موجودة أهو، موجودة ومتواجدة جداً

تحياتي ونورت يا دكتور

مَلَكة said...

آخر

ده إنت حكايتك حكاية!!
تفتكر المشكلة إنك مش عارف تقف في مكانك ولا إنك مش لاقي مكانك جواك أصلاً؟

سبتها ليه؟؟
سؤال متطفل بس واجب يتسأل

وبعدين ما تبطل تجر شكل البنت بقى
هي عملت حاجة ولا جت قالت حاجة؟
الحق عليها إنها بتشجعني يعني؟
بس هي بتشجعني بطريقتها بس مش أكتر:D

مَلَكة said...

ياسمين

هو إيه أصله ده؟
إنتوا هتتخانقوا زي العيال الصغننيين ولا إيه؟
ما تقلقيش يا أوختشي سمعتك في الحفظ والصون
محمد كان بس بيرمي السلام بتاعه
برضو بطريقته الخاصة:D

نيجي لردك بقى

أنا فاهمة المشكلة إيه
بس كمان مبحبش جملة"الظروف والناس" مهما كانت واقعية
بس فيه حاجات أما بتتاخد مننا أو تختفي مرة واحدة لأي سبب
بنحس إننا بجد ضايعين ولو مؤقتاً
ساعتها كل الزحام بيبقى ملوش لازمة
المهم اللي ضاع

نورتي يا ياسو

مَلَكة said...

آخر كمان مرة

المرة الجاية هحرمكوا انتوا الاتنين من المصروف:D

altwati said...

اعتقادي بأن اليد التي فقدتها هي أقدر الأيدي على إنقاذي من ضياع أكيد وسط
المليون شخص
أظنه يتواءم
مع مرحلتك العمرية التي لا أشكك فيها مطلقا
لكنها تكون مهتمة بالخوف من التغيير
وفقدان الاشياء
تحياتي

شقاوة شعب said...

ساعتها يا ملكة تدى نسك فرصة للبكاء
هيطلع كل شحنات الفراغ اللى جواكى
وهيطلع شحنات الاحاسيس السلبية اللى جاتلك بسبب اللى اتخلوا عنك
وبعدها تقومى تقفى على رجلك وتقولى مش ممكن اسمح لحد يوقف حياتى

Unknown said...

يخرب بيت بلاغتك!
هو ده بالضبط.. كلامك بيوجع!
هو فيه فرق بسيط..
تايه وفيه مليون طريق.. عايز أمشي فيهم كلهم!!
بس برضه مستني الإيد دي...

على فكرة (عشان كسلت أرد هناك): اتعودتي على وجودي هنا؟
ده حاجة تسعدني طبعا.. أنا كمان اتعودت على المدونة دي بجد..

كنت ميت على سبيل التجديد وجيت تاني..
حمدا لله على سلامتي!

مَلَكة said...

altwati

موافقة على رأيك
وإن كنت شايفة إن دي تقريباً مخاوفنا في كل عمر
هيفضل الخوف من الفقدان أو الفراق هو أعظم فوبيا لكل البشر مهما اختلفت أعمارهم

شكرا للمرور والرد وكل التحية:)

مَلَكة said...

شقاوة شعب

وده بالظبط اللي حصل وقتها
معرفتش أعمل حاجة غير إني أبكي
كان قرار بأني استسلمت وعايزة حد ياخدني للايد اللي اختفت مرة واحدة دي يوديني ليها
وفعلا
البكا بيقوي مش بيضعف

تحياتي

مَلَكة said...

دافنشي

مرحباً بالبعث:)


كلامك فكرني بقصيدة للشاعر
Robert Frost
اسمها
The Road Not Taken
انما ماعلينا

أعتقد إن التوهة جوة الزحمة أصعب كتير من التوهة في صحرا لوحدك
ف الصحرا سهل تلاقي طريق واحد
إنما وسط الزحمة
زي ما انت قلت بالظبط
فيه مليييون طريق!

مرحبا بك في كل وقت
واعتبر المدونة مدونتك كمان:)