Sunday, May 13, 2007

في الأوضة الضلمة

مسمار ع الحيطة
متعلق عليه حلمي
من غير شماعة
قبل ما أنام
أتأكد إن الحلم مكانه
وإن تراب الشارع
لسة ما طالهوش

18 comments:

إبـراهيم ... said...

حلووووووة قووووي ، قووووي يا مـلكـة


.............
.
.
حقيقي تُـحـفـة ... تسلم إيـدك :)

مش بقول لك بقيتي محتـرفة
صباااااااح الورد :)

فتاة عشوائية said...

جميل أوى إحساسك الطفولى اللى بيحمل فى طياته حزن وخايف من الكئابة

.:.-=- ELGaZaLy-=-.:. said...

جميل وبسيط ومعبر اوى يا ملكة بحد

إبراهيم السيد said...

الله ، بتفق مع ابراهيم تماما

بجد حلوة أوي
ابراهيم السيد

سيدوفسكي said...

سالخير يا ملكة

جميل الكلمات القصيرة دي .. هو معروف طبيعي أني فاشل تماما في كتابة حاجات زي دي .. وفاشل في فهمها .. بس دي فعلا جميلة .. وكتير محسوسة

و زي ما قال/قالت لوليتا .. الكلام يحمل احساس طفولي حزين .. وفيه شوية براءة كداهو

نفسي أتعلم أكتب الحاجات دي يا خوانااااااااااا .. عاااااااااااااااااااا

العواف بقى المفترض أقوم أذاكر .. بس انتي عارفة كويس قاعدة المفروض

سلام الآن

YOTTA said...

ماشى
حلو الكلام
بس ياريت بأه تتأكدى ان البيبان والشبابيك مقفولين كويس
كويس أوى
عشان الجو كله تراب اليومين دووول

واخده لى بالك انتى!!!!!!!

محمد مصطفى said...

نص راق ٍ جدا ً يا ملكة
دمت مبدعة

مَلَكة said...

ابراهيم

الله يكرمك يا فندم مش بقولك دايما رافع روحي المعنوية كدة؟

بس موصلتش لدرجة الاحتراف طبعا
وسعت منك دي شوية:)

وأخيراً
صوباع الخير

مَلَكة said...

لولي

عارفة يا علا الواحد بيبقى حاسس إنه بيلصم فرحته ويحاول يحطها في علبة قطيفة ويحافظ عليها اطول وقت ممكن علشان متضيعش منه ويكتئب
محاولااات

تسلمي يا قمر نورتيني

مَلَكة said...

الغزالي

اولا متغيبش كتير عن المدونة كدة يافندم
بعد كدة يوم التأخير هيبقى بربع جنيه:D

متشكرة ليك جدا جدا
تحياتي

مَلَكة said...

إبراهيم السيد

بفرح جدا لما بشوف ردودك هنا
خاصة لما تكون حاجة كتبتها وعجبتك
تسلم الايادي يافندم وتحياتي الدائمة ليك

مَلَكة said...

الرفيق مهاب

الشربات وصلك منه كوباية يامهاب بيه؟
شربات ايه؟
شربات رجوعك ترد على المدونات وتكتب تدوينات وهكذا إذن اليس كذلك يعني:)

بس متقولش فاشل بس
متخليش بتوع التنمية البشرية يضربونا:D

سعيدة ان النص اللي ملوش ملامح ده عجبك يارفيق
بس تفتكر لسة فيه شوية براءة فعلا؟؟

بس حلوة تتعلم دي
قال يتعلم قال
يابني دي بتيجي كدة
هفوة يعني بالصدف:D
بس انا مستعدة اديك درس فيهم
وكما قال خالد الذكر ميكيافيللي
الدفع مقدما

وطبعا طبعا يعني
نظرية المفروض دي هتفضل سارية المفعول لحد قبل الامتحان بيومين
سالخييييييييير

نورت يا سيودفسكي

مَلَكة said...

يوتتي

انتي بتقولي فيها؟؟
ده باين التراب لازم ييجي قبل معاده وغزم عننا
السؤال بقى
كام مرة هنقدر ننفض التراب من ع الحلم المتعلق ع الشماعة؟

لنا الله ونورتي يا زميلة النضال

مَلَكة said...

مادو

يسعدني جدا رأيك ده يا محمد
متشكرة ليك بجد على اهتمامك وردك الحلو ده

تحياتي ليك دايما

بتاع الجاز said...

بس خلاص كده!!!!!!!!.يعنى انا قاعد مستنى التحميل بتاع النت وانا صاحب مرض عشلن اقرا الكلمتين دول!!!.عالعموم كلمتين ابرك من عشره

kafrawy said...

ممكن يهرب من الباب..........؟

مَلَكة said...

صابر ومعاه راضي

مهو عشان فيه حاجات مبتجيش بالسااااهل :)

قولي انت بس شركة الدي اس ال بتاعتكم ايه وانا ابلغ عنها انها بتعطل زباينها

نورتني ويارب متكونش اخر زيارة :)

مَلَكة said...

كفراوي

مش هسيبه يهرب من الباب
هعمل بنصيحة شاعرنا الجميل أحمد الحضري
لما قال
اقفل عليك الحلم

تحياتي ليك:)