مواضع الاتهام كثيرة، متعددة، مختلفة (لضمان عدم الملل)، تدعو للاستنكار أحيانا، وتدعو للاعتراض (بطريقة قبيحة أحيانا برضو)..
في لحظة ما، ستكتشف الحقيقة الكبرى.. عزيزي البني آدم.. يمكن لأي شخص، يحبك أو يكرهك، يعرفك أو يجهلك، أن يتهمك بأي شيء، يعاقبك على شيء فعلته، ويعاقبك (في نفس ذات الوقت) على شيء لم تفعله..وخد عندك
.
أنت متهم بالكآبة دائما، ما لم تصل الابتسامة لأذنيك 24 ساعة في اليوم
ومتهم بالمياعة لو فضلت نفس الابتسامة على وشك 24 ساعة في اليوم
ومتهم بالتجهم لو احتفظت بوشك عادي (ابتسامة الخط المستقيم إياها)
.
لو قلت بعض إسرارك.. أنت جردل وبتدلدق في أي حتة
لو احتفظت بها..فأنت غامض وإتم "آخر حاجة"
لو لم يكن لديك أسرار من أصله.. إيه يا عم الفراغ اللي أنت فيه ده؟!
.
لو تعرضت للتحرش –كبنت طبعا- فاللبس هو السبب
لو اتكلمت.. عينها بجحة وهي اللي تستاهل
لو ماتكلمتش.. ماهي مبسوطة باللي بيحصل
لو نزلت من الأتوبيس.. هيتحرش بيها حد تاني في الأتوبيس اللي بعده!
.
لو موافق الحكومة.. إنت منافق وعميل
لو كرهت الحكومة..معارض ومش عاجبك حاجة
لو وقفت ع الحياد..اصلك تافه ومالكش مبدأ
لو ماهتميتش اصلا.. تبقى من الغوغااااء!
.
ولهذا..قررت بكل بساطة، أن أهدي العالم خلاصة حكمتي وتجاربي... عزيزي البني آدم..توقف عن تقديم المبررات و الدفاعات أمام كل الاتهامات الموجهة إليك، وارفع حاجبك الأيسر وأنت تقول من كل قلبك "ياكش تولع" !
7 comments:
ياصباح الولعة
ولكم باك صديقتي ملكة
هذا هو النفس اللي كنت مفتقداه من مدة
أنا ايضا احاول أن اقولها
في ظل الظروف المولعة اصلا اللي انا عايشاه بس مش عارفة
على رأي المثل "اتفها لفوق تنزل في عبي"
وصباحك ,,, شوية حاجات حلوة
من غير ولعة
الناس عمرها ما هترضى عن حد
و عشان كدة الواحد لازم يعمل الصح بغض النظر عن رأي الناس
ياااه
بتتكلمي بلساني، لحد أول الأسبوع ده كان شعاري على الفيس بوك (اياكش تولع)!
وبضم صوتي لصوت سيادتك وبزود إن اللي مش عاجبه يخبط دماغه في الحيطة.
انتي صح جدا .. وانا أضم صوتي لصوتك وما اقولش أي حاجة :D
بلاش مبالغة بس
هدهود
حلو جدا المثل ده
اول مرة اسمعه بس مفتكس للغاية :)
صباحك زي الفل
وينر
من ناحية الناس عمرها مابترضى.. عندك حق
بس من ناحية اعمل الصح.. دي فيها كلام كتييير
رنا
مش بقولك هنبقى اصحاب؟ :)
يوني
منورة :)
مجهول
انا مش ببالغ خااااالص
وبالمناسبة
مش هقتلك لو كتبت اسمك يعني :)
Post a Comment