أنا أرغي .. إذن أنا موجودة

تاج متخفي في صورة عشرميت تاج اتمرر لي بوساطة الإنسان والروائي الجميل محمد كمال حسن

يارب إجاباتي متندرجش تحت بند "السمن البلدي" والحاجات التقيلة دي نبدأ بقى:ـ

أول حاجة حساب لدرجة إدماني للتدوين ودي الحمد لله طلعت 55% يعني لسة فيه أمل إن ربنا يتوب عليا من التدوين وأعتزل في قمة مجدي وآدي شهادة الإدمان موقعة من اتنين مدونين وختم البلوجر عليها

55%

ـــــــــــــــــــــــــــــــــــــــــــــــــــــــــــــــــــ

التاج التاني ياااا مسهل:

ـ مين أكتر 6 أشخاص بتحبهم؟

طيب هما أكيد أمي وأبويا آدي أول اتنين

ناخد التالت للنص التاني اللي في حياتي:)

والرابع والخامس والسادس موزع على أصحابي المقربين للغاية وهما أكيد عارفين نفسهم

ـ هل أنت سعيد؟

آه الحمد لله حالياً سعيدة بدرجة فزيعة فزيعة يعني(اللهم لا حسد) يارب أفضل كدة على طول بقى

ـ لو اجتمعت مع حسني مبارك في مكان واحد هتعمل إيه؟

عندي احساس إن حد من إخوانا الأمامير بتوع لاظوغلي هو اللي ورا السؤال ده بس عموما هقوله اللي بيتقال له كل يوم "حسبي الله ونعم الوكيل"

ـ بتحب مصر؟

مصر كمعنى مجرد وأماكن ليا فيها ذكريات آه بحبها غير كدة لأ

ـ إنت مسلم؟

ايون الحمد لله، مع اضافة (ة) عشان مراعاة المؤنث اللي هي أنا يعني

ـ ليه؟

زمان كان لمجرد إن أبويا وأمي مسلمين إنما اما كبرت ودورت وفهمت لقيت إني مش عايزة أكون غير مسلمة،ببساطة كدة

ـ مين أكتر شخصية متقدرش تستغنى عنها؟

أول 3 في الكشف الأولاني :)

ـ أكتر موقف محرج؟

اللي جاي في دماغي دوقتي موقف حصل لي في سنة أولى كلية كنت مخنوقة من دكتورة عندنا بشكل بشع يعني وواقفة على باب القسم مع شوية بنات بقطع في فروتها بصوت عالي وبغل واضح وبعدين اكتشفت انها -كالعادة- احم واقفة ورايا، أكيد هي كانت حطاني السنة كلها في دماغها بسبب الموضوع ده يلا بقى اهي راحت وراحت ايامها الله لا يعودها بتاتا

ـ الأمنية التي تتمنى تحقيقها؟

ممكن أقتبس من الرائعة برايد جملتها الشهيرة وأقول "عايزة أتجوز"!!

ــــــــــــــــــــــــــــــــــــــــــــــــــــــــــــــــــــــــــ

التاج التالت والأخير هييييييه

ـ اسم مدونتك؟

مملكة واحدة من الشعب

ـ لماذا اخترته وماهي نيتك من وراء اختياره؟

هو أنا هفجر ال"قلل المتحدة" ولا إيه؟؟

كل الموضوع إني حسيت إن لكل واحد فينا ركن بيعتبره مملكته الخاصة،ركن صغير أو كبير ، حلو أو وحش مش مهم إنما ده اللي بنحس فيه بالأمان عشان بتاعنا احنا وبما إني مجرد واحدة من الشعب فمملكتي هي المكان اللي بكون فيه على طبيعتي وبمارس فيه هوايتي/ حياتي المفضلة : الكتابة، بمارس فيه طقوس الرغي المحببة إلى، وطقوس الرثاء لو فيه اكتئاب وهكذا

ـ هل فكرت في اغلاق مدونتك؟ والسبب؟

أينعم فكرت أكتر من مرة في بداياتها عشان كتير كنت بحس إني بكتب حاجات ملهاش لازمة ومتستحقش تتقري وهراء من ذات القبيل إنما دوقتي الوضع اتغير تماماً للنقيض

ـ صورتك في المدونة رمزيتها؟

لفترة طويلة كانت صورتي بنوتة صغنيينة ماسكة وردة زرقا لأني بعشق اللون الأزرق دوقتي غيرتها بصورة بنوتة برضو واقفة ادام البحر بتحلم في مشهد غامض، معرفش ليه الصورة دي كل ما اشوفها بتفكرني بفيلم روائي قصير رائع اسمه "بروفة البحر" للمخرج محمد كامل، بالمناسبة حد يعرف الفيلم ده؟؟

ـ لماذا دخلت عالم التدوين من الأساس؟

دخلته بسبب تعليق عند سلمى وكملت تدوين هنا لأني كنت في حاجة إلى مدونة ماتجيبش ليا الشلل زي الاسبيس اللي كنت بكتب فيه قبل كدة

ـ أحلى جملة قيلت لك في وصف مدونتك؟

إيمان الميهي دايما بتقول إنها بتستريح لما بتيجي مدونتي ودي أكتر حاجة تسعد أي حد إنه يسمعها :)

وكان فيه جملة على نص نشرته هنا كانت عبارة عن كلمة واحدة سحرتني من سيد العارفين : كانت "الله" !

ـ التعليقات بالنسبة لك أهميتها؟

أهمية قصوى لأني من خلالها باخد الدافع اللي بيخليني أكمل كتابة هنا وأول حاجة بشوفها وبهتم بيها واقراها مليون مرة وبتعرفني على مدونين تانيين كان مستحيل أكتشفهم لو مكنوش سابوا خيط ليهم هنا:)

ـ أحلى بوست كتبته مع اللينك ولماذا؟

صعب أوي أحدد واحد خاصة إني بحس إن كل حاجة كتبتها فيها جزء مني لكن التدوينة اللي كتبتها مباشرة على النت ونشرتها من غير ما أعدل فيها ولا حرف وكنت فعلا مكبوتة وحسيت بعدها براحة كبيرة كانت اسمها "عايزة أعيييييش" ويبدو إن الناس حست نفس احساسي وعلقت عليها علشان تكون بكدة أكتر تدوينة اخدت تعليقات طوال مدة خدمتي كمدونة بكسر الواو أو النون(أيهما أصح)

ـ أفضل مدونة قرأتها؟

صعب أحدد برضو لكن معظم الموجودين في قائمة "الجيرة والعشرة" على يمينك وانت داخل يندرجوا تحت أفضل المدونات التي أتابعها

ـ أفضل بوست قرأته وضع لينكه؟

بما إني مش فاكرة حقيقي أفضل تدوينة لكن تدوينة ولد مواليد واحد وتمانين يقابل بنت مواليد سبعة وتمانين لمحمد كمال عجبتني لدرجة إني قريتها لحد دوقتي أكتر من 5 مرات

المشكلة إن فيه تدوينات حلوة جدا بجد لكن واحدة زيي عندها فقدان ذاكرة مؤقت هيبقى مستحيل تفتكرها معلش بقى

ـ لو حد قل أدبه في التعليقات إيه رد فعلك؟

لو شتيمة بمسح التعليق لأني مش فاتحة مدونتي عشان أجرح مشاعر الناس اللي بيتابعوها وقروا تعليق من النوعية دي إنما لو نقد لمحتوى المدونة أو ليا في حدود المسموح بسيبه عاتشي أنا متقبلة الأمر تماماً بس برضو من غير شتيمة وقلة أدب

ـ أسوأ مدونة؟

فيه حاجات بتخنقني في بعض المدونات زي المدونات الهابلة اللي بتتكلم عن الاسلام بشكل مسيء وعبيط في نفس الوقت أو اللي بتتكلم عن حاجات بتخدش الحياء لمجرد كسر التابووه و لفت الانتباه بس .

فيه برضو الناس اللي عايشة الدور وفاتحاها أسامة منير وكل كلام الحب اللي بيكتبوه بيكون ساذج ومن نوعية "أنا بحبك ليه إنت لأ" ودول بيرفعوا ضغطي فبيظبطوه و لهم جزيل الشكر فعلاً

ـ أسوأ بوست أسوأ مدون؟

أكيد مش ههتم واحفظ مكانه طالما هو سيء بس انا فاكرة تدوينة كريم عامر عن رمضان وكانت الدليل الواضح والصريح عن إنه إنسان مش فاهم أي حاجة في أي حاجة فعلاً!!

ـ إيه اللي هيحصل لايميلك لما تموت؟

هيعيش بعدي فترة لا بأس بها وبعدين يموت، من عادة الأشياء أن تخون أصحابها وتحيا من بعدهم (مش فاكرة قريت الفكرة دي فين)

ـ إديت الباص وورد لحد قبل كدة؟

تؤ

ـ اسمك؟

ملكة

ـ المشهور بيه وسط أصحابك؟

ملكة برضو لكن المقربين بيستخدموا ملوكة وموّكا

ـ عمرك؟

لسة 19 سنة لحد الشهر الجاي ما يشرف

ـ برجك؟

الميزان

ـ مجال دراستك؟

كلية الآداب ، قسم اللغة الإنجليزية وآدابها (هما بيكتبوها كدة و ربنا)ـ

ـ شخصيتك نوعها إيه؟

متناقضة، متأملة، مبحبش العلاقات الاجتماعية لأني مملة نوعاً ، خوافة للغاية ، مبتعلمش من أخطائي غالباً، مترددة أحياناً، وطبعاً عندي فوبيا من الحشرات والزواحف والقوارض وفصيلة العنكبيات

ـ السفر بالنسبة لك؟

اضطراب مشوب بمتعة التجديد

ـ الأكلة المفضلة؟

مبحبش الأكل أساساً بس ممكن أستحمل ورق العنب كاسثناء

ـ الصفات اللي أخدتها من بابا؟

الدماغ وحب القراية والكتابة والعصبية و الخوف المريع من الفشل

ـ الصفات اللي أخدتها من ماما؟

عقدة ارضاء الآخرين بأي ثمن، العصبية، سرعة التأثر، الطيبة والسذاجة أحياناً

ـ أكتر 6 حاجات بتكرهها؟

الكبدة أو السبانخ

وزارة الداخلية أو إني أشوف أي واحد لابس شرطة

الأنانية والبخل(شروة على بعضها كدة)

اني اشوف حد بيرمي حاجة في الشارع

الصوت العالي حتى في مجرد كلام

وأخيراً سواقين المكروباصات

ـ أكتر ست حاجات بتحبها؟

وسط البلد

خروجاتي مع اصحابي خاصة لما تتضمن وسط البلد برضو

حكايات مامتي وبابايا عن طفولتي المشردة :)

النيل صباحاً

الشوكلاتة

فيروز

ـ الانترنت بالنسبة لك؟

وسيلة للتعبير عن الرأي و التواصل مع الناس ومعرفتهم بشكل أفضل

أمرره لـ

مهاب

و

مهموهتي العزيزة

و

آخر ويارب يحن علينا ويعمله

و

دمـتـم

عودة وتاج وحاجات كدة

من الفنان دافنشي وصلني تاج أثناء الغياب وبما إني شعرت بافتقادي للتاجات خاصة اللذيذة منها إذا فلنبدأ الرغي :ـ

ـ لما بتشوف واحدة جميلة قوي بتشيل عينك بعد قد إيه؟

بعد أول مرة يمكن علشان مش بيشدني الجمال المتعارف عليه من الناس ومعاييرهم وطبيعي اني مش هتنح يعني بما إني بنت :)

ـ لو لك 3 أمنيات هيتحققوا.. هيكونوا إيه؟ (بس حاجة خاصة بك أنت

أول واحدة افضّل أخليها جوة خوفاً عليها غالبا اما بنبوح بحاجة هنعملها او عايزينها مبتحصلش

تاني أمنية عايزة أفضل أكتب حاجات أكون راضية عنها وتكون بتعبر عني لأن الكتابة بالنسبة لي حياة

تالت أمنية اني أتخلص من كل الذكريات السيئة بتاعة السنين اللي فاتت هي أمنية خيالية شويتين بس اهو الكلام بيريح

ـ آخر مرة بكيت؟

النهاردة بسبب ان حظي الجميل خلاني أشهد حادثة حصلت قدامي بكل تفاصيلها مباشرة :(

ـ إيه أكتر حاجة بتحبها في نفسك؟

إني لسة بخاف على غيري أكتر ما بخاف عليا

ـ أكتر حاجة بقى بتكرهها في نفسك؟

العصبية والتردد والكسل وماتعدوش ورايا بقى

ـ أسوأ حاجة عملتها؟

إني وهمت نفسي قبل كدة بحاجات مش موجودة لكن في المجمل يعني معتقدش اني عملت كوارث وكدة

ـ مبادئك.. ثابت عليها؟

بحاول أثبت عليها بس أحياناً بضطر أتأقلم مع المواقف حتى لو اتخليت عن مبدأ لمجرد ان الحياة تعدي وخلاص

ـ لو رجع الزمن بيك مين الشخص اللي تختاره أنك متقابلوش؟

يالهوي! كتييييير مكنتش أتمنى أقابلهم ولا أعرفهم بس عشان انا عارفة ان ربنا بيسبب الأسباب فأعتقد إن كل واحد من الأشخاص دول كان ليه فضل عليا في إني أفهم الدنيا أحسن وأتغير وأكون أنا اللي موجودة دوقتي دي يبقى المفروض بعد كل ده إني أشكرهم!!ـ

ـ لأي مدى ممكن تضحي ؟

للانهاية طالما إن تضحيتي ليها نتيجة ايجابية مهما كانت صغيرة

ـ بتبكي من غير سبب؟

لما بكتئب جدا ممكن أبكي من غير سبب منطقي إنما جوايا ببقى عارفة كويس أوي أنا ببكي ليه

ـ أنت قوي؟

لأ لكن بحاول أكون قوية وكتير بستمد قوتي من الناس اللي حواليا

وعشان أكون أكملت الواجب وزيادة أمرر التاج لـ مهمـوهتي عشان ليها ف ذمتي تاج من زمان :)

تاج لدواعي الرغي عن الذات حالياً

تاج وصلني من العزيزة جداً إيمان،و3 تيجان من صاحب الحدوتة المصرية محمد ياسر و من مادو أحدهم وبما إني في موود وقتي يدفعني دفعاً للرغي وخاصة الرغي عن ذاتي(سبحان مغير الأحوال) إذن لا مانع مطلقاً من إني أعمل منهم واحد باعتباره أول الغيث أما التانيين فربنا يسهلها بقى، نبدأ بالاستجواب بتاع ايمي

******

last beverage?

كابشتينو بأربع معالق سكر

...

last phone call?

هو التليفون مرنش من امبارح لكن اخر مكالمة كانت من زعرورة وكانت أجمل حاجة في يومي بجد

...

last instant message?

مع صاحب كوكب الأرض شادي

...

Last CD played?

سي دي لأغنية رق الحبيب أم كلثوم

...

Last time you cried?

مش فاكرة بس بقالي أكتر من 4 او 5 ايام مبكيتش بدموع يعني

...

Been cheated on you?

يتوقف على معنى الخيانة هنا

يعني خيانة بالمعنى الحرفي معتقدش

إنما لو بنعتبر الخيانة مثلا سر استأمنت حد عليه وافشاه

او حد موقفش جنبي في وقت ما احتاجته

يبقى أيوة حصل وكتير

... Lost someone special?

فقدان بالموت أيوة مرة واحدة

فقدان معنوي او فراق لكن لسة على قيد الحياة

كتيير برضو

...

Been depressed?

أكيد لأني إنسانة

...

List your 3 favourite colours..

كل درجات الأزرق في كل حاجة

كل درجات البمبي ماعدا الفوشيا الفاقع طبعاً

البني في الهدوم بس

...

This month have you made a new friend?

أيوة الحمد لله

...

laughed till you cried?

أيوة بتحصل معايا كتيييير

بس ببكي من كتر الضحك

مش ضحك وبيقلب بغم يعني

...

Met someone who changed your life?

مدرس الانجليزي بتاعي في الثانوية العامة

معرفش من غيره حياتي كانت هتمشي ازاي

بس أكيد مكنتش هتبقى زي ما هي دلوقتي أبداً ...

Found out who your true friends are?

أيوة و مازلت بستكشف

...

Is there something you want to tell someone?

هي حاجة واحدة دلوقتيعايزة أقولها لكل الناس اللي في حياتي وبحبهم وبيحبوني

أنا عارفة إني شخصية صعبة أحيانا(ان مكنش دائما)فشكراً علشان بتستحملوني

ولو بنسى اقولكم اني بحبكم

فلازم تكونوا متأكدين منها من غير كلام ومهما حصل

...

How many people as your top friends do you know in your real life?

كنت متخيلة أما أرد على السؤال هقول مش عارفة

بس سبحان الله،طلعوا أكتر من اتنين

ربنا يخليهملي:) ...

How many kids do you want to have?

كالعادة اتنين عشان يتربوا ويتعلموا ويعيشوا كويس إلخ إلخ

وحبذا لو بنتين وسنهم قريب من بعض

بس ساعات ببقى عايزة أجيب أكتر من 5 لمجرد إن محدش فيهم يحس بالوحدة أو إن البيت كبير عليه أبداً

...

Do you wanna change your name?

اطلاقا مطلقاً

ده هو اللي حيلتي :D

وبعدين حاجة مميزة صعب تتنسي

ثم ده اسمي يعني

هو الواحد هيتبرى من كام حاجة بالظبط؟؟

...

What did you do for your last birthday?

مش عايزة أفتكررررره اليوم ده خااالص

كان أحلى حاجة فيه إني خرجت أكلت بيتزا أنا ومامتي

وفاكرة جداً إني كمان كلت يومها شوكلاتة جالاكسي(هدية من مامتي برضو)ـ

دوول كفاية

...

what time you woke up today?

الثامنة صباحاً بسبب محاضرة الرواية

وكانت عندي رغبة ملحة إني أطوح الموبايل في أي حتة أبعد من اتنين ميل ونص

...

what were you doing at last midnight?

كنت في بيتنا تحديداً على السرير بقرا في رواية(تحديداً سارة رواية العقاد الوحيدة) وده كان

قبل النوم مباشرة

ألا مش عايزين شهود بالمرة طيب؟؟

...

Name something u can't wait for?

المكروباص؟ لأ بستناه غصب عن عيني

الأكل؟ لأ برضو أنا أساساً مش من هواة الأكل ولو جعانة ممكن جدا ماكلش عادي

الوظيفة؟ أكيد وحتماً لأ هو أنا غاوية بهدلة

العريس؟ لأ طبعاً، كان غيري أشطر

ممكن النتيجة بتاعة الكلية،بفضل على نار لحد ما بعرفها

أنا ممكن متوترش وانا داخلة امتحان مادة مش فاتحة إلا ربعها

لكن في انتظار النتيجة ببقى متوترة كذبابة فقدت جناحها الأيمن في حادث منزلي :(

...

what are you listening to now?

الصمت الرهييب يتخلله صوت تلفزيون الجيران اللي تحتنا:S

...

Have you ever talked about someone behind their back?

أيوة للأسف

...

What's the last piece of cloth you borrowed from some one?

مفيش لأني بكره للغاية ألبس حاجة حد أو حد يلبس حاجتي

...

Who's getting in ur mind right now?

هه؟ اشمعنى؟ (محاولة للشوشرة لا أكثر)ـ

...

Most visited webpage?

أكيد صفحة الايميل

بعدها مدونتي

بعدها مدونة الأخ إبراهيم اللي معاه

كدة بقوا 3 صفحات

مش مشكلة زيادة الخير تلاتة انا حرة بقى

*******

هذا وأقفل التاج في ساعته وتاريخه واعترف المتهم بكل شيء لكننا إلى الآن لم نعرف بعد ما هو هذا الشيء بالتحديد(اذبهلال)!!ـ

تاج ، يتيج ، فهو متدبس

سالخير عليكوا

.

لسة عارفة امبارح بس بالصدفة البحتة إن الباشمهندز ياسر مرر لحضرتي تاج محترم وطبعاً عشان عيب يعني أكسفه وأكسف الجمهور الحبيب اللي متشوق يعرف عني خمس حاجات من أسراري العسكرية الأمنية فأنا هتدبس واعمل التاج...هيصوا بقى يلا

.

أولا:جدير بالذكر واللي محدش يعرفه لحد دلوقتي إن التاج المتين ده هو أول تاج يوصلني من ساعة ما عملت المدونة وده إن دل فيدل على إن أصبحت شخصية مشهورة في المجتمع التدويني أو يدل على إن ياسر غاوي أذية لخلق الله اللي يعرفهم:D

..

ثانياً:امممم الواحد برضو مش عايز يسيح لذاته أوي يعني،بس ممكن مثلا تعرفوا إني مبحبش مادة اللغويات اللي عندنا في القسم والسبب بسيط إني مبذكرهاش أساسا وطبيعي إني مبجيبش فيها أكتر من مقبول كل سنة،زيها برضو زي الرياضيات في كل مراحل حياتي كنت فاشلة فشل ذريييييع فيها ولحد دلوقتي لو ركبت مكروباص وحد اداني الم الاجرة بدبس اللي جنبي فيها بدون نقاش، المعلومة دي بتوضح طبعا إن العباقرة لازمن يبقى عندهم حتة كدة يعني الاستثناء الذي يؤكد القاعدة مش أكتر

...

ثالثا:أنا فاشلة برضو في الطبيخ("مبعرفش أطبخ" يعني عشان زعرورة متزعلش) ،بعرف يعني أعمل حاجات بسيطة إنما المحاشي والبشاميل والحاجات الحلوة دي ولا ليا فيها، بس انا ناوية اتعلم يعني اما يبقى اسمه ايه ده ييجي هتطحن في المطبخ بكامل إرادتي الحرة المستقلة جدا فياريت لو حد عنده أمل يتجوز واحدة بتعرف تطبخ من بتوع دلوقتي يروح يجيب له واحدة فليبينية أفيد له

....

رابعاً:أنا فوضوية غالباً بس ساعات بيطلع في دماغي وأوضتي تبقى نضيفة لمدة يومين كدة ولا حاجة وبعدين ترجع لعادتها القديمة تاني يعني ساعات الفوضوية وعدم النظام بيحسسك بألفة بين المكان اللي انت عايش فيه ده غير إنه بيقوي حاسة البحث عندك عشان تطلع شيء ما من بين أنقاض الهدوم والمذكرات وما إلى ذلك

.....

خامساً:السر الأخطر بقى،أنا مبحبش أتواجد في أي نوع من الاجتماعات او الزحمة،بتوتر جدا و باخد اي ركن على جنب لحد ما اروح بيتنا،تقدروا تعتبروني متناقضة لأن أحياناً وانا قاعدة لوحدي بتمنى اكون مع ناس ووانا مع الناس ببقى هموت واقعد لوحدي واسيبهم

.....

هييييييييييييييييه خلصتهم خلاويص،وحان الوقت إني أضحك ضحكة من نوعية "نياهاهاها" وأمرر التاج لحد غيري بقى

ـ ست البناااات زعرورة

ـ إبراهيم (أنا وأنا)ـ

ـ إيمان (شلال العطر)ـ

ـ سوكة اللي كيفها كدة

ـ مهاب

والتاج مفتوح لأي حد غاوي تسييح لذاته عشان يعمله نحن نؤيد هنا الديموقراطية بشدة وتحتها كسرة،فوتكم بعافية