حالة

ولماذا يجب أن نقيد كل احساس في بضع كلمات؟

هل لأن الحروف "س ع ا د ة" يجب أن تعبر بالضرورة عن شيء نشعر به؟

وماذا تعرف تلك الحروف المجردة من المعاني ما يعتمل في القلب الآن؟

ماذا تعرف هي عن الطيران دون مشقة البحث عن طعام؟

وعن السمو الذي يجتاح روح هؤلاء الذين يشعرون بـ "نيرفانا" في لحظة ما؟

وعن لمعة العين حين تلقى أخيراً ما كانت تتوق إليه؟

لماذا يجب أن نقتل سعادتنا بانتظار أن نخلق عملاً أدبياً لا يساوي شيئاً!؟

الحياة .. سيرًا

أنا حين أسير

أفقد ما يتبقى من اهتمامي

بوجوه الناس

أراهم أطيافاً مظلمة

"سيلويت"

لا يهمني أن أدقق كثيرًا

في تفاصيله

...

أنا حين أسير

أنظر دوماً لمقدمة حذائي

فأراني عليها

كل الهواجس واللامنطقيات

كل ارتعاشاتي المكبوتة

كل غضبي المستسلِم

و أطرافي المبتورة خارجًا

النامية للداخل باستمرار

...

أنا حين أسير

تسطو إحدى قدميِّ

على اتجاهات الأخرى

أتعثر دومًا في خطواتي

واختياراتي

وكثيرًا ما أصدم أحد المارة

بذراعي

أعتذر له بهمهمات غامضة

عن سيري ـ بمحض حمق ـ

في طريق ليس لي

...

و الوصول ... الوصول مرّ

هو دائمًا مرّ

ألقي بحذائي داخل قبو خشبي

ثم أخلع ما تبقى فوق جسدي

من غبار

أطرافي تلقي بذاتها في انهاك

فوق القطن المتصلب

و لا أتحرك .. لا أتحرك

لكن شيئا ً بي

مازال يسير ...

تاج لدواعي الرغي عن الذات حالياً

تاج وصلني من العزيزة جداً إيمان،و3 تيجان من صاحب الحدوتة المصرية محمد ياسر و من مادو أحدهم وبما إني في موود وقتي يدفعني دفعاً للرغي وخاصة الرغي عن ذاتي(سبحان مغير الأحوال) إذن لا مانع مطلقاً من إني أعمل منهم واحد باعتباره أول الغيث أما التانيين فربنا يسهلها بقى، نبدأ بالاستجواب بتاع ايمي

******

last beverage?

كابشتينو بأربع معالق سكر

...

last phone call?

هو التليفون مرنش من امبارح لكن اخر مكالمة كانت من زعرورة وكانت أجمل حاجة في يومي بجد

...

last instant message?

مع صاحب كوكب الأرض شادي

...

Last CD played?

سي دي لأغنية رق الحبيب أم كلثوم

...

Last time you cried?

مش فاكرة بس بقالي أكتر من 4 او 5 ايام مبكيتش بدموع يعني

...

Been cheated on you?

يتوقف على معنى الخيانة هنا

يعني خيانة بالمعنى الحرفي معتقدش

إنما لو بنعتبر الخيانة مثلا سر استأمنت حد عليه وافشاه

او حد موقفش جنبي في وقت ما احتاجته

يبقى أيوة حصل وكتير

... Lost someone special?

فقدان بالموت أيوة مرة واحدة

فقدان معنوي او فراق لكن لسة على قيد الحياة

كتيير برضو

...

Been depressed?

أكيد لأني إنسانة

...

List your 3 favourite colours..

كل درجات الأزرق في كل حاجة

كل درجات البمبي ماعدا الفوشيا الفاقع طبعاً

البني في الهدوم بس

...

This month have you made a new friend?

أيوة الحمد لله

...

laughed till you cried?

أيوة بتحصل معايا كتيييير

بس ببكي من كتر الضحك

مش ضحك وبيقلب بغم يعني

...

Met someone who changed your life?

مدرس الانجليزي بتاعي في الثانوية العامة

معرفش من غيره حياتي كانت هتمشي ازاي

بس أكيد مكنتش هتبقى زي ما هي دلوقتي أبداً ...

Found out who your true friends are?

أيوة و مازلت بستكشف

...

Is there something you want to tell someone?

هي حاجة واحدة دلوقتيعايزة أقولها لكل الناس اللي في حياتي وبحبهم وبيحبوني

أنا عارفة إني شخصية صعبة أحيانا(ان مكنش دائما)فشكراً علشان بتستحملوني

ولو بنسى اقولكم اني بحبكم

فلازم تكونوا متأكدين منها من غير كلام ومهما حصل

...

How many people as your top friends do you know in your real life?

كنت متخيلة أما أرد على السؤال هقول مش عارفة

بس سبحان الله،طلعوا أكتر من اتنين

ربنا يخليهملي:) ...

How many kids do you want to have?

كالعادة اتنين عشان يتربوا ويتعلموا ويعيشوا كويس إلخ إلخ

وحبذا لو بنتين وسنهم قريب من بعض

بس ساعات ببقى عايزة أجيب أكتر من 5 لمجرد إن محدش فيهم يحس بالوحدة أو إن البيت كبير عليه أبداً

...

Do you wanna change your name?

اطلاقا مطلقاً

ده هو اللي حيلتي :D

وبعدين حاجة مميزة صعب تتنسي

ثم ده اسمي يعني

هو الواحد هيتبرى من كام حاجة بالظبط؟؟

...

What did you do for your last birthday?

مش عايزة أفتكررررره اليوم ده خااالص

كان أحلى حاجة فيه إني خرجت أكلت بيتزا أنا ومامتي

وفاكرة جداً إني كمان كلت يومها شوكلاتة جالاكسي(هدية من مامتي برضو)ـ

دوول كفاية

...

what time you woke up today?

الثامنة صباحاً بسبب محاضرة الرواية

وكانت عندي رغبة ملحة إني أطوح الموبايل في أي حتة أبعد من اتنين ميل ونص

...

what were you doing at last midnight?

كنت في بيتنا تحديداً على السرير بقرا في رواية(تحديداً سارة رواية العقاد الوحيدة) وده كان

قبل النوم مباشرة

ألا مش عايزين شهود بالمرة طيب؟؟

...

Name something u can't wait for?

المكروباص؟ لأ بستناه غصب عن عيني

الأكل؟ لأ برضو أنا أساساً مش من هواة الأكل ولو جعانة ممكن جدا ماكلش عادي

الوظيفة؟ أكيد وحتماً لأ هو أنا غاوية بهدلة

العريس؟ لأ طبعاً، كان غيري أشطر

ممكن النتيجة بتاعة الكلية،بفضل على نار لحد ما بعرفها

أنا ممكن متوترش وانا داخلة امتحان مادة مش فاتحة إلا ربعها

لكن في انتظار النتيجة ببقى متوترة كذبابة فقدت جناحها الأيمن في حادث منزلي :(

...

what are you listening to now?

الصمت الرهييب يتخلله صوت تلفزيون الجيران اللي تحتنا:S

...

Have you ever talked about someone behind their back?

أيوة للأسف

...

What's the last piece of cloth you borrowed from some one?

مفيش لأني بكره للغاية ألبس حاجة حد أو حد يلبس حاجتي

...

Who's getting in ur mind right now?

هه؟ اشمعنى؟ (محاولة للشوشرة لا أكثر)ـ

...

Most visited webpage?

أكيد صفحة الايميل

بعدها مدونتي

بعدها مدونة الأخ إبراهيم اللي معاه

كدة بقوا 3 صفحات

مش مشكلة زيادة الخير تلاتة انا حرة بقى

*******

هذا وأقفل التاج في ساعته وتاريخه واعترف المتهم بكل شيء لكننا إلى الآن لم نعرف بعد ما هو هذا الشيء بالتحديد(اذبهلال)!!ـ

تعليق على السكوت

القصيدة دي كانت تعليق الإنسان والشاعر الجميل محمود سراج على التدوينة اللي فاتت ولأني بصراحة معجبة بالقصيدة جدا قررت إني أحطها في تدوينة لوحدها لأنها فعلاً تستاهل شكراً لحد الأسبوع الجاي يا محمود :)

....

وسط السكوت

كان الكلام

جوه العيون

رافض يموت

وسط السكوت

النظرة صبحت ليها صوت

نظرات بتشكى لبعضها

ف الصمت شايلة همها

لكنها

وسط السكوت

كانت بتفتح حضنها

محض صمت

ما تيجي نسكت !!؟

To start over

كم مرة نستطيع أن نبدأها من جديد؟

يغريني التعب كي أتوقف عن سيل المحاولات

لكنني لا أريد أن أنتهي حيث بدأ الآخرون

..

أنا لم أعد "أريد" بعد الآن

بل صارت الصيغة

"يجب عليِّ"

..

قد يراودني المعبد -حين الضجر- عن معول

أن أعيد تشييده من جديد

كما كنت أتخلص من كتاباتي المزعجة

أقطعها بالكامل ثم أبدأ السطر الأول

في محاولة مني لنسيان كل ما كنت قد سطرت

لكنني فعلاً مرهقة للغاية

أنا تعبة حتى السكون

ولينهار المعبد الآن لا آبه

لم أعد بقادرة على اسناده بيديِّ

وقواي المنهكة تصرخ في أن أتركه يتهدم

لأنه يبدو كثيراً اليوم

كأن لم يكن لي منذ البداية

تـعـبـت

دعوة وتهنئة

أولاً مبروووك كبيرة جدا للصديق الجميل والشاعر محمد عز على صدور ديوانه الأول

"شنطة وضبة ومفتاح"

الصادر عن دار اكتب للنشر والتوزيع .

واللي هيقام له حفل توقيع يوم الثلاثاء 17 إبريل بإذن الله تعالى .

الساعة السادسة في متحف الفن الحديث ، الدور الثاني بدار الأوبرا ..

كل التوفيق للديوان وصاحب الديوان، وألف مبروك مرة تانية :)

إكليل الغار

النص الرائع للأديب/أسامة نور الدين

والأداء الأروع من مجموعة الممثلين المسرحيين

وبخاصة أداء الممثل والمخرج الشاب شادي سرور وأداء المتألق خليل مرسي

يجعل من الصعب جدا تجاهل دراما كتلك في ظل تردي ظروف المسرح الآن

المسرح ليس دائماً ضحكات رخيصة وافيهات مبتذلة

وهذا ما أثبته مسرح الطليعة المعروض عليه حاليا مسرحية إكليل الغار

المأخوذة عن دراما بنفس الاسم نشرت عن ( الهيئة العامة للكتاب) منذ سنوات وفازت بأكثر من جائزة

أنصحكم بمشاهدتها لأنها فعلاً رائعة بكل المقاييس

العرض يبدأ 9مساءً وتذكرة الدخول 10 جنيه وتخفيض 50%للطلبة

ب ر د ي ا ت

(1)

لأيام طوال ظل النزف

يسيل

بين شقوق طرقات المدينة

هائماً بين أقدامهم

تارة يلطخهم..

وتارة يلطخونه!

***

(2)

سيصفقون لك حتى تلتهب أكفهم

وسيمطرون أذنيك بمديح العالم

سيقفون لك احتراماً

وسينحنون اجلالاً

لكن أحدهم

- لن يراه سواك -

سيظل معك دائماً

كي يجذبك لأسفل أكثر

حين يغرقونك هم!

***

(3)

تقول البردية:

"لا تغتر بأشباه النهايات"

فتغتال أناملك كل ما تبقى.

تكمل البردية:

"لا تكسر مرآة أبداً"

ليس لديك- كما الأفلام- مرآة تكسرها.

تقول البردية:

"لا تصدق كل شيء"

تعود لقراءة القانون الأول ثانية

"لا تغتر بأشباه ال/

في الخلفية

صوتٌ مميز لقطع طولي!

***

(4)

لوساوس الكائن الأرضي

رنين محبب

ولضجة العالم شبه الأرضي

رنين مسيطر يخترقك

فاسألهما حين يقتلانك:

لمِ تُركت يداك حرة

كي تصما أذنيك؟!

***

(5)

حينما قال:

"وطنٌ بحجم عيوننا" *

لم يخطيء

كانت تبرأته

على حروف كلماته

أخطأنا نحن

حين تركنا عيوننا داخل الأرحام

وخرجنا!

***

* "وطن بحجم عيوننا" هو عنوان الديوان الأول للشاعر أحمد بخيت

Special dedication to >>

كما هو واضح من العنوان

إهداء خاص ل: سلمى

القصيدة بعنوان ( توت) من ديوان

" السنة 13شهر "

للشاعر الجميل: سالم الشهباني

وش الشجر

والليل بَكا

لحظة قدومه

الصيف بيرحل

ينتزع

من جسمنا

آخر هدومه

كان اللقا

كان الوداع

خطين بيسروا ف دمنا

كان اللقا

كان الوداع

كان انكسارنا ف نفسنا

فتش قلوبنا

وارتئى

ايه اللي راح

يا سيِّدي

الغايب

ال ...

غايب

ال... مرتقى

فوق الجراح

كان ايه بقى

من مر بعدك

والرجوع

غايب

دموع

راجع

دموع

القلب لم

عاد يِسوع

الإنتظار

وانت النهار

النهار

الغروب

انت الأمان

الأمان

الهروب

انت الدروب

بتضمني

وتشدني

للقاك

حاجات

وتصدني في لقاك

حاجات

انت انتصاري

ف اللي جاي

ولا انكساري

ف اللي فات

خروج

"يابرتقان ياحمر

ياجديد

بكرة الوقفة"ـ

وبعده الوقفة

وبعده الوقفة

لسة باقيلنا كتير

ع العيد

نظرية

When you dim your light so that some one else can shine,

the whole world gets darker !

حادي بادي هنقاطع ولا هنعادي

النهاردة فجر 26/3 يامصريين

من 28سنة السادات راح اسرائيل

واعتبروها نكسة جديدة بعد سبعة وستين

بكرة(صباحا يعني اي حاجة بقى) الاستفتاء/الملوخية على 34 مادة في الدستور

مش محتاجة فهلوة سعادتك عشان تفهم ان مصر كلها رافضاه

ولا عشان تفهم ان المنطق بيقول

بما اني واحدة من الشعب

وبما ان الشعب كله رافض

إذن أنا كمان رافضة

#وهو المطلوب اثباته ياعم الحاج

طب ايه المشكلة دوقتي؟

المشكلة اني معرفش أروح اللجنة بكرة ولا لأ

آه والله شفتوش خيبة أكتر من كدهوة؟؟

بقالي شهر ونص مستنية البطاقة وأخيراً

وبعد ما طلع عين أهلي بسبب موظفين قسم السيدة

استلمتها(زغردي ياأم فاروووق)ـ

وبعدين قريت النهاردة باليل جريدة صوت الأمة وجريدة الكرامة

ودي خطوة غير عادية بالمرة

لأني مقاطعة الجرايد بأنواعها من زمان والحمد لله

ودماغي لألأت(يعني زي البيض الممشش كدة)ـ

و الأسئلة التي تمرح في جمجمة حضرتي الآن بقى هي:ـ

نقاطع الاستفتاء بحكم كوننا لا نرضى ان نساوم على حريتنا كمواطنين ولا يمكن ان نشارك في مهزلة زي دي وان مجرد مشاركتنا معناها موافقتنا الضمنية على التعديلات واللي بيحصل؟؟

ولا نروح ونقول لأ مع اننا عارفين مليون في المية إنها متزورة متزورة ياولدي لمجرد اننا نعمل اللي علينا ونبرأ نفسنا بغض النظر عن النتايج؟؟

هنقاطع ياعباري ولا نستشهد ونروح؟

زيس ايز ذا كويسشن

ولما لم أجد الاجابة عن الاسئلة الحلوة دي لحد دلوقتي مع ان خلاص

كلها كام ساعة والنهار يطلع و يدرك العادلي الصباح

ويسكت الديك عن الكلام المباح لأنه بدأ يدخل في الغويط

قلت أعرض على الساهرين أمثالي وجهات النظر

والمأساة المطروحة ولا مأساة الحاج أوديب وعم سوفوكليس

يمكن تدبروني وتقولوا رأيكم

مع الاخذ في الاعتبار ان الاسباب لازم تكون مقنعة ومستوفية الشروط

وعليها دمغة من اتنين ناخبين مسحولين متظاهرين متقاعدين

وانا من هنا لحد بكرة الصبح هقلبها في دماغي

يمكن اتوصل لحل أخير تالت لم يأت في الحسبان من قبل وهو:ـ

إني أهاجر موريتانيا !!ـ

شكراً بهاء طاهر

كل مآسي اليوم النهاردة وخنقته عوضهم عني ساعتين معاه .. .. حبيت ابعت رسألة صغيرة إليه مع إنه مش هيشوفها ولا يعرفنيش:ـ

.

Bahaa Taher,Thanks A Million,You Made My Day! Bahaa,Mahinor(my friend),and me

البقاء لله يا مصريين

مظاهرة من طلاب التيار الاسلامي احتجاجاً على التعديلات الدستورية،مكنتش مظاهرة وإنما جنازة!جنازة بكل تفاصيلها،شارات الحداد، اليفط السودا،الموسيقى الجنائزية وأخيراً نعش وعليه علم مصر علامة على إن اخر مسمار في نعش البلد اتدق بعد تمرير التعديلات الأخيرة،في الوقت نفسه ظهرت مجموعة من البنات واضح اوي على شكلهم انهم مش اكتر من اعدادي او ثانوي ولابسين قمصان بيضا وبنطلونات رمادي وقفوا فوق سلم مبنى المسرح الشهير علشان ميسيبوش مكان للمتظاهرين التانين،وبدأ واحد يلقنهم هتافات من نوعية التأييد لمبارك ونشيد بلادي بلادي وأخيراً نعم للتعديلات!،جدير بالذكر ان اشكال اللي كانوا واقفين معاهم آخرهم بلطجية ومأجورين! وده لينك للفيديو http://www.youtube.com/watch?v=EFNXEDJBE0w

نزيهة والانتخابات

نزيهة صحيت الصبح في مرة

لقت الدنيا كلها بتتكلم عنها

في الجرايد

"الانتخابات لابد وان تكون نزيهة"

في التلفزيون

"الاشراف القضائي لتحقيق انتخابات نزيهة"

وحتى في الشارع:ـ

نزيهة استغربت جدا من اللي بيحصل ده

وقالت أنا لازم أفهم هو فيه ايه في البلد وليه سيرتي بقت على كل لسان زي اللبان

نزيهة خدت مكروباص ولسة بتدفع الخمسين قرش لقت السواق بيقولها الاجرة 75

نزيهة بصت له وسكتت وطلع الربع جنيه بأدب واديتهوله

بعد شوية السواق متحركش

نزيهة اتكسفت تسأله احسن يزعل ولا حاجة

سألت الراجل اللي جنبها

قالها انه مستني الأذن من أمين الشرطة عشان يصبح عليه

نزيهة مفهمتش ايه المشكلة يعني لما السواق يصبح على الأمين وهو راجع

نزيهة سكتت وحطت مناخيرها في الشباك جنبها عشان ريحة السجاير بتاعة السواق

بعد ساعتين السواق وصل لحد شارع الجامعة وقال للركاب انزلوا كملوها مشي للجيزة

نزيهة عملت زي الباقيين ونزلت تمشي

نزيهة بصت فوق محل عمر أفندي لقت يافطة بتقول

نؤيد الرئيس

نزيهة بعد نص ساعة لف في الجيزة وبعد عينيها ما اتعمت من كتر قراية يفط النزاهة

نسيت هي كانت رايحة الجيزة ليه

نزيهة اخيراً قررت انها تروح القسم عشان تعمل محضر

للناس اللي اخدوا اسمها ومرطرطينه على كل حتة وكل لون

نزيهة راحت القسم و قالت للظابط اسمها

نزيهة مبقتش نزيهة بعد اليوم ده

نزيهة بقى اسمها دلوقتي:ـ