تسلل لا إرادي

يوم انسلَّت

و أطلَّت

من فرجة باب خشبي

كان هنالك :

زجاجة العطر الفارغة

أوراقها الصفراء متناثرة مغبرة

أقلام رصاص قُصفت أسنانها

طاولة مخدوشة مذ خمسة عشر عامًا

يرقد فوقها سكين يشي بجريمته

منديل تخترقه بقع بنية اللون

ثلاثة خواتم زواج ذهبية منقوشة من الداخل

قابعة بسكون فوق ثلاث ورقات

مملوءة بالخانات والأختام ...

المشهد صامت بالكامل

لا شخوص فيه

كلهم رحلوا - كما يقولون- بسلام

تاركين لها

عذاب فرجة الباب !

I love you = أنا أهتم لأمرك مش أكتر يعني

حاجة غريبة أوي يا جدع ، الواحد يبقى قاعد مأنتخ بيتفرج على التلفاااز وبعدين تقلب على قناة (One tv) بتاعة دبي تلاقي حلقة من حلقات (Friends) شغالة كدة إذ فجأتن. ولو إنت من البشر اللي عمرهم ما بيحفظوا مواعيد أفلامهم ومسلسلاتهم المفضلة (زي حالاتي كدة) هتنشكح بالقوي يعني وتقعد تتفرج على الحلقة وإنت في إيدك شوية لب معتبراً إن الوالدة داعيالك النهاردة بروقان البال

وبعدين يا سيد وإنت رامي ودنك مع الواد (روس) تلاقيه مثلا بيقول إنه يهودي وترمي عينك كدة بالغلط على الترجمة قوووم إيه؟ تلاقيهم مترجمينها "بلا ديانة" !!! وش كدة قرر مترجمين القناة إن الديانة اليهودية دي مش موجودة أصلا وبح خلاص مش معترفين بيها وعلى هذا الأساس مش عاوزين نعمل بلبلة في مخ الناس اللي بتتفرج فنقولهم إنها ...مش ديانة أصلاً..ياحلاوة يا ولاد!

طبعا وقتها هتقول لنفسك مش مهم يا واد طنش خاااااالث واستمتع بالحلقة و أهو نص العمى ولا كله وكفاية إنك بتفهم إنجليزي وبلاها ترجمة. قوم يعدي مشهد رومانسي كدة عثول (مفيهوش حاجة عيب عشان الناس اللي مخها ما بيصدق يروح لبعيد) وتلاقي البت (مونيكا) بتقول للواد (تشاندلر) إنها بتحبه والجملة العتيدة "I love you" تخرم ودانك وانت قاعد وبحركة غريزية لا ارادية باعتبارك برضو مواطن مصري عينك تخبط في شريط الترجمة فتلاقيها اتحولت إذ فجأتن إلى "أنا أهتم لأمرك" كدة يعني أنا أهتم لأمرك ومش أكتر من كدة زيك زي أي قطة مشردة بهتم بيها وبعطشف عليها وبحط لها كل يوم لبن ع السلم وخلاص!!

السؤال يا محترم بقى منك له لها: إيه العيب في جملة الحب دي عشان يشيلوها رغم إن مفيش مخلوق ميعرفهاش؟ وهل الحب - لا سمح الله - ممنوع رقابياً أو قد يؤدي - برضو لا سمح الله - لمعصية حتى لو كان في مجرد جملة في مسلسل؟؟

وإيه مشكلة الديانة اليهودية عشان ميعترفوش بيها؟ مش دي برضو ديانة من الديانات السماوية التلاتة ولازم احنا - كمسلمين- نعترف بيها وبالمسيحية كجزء من إيماننا بالله؟ ولا ده جزء من انكار الاخر اللي بنحترفه في وطننا العربي المجيد؟؟

وبعدين، إذا كان فيه فيلم أو مسلسل ضد التقاليد العربية أو مش عاجب وجهة نظر القناة فإما إنهم يذيعوه باعتبار إن اللي بيتفرج عنده نوع من أنواع التمييز بين اللي ممكن يتوافق مع ثقافته واللي مش ممكن أو إنهم يريحونا ويريحوا نفسهم وميذيعوش الحاجة دي من الأصل وبلاها وجع الدماغ من الأول !!

وأخيراً ، اللي ميعرفوش مسلسل فريندز:ـ

ابقوا جوجلوا عليه يارفاق و مش هتدوروا كتير لأنه أشهر من السيد الرئيس بذات نفسه (حبيبنا كلنا طبعاً)!

Catharsis

Some dance to remember,

Some dance to.. forget !

..

وهنا .. "باليرينا" أخرى

فُقد ذات لحظة

عمرك حسيت بالتوهة؟

التوهة غير التوهان

احساسك إنك .. فاضي من جواك

خواء ذاتي وفراغ ملوش حدود

لأنك بتكون وقتها فاقد كل حواسك

فاقد كل اتجاهاتك و رؤيتك

اللي ممكن تدلك ع الطريق

الاتجاهات ضاعت أو مشوشة قدامك

وكأنك تهت لما حد كبير قرر يسيب ايدك

فجأة وسط الزحمة

تخيل كأنك واقف بين مليون واحد

وانت بس اللي مش عارف تمشي ازاي؟

مش عارف تروح فين وليه؟

مينفعش تسأل حد من اللي واقفين

عشان محدش فيهم هيقدر أبداً

يديلك الحاجات اللي انت فقدتها مرة واحدة دي

محدش فيهم هيقدر يحسسك بالأمان

أو هيقدر يخليك تثق في ارشاداته

كل اللي انت بتتمناه في الوقت ده

إنك تلاقي الإيد

اللي انت كنت ماسكها من شوية

الإيد اللي ضاعت منك

أو اللي انت ضعت منها

لأول مرة تتوه جواك

وانت لسة واقف في مكانك !

Undo !

الأقلام الرصاص

وحدها تسمح لك بتصحيح أخطائك

وحدها تزودك بالطمأنينة لأن لديك فرصة العودة بالزمن للوراء كي تغير كل الأحداث

وحدها تشعرك أن بياض الورقة هو الأرقى مما يُخط فوقه

وحدها تمنحك حرية ممارسة اللافعل واللاكتابة

لكن الأمر دائماً رهن جودة ممحاة

!! ومقدرة ورقة على التحمل

عودة وتاج وحاجات كدة

من الفنان دافنشي وصلني تاج أثناء الغياب وبما إني شعرت بافتقادي للتاجات خاصة اللذيذة منها إذا فلنبدأ الرغي :ـ

ـ لما بتشوف واحدة جميلة قوي بتشيل عينك بعد قد إيه؟

بعد أول مرة يمكن علشان مش بيشدني الجمال المتعارف عليه من الناس ومعاييرهم وطبيعي اني مش هتنح يعني بما إني بنت :)

ـ لو لك 3 أمنيات هيتحققوا.. هيكونوا إيه؟ (بس حاجة خاصة بك أنت

أول واحدة افضّل أخليها جوة خوفاً عليها غالبا اما بنبوح بحاجة هنعملها او عايزينها مبتحصلش

تاني أمنية عايزة أفضل أكتب حاجات أكون راضية عنها وتكون بتعبر عني لأن الكتابة بالنسبة لي حياة

تالت أمنية اني أتخلص من كل الذكريات السيئة بتاعة السنين اللي فاتت هي أمنية خيالية شويتين بس اهو الكلام بيريح

ـ آخر مرة بكيت؟

النهاردة بسبب ان حظي الجميل خلاني أشهد حادثة حصلت قدامي بكل تفاصيلها مباشرة :(

ـ إيه أكتر حاجة بتحبها في نفسك؟

إني لسة بخاف على غيري أكتر ما بخاف عليا

ـ أكتر حاجة بقى بتكرهها في نفسك؟

العصبية والتردد والكسل وماتعدوش ورايا بقى

ـ أسوأ حاجة عملتها؟

إني وهمت نفسي قبل كدة بحاجات مش موجودة لكن في المجمل يعني معتقدش اني عملت كوارث وكدة

ـ مبادئك.. ثابت عليها؟

بحاول أثبت عليها بس أحياناً بضطر أتأقلم مع المواقف حتى لو اتخليت عن مبدأ لمجرد ان الحياة تعدي وخلاص

ـ لو رجع الزمن بيك مين الشخص اللي تختاره أنك متقابلوش؟

يالهوي! كتييييير مكنتش أتمنى أقابلهم ولا أعرفهم بس عشان انا عارفة ان ربنا بيسبب الأسباب فأعتقد إن كل واحد من الأشخاص دول كان ليه فضل عليا في إني أفهم الدنيا أحسن وأتغير وأكون أنا اللي موجودة دوقتي دي يبقى المفروض بعد كل ده إني أشكرهم!!ـ

ـ لأي مدى ممكن تضحي ؟

للانهاية طالما إن تضحيتي ليها نتيجة ايجابية مهما كانت صغيرة

ـ بتبكي من غير سبب؟

لما بكتئب جدا ممكن أبكي من غير سبب منطقي إنما جوايا ببقى عارفة كويس أوي أنا ببكي ليه

ـ أنت قوي؟

لأ لكن بحاول أكون قوية وكتير بستمد قوتي من الناس اللي حواليا

وعشان أكون أكملت الواجب وزيادة أمرر التاج لـ مهمـوهتي عشان ليها ف ذمتي تاج من زمان :)

تلميحات

منذ عشرين عامًا إلا يوم

كانت تنتظر

فوق المقعد الخشبي

في اليد كتاب لا ينتهي

تقتل به الوقت

أو يقتلها

والنافذة الأمامية مغلقة

هي دائمًا مغلقة

حين ملّها الانتظار

استعدت للنهوض

لكن حركة بسيطة

في مزلاج النافذة الأمامية

أعادتها لمشهدها الأول

للمقعد الخشبي والكتاب

!! ربما لعشرين أخرى

و قالها صنع الله إبراهيم

كلما أمعنت التفكير فيما كتبته طوال مساري، أرى طفلاً يريد أن يقول ما لا يقوله الغير

!!

أربعون عامًا وأربعمائة ألف نكسة

!!أربعون عامًا على 5 يونيو 1967

ترى كم هزيمة منينا بها خلال الأربعين عام الماضية؟

عذراً لأني رغمًا عني لمحت تاريخ اليوم في النتيجة !!ـ

!!! عايزة أعييييش

مليون حاجة في نفسي اعملها من غير ما حد يتكلم او يعترض او يعلق او عيب حرام ميصحش مش حلو ممكن تتفهم غلط ممكن تتفهم صح مش مهم كل ده مش مهم اي حاجة مش مهم اي حد مش عايزة ابقى لوحدي مش عايزة البس اسود ولا عايزة اشوفه مش عايزة البس جزمة واقفلها مش عايزة البس جزمة في رجلي خالص مش عايزة ابقى زرقا ولا عايزة ابكي ولا ازعل ولا اسمع اغنية تخليني ادمع ولا اقرا حاجة وتهزني مش عايزة حيطان البيت تقيدني ولا الناس في الشارع يحبسوني مش عايزة لساني يسكتني ولا عايزة ادور على كلام حلو اكتبه

.

عايزة اجري تحت مطرة ومش مهم هدومي والطرحة يتبلوا مش مهم يقولوا ايه مش مهم اروح ازاي عايزة انسى كل حاجة واي حد عايزة كمان اكل ايس كريم عشان واحشني اوي ومش مهم يكون معايا منديل امسح بيه ايديا اما الايس كريم يسيح ليه كل ما كنا بناكل ايس كريم واحنا صغيرين كان بيسيح مننا ويزعقولنا ؟طب وايه يعني اما يسيح؟ ايه يعني اما نوسخ هدومنا وايدينا وبوقنا بيه؟ الدنيا اتقلبت؟ طظ في اي حاجة واي حد الا الايس كريم ويكون فراولة كمان عشان بحبها مع ان بتجيبلي حساسية طب وايه يعني؟ طعمه بيبقى حلو وبحبه أوي طظ في اي حاجة تانية

عايزة وانا ماشية لو وقعت متكسفش ومبقاش عايزة اعيط والارض تنشق وتبلعني عايزة اقوم ومش هنفض هدومي مش مهم الهدوم ومش مهم الشارع والناس طب ليه كل ما كنت بمشي مع الكبار و اقع كنت بتضرب بالقلم على وشي؟ فيها ايه لما وقعت؟ الارض هي اللي وجعتني مش انا اللي وجعتها طب كنت أنا اللي بتضرب ليه؟ عايزة اما اقع دوقتي واقوم ابقى الاقي حد ياخدني في حضنه ويطبطب عليا بس بعدها نفضل نضحك سوا عليا وعلى الارض اللي انا المرة دي وجعتها

عايزة اكلم اللي انا عايزاهم وقت ما انا عايزة واقول اللي نفسي فيه ومش مهم يفهموا ميفهموش مش مهم يقولوا عليا ايه او يفتكروا ايه مش مهم حاجة وكمان مش مهم حد فيها ايه يعني لما اتكلم؟ اما بقول اللي في نفسي ما بتعبش وهما كمان مش هيتعبوا خلاص يبقى كلنا نقول اللي احنا عايزينه في الوقت اللي عايزينه للناس اللي عايزينهم وطظ في اي حاجة تانية متخليناش نتكلم

.

عايزة كمان اخرج في عز الشتا على كوبري قصر النيل الساعة 5 الصبح وخدودي الدافية يخبطها الهوا الساقع جدا وأصرخ بأعلى صوت ليا مش مهم اصرخ بايه ولا ليه ولا مين اللي هيسمع مش مهم كمان بعد ما اصرخ ادور اعمل ايه وليه وازاي وبعدين عايزة الغي كل الاسئلة والغي كل الكلمات اللي كتبتها وزهقت منها لأ أنا عايزة أخترع أبجدية جديدة أو أنسى القراية والكتابة أصلا عايزة اتعلم حاجة تانية لأ مش عايزة اتعلم عايزة الاقي نفسي عارفة اعبر عن نفسي بالطريقة اللي بحبها من غير ما اتعلم حاجة خالص عايزة ألون بس مش عايزة أرسم وعايزة استمتع بالموسيقى بس مش عايزة ادرسها واعرف دي يعني ايه وده يعني ايه وعايزة اشخبط وأغني بصوت عالي وعايزة ألعب وعايزة كمان أرقص وافرد دراعاتي بعييييييد جدا بس مش عايزة الاقي حاجة خبطت فيهم وقفتهم

.

عايزة اكل شوكلاتة وقت ما احب ومش عايزة الناس تتريق عليا ولا تسخر مني ولا من الحاجات اللي بحبها ولا يجبروني احب حاجات مبحبهاش مش عايزة اشوف حاجة غلط واسكت عليها عايزة ازعق بأعلى صوت واقول كل اللي انا عايزاه مش عايزة اخاف من حاجة ولا اخاف من حد

مش عايزة أروح الجامعة ومش عايزة أشوف أي واحد لابس بدلة بيضا عليها نجوم ولا اي واحد لابس اسود وقاعد جنب عربيات خضرا كبيرة مش عايزة اركب اتوبيسات مش عايزة اصلا اشوفهم ولا عايزة اشوف عربيات عايزة الناس تمشي على رجليها وانا كمان امشي على رجلي كتييير لحد ما اتعب مش عايزة اتعب اصلا عايزة افضل ماشية على طول انا بحب امشي وكمان مش عايزة امشي وانا مكشرة وراسمة على وشي ملامح جد عايزة اضحك واغني واصرخ واجري بس مش عايزة اعيط ولو عيطت مش عايزة حد يلومني وكمان لو عيطت مش عايزة ابقى لوحدي ولو بقيت لوحدي مش عايزة اسمع صوتي ومش عايزة أفكر ومش عايزة أفتكر ومش عايزة أفسر وأستنتج وأشرح وأكره نفسي مش عايزة أزعل خالص

عايزة اللي بحبهم يكونوا مجانين زيي ننسى سوا الناس والدنيا كلها والقيود والتقاليد والصح والغلط مين اصلا قال ان كل الناس تعرف ايه الصح وايه الغلط؟طب ليه بقى صح؟مين قال انه صح وليه التاني غلط و ايه يحكم انه غلط ومين؟ عايزة أحب واتحب زي ما انا عايزة وعايزة كمان اتمشى مع الانسان اللي احبه في الاماكن اللي بحبها وع البحر رجليا حافية والمياه تيجي عليها عايزة احكي ويحكي هو من غير ما نبطل كلام نتكلم كتيير نقول كل حاجة من غير ما نخاف طظ في اي تجارب للناس طظ في الاصول وطظ في العادي طظ في الملل وطظ في الكدب وطظ في الكرامة وطظ في الحيرة وطظ في الاشارات وطظ في المواقف والكلام والذكاء والغباء مش مهم أي حاجة

مش عايزة ماديات بكره الفلوس بكرهها جدا جدا وبكره اللي بيحبوها اكتر من اي حاجة وبكره اللي بيكرهوا بعض عشانها وبكرههم وبكرهها اما بتخنقني وبتخنق اللي بيكرهوها زيي عايزة اعيش من غيرها او الغيها من حياتي ممكن كمان الناس تتعامل من غيرها اللي عايز حاجة ياخدها واللي مش عايز يديها عايزة ازرع ورد عندي في البيت لأ مش عايزة اعيش في البيت ولا وسط الزحمة والخنقة والناس والجيران عايزة اعيش في مكان مفتوح طب مكان ليه اصلا؟ مش عايزة مكان خالص

مش عايزة اعتذر عن حاجة كتبتها عشان كل اللي بكتبه حقيقي ونفسي فيه مش عايزة أذاكر و بكره الامتحانات والدراسة واللي بعد الدراسة كنت بحب اللي قبل الدراسة وعايزة افتكر هو احنا كنا عايشين ازاي قبل ما نروح الحضانة والمدرسة؟ مش مهم الدراسة والامتحانات والمذاكرة احنا مبنعملش بيهم حاجة ومش مهم الشغل والمجتمع والمستقبل مش مهم كل حاجة مش بتخلينا نعيش بجد

فـراغـات

ع الورقة البيضا

خطين بالإسود

كانوا متباعدين

حطيت في النص

نقطــة

وصلت الأول بالتاني

على نفس النقطة

وقفوا الاتنين

واما اتقابلوا

كان اللقا

ع الورقة البيضا

و بس !

إدراك

انحدارات الألم تؤلمني

تخبرني أني لم أمت بعد

وأن الحزن لا يقتل

بل يكسر باحترافية

حيث لا كدمات زرقاء واضحة

ولا أجزاء منفصلة مبعثرة

لأن معظم شروخ الروح

لا يجب أن يطلّع عليها العالم

أبـداً !

في الأوضة الضلمة

مسمار ع الحيطة

متعلق عليه حلمي

من غير شماعة

قبل ما أنام

أتأكد إن الحلم مكانه

وإن تراب الشارع

لسة ما طالهوش

حملة : لا للشعر الانجليزي

أنا بحب الشعر ... وربنا بحبه واللي يقول غير كدة يبقى كداب في أصل وشه

وسواء كان شعر عربي أو انجليزي فأنا لسة بحبه ولسة باقية على العشرة إنما أنا أشجب وأحتج وأستنكر وأدين بشدة وعنف للغاية جدا اوي خالص يعني

طريقة تدريس الشعر في قسم انجليزي عندنا

بل وكيفية اختيار القصائد اللي بندرسها كمان

مهو عشان الضرب في الميت حرام

والله حرام وميرضيش ربنا وكفااااااااااااااية بقى(احم لا مساس بنظام الحكم هنا خاااالص)ـ

سؤال للدكاترة بقى

ليه تكرهونا في الشعر واحنا اصلا مفيش بينا وبينه تار بايت؟

يعني الشعر ده حاجة جميلة خالص ونميسة وابن حلال كمان

مقولناش اي حاجة (قال يعني هنقدر)ـ

بنفهم الشعر(اه وربنا بنفهمه ساعات)ـ

وساعات بيعجبنا منه وناخد اقتباسات وحاجات حلوة زي دي كدة(عدانا العيب اهو)ـ

ده احنا كمان والله ساعات بنكتب حاجات شبه الشعر (وان كره الكارهون)ـ

انما برضو اسمه شعر يعني بنقدره حق قدره تالت ومتلت(حد عنده اعتراض يابشرية؟)ـ

إنما يبدو إن قسم انجليزي صعبان عليه يسيب الطلبة بتوعه يحبوا الشعر براحتهم

لازم يخرجهم منه كارهين الشعر وكارهين الشعراء

و بيدعوا إن ربنا مايبشبش طوبة (كوليردج) مطرح ماهو قاعد

وإنهم يبطلوا يكتبوا شعر لو بيكتبوه

ويبطلوا يقروه لو صادف وقروه

ومبقولش ان كل القسم كدة بيكرهنا فيه

لأ وربنا ساعات ونادرا دكتورة تحببنا فيه بطريقة تدريسها

وده بعون الله محصلش غير مرة واحدة من 3 سنين

وكان ترم واحد بس اللي استمتعنا وفهمنا فيه الشعر كاملا(حدث بالفعل وصدق او لا تصدق)ـ

انما الغالب والاعم والاشمل-والاشول احيانا-هو ان الاغلبية يكرهونا في عيشتنا قبل الشعر

كل حد بكلمة في الامتحان

اكتبوا خلفية الحركة الرومانسية في اجابة السؤال

لأ متكتبوش ولو كتبتوا هتنقصوا في الدرجات

وبعدين يابشر حرام علييكووووا ده احنا طلبة

يرضي مين ان الواحد يذاكر الشعر طول السنة ويحضر محاضرات وايده تتكسر من الكتابة ورا الدكاترة

ويقضي اليوم بحاله بيذاكر في قصيدة تلاتين صفحة نصها شوية هلاوس وفي الاخر نجيب مقبول بالعافية ده إذا نجحنا أصلا؟؟

طب ليه وعشان ايه؟

والنبي ده لو الحاج (كيتس) بنفسه جه يحل الامتحان وصححتوه له مش هيجيب اكتر من ال11 العتيدة

راعوا اننا بنتعب في المادة و في غيرها واننا مش شوية رعاع جم القسم غلط ومكانهم في المدبح مثلا

واننا بني ادمين وبنفهم ولينا وجهات نظر محناش شوية حفيظة وكتبة

فياريت متتعامولش معانا على اساس اننا خسارة فينا الدرجة اللي بتدوهالنا في الامتحان

وبعدين احتمال كبير جدا اننا كمان سنة هنقف بدالكم وندرس لأجيال تانية نفس الشعر ونعقدهم في عيشتهم بالظبط

زي ماعقدتونا في عيشتنا لمجرد ان الشعر على ايامنا كان بيتدرس غلط لحد ما كرهناه

الرحمة ياجدعان مانتوا كنتوا زينا في يوم من الأيااام

وربنا يستر وأكمل السنة دي على خير

جربت تشوفها كدة؟

جربت تصحى الفجر وتخرج تشم الهوا نضيف وتملا كيانك كله بيه؟

جربت تصلي وانت حاسس كل كلمة بتنطق بيها وإن جسمك مش موجود على الأرض؟

جربت تختار أحلى لبس بتحبه وتبص في المراية وتحس إنك أحلى مما كنت متخيل؟

جربت تخرج للشارع الزحمة وتبتسم في وش كل اللي متعرفهمش وفي سرك تقولهم كلهم صباح الحياة؟

أو جربت تقوم من على كرسيك علشان غيرك يقعد وتاخد منه ابتسامة بتقولك شكرا علشان حسيت بيا؟

جربت تحب وشوش الناس وتشوفهم كلهم حلوين مهما الدنيا كانت زحمة وحر؟

طب جربت تقابل اصحابك وتاخدهم في حضنك واحد واحد؟

أو جربت تقدّر تعب اللي أدامك لدرجة إنك تقرر تشكره وتفهمه ان تعبه مبيروحش هدر زي ما هو فاكر؟

جربت تحس أد إيه بكرة هيبقى حاجة عمرك ما حسيت بجمالها قبل كدة ولا تقدر توصفها؟

جربت ترّوح بيتك وتحس بريحته المميزة جواك وانت عايز تحضن حيطانه ؟

جربت تبص للسما وتشكر ربنا على إن هداياه ليك عمرها ما بتنتهي؟

طب جربت تقاوم النوم لأنك خايف تنام و تصحى تلاقي الكون اتغير؟

...

جربت تشوف الدنيا باللون اللي بتعشقه ؟؟